Haʻu, ʻo Muimui ʻIate Au: Tokāteline mo e Ngaahi Fuakava
Te u lava fēfē ʻo ʻiloʻi maʻaku pē?
Siosefa Sāmita—Hisitōlia 1:1–26
(4–10 Sānuali)
Tā valivali ʻa Ben Simonsen
Naʻe loto ʻa e talavou ko Siosefá ke ne ʻiloʻi maʻana pē ʻa e tui fakalotu naʻe moʻoní. Naʻá ne kole ki he ʻOtuá ʻi he lotu peá ne maʻu ha tali fakahangatonu mei he ʻOtuá mo Sīsū Kalaisi. Naʻá ne foki ki ʻapi peá ne talaange ki heʻene faʻeé, “Kuó u ʻiloʻi maʻaku” (Siosefa Sāmita—Hisitōlia 1:20).
Ko e hā te tau lava ʻo ako mei he sīpinga ʻa Siosefá? Te tau lava fēfē ʻo “ʻiloʻi maʻatautolu” ʻa e meʻa ʻoku moʻoní?
-
Naʻe fakaʻaongaʻi ʻe Siosefa ha taimi lahi ke lau ai ʻa e Tohi Tapú. Naʻá ne lau ʻi he Sēmisi 1:5 ʻe lava ke ne ʻeke ʻene ngaahi fehuʻí ki he ʻOtuá ʻi he lotu.
-
Naʻe ʻikai ke tangutu pē ʻa Siosefa ia ʻi ʻapi ʻo tatali ai ke maʻu ha tali. Naʻá ne ʻalu ki ha ngaahi siasi kehekehe. ʻI he talanoa ʻa Siosefa ki he kau taki mo e kau mēmipa ʻo e ngaahi kautaha lotu kehekehé, naʻá ne ongoʻi naʻe ʻi ai ha meʻa ne puli, ʻa ia naʻe iku ai ki heʻene fili ke ʻeke ki he ʻOtuá. ʻOku tokoni ʻetau ako e meʻa kotoa te tau lavá, ke tāpuekina ai kitautolu ʻaki ha ueʻi fakalaumālie mei he Tamai Hēvaní.1
-
ʻI he ʻUluaki Mata Meʻa-Hā-Maí, naʻe folofola ange ʻe he Fakamoʻuí kia Siosefa naʻe ʻikai ha siasi ʻi he taimi ko iá ʻe moʻoni. Naʻá Ne folofola ange foki ʻe fakafoki mai ʻa Hono Siasí ʻi ha ʻaho. Naʻe pau ke tatali ʻa Siosefa ke ne ako ha meʻa lahi ange. Taimi ʻe niʻihi ʻe pau ke tau tatali foki ki ha ngaahi tali.