Ko ha Fili Lelei Ange
Naʻá ku ʻohovale ʻi heʻeku maʻu ha pōpoaki fakahangatonu mei he Laumālié. Naʻá ku ʻilo ʻa e meʻa ke faí pea ʻikai ke toe tatali ʻi ha lau sekoni.
Laʻitā ʻi muʻa ʻi he Temipale Vancouver British Columbia, naʻe ʻomi ʻe he tokotaha faʻu tohí; ngaahi ʻata kehé mei he Getty Images
Hili ha mavahe hoku husepānití ki he ngāué, naʻe angamaheni ʻaki ʻeku fakakakato ʻeku ngāue fakaʻapi fakaʻahó peá u tokoto hifo ʻi ha ngaahi houa siʻi ʻo Facebook, Messenger, mo Instagram. ʻOku ou fakamoleki ha meimei houa ʻe 15 he uike ʻi he mītia fakasōsialé. Hangē naʻe ʻikai ke u mei lava ʻo taʻofi ʻeku vahevahe ha fanga kiʻi vitiō mo ha fanga kiʻi laʻitā fakaolí, ka naʻe hāhāmolofia ke u vahevahe ha ngaahi pōpoaki fekauʻaki mo e Siasí. Taimi ʻe niʻihi ʻi he ʻamanaki ke mohé, ʻe pau ke tokoni mai hoku husepānití ke u mavahe mei he mītia fakasōsialé kae lava ke u mohe.
ʻI he taimi ko ʻení, ne u fokotuʻu ha taumuʻa ke lau ʻa e Tohi Tapú ke ʻosi ke tokoni mai ke mahino lelei ange ʻa e ongoongolelei ʻo Sīsū Kalaisí kiate au. Naʻá ku fakatukupaaʻi au ke u lau ha meimei vahe ʻe tolu ʻi he ʻaho takitaha. ʻI he ngaahi ʻaho ʻoku mole lahi ange ai hoku taimí ʻi he mītia fakasōsialé, te u feinga ke lahi ange e meʻa ʻoku ou laú.
ʻI ha pō ʻe taha, naʻá ku tuku ʻeku Tohi Tapú ʻi hoku tafaʻakí ke u lau ha ngaahi vahe ʻe niʻihi. Ka kimuʻa peá u laukongá, ne u toʻo mai ʻeku telefoní peá u fakamoleki ʻa e houa ʻe taha mo e konga hono hokó ʻi he mītia fakasōsialé. ʻI heʻeku fakatokangaʻi hake ʻa e taimí, naʻá ku tuku ʻeku telefoní ki he tafaʻakí peá u tūʻulutui ʻo lotu. Naʻe ʻikai aʻu ʻeku lotú ʻo sekoni ʻe 10. ʻI heʻeku tuʻu haké, naʻe haʻu ha leʻo ki hoku ʻatamaí, ʻo pehē, “ʻOku ou fakaʻamu ʻe lahi tatau e taimi ʻokú ke fakaʻaongaʻi ai e mītia fakasōsialé mo e taimi ʻokú ke lotu aí.”
Naʻá ku ʻohovale ʻi heʻeku maʻu ha pōpoaki fakahangatonu mei he Laumālié. Naʻá ku ʻilo ʻa e meʻa ke faí pea ʻikai ke toe tatali ʻi ha lau sekoni. Naʻá ku tamateʻi ʻi he taimi pē ko iá ʻa e polokalama mītia fakasōsialé mei heʻeku telefoní pea kamata ha ʻaukai mei he mītia fakasōsialé.
Hili ha uike ʻe taha mei ai, naʻá ku maʻu ʻenitaumeni ʻi he temipale māʻoniʻoní. Naʻá ku palōmesi ki he ʻEikí fakataha mo e ngaahi fuakava ne u fakahoko mo Iá, te u laukonga ʻi heʻeku taimi ʻataá fekauʻaki mo e Siasí pea pehē ki he Palōfita ko Siosefa Sāmitá pea te u hokohoko atu hono lau ʻa e Tohi Tapú.
Kuo tāpuekina lahi au ʻe he Tamai Hēvaní ʻi heʻeku fili ke fakahoko ha fili lelei angé ʻaki ʻeku mavahe mei he mītia fakasōsialé ʻo fakaʻaongaʻi ha taimi lahi ange ke ako kau ki he ongoongolelei ʻo Sīsū Kalaisi kuo fakafoki maí.