Tokoni ki he Fatongia Fakaemātuʻá
Ko e Meʻa ne Akoʻi mai ʻe he Tafí fekauʻaki mo e Tuʻunga Fakaemātuʻá
ʻOku nofo ʻa e tokotaha naʻá ne faʻú ʻi ʻIutā, USA.
Naʻe tokoni e ngaahi ngāue ʻeku fānaú ʻi ʻapí ke tali ai ʻeku lotú.
Tā fakatātaaʻi ʻe David Green
Naʻá ku ʻā hake ʻi ha pongipongi ʻe taha mo e ongoʻi lōmekina. Naʻe ongo mafatukituki hoku ngaahi fatongia ko ha mātuʻá, pea naʻá ku ʻiloʻi moʻoni ʻa hoku ngaahi vaivaí. Hangē ne ʻi ai ha faikehekehe lahi ʻi he meʻa ne u fakakaukauloto ki ai ʻi he hoko ko ha mātuʻá, mo e meʻa ʻoku lolotonga hokó.
Naʻá ku tūʻulutui ʻo lotu mo fakahā ki he Tamai Hēvaní ʻa e lahi ʻo ʻeku ʻofa ʻiate Iá. Naʻá ku fakahā ange kiate Ia ʻa ʻeku ʻofa lahi ʻi he fānau kuó Ne faitāpuekina ʻaki homau fāmilí. Pea ne u kamata ke fakahā ange kiate Ia ʻa ʻeku feinga ke hoko ko ha mātuʻa leleí, ka ne u ongoʻi naʻe ʻikai lelei feʻunga ʻeku ngāue naʻe faí. ʻI heʻeku lotú, naʻá ku fakakaukau ai ki he tuʻunga lelei ange ne mei ʻi ai e fānaú kapau na ko e ʻOtuá tonu pē naʻá Ne ohi hake kinautolú.
Ne haʻu leva ha fakatātā ki hoku ʻatamaí. Naʻá ku fakakaukauloto ki he tafi ʻe heʻeku fānaú ʻa e faliki ʻo e peitó. Ko e taha ʻeni ʻo e ngaahi ngāue kehekehe naʻe vahe ke nau fai ke tokoni ai ki homau fāmilí. Taimi ʻe niʻihi, ʻoku ou taʻefiemālie ʻi heʻeku mamata ki heʻenau ngāué koeʻuhi ʻoku nau kei ako e ngāué pea ʻikai faʻa lelei hono fakahokó. Ka ʻoku ou tuku pē ke nau fai ia, kae pehē foki ki ha fanga kiʻi ngāue kehe fakaʻaho, he ʻoku ʻi ai haʻaku taumuʻa ʻoku maʻongoʻonga ange maʻanautolu. ʻOku ou ʻilo ʻi he kotoa ʻo e ngaahi founga ngāue taʻehaohaoá ni, te nau ako mo tupulaki ai. ʻE faifai pē pea te nau malava ke fakahoko vave mo lelei ia hangē ko ʻeku ngāué. Ko e taumuʻa ko ia ʻo ʻenau falalaʻanga mo tauʻatāiná ʻoku mahuʻinga lahi ange ia ʻi haʻaku fakahoko tokotaha pē ʻa e meʻa kotoa. ʻOku ʻikai ke u ohi hake ʻeku fānaú ki ha ola lelei taimi nounou pē—ʻoku ou feinga ke tokoniʻi kinautolu ke nau fakalakalaka ʻi ha taimi lōloa.
Pea naʻá ku fifili mahalo ko e meʻa tatau pē ʻeni ʻoku hoko foki ki heʻetau mātuʻa fakalangí. ʻOku ʻafioʻi ʻe he Tamai Hēvaní he ʻikai ke tau lava ʻo fakahoko haohaoa ʻa e fatongia ʻo e hoko ko ha ngaahi mātuʻá. Mahalo ʻoku ʻi ai ha ngaahi meʻa ʻe niʻihi ʻoku tau fakahoko ʻokú Ne faʻa taʻefiemālie ai, ka ʻokú Ne fakaʻatā pē koeʻuhí ʻokú Ne ʻafioʻi ʻoku tau kei ako mo tupulaki. ʻOkú Ne maʻu ʻa e fakakaukau taʻengata taupotu tahá. ʻOkú Ne fakakaukauloto mai te tau hoko ha ʻaho ko ha mātuʻa hangē ko Iá, ʻo malava ke ʻofa kakato, faiako lelei, mo tā sīpinga haohaoa. ʻI heʻetau fai ha fehalākí, ʻokú Ne ʻafioʻi ʻoku tau fakatupulaki ha ngaahi ʻulungaanga lelei hangē ko e faʻa kātakí mo e ʻofa faka-Kalaisí. Pea ko ia ai, ʻi Heʻene potó, ʻokú Ne tuku ai ke tau ngāue pea tau tōnounou, pea tau toe feinga pe.
Hono ʻikai ke u fakaʻamu ke u hoko ko ha mātuʻa haohaoa he taimí ni! Hangē ko e tohi ʻa Siosefa Sāmitá, ʻoku ou faʻa fakatokangaʻi ʻoku ou tō ai ki he “ngaahi fai hala naʻe taʻepoto” (Siosefa Sāmita—Hisitōlia 1:28). Ka ʻoku ou maʻu ha fiemālie ʻi heʻeku ʻiloʻi ʻoku mahino ki he ʻOtuá ʻa hoku lotó, ʻa ia ʻoku ʻuhinga ia ʻokú Ne ʻafioʻi ʻoku ou feinga ke akoʻi ngofua au. ʻOku ou fiefia ʻi he taimi ʻoku ʻeke mai ai ʻe heʻeku fānaú, “ʻE anga fēfē haʻaku fai lelei ange ʻeni?” pea hangē ʻoku nau loto ke fakalakalaká. Ko e koloá ke u fai pehē ki he Tamai Hēvaní.
ʻI heʻeku fakakaukauloto ki he ngaahi fakakaukau ko ʻení, naʻe toe ai ha taimi ʻe taha ne u loto-foʻi ai. “Kae fēfē kapau ʻe hoko ʻeku ngaahi fehalaaki ʻi he founga tauhi fānaú ke fakamamahiʻi ai ʻeku fānaú?” Ko ʻeku fehuʻí ange ia. “ʻOku ʻikai ke u loto ke u taʻotaʻofi ʻenau fakalakalaká, neongo kapau te u hoko ʻo maʻu ha lelei ʻi he founga ngāue ko iá.”
Naʻe toe haʻu ki heʻeku fakakaukaú ha fakatātā ʻo e fakamaau fale ʻeku fānaú. Hili e feinga lahi hoku ʻofefiné ke mopi ʻa e falikí pea fakavave atu ke vaʻinga pe fakaʻosi ha ngāue ʻe taha, ʻoku ou faʻa fufulu ʻa e toenga ʻo e ngaahi konga ʻoku pikipikí. Pea naʻá ku fakakaukau ki he ʻaloʻofa taʻefakangatangata mo e mālohi ʻo Sīsū Kalaisí, ʻa ia kuo ʻufiʻufiʻi ʻe Heʻene Fakaleleí ʻa e ngaahi tūkunga faingataʻa ʻi he moʻui ʻo e tokotaha kotoa peé. ʻOku fetongi ʻe Heʻene ʻaloʻofá ʻa ʻeku ngaahi tōnounou ʻi heʻeku tauhi fānaú, ʻo hangē ko hono fetongi ʻe Heʻene ʻaloʻofá ʻa e ngaahi mamahi ʻoku foua heʻeku fānaú koeʻuhí ko ʻeku ngaahi tōnounoú. ʻOku fakamoʻui ʻe Heʻene Fakaleleí ʻa e kotoa ʻo e ngaahi tōnounou ko iá ʻi ha founga ʻoku ʻikai lava ke makupusi ʻe ha taha ʻiate kitautolu.
ʻOku ou maʻu ha nonga ʻi he fakahā fakataautaha ne u maʻu he ʻaho ko iá. Naʻá ku ongoʻi naʻe akoʻi au ʻe he Laumālié, ʻoku feʻunga ʻa ʻeku feinga lelei tahá ʻi he taimi ʻoku ou fengāueʻaki fakataha ai mo e ʻEikí. ʻOku ou ʻilo ʻe hoko atu e ngāue māmālie ʻa e Tamai Hēvaní ʻi he moʻui ʻo ʻeku fānaú, ke fakahaohaoaʻi e meʻa ʻoku taʻehaohaoa ʻi heʻeku fakahokó. ʻI Heʻene tokoní, ʻe lava ke ngāue ʻeku fānaú ʻiate kinautolu pē ʻi ha ʻaho, ʻo hangē nai ko e Tamai Hēvaní pē naʻá Ne kamata ohi hake kinautolú. Ka ko hono kehé he naʻe fakakau foki ʻi Heʻene palaní ʻa hono liliu aú—fakamāʻoniʻoniʻi mo hinoiʻi au ke u hoko ʻo hangē ko Iá. Hono ʻikai maʻongoʻonga ʻa e poto ʻa hotau ʻOtuá!