Fakaʻilekitulōnika Pē: Kakai Lalahi Kei Talavoú
Ko e Founga Naʻe Mahino Lelei Ange Ai Kiate Au ʻEku Ngaahi Fuakavá Hili ʻa e Mālōlō ʻEku Tangataʻeikí
ʻI he mālōlō ʻeku tangataʻeikí, naʻe ʻikai ke u ʻilo pe ʻe anga fēfē hano matuʻuaki ia ʻe hoku fāmilí. Ka naʻe tokoniʻi au ʻe he ngaahi tāpuaki ʻo e ongoongolelei ʻo Sīsū Kalaisí ke u maʻu ha ʻamanaki lelei mo ha mahino lahi ange.
ʻI heʻeku tupu hake ʻi Tailení, naʻá ku faʻa ongoʻi ʻi he taimi ʻe niʻihi ʻoku hangē ʻoku kiʻi ngali kehe ʻeku hoko ko ha tokotaha Kalisitiané. Neongo naʻe kehe ʻeku tuí mei he tokolahi ʻo e kakai naʻa mau feohí, ka naʻe ʻikai ke u teitei ongoʻi mā pe fie tukuange ʻa e ongoongolelei ʻo Sīsū Kalaisí. Naʻá ku saiʻia maʻu pē ʻi he ngaahi moʻoni naʻá ne akoʻi maí, pea naʻá ku fai hoku lelei tahá ke faipau kiate kinautolu.
Ka naʻe hoko ha meʻa fakamamahi ki hoku fāmilí. Pea ko e fuofua taimi ia ʻi heʻeku moʻuí ke u fai moʻoni ai ha fili, fakalakalaka, mo pikitai ki he tuí ʻi ha taha ʻo e ngaahi makatuliki ʻo e ongoongoleleí—ko e palani ʻo e fakamoʻui ʻa e ʻOtuá.
Fiemaʻu ke Toe Langa Hake ʻEku Tuí
Naʻe silaʻi au mo hoku fāmilí ʻi he Temipale Hong Kong ʻi he 2014. Naʻá ku tatali fuoloa ki he ʻaho ko ʻení pea naʻá ku fuʻu fiefia ʻaupito. Ka ʻi he hili ha taimi nounou mei heʻemau aʻusia ʻa e ouau fakaʻofoʻofa ko ʻení, naʻe mālōlō fakafokifā ʻeku tangataʻeikí.
Naʻe lōmekina au ʻe ha fuʻu mamahi lahi. Naʻe ʻikai ke u ʻilo pe te u lava fēfē mo hoku fāmilí ʻo matuʻuaki ʻa e mole ʻeku tangataʻeikí. Naʻá ku ongoʻi kuo mole atu ha fuʻu konga lahi ʻo ʻemau moʻuí. Te mau lava fēfē ʻo kātekina ʻa e moʻuí taʻe-kau ai ʻa e tangataʻeikí?
ʻI he fuʻu taimi faingataʻa ko ʻení, naʻá ku tafoki ki he Tamai Hēvaní mo Sīsū Kalaisi ke maʻu ha fakafiemālie, naʻá ku ako ʻa e founga ke fakaloloto ai ʻeku fakamoʻoni ki he palani ʻo e fakamoʻuí mo e fāmili taʻengatá.
Kuo akonekina maʻu pē au peá u tui ʻe lava ke fakataha ʻa e ngaahi fāmilí ʻo taʻengata. Ka naʻe siviʻi moʻoni ʻeku fakamoʻoní ʻi heʻeku fehangahangai mo e mole lahi ko ʻení. Naʻá ku fakaʻamu mo loto ke u ʻiloʻi te u toe sio ki heʻeku tangataʻeikí ʻi ha ʻaho. Naʻe kamata ke u fie ako lahi ange ki he tokāteline ʻo e ngaahi fāmili taʻengatá.
Naʻe toki akoʻi mai ʻe Palesiteni Henelī B. ʻAealingi, ko e Tokoni ʻUluaki ʻi he Kau Palesitenisī ʻUluakí ʻo pehē:
“ʻOku fakafou ʻi he ngaahi fuakava ʻo e sila ʻi he temipalé ʻa ʻetau lava ʻo maʻu ʻa e fakapapau ko ia ʻe hoko atu ʻa e ngaahi fehokotaki ʻofa fakafāmilí ʻi he hili ʻa e maté pea tolonga ʻo taʻengata. …
ʻE hoko mai ʻa e ʻahiʻahí, faingataʻá, mo e loto-mamahí kiate kitautolu kotoa. … Ka, ʻi heʻetau ō ki he temipalé mo manatuʻi ʻetau ngaahi fuakavá, ʻe lava ke tau mateuteu ke maʻu ha fakahinohino fakataautaha mei he ʻEikí.”
Pea ʻoku moʻoni ia! ʻI he taimi naʻá ku faingataʻaʻia lahi ai ke ongoʻi ʻa e ʻofa ʻa e Tamai Hēvaní mo Sīsū Kalaisi ʻi heʻeku moʻuí hili ʻa e mālōlō ʻeku tangataʻeikí, naʻe tokoni hono ako ʻo e fuakava fakafiemālie mo e tāpuaki ko ʻení ke u toe sio ai ki ha fanga kiʻi meʻa iiki ʻo ʻEna ʻofá mo e māmá.
ʻOku Haʻi Kitautolu ʻe Heʻetau Ngaahi Fuakavá kiate Ia mo e Niʻihi Kehé
Naʻe toe mahuʻingamālie ange kiate au ʻemau sila ʻi he temipalé hili ʻa e mālōlō ʻeku tangataʻeikí. Pea naʻá ku fakatokangaʻi ko e ngaahi fuakava kotoa pē ʻoku fakaafeʻi mai ʻe he Tamai Hēvaní ke tau fakahoko mo tauhí, ko ha ngaahi faingamālie fakaʻofoʻofa ia maʻatautolu.
ʻOku ʻikai ko ha ngaahi palōmesi faingofua pē ʻa e ngaahi fuakavá—ka ko e kī ia ki hono tokoniʻi kitautolu ke fakaafeʻi mai ʻa e mālohi ʻo e Fakamoʻuí ki heʻetau moʻuí. ʻOku nau fakaʻatā ke hokohoko atu ʻetau ngāué mo e ʻamanaki leleí, neongo ʻa e loto-mamahí mo e ngaahi faingataʻa ʻo e moʻuí. Koeʻuhí ko ʻeku maʻu lahi ange ʻa e mālohi faifakamoʻui ʻo Sīsū Kalaisí, te u lava ʻo kātaki ki he ngataʻangá ʻi he fiefia, ʻi heʻeku ʻiloʻi te u toe sio ki heʻeku tamaí.
Pea hangē pē ko e palōmesi naʻe fai ʻe Palesiteni ʻAealingí, “‘Neongo pe ko e hā ʻa e meʻa ʻe hokó, ʻe lelei ʻa e meʻa kotoa pē koeʻuhí ko e [ngaahi fuakava ʻo e] temipalé.’”
ʻOku ou houngaʻia ʻaupito ʻi he ongoongolelei ʻo Sīsū Kalaisí pea mo e ʻamanaki lelei mo e nonga ʻokú ne ʻomaí, tautautefito ki he taimi ʻoku ou fiemaʻu ai ʻa e nongá ʻi he taimi ʻo e taʻepaú mo e molé. ʻOku ou kei ongoʻi loto-mamahi pē, ka ʻoku fakamāfanaʻi ʻe heʻeku ngaahi fuakavá hoku lotó mo tokoniʻi au ke u hokohoko atu ʻi he ʻamanaki leleí.
ʻOku ou poupou atu ke mou fakalaulauloto ki he mahuʻinga ʻo e ngaahi fuakava kuo mou faí mo e founga ʻoku nau fakafehokotaki ai koe ki he Tamai Hēvaní mo Sīsū Kalaisi ʻi he ʻaho takitaha. ʻOku ou ʻiloʻi hangē pē ko e ʻaʻeva ʻa e Fakamoʻuí mo au ʻi he hala ʻo e fuakavá, te Ne ʻaʻeva foki mo koe ʻi hoʻo tafoki kiate Iá.