Ko Ha Pulusinga Foʻou Maʻá e Siasí Fakaemāmani Lahi

Siʻi kāinga ʻofeina,

ʻOku lava ke maʻu ʻi he ngaahi fonua ʻi he funga ʻo e māmaní ha Kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Neongo ʻoku tau lea ʻaki ha ngaahi lea fakafonua kehekehe, ka ʻoku tau uouangataha ʻi heʻetau feinga ke muimui ki he Fakamoʻuí mo fiefia ʻi hono ʻiloʻi ko e fānau kotoa kitautolu ʻa e ʻOtuá.

Talu mei he kamataʻanga ʻo e Siasi kuo fakafoki maí, kuo poupouʻi ʻe he ngaahi pulusinga hangē ko e ngaahi makasini ʻa e Siasí, ʻa e kāingalotú ʻi heʻenau feinga ke ako, moʻui ʻaki, mo vahevahe ʻa e ongoongoleleí. Kuo tokoniʻi ʻe he ngaahi pōpoaki fakalaumālié ke fakafehokotaki ʻa e kāingalotú mo e kau taki ʻo e Siasí pea ʻiate kinautolu. Koeʻuhi ko ha holi ke fakalahi ʻa e ngaahi tāpuaki ko ʻení ki ha niʻihi tokolahi ange ʻi he fānau ʻa e ʻOtuá, ʻoku mau fiefia ai ke vahevahe ʻa e fuofua tatau ko ʻeni ʻo e Liahoná mo kimoutolu.

ʻOku kau ʻi he ngaahi liliu kehe ki he ngaahi makasini ʻa e Siasí ʻa e ngaahi pulusinga foʻou maʻá e fānau mo e toʻu tupu ʻi he funga ʻo e māmaní. ʻE ngāue fakataha ʻa e ngaahi makasini takitaha— Liahoná, Ki Hono Fakamālohia ʻo e Toʻu Tupú, mo e Kaumeʻá—pea mo e ngaahi maʻuʻanga tokoni ki he ako folofola ʻi he Haʻu, ʻo Muimui ʻIate Aú ʻa ia ʻokú ne poupouʻi ʻa hono ako ʻo e ongoongoleleí ʻi hoʻomou ʻapí. ʻE lahi ange foki ʻa e faingamālie ke maʻu ʻa e ngaahi makasini ko ʻení ʻi he ngaahi founga fakaʻilekitulōniká.

ʻOku kei tuʻu maʻu pē ʻa e taumuʻa ʻo e ngaahi makasini ʻa e Siasí: ke tokoniʻi e fānau ʻa e ʻOtuá ke nau toe ului lahi ange ki honau Fakamoʻui ko Sīsū Kalaisí. ʻOku mau houngaʻia ʻi hoʻomou holi ke ako mo moʻui ʻaki e ongoongoleleí, pea ke mou ʻiloʻi ʻe tokoniʻi kimoutolu ʻe he ngaahi makasini ko ʻení ʻi he ngaahi fāifeinga ko iá.

Fakaʻapaʻapa Atu,

Kau Palesitenisī ʻUluakí