Ngaahi Tefitoʻi Moʻoni ʻo e Ngāue Fakaetauhí
Feohi mo Fefakamālohiaʻaki
ʻOku tāpuekina kitautolu kotoa ʻi he taimi ʻoku tau ngāue fakaetauhi pe ngāue fakaetauhi mai ai e niʻihi kehé kiate kitautolú.
ʻI he tuʻunga lelei tahá, ko e ngāue fakaetauhí ʻoku ʻikai ko ha fononga ia ʻoku huʻu-taha pē. ʻI he taimi ʻoku tau ngāue fakaetauhi ai ki ha taha, ʻoku faitāpuekina e tokotaha kotoa ʻoku kau aí—ʻatautolu, ko hotau ngaahi hoangāué, mo kinautolu ʻoku tau ngāue fakaetauhi ki aí. ʻOku faitāpuekina kitautolu ʻe hotau ngaahi mālohingá. ʻOku faitāpuekina kitautolu ʻi he taimi ʻoku tau fepoupouaki mo fetokoniʻaki ai ʻi heʻetau ngaahi faingataʻá. ʻOku faitāpuekina kitautolu ʻe he ngaahi vā fetuʻutaki ʻoku lolotonga fatú.
ʻI hono fakamatalaʻi ʻa e ʻuhinga ʻo e ngāue fakaetauhí ki he niʻihi kehé, naʻe akoʻi mai ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ke tau “ʻiate kinautolu mo fakamālohia ʻa kinautolu” (Tokāteline mo e Ngaahi Fuakava 20:53).1 ʻI he potufolofola ko ʻení, ʻoku ʻi ai ha ongo meʻa mahuʻinga ʻe ua ʻe tokoni mai ke tau ngāue fakaetauhi ai kiate kinautolu ʻoku tau tokanga ki aí:
-
ʻUluakí, ʻoku fokotuʻu mai ʻe he “ʻiate kinautolú” ʻoku mahuʻinga ke tau maheni lelei mo kinautolu ʻoku tau ngāue fakaetauhi ki aí ke tau faʻu ha vā fetuʻutaki ʻuhingamālie pea fatu ha vā ʻo e fefalalaʻaki.
-
Uá, ko e taimi ʻoku nau ʻiloʻi ai ʻoku tau ʻofa mo tokanga moʻoni kiate kinautolú, te tau lava ʻo aleaʻi ʻa e ngaahi founga te tau lava ai ʻo poupouʻi mo “fakamālohia ʻa kinautolú.” ʻI heʻene peheé, ʻe fakamālohia foki mo kitautolu.
ʻOku ʻikai ko ha foʻi ngāue ʻa e kakaí; ko hotau kāinga kinautolu—ko hotau kaungāfononga ʻi he fonongaʻanga ʻo e moʻuí. ʻOku tau loto ke tau fononga fakataha ʻi he moʻuí, ʻo fetokoniʻaki ʻi hono maʻu ha mālohi ke ikunaʻi e ngaahi fakafeʻātungiá mo e ngaahi maka tūkia ʻi he halá (vakai, Hepelū 12:10–13).
ʻOku fakahaaʻi ʻe he foʻi lea “fakamālohia” ʻa e meʻa ʻoku tau holi moʻoni ki aí—ke ʻoatu ʻe heʻetau tokoní ʻa e poupou mo e ngaahi meʻangāue kae lava ʻe he fakafoʻituitui takitaha ʻo maʻu ʻa e ngaahi maʻuʻanga tokoni mo e mālohi ke laka atu ki muʻa mo ikunaʻi ʻa e ngaahi faingataʻa ʻo e moʻuí.
Ko e tokolahi ʻo kitautolu ʻoku tau ongoʻi taʻefeʻunga ke tokoniʻi hotau kāingá ʻi heʻenau ngaahi palopalema makehé. Naʻe ʻomi ʻe ʻEletā Hōlani ʻa e fakalotolahi ko ʻení: “Neongo ʻetau ongoʻi kotoa pē hotau ngataʻangá mo ʻetau taʻefeʻungá, kae ʻofa ke tau ngāue fetākinima mo e ʻEiki ʻo e ngoue vainé, ʻo foaki ki he ʻOtua mo ʻetau Tamaí ha nima fietokoni ʻi he fatongia mafatukituki ko hono tali ʻo e ngaahi lotú, fai ʻo ha fakafiemālié, holoholoʻi ʻa e loʻimatá, pea fakamālohia e ngaahi tui ʻoku vaivaí.”2
ʻI he taʻú ni, ʻe ʻomi ʻe he ngaahi talanoa ko ʻeni ʻo e Ngaahi Tefitoʻi Moʻoni ʻo e Ngāue Fakaetauhí ha ngaahi fakakaukau mo e maʻuʻanga fakamatala ʻe lava ʻo tokoni atu ke mahino ʻa e founga ke tau feohi mo fakamālohia e niʻihi kehé ʻi heʻenau fehangahangai mo e ngaahi faingataʻa ʻo e moʻuí.
Laʻitā ʻi he toʻomataʻú mei he Kaleidoscope Pictures