Ngaahi Tefitoʻi Meʻa Mahuʻinga ʻo e Ongoongoleleí
ʻOku Folofola mai ʻa e ʻOtuá Kiate Kitautolu he Kuongá Ni
ʻOku finangalo ʻa e Tamai Hēvaní ke tokoniʻi kitautolu. ʻOku tau fakafanongo nai kiate Ia?
ʻI he taʻu ʻe uangeau kuohilí, naʻe hā ʻa e Tamai Hēvaní mo Sīsū Kalaisi ki ha kiʻi tamasiʻi taʻu hongofulu tupu ko Siosefa Sāmita hono hingoá. ʻOku akoʻi mai ʻe he ʻUluaki Mata Meʻa-Hā-Mai ko ʻení ha ngaahi moʻoni mahuʻinga. ʻOku toe tataki ʻe Sīsū ha Siasi ʻi he māmaní. ʻOku ʻi ai ha kau palōfita he kuongá ni ʻo hangē ko e kuonga muʻá. Pea ʻoku ʻafioʻi ʻe he ʻOtuá ʻa kitautolu fakataautaha mo fakafanongo ki heʻetau ngaahi lotú. ʻOku tāpuekina kitautolu ʻi he taimi ʻoku tau feinga ai ke fanongo ki Hono leʻó he ʻaho kotoa.
Ko e Hā ʻa e Fakahā?
Ko e taimi ʻoku folofola ai ʻa e ʻOtuá ki Heʻene fānaú, ʻoku ui ia ko e “fakahā.” ʻOku kehekehe ʻa e ngaahi faʻahinga ʻo e fakahaá.
Ko e fakahā fakatāutahá ʻa e taimi ʻoku folofola mai ai ʻa e ʻOtuá kiate kitautolu fakafoʻituitui ʻo fakafou ʻi he Laumālie Māʻoniʻoní. Te Ne lava ʻo fakafiemālieʻi mo tataki kitautolu.
Te tau lava foki ʻo maʻu ha fakahā ki he founga ke tokoniʻi ai ʻa kinautolu kuo uiuiʻi ke tau tatakí. Hangē ko ʻení, ʻe lava ke maʻu ʻe he mātuʻá ha fakahā fekauʻaki mo honau ngaahi fāmilí, pea ʻe lava ke maʻu ʻe ha pīsope ha fakahā fekauʻaki mo hono uōtí.
Ko e palōfitá pē te ne lava ʻo maʻu ʻa e fakahā ki he Siasí fakakātoa, ka te tau lava kotoa ʻo lotua ke ʻiloʻi pe ʻoku moʻoni nai ʻa e meʻa ʻoku akoʻi mai ʻe heʻetau kau takí.
Tā ʻo e kiʻi taʻahine ʻi he sea ʻo e falelotú, fai ʻe Miguel A. Honores Troncosc; tā ʻo ha fefine ʻoku lotu, fai ʻe Catherine Frost; tā ʻo ha tangata ʻi he vao ʻakaú, fai ʻe David Winters; Jehovah Keeps a Promise [Tauhi ʻe Sihova ha Palōmesi], fai ʻe Sam Lawlor
Te u Fakaafeʻi Fēfē Nai ʻa e Fakahaá?
ʻE lava ke tau lea ki ha Tamai Hēvani ʻofa, māfimafi, mo tokaimaʻananga ʻi ha faʻahinga taimi pē ʻo fakafou ʻi he lotú. ʻOkú Ne finangalo ke tau fakamālō kiate Ia ʻi he ngaahi tāpuakí, talanoa mo Ia fekauʻaki mo ʻetau moʻuí, pea kole ʻa e meʻa ʻoku tau fie maʻú. ʻOku totonu leva ke tau tokanga ki he ngaahi fakakaukau mo e ngaahi ongo ʻoku haʻu mei he Laumālie Māʻoniʻoní, ʻa ia ʻoku hangē ko ha talafekau mei heʻetau Tamai Hēvaní.
ʻOku Ongo Fēfē Nai ʻa e Fakahaá?
ʻOku ʻikai ko ha founga pē ʻe taha ʻe lava ke fakamatalaʻi ʻaki ʻa e fakahaá. ʻOku folofola mai ʻa e ʻOtuá kiate kitautolu takitaha ʻi ha founga ʻe mahino kiate kitautolú (vakai, Tokāteline mo e Ngaahi Fuakava 1:24). Taimi ʻe niʻihi ʻoku aʻusia ʻe he kakaí ha ngaahi misi mo ha ngaahi vīsone. Ka ko e taimi lahi, ʻoku folofola mai ʻa e ʻOtuá kiate kitautolu ʻo fakafou ʻi he ngaahi ongo fakalongolongo mei he Laumālie Māʻoniʻoní, hangē ko e māfaná, nongá, pe fiefiá.
ʻI he ako he māhiná ni ki he Tokāteline mo e Ngaahi Fuakavá, ʻoku tau laukonga ai fekauʻaki mo ʻŌliva Kautele, ʻa ia naʻe akoʻi kiate ia ʻe haʻu ʻa e fakahaá ki heʻene fakakaukaú mo e lotó fakatouʻosi (vakai, Tokāteline mo e Ngaahi Fuakava 8:2).
Ko e Hā ha Ngaahi Sīpinga ʻo e Fakahaá ʻi he Folofolá?
ʻOku fakamatalaʻi ʻe he ngaahi talanoa lahi mei he folofolá ʻa e folofola e ʻOtuá ki Hono kakaí:
-
Naʻe folofola ʻa e ʻOtuá kia Noa fekauʻaki mo e founga ke tauhi ai hono fāmilí ke malú (vakai, Sēnesi 6:17–18).
-
Naʻe fakafiemālieʻi ʻe he Tamai Hēvaní mo Sīsū ha ākonga ko hono hingoá ko Sitīveni (vakai Ngāue 7:55).
-
Naʻe tokoni ʻa e fakahaá kia Nīfai ke ne tauhi ʻa e ngaahi fekaú (vakai 1 Nīfai 4:6).
-
Neongo ʻoku haʻu ʻa e ngaahi folofola kehé mei ha ngaahi lekooti fakakuonga muʻa, ka ʻoku faʻu ʻa e Tokāteline mo e Ngaahi Fuakavá ʻaki ha ngaahi fakahā ʻi he kuongá ni. ʻI he taʻú ni, ʻoku tau maʻu ʻa e faingamālie makehe ki hono ako ha tohi kuo fonu ʻi he ngaahi folofola hangatonu ʻa e ʻEikí.