Tataki Kitautolu Kotoa kia Sīsū Kalaisi

Ko ha fonongaʻanga ʻo e moʻuí. ʻE lava ke tokoni ʻa e Liahoná.

ʻI he ngaahi kuonga ʻo e Tohi ʻa Molomoná, naʻe teuteuʻi ʻe he ʻEikí ʻa e Liahoná ke tokoni kia Līhai mo hono fāmilí ke fakalakalaka ʻi heʻenau fonongá. Ko ha “kāpasa, [ʻa ia te ne] tuhuʻi kiate kinautolu ha hala hangatonu ki he fonua ʻo e talaʻofá” ( ʻAlamā 37:44).

Hangē ko Līhaí, ʻoku tau ʻi ha fonongaʻanga. Te tau aʻusia ha ngaahi taimi faingataʻa mo fiemālie. ʻAlomālie mo e ʻalotāmaki. Nonga mo e mamahi. Ka ʻi hono fakakātoá, ʻoku ʻi ai ha taumuʻa fakalangi koeʻuhí ʻoku tau maʻu ha tuʻunga malava fakalangi. ʻOku ʻikai finangalo pē ʻa e Tamai Hēvaní ke tau foki hake kiate Ia; ʻokú Ne finangalo ke tau hoko ʻo hangē ange ko Iá ʻo fakafou ʻi Hono ʻAlo ko Sīsū Kalaisí. Ka ʻoku tau fie maʻu tokoni he ngaahi taimi ʻe niʻihi.

ʻI he malumalu ʻo e fakahinohino ʻa e kau palōfita moʻuí, ʻoku fokotuʻutuʻu ʻa e makasini Liahona ʻi hotau kuongá ke tokoniʻi kitautolu ke ʻilo ʻa e hala mo e founga ke muimui aí. ʻOku liliu kitautolu ʻe hono ako mo moʻui ʻaki e ongoongolelei ʻo Sīsū Kalaisí. Pea ʻi heʻetau ikunaʻi ʻetau ngaahi taimi faingataʻa ʻi he moʻuí, te tau ʻilo ai kuó Ne lava ʻi heʻetau muimui ʻiate Ia ʻi he laʻaá mo e ʻalotāmakí, ʻo fakaʻatā ke Ne ngaohi kitautolu ke aʻusia e meʻa kuó Ne ʻafioʻi maʻu pē te tau aʻusiá.

Laukonga ke ako lahi ange fekauʻaki mo e Liahona foʻoú.

Ko ha Makasini maʻá e Loto mo e ʻApi Kotoa Pē

Neongo pe ko hoʻo haʻú mei Solovēnia pe Sipeini, Matakasikā pe Masasūseti, ko e makasini ʻeni maʻau. Neongo pe ʻokú ke lea faka-Kōlea pe Kilipati; pe ʻokú ke fale piliki pe kofe; pe naʻe taʻu ʻe 80 ʻaki ʻaneafi hoʻo papitaisó pe toki papi ʻaneafi pē. ʻOsi mali, teʻeki mali, matuʻotua pe kei siʻi—ʻoku talanoa mo fakahā mai ʻe he ʻū lauʻi peesi ko ʻení ʻa e ngaahi meʻa mahuʻinga kiate koé. Ko hoʻomou fakamoʻoní, aʻusiá mo e fāmili ʻo e tuí. Ko e tāpuaki maʻongoʻonga ia ʻo hono maʻu ha makasini fakamāmanilahi maʻá e kakai lalahí. ʻOkú ne fakatahatahaʻi kitautolu mo fakamanatu mai ʻoku tau kau kotoa ki ha fāmili fakamāmanilahi mo ha siasi fakamāmanilahi.

Ko ia ai, kau mai ke tau kau fakataha ʻi heʻetau ʻunu kotoa ke ofi ange kia Sīsū Kalaisí. Makasini ʻe taha ʻi he taimi, peesi ʻe taha ʻi he taimi. Mo ha kau palōfita mo ha kau ʻaposetolo ʻoku nau tataki kitautolu, pea mo ha Fakamoʻui ʻaloʻofa ʻokú Ne tokoniʻi kitautolu. Kitautolu kotoa. Fakataha.

Meʻa ke ʻAmanaki ki ai mei he Liahona foʻoú

Ngaahi Pōpoaki mei he Kau Palōfitá mo e Kau ʻAposetoló

ʻE ʻoatu ʻe he makasini Liahoná ha ngaahi pōpoaki mei he kau taki ʻo e Siasí ʻi ha founga taimi totonu ange. ʻE tataki kitautolu kotoa ʻe he ngaahi pōpoaki ko ʻení ki he Fakamoʻuí, ʻi hono pākí pea ʻi he ʻinitanetí.

Tokoni Lahi Ange maʻá e Kau Mēmipá Kotoa

Kimuʻa atú, naʻe tuʻo fiha pē ʻi he taʻu hono maʻu ʻe ha kau mēmipa ʻe niʻihi ʻa e makasiní, ʻo makatuʻunga ʻi heʻenau lea faka-fonuá. ʻE paaki he taimí ni ʻa e makasini fakamāmanilahi ko ʻeni ʻa e Siasí ʻi he māhina kotoa pē pe fakahili māhina ʻi he ngaahi lea fakafonua ʻoku lea ʻaki ʻe ha pēseti nai ʻe 97 ʻo e kau mēmipá.

Fakamatala Fakaʻilekitulōnika Lahi Ange

Ke tokoniʻi koe ke ke maʻu ʻa e talanoa ueʻi fakalaumālie ʻokú ke fie maʻú, te mau ʻoatu ia ʻi he ngaahi founga lahi ange te ke fie maʻú. Fekumi ki ha ngaahi aʻusia fakatupulaki mo fakataautaha ʻi he liahona.ChurchofJesusChrist.org, ʻi he ngaahi polokalama Gospel Living mo e Gospel Library, ʻo fakafou ʻi he ngaahi ʻīmeilí mo e ngaahi founga kehe ʻoku ʻamanaki ke tuku maí.

Fakatefito ʻi ʻApi Hono Ako ʻo e Ongoongoleleí

Te tau vahevahe ʻi he māhina takitaha ha ngaahi aʻusia, ʻekitivitī, mo ha ngaahi akonaki ke tokoni ki he Kāingalotu ʻo e Siasí ke ako e ongoongoleleí ʻi ʻapi pea akoʻi ia ki heʻenau fānaú mo e ngaahi ʻofaʻangá.

Ngaahi Talanoa Moʻoni mei ha Kāingalotu Moʻoni

ʻI hoʻo lau e ngaahi aʻusia langaki tui mei he kau mēmipa ʻi he funga ʻo e māmaní, ʻe fakamālohia ai hoʻo tuí. Pea ʻe fakamanatu atu ai kiate koe ʻoku tau kau ki ha meʻa ʻoku mahulu hake hono maʻongoʻongá ʻi hotau uōtí pe koló. Vahevahe hoʻo aʻusiá ʻi he liahona.ChurchofJesusChrist.org pe ʻīmeili mai kiate kimautolu ʻi he liahona@ChurchofJesusChrist.org.

Ngaahi Talanoa mo e Ngaahi Pōpoaki Ofi ki ʻApí

ʻOku laka hake ʻi he ngaahi tatau fakalotofonua ʻe 60 ʻoku pulusi ʻe he Liahoná ʻa ia ʻoku kau ki ai ha ngaahi peesi ʻoku fakatefito ki ha ngaahi feituʻu fakasiokālafi kehekehe mo ha ngaahi lea faka-fonua. ʻE tokoni ʻa e ngaahi peesi fakalotofonua ko ʻení ke fakafehokotaki koe mo e Kāingalotu, kau taki, mo e ngaahi meʻa ʻoku hoko ofi ki ʻapí.