Ko e Makatuʻunga ʻo ʻEku Moʻuí mo e Tuí
Ko e lahi ange ʻeku lau e Tohi ʻa Molomoná, ko e lahi ange ia ʻeku tui ko e folofola ia ʻa e ʻOtuá.
Tatau ʻo e Tohi ʻa Molomoná mei he tokotaha faʻu tohí; ngaahi ʻata kehé mei he Getty Images
ʻI heʻeku kei tamasiʻí, naʻe ʻikai ke u fiefia, ka naʻe liliu ia ʻi he taimi ne tukituki mai ai ha ongo tangata ʻAmelika ʻi homau matapaá.
ʻI heʻeku taʻu 14, naʻá ku fieʻilo kau ki he ongo ʻAmelika ko ʻeni ʻokú na lea faka-Siapani mo fakafeʻiloaki mai ko ha ongo faifekau kinaua. Hili ʻena mavahé, naʻe mono mai heʻeku tamaí ha tohi ne na toki ʻoange ki ai naʻe ui ko e Tohi ʻa Molomoná. Naʻe kamata ke u lau ia peá u ongoʻi ha meʻa makehe, ka naʻe ʻikai ke u ʻilo pe ko e hā ia. Hili ha māhina ʻe taha mei ai, naʻe kakato ʻeku lau iá peá u hili ia ʻi heʻeku tukuʻanga tohí.
Hili ha taʻu ʻe tolu mei ai, ne u fetaulaki mo ha ongo faifekau ʻe toko ua ʻi he tauʻanga lēlue ʻi Tokioó. Naʻá na fakaafeʻi au ke u fanongo ki heʻena pōpoakí. Naʻá ku ʻomi ʻeku Tohi ʻa Molomoná ki heʻemau fakataha hono hokó.
Naʻá na kamata ʻaki e fepōtalanoaʻakí haʻana pehē, “‘Okú ma fie vahevahe ha tohi mahuʻinga kiate koe.”
Naʻá ku toʻo ʻa e Tohi ʻa Molomoná mei heʻeku kató peá u ʻeke ange, “Ko e tohí nai ʻeni? Kuó u ʻosi lau ia.”
Naʻá na ʻohovale. Naʻe faifai pea akoʻi kiate au ʻa e ongoongoleleí, pea naʻe poupouʻi au ʻe he ongo faifekaú ke u kole ki he ʻOtuá ʻaki ha loto-fakamātoato pe ʻoku moʻoni nai ʻa e Tohi ʻa Molomoná (vakai, Molonai 10:4–5).
ʻI ha pō ʻe taha naʻá ku fakakaukau ki he ʻOtuá, Siasí, Tohi ʻa Molomoná, pea mo e founga te u lava ʻo fiefia mo ongoʻi māfana ai ʻi hoku lotó. Naʻá ku fili leva ke u papitaiso.
Hili ʻeku kau ki he Siasí, naʻe hokohoko atu ʻeku lau e Tohi ʻa Molomoná. Lolotonga ʻeku laukonga ʻi ha ʻaho ʻe taha, naʻá ku maʻu ha fakakaukau makehe fekauʻaki mo e faitoʻo ʻeku tamaí ki he toto māʻolungá. Naʻá ku ako lahi ange ki ai peá u ʻiloʻi ʻe ala fakatupu ai ha loto-mafasia fakatuʻutāmaki. Naʻe kole ʻe heʻeku tamaí ki heʻene toketaá ke liliu ʻene faitoʻó hili ʻeku faleʻi iá. Naʻe mole ai pē ʻene loto-mafasiá talu mei ai.
Ko e lahi ange ʻeku laukongá, ko e lahi ange ia ʻeku tui ko e Tohi ʻa Molomoná ko e folofola ia ʻa e ʻOtuá. Naʻá ku fiefia lahi ange mo loto ke vahevahe ʻa e moʻoní mo e niʻihi kehé.
Naʻe fakafepakiʻi ʻe heʻeku ongomātuʻá ʻeku ʻalu ʻo ngāue fakafaifekaú, pea naʻe faifai pē pea tuli au mei hona ʻapí, ka naʻá ku kei maʻu pē ʻa e loto fakapapau. Naʻá ku ngāue ʻi Tenesī, USA. ʻI heʻeku hoko ko ha faifekau ʻo e Siasí mei ha fonua tui faka-Puta kae ngāue ʻi he uhouhonga ʻo ha feituʻu ʻoku mālohi ʻenau tui fakalotú ʻi he ʻIunaiteti Siteití, naʻe faʻa ʻeke mai kiate au pe naʻe anga fēfē ʻeku tui ki he Tohi ʻa Molomoná. Naʻá ku fakamoʻoniʻi ange kuó u lotua ʻa hono moʻoní peá u maʻu ha tali ʻoku moʻoni ia.
Hili ʻeku ngāue fakafaifekaú, naʻá ku ʻosi mei he akó peá u kau atu ki ha kautaha lahi ʻi Siapani ne nau ʻave au ki ha ngaahi feituʻu kehekehe ʻi māmani kau ai ʻa Maianimā, ʻIngilani, mo ʻAealani. Ko e feituʻu kotoa pē ne u ʻalu ai, naʻá ku vahevahe ʻeku fakamoʻoni ki he Tohi ʻa Molomoná ki he tokolahi taha e kakai ne u malavá, mei ha fakaʻuli tekisī ki ha minisitā fakafonua.
Kuo hoko ʻa e Tohi ʻa Molomoná—pea ʻe hoko maʻu pē—ko e makatuʻunga ʻo ʻeku moʻuí mo ʻeku tui kia Sīsū Kalaisí. Ko e taimi pē ʻoku lōmekina ai au ʻe he ʻahiʻahí, ʻoku ou lau ʻa e Tohi ʻa Molomoná peá u ikunaʻi ʻeku ngaahi faingataʻá ʻaki ha poupou fakalaumālie mei he Tamai Hēvaní mo hoku Fakamoʻuí. ʻOku tāpuekina au ʻe he Tohi ʻa Molomoná ʻi he ʻaho kotoa pē ʻo ʻeku moʻuí.