“Founga ʻOku Fakafehokotaki Ai Au ʻe Heʻeku Ngaahi Fuakavá ki he Meʻa ʻOku Mahuʻinga Tahá,” Liahona, ʻOkatopa 2024.
Kakai Lalahi Kei Talavoú
Founga ʻOku Fakafehokotaki Ai Au ʻe Heʻeku Ngaahi Fuakavá ki he Meʻa ʻOku Mahuʻinga Tahá
Naʻe ʻikai ke u fakatokangaʻi ʻa e tāpuaki ʻoku ou maʻu ʻi heʻeku ngaahi fuakavá.
Fakaikiiki mei he Kalaisi ʻi ha Pulupulu Kulokulá, tā fakatātaaʻi ʻe Minerva Teichert
ʻOku ou fiefia ke ongoʻi ʻa e Laumālié. Ko ha ongo ia te u lava ʻo pehē ʻi he loto-toʻa ʻoku ou ʻiloʻi ʻi he taimí ni.
Ka naʻe fiemaʻu ke ngāueʻi. ʻI heʻeku tupu hake ʻi he fakatokelau ʻo ʻIngilaní, naʻe faʻa faingataʻa ke u ʻi ha ʻātakai naʻá ne fakaʻatā au ke u ongoʻi ʻa e Laumālie Māʻoniʻoní. ʻOku tokolahi fau ha kakai lalahi kei talavou lelei ai ne tupu hake ʻi he Siasí, ka naʻe faʻa faingataʻa ʻi he taimi ʻe niʻihi ke fakafenāpasi homau ʻulungāngá mo e tokāteline mo e ngaahi moʻoni ne mau ʻilo ʻi homau lotó.
ʻI ha taimi fuoloa, ne u ʻalu ki he lotú ʻi he Sāpaté ka ne u ongoʻi taʻefiemālie mo mamahi ʻi heʻeku ʻilo naʻe ʻikai ongo ki he niʻihi kehe ne u ʻofa mo tokanga ki aí ʻa e ngaahi meʻa naʻe fakahoko mai ʻe he Laumālié kiate aú.
Hili ko iá, ne akoʻi ʻe Palesiteni Lāsolo M. Nalesoni ʻo pehē, “ʻI he ngaahi ʻaho ka hokó, he ʻikai lava ke tau moʻui fakalaumālie taʻe kau ai ʻa e tataki, fakahinohino mo e ivi fakafiemālie, mo tatau maʻu pē ʻo e Laumālie Māʻoniʻoní.”
Ka neongo ia, ʻoku ou ako ki he mahuʻinga ʻo e fakaʻatā ha potu moʻó e Laumālié ʻi he tapa kotoa pē ʻo ʻeku moʻuí pea tokoniʻi e niʻihi kehé ke nau fai ʻa e meʻa tatau.
Fefaʻuhi mo e Ngaahi ʻAhiʻahí
Hili ʻeku ʻosi mei he ako māʻolungá, ne u fehangahangai mo ha ngaahi faingataʻa lahi. Hangē ko ʻení, ʻoku lahi ha ngaahi ʻekitivitī mo ha ngaahi konifelenisi maʻá e kāingalotu lalahi kei talavou ʻo e Siasí ʻi he feituʻu ʻoku ou nofo aí. Ka ʻi he hili ʻa e ngaahi ʻekitivitī ko ʻení, ʻe ʻalu ha kakai lalahi kei talavou ʻe niʻihi ki ha ngaahi kalapu pe ngaahi feituʻu ʻoku ʻikai fenāpasi mo hotau ngaahi tuʻunga ʻulungaanga mahuʻingá.
Naʻá ku ʻohovale ai!
Ko ha meʻa angamaheni ʻa e inu kava mālohí mo e kalapú ʻi heni, ka naʻe ʻikai ke u ʻamanaki ʻe fai foki ʻe hoku ngaahi kaungāmeʻa ne mau tangutu fakataha ʻi he lotú ʻa e ngaahi meʻa ko iá.
Naʻá ku puputuʻu.
ʻI heʻeku sio ki hono fakahoko ʻe he ngaahi kaungāmeʻá ʻa e ngaahi fili ko ʻení naʻe faingataʻa ai ke u ʻiloʻi pe ko hai te ne tokoniʻi au ke u kei mālohi fakalaumālié. Tuʻunga ʻi heʻeku vakai ki he niʻihi kehé ʻoku fakavaʻivaʻinga pē ʻenau moʻui ʻaki e ongoongoleleí, naʻe faifai peá u hē atu mo au mei he ongoongoleleí. Naʻe ʻikai ke u ʻalu ki he lotú pe fai ha lotu, pea naʻá ku fai ha ngaahi meʻa naʻe ʻikai totonu ke u fai.
Ka ʻi ha ʻaho ʻe taha, ʻi heʻeku ongoʻi mātuʻaki mamahí, naʻá ku lotu ki he Tamai Hēvaní mo fakahā kiate Ia ʻeku ngaahi ongó. Naʻá ku talaange kiate Ia naʻá ku fiemaʻu ke moʻoni ʻa e Siasí pea ne u fiemaʻu ke mahino kiate au ʻEne ngaahi fekaú, ka naʻe faingataʻa ʻaupito ke u fakakaukau ke tuʻu toko taha pē. Ka naʻá ku talaange kiate Ia kapau te u lava ʻo maʻu ha fakapapau ki he ngaahi moʻoni ʻo e ongoongoleleí, te u fakafanongo pea fai hoku lelei tahá ke toe moʻui ʻaki ia.
Hili ha ngaahi ʻaho siʻi mei ai, ne u ongoʻi ha ueʻi fakalaumālie makehe naʻe fiemaʻu ke u ʻalu ʻo ngāue fakafaifekau.
Naʻe fakatuʻupakē pē ʻene haʻu ʻa e fakakaukaú kiate aú. Ka naʻe lava ke u ongoʻi hono ueʻi au ʻe he Laumālié ki he foʻi fakakaukau ko iá. Naʻá ku ʻiloʻi ʻe lava ʻe he teuteu ke ngāue fakafaifekaú ʻo fakamanatu mai ʻeku fakamoʻoní, ke toe langa hake hoku vā mo e Tamai Hēvaní mo Sīsū Kalaisí, pea fakafalala ki heʻeku tuí—kae ʻikai ko ha toe taha kehe.
Pea ko e meʻa ia ne u fakaʻānaua ki aí.
Ko ia, naʻe kamata ke u liliu. Naʻe fiemaʻu ki ai ha ngāue fakalaumālie lahi ʻaupito. Naʻe pau ke taʻofi ʻeku feohi mo ha ngaahi kaungāmeʻa ʻe niʻihi, naʻe ʻikai ke u toe kaumeʻa mo e tokotaha naʻá ku teiti mo iá, pea naʻe pau ke u fetongi ʻeku ngaahi tōʻonga koví ʻaki ha ngaahi tōʻonga ʻoku lelei angé. Naʻá ku ngāue mo ʻeku pīsopé pea fakafalala ki he mālohi fakaivia ʻo Sīsū Kalaisí ke tokoniʻi au ke u laka ki muʻa.
Ko Ha Fakakaukau kuo Liliu
Kimuʻa ʻi heʻeku ngāue fakafaifekaú, naʻe ʻikai mahino kiate au ʻa e ngaahi fekaú mo e ngaahi fuakavá. Naʻe vakai hoku ngaahi kaungāmeʻá ki he ngaahi tāpuaki ko ʻení ʻo hangē ha ngaahi meʻa fakamafasiá, pea naʻe kamata foki ke u vakai kiate kinautolu ʻi he founga ko iá. Ka ʻi he hili ʻeku ngāue fakafaifekaú mo toe langa hake ʻeku tuí, ʻoku ou vakai leva ʻi he taimí ni ki he ngaahi fuakavá mo e ngaahi fekaú ko ha ngaahi fatongia mohu tāpuekina ʻokú ne tokoniʻi au ke u pukepuke ʻa e fehokotaki fakalangi mo fakahangatonu mo e Tamai Hēvaní mo Sīsū Kalaisí—ʻi he ʻaho kotoa pē.
Naʻe fakamoʻoni kimuí ni ʻa Palesiteni ʻEmelī Pele Filimana, ko e Palesiteni Lahi ʻo e Kau Finemuí, ki he mālohi ʻo e ngaahi fuakavá: “Mahalo ʻoku mou fanongo ki he ngaahi lea ko iá pea fakakaukau ki he ngaahi puha ke fakaʻilongaʻí. Mahalo ko e meʻa pē ʻoku mou vakai ki aí ko ha hala fonu ʻi he ngaahi fiemaʻu ke fakakakato. ʻOku fakahā mai ha meʻa ʻoku fakaofo ange ʻi heʻetau vakai ofi ange ki aí. Ko e fuakavá ʻoku ʻikai fekauʻaki pē ia mo ha aleapau, neongo ʻoku mahuʻinga ia. ʻOku fekauʻaki ia mo ha vā fetuʻutaki.”
Naʻe fakamoʻoni foki ʻa ʻEletā Lōpeti M. Teini ʻo e Kau Fitungofulú “ko e ngaahi fuakavá ko e founga ia ʻoku fakahaaʻi mai ai ʻe he ʻOtuá ʻa ʻEne ʻofá.”
Neongo pe ko e fē feituʻu ʻoku tau tuʻu aí—tatau ai pē kapau te tau tuʻu toko taha—ʻoku haʻi kitautolu ʻe he ngaahi fuakava kuo tau faí ki he ngaahi vā fetuʻutaki ʻoku mahuʻinga tahá.
ʻOku ou loto-mamahi ʻi he taimi ʻe niʻihi ʻi he ʻikai mamata ʻa e niʻihi kehé ki he ngaahi tāpuaki fakaʻofoʻofa ʻo e ongoongolelei ʻo Sīsū Kalaisí. ʻI he taimi ʻe niʻihi, ʻoku ou fie luluʻi kinautolu mo fakamanatu ange ʻa e mana ʻo ʻenau ngaahi fuakavá! ʻOku ou fiemaʻu ke nau ʻiloʻi ʻa e meʻa ʻe lava ke fakaʻatā ʻe he Fakamoʻuí ke nau fai mo aʻusiá!
Neongo ʻoku ʻikai ke u lava ʻo mapuleʻi ʻa e niʻihi kehé, ka te u lava ʻo tauhi ʻeku fakamoʻoní ke mālohi. Te u lava ʻo ʻilo ʻa e taimi ke mavahe ai mei he ivi tākiekina ʻo ha kakai ʻe niʻihi pea ʻiloʻi foki ʻa e founga ke hoko ai ko ha tākiekina lelei kiate kinautolú.
ʻOku ou tui ko e meʻa ia naʻá ne toe fakafoki mai au hili ʻeku fefaʻuhi mo ʻeku tuí: ko hono manatuʻi e ʻofa ʻa hoku Fakamoʻui ko Sīsū Kalaisí.
ʻOku ou ʻilo naʻe ʻikai ke u mei ʻalu ʻo ngāue fakafaifekau kapau naʻe ʻikai ke u kole ki he Tamai Hēvaní ha fakahinohino fakalangi ʻi ha taimi ʻo e puputuʻu lahi. Neongo ʻeku fakaʻamu naʻe ʻikai fiemaʻu ke u foua ʻa e ngaahi aʻusia fakamamahi ko iá, ka naʻá ku ako ha meʻa lahi fekauʻaki mo e fakatomalá, fekauʻaki mo e ʻofa haohaoa ʻa e Tamai Hēvaní, pea mo hono mahuʻinga ke fakamuʻomuʻa e ngaahi vā fetuʻutaki leleí (tautautefito ki he vā mo Ia mo hotau Fakamoʻuí) ʻa ia ʻokú ne ʻai ke tau fehokotaki mo e Laumālié.
Neongo ʻa e ngaahi konga faingataʻá, ka naʻe mahuʻingamālie ʻa e meʻa kotoa pē ʻi hono toe langa hake ʻeku tui kiate Iá.