Ko e hā naʻe akoʻi ʻe Molonai kia Siosefa Sāmitá?

Tokāteline mo e Ngaahi Fuakava 2; Siosefa Sāmita—Hisitōlia 1:27–65

(11–17 Sānuali)

Naʻá Ne Ui Au ʻAki Hoku Hingoá, tā ʻa Michael Malm

ʻI he ʻaho 21 ʻo Sepitema 1823, naʻe lotua ai ʻe Siosefa Sāmita ha fakamolemole ʻo ʻene ngaahi angahalá pea ke ne ʻiloʻi ʻa hono tuʻunga ʻi he ʻao ʻo e ʻOtuá. ʻI he taimi ne lotu ai ʻa Siosefá, naʻe fakafonu hono lokí ʻe ha maama pea naʻá ne mamata ki ha ʻāngelo ʻoku tuʻu ʻi he ʻataá.

Naʻe ui ʻe he ʻāngeló ʻa Siosefa ʻaki hono hingoá peá ne fakafeʻiloaki ange ko Molonai ia. Naʻá ne fakahā ange kia Siosefa kuo fakamolemoleʻi ia pea ʻoku ʻi ai ha ngāue ʻa e ʻOtuá maʻana ke fai.

Naʻe fakahā ange ʻe Molonai kia Siosefa ʻe ʻiloa hono hingoá “ʻi he lelei mo e kovi ʻi he ngaahi puleʻanga, mo e ngaahi faʻahinga, mo e ngaahi lea fulipē” (Siosefa Sāmita—Hisitōlia 1:33).
Naʻe ʻiloʻi ʻe Siosefa ʻa e ʻū lauʻi peleti koula naʻe tanu ʻi ha tafungofunga ofi mai ʻa ia naʻe ʻi ai ʻa e “kakato ʻo e Ongoongolelei taʻengatá” (Siosefa Sāmita—Hisitōlia 1:34). Naʻe fakahā ange foki ʻe Molonai kia Siosefa kau ki he ʻŪlimí mo e Tūmemí ʻa ia kuo teuteuʻi ʻe he ʻOtuá ke liliu ʻaki ʻe Siosefa ʻa e ʻū lauʻi peletí (vakai, Siosefa Sāmita—Hisitōlia 1:35).
Naʻe vahevahe ʻe Molonai kia Siosefa ha ngaahi kikite ʻe niʻihi naʻe ʻamanaki ke fakahoko fekauʻaki mo hono fokotuʻu ʻo e kuonga fakakosipeli fakaʻosi ko ʻení mo e ngaahi tāpuaki te ne ʻomi ki he māmaní.
Naʻe hā tuʻo tolu ʻa Molonai kia Siosefa ʻi he pō ko iá pea tuʻo taha ʻi he pongipongi hono hokó. Naʻá ne fai ʻa e fekau tatau ka naʻá ne ʻoange ha toe fakamatala mo ha fakahinohino lahi ange ʻi he taimi kotoa pē kia Siosefa (vakai, Siosefa Sāmita—Hisitōlia 1:44–46, 49).