Fakaʻilekitulōnika Pē
Teuteu ʻi he ʻAho ʻe 7 ki he Konifelenisi Lahí
ʻE lava ʻe he ngaahi teuteu naʻe fai ki he tō folofola ʻa e Tuʻi ko Penisimaní ʻo tataki fakalaumālie ʻetau sīpinga ʻo e teuteu ki he konifelenisi lahí.
ʻI he Tauhi ʻo Homou ʻOtuá, tā fakatātā ʻa Walter Rane
ʻIkai nai ʻoku hā mahino lelei ʻa e ʻikai ke kamata pē ʻa e Mōsaia 2 ʻi he tō folofola ʻa e Tuʻi ko Penisimaní? Ka ʻoku fakahaaʻi ʻe he ʻuluaki veesi ʻe valu ʻo e vahe ko iá ha konga mahuʻinga ʻo e tō folofola ʻa e Tuʻi ko Penisimaní—ʻoku nau fakahaaʻi ha teuteu fakamātoato naʻe fai ʻe he fakafoʻituituí, fāmilí, mo e kau takí ke teuteuʻi honau lotó mo e ʻatamaí ke fanongo ki he ngaahi pōpoaki mei he palōfitá, Tuʻi ko Penisimaní. ʻOku kau ʻi he ngaahi sīpingá ʻa e:
-
Naʻe fai ha fakaafe ki he tokotaha kotoa pē ke omi ʻo fanongo (veesi 1).
-
Naʻe fai ʻa e fakaafé ni ko ha tali ki ha fakahinohino mei ha palōfita (vakai, Mōsaia 1:10).
-
Naʻe mateuteu ʻa e niʻihi fakafoʻituituí mo e ngaahi fāmilí mo fai ha feilaulau makehe (veesi 3).
-
Naʻa nau fakafetaʻi koeʻuhí ko e ngaahi meʻa kotoa pē kuo fai ʻe he ʻOtuá maʻanautolú (veesi 4).
-
Naʻa nau fononga ki he temipalé ʻo maʻu ha ngaahi feituʻu fakafoʻituitui maʻa honau ngaahi fāmilí (veesi 5).
-
Naʻa nau fokotuʻu honau ngaahi fale fehikitakí ʻo hanga ki he temipalé koeʻuhí ke nau lava ʻo nofo ai ʻo fanongo ki he palōfitá (veesi 6).
-
Naʻa nau tuku atu ha ngaahi pōpoaki ʻo e ngaahi akonakí kuo ʻosi tohí koeʻuhí ke lava ʻa e tokotaha kotoa pē ʻo maʻu ʻa e ngaahi lea naʻe lea ʻakí (veesi 8).
ʻOku ou saiʻia ʻi he sīpinga ko ʻeni ʻo e teuteu ke fanongo ki he palōfita ʻa e ʻOtuá! Mahalo naʻe fakakau ʻa e ngaahi veesi ko ʻeni fekauʻaki mo e teuteú ʻi he Tohi ʻa Molomoná ke ueʻi kitautolu ke tau teuteu fakamātoato ki he konifelenisi lahí pe ki ha faʻahinga pōpoaki pē mei he kau palōfita ʻa e ʻOtuá ʻi he taʻú kakato.
ʻI he ngaahi taʻu siʻi kuo hilí, kuó u feinga ke teuteu fakamātoato ki he konifelenisi lahí ʻi he uike kimuʻá, pea naʻá ne ʻai ke toe mahuʻingamālie ange ʻeku aʻusia ʻi he konifelenisí ʻi ha ngaahi founga fakaʻofoʻofa lahi! Kapau ʻokú ke fie ʻahiʻahiʻi ha teuteu fakamātoato ʻi ha ʻaho ʻe fitu ki he konifelenisi lahí, ko ha ngaahi fakakaukau ʻeni ʻoku fakatefito ʻi he ngaahi veesi mei he Mōsaia 2.
ʻAho ʻe 7 ʻo e Teuteu ki he Konifelenisi Lahí—Ko ha Sīpinga mei he Mōsaia 2:1–8
|
Teuteu ʻi he ʻAho ʻe 7 ki he Konifelenisi Lahí | |
|
1. Fakaafeʻi ʻa e kakai kotoa pē ke nau omi ʻo fanongo (veesi 1). |
1. Fakaafeʻi ha niʻihi kehe ke nau mamata ʻi he konifelenisi lahí. |
|
2. Fai pau ki he fakahinohino ʻa e palōfitá (Mōsaia 1:10). |
2. Fai leva ʻa e fakaafe naʻe toki fakahoko mai ʻe he kau palōfitá. |
|
3. Fai ha feilaulau mo ha feilaulau tutu (veesi 3). |
3. Lotua ha meʻa te ke lava ʻo feilaulauʻi ke ke maʻu lelei ange ai ʻa e folofola ʻa e ʻOtuá. |
|
4. Fakafetaʻi koeʻuhí ko e meʻa kotoa pē kuo fai ʻe he ʻOtuá (veesi 4). |
4. Fakamālō ki he anga hono tāpuekina hoʻo moʻuí ʻe he ngaahi akonaki mei he ngaahi konifelenisi lahi kimuʻá. |
|
5. Fononga ki he temipalé pea kumi ha feituʻu maʻa honau ngaahi fāmilí (veesi 5). |
5. Fokotuʻu ha feituʻu toputapu ke fanongo ai ki he konifelenisi lahí. |
|
6. Fokotuʻu honau ngaahi fale fehikitakí ʻo hanga ki he palōfitá; nofo ʻo fanongo (veesi 6). |
6. Fakafuofuaʻi ʻa e tuʻunga lelei ʻo e tafoki ho lotó ki he kau palōfitá, pea mateuteu ke “nofo maʻu … mo fanongo.” |
|
7. ʻAve ʻa e ngaahi pōpoakí ʻi ha tohi (veesi 8). |
7. Teuteuʻi ha palani ki hono ako ʻo e konifelenisí ʻi he kahaʻú. |
ʻAho 1: Fakaafeʻi ha niʻihi kehe ke nau mamata ʻi he konifelenisi lahí. Te ke lava ʻo fakaafeʻi taha taha ʻa e niʻihi kehé pe ʻoatu ha fakaafe ki ho ngaahi kaungāmeʻá kotoa ʻi he mītia fakasōsialé. Fakakaukauʻi mo ha ngaahi founga kehe te ke lava ke vahevahe atu ai ha fakaafe ʻi homou koló! Te ke lava ʻo faʻu ha fakaafe fakafiefia ki ho fāmilí pe kaungā nofo ʻi ʻapí ke fakahaaʻi ʻa e meʻa makehe ʻoku hokó mo e ngaahi tāpuaki ʻoku ako mei he kau palōfitá mo e kau taki ʻo e Siasí.
ʻAho 2: Fai pau ki he ngaahi fakaafe lolotonga mei he kau palōfitá. Te tau lava ʻo fakahaaʻi ki he Tamai Hēvaní ʻoku tau mateuteu ke maʻu ha fakahinohino pea fakaʻaongaʻi ia ʻaki hono fakahoko ʻa e ngaahi akonaki kuo tau ʻosi maʻú. Fakakaukau ke lau ʻa e ngaahi lea kimuʻa mei he kau palōfitá mo e kau ʻaposetoló pea fakaʻaongaʻi ʻa e ngaahi fakaafe naʻa nau faí.
ʻAho 3: Lotua ha meʻa te ke lava ʻo feilaulauʻi ke ke maʻu lelei ange ai ʻa e folofola ʻa e ʻOtuá. Fakakaukau ki ha feilaulau te ke ala fai ʻi he uiké ni ke fakahaaʻi ki he Tamai Hēvaní ʻokú ke mateuteu ke fanongo lahi ange kiate Ia. Hangē ko ʻení, ʻi hono ueʻi au ʻe ha fakaafe ʻe ua kimuʻa meia Palesiteni Lāsolo M. Nalesoni ke taʻofi fakataimi hono fakaʻaongaʻi ʻo e mītia fakasōsialé, kuó u ʻiloʻi ʻoku tokoni hono taʻofi ʻo e mītia fakasōsialé (tukukehe ʻa hono vahevahe atu ai ʻa e konifelenisi lahí) pea pehē ki he ngaahi mītia kehe ʻoku ʻikai ʻo e Siasí kimuʻa ʻi he konifelenisi lahí. ʻOku tokoni ia ke fakaʻataʻatā hoku ʻatamaí ke u tokanga lahi ange kia Sīsū Kalaisi mo ʻEne folofolá. Te tau lava ʻo takitaha lotua ha ueʻi fakalaumālie ke tau ʻiloʻi ʻa e feilaulau ʻe tokoni lelei taha ke tau mateuteu fakafoʻituitui aí.
ʻAho 4: Fakamālō ʻi he anga hono tāpuekina hoʻo moʻuí ʻe he ngaahi akonaki mei he ngaahi konifelenisi lahi kimuʻá. Fakakaukau ki he founga kuo faitāpuekina ai hoʻo moʻuí ʻi hoʻo fakaʻaongaʻi ʻa e ngaahi akonaki ʻo e konifelenisi lahi kimuʻá. Fakamālō ki he Tamai Hēvaní koeʻuhí ko e ngaahi akonaki mo e ngaahi tāpuaki ko iá. Te ke lava foki ʻo hiki hoʻo ngaahi fakakaukaú ʻi hoʻo tohinoá pe vahevahe hoʻo ngaahi aʻusiá mo kinautolu ʻokú ke ʻofa aí.
ʻAho 5: Fokotuʻu ha feituʻu toputapu ke fanongo ai ki he konifelenisi lahí. Tatau ai pē pe te ke fanongo ki he konifelenisi lahí ʻi ha ʻapisiasi, ʻi ho ʻapí, ha paʻake ʻoku lōngonoa, pe ko hoʻo ngāueʻangá, vakai pe ʻoku ʻi ai ha founga ke teuteu ai ʻa e feituʻu ko iá ko ha “fale ʻo e ako” (Tokāteline mo e Ngaahi Fuakava 109:8). Fakakaukau ki ha ngaahi founga faingofua te ke lava ai, ʻo hangē ko e akonaki ʻa Palesiteni Nalesoni fekauʻaki mo e Sāpaté, ʻo “fakafoʻou homou ʻapí [pe ngaahi feituʻu kehé] ke hoko ko ha senitā ki hono ako ʻo e ongoongoleleí” ki he konifelenisi lahí, hangē ko hono fakamaʻa pe toʻo fakataimi ʻa e ngaahi meʻa ʻoku malava ke fakatuta mo fakatuʻutāmakí.
ʻAho 6: Vakaiʻi pe ʻoku lelei fēfē ʻa e tafoki ho lotó ki he kau palōfitá, pea teuteu ke “nofo maʻu … mo fanongó.” ʻI heʻeku fakakaukau ki he fokotuʻu ʻe he kakaí honau ngaahi tēnití ʻo hanga ki he palōfitá, ʻoku fakamanatu mai ke u vakaiʻi fakalelei ʻa e tuʻunga ʻoku ou fanongo mo talangofua ai ki he kau palōfitá. Te tau lava ʻo fakakaukau ke toe vakaiʻi ʻa e “ʻE ʻIkai Te Ke Maʻu Mo Ha ʻOtua Kehe” meia Palesiteni Nalesoni mo e “Ko Hai ʻOkú ke Fakafofongaʻí?” meia ʻEletā Lini G. Lōpini, ko ha Fitungofulu Taki Māʻolunga mālōlō. ʻOku nau ʻeke ha ngaahi fehuʻi fakaʻofoʻofa ʻo kau ki he anga ʻetau fanongo mo talangofua ki he ʻOtuá mo ʻEne kau palōfitá. ʻI heʻetau fai iá, te tau lava ai ʻo fakaava hotau lotó ke fakatomala pea mateuteu ange ke muimui ki he ngaahi fekau ʻa e ʻOtuá ʻi he konifelenisi lahi ka hokó.
ʻOku ou saiʻia foki ʻi he teuteu ʻa e kakai ʻo e Tuʻi ko Penisimaní ke nau “nofo maʻu … pea fanongo” ʻo ʻikai fiemaʻu ke nau mavahe mei honau ngaahi fale fehikitakí ʻi he taimi naʻá ne tō folofola aí. ʻI heʻeku kei siʻí, naʻá ku faʻa fakakaukau ko ha taimi mālōlō lelei ʻa e taimi ʻoku fai ai ʻa e hiva ʻo e konifelenisi lahí, ka ʻoku ou ʻiloʻi ʻi he taimi ní ko e hivá ko ha konga mahuʻinga foki ia ʻo e ngaahi akonaki ʻo e konifelenisí. ʻOku ou feinga ke mateuteu lelei ange ke ako mei he konga ko ia ʻo e konifelenisi lahí koeʻuhí ke u lava ʻo “nofo maʻu” ʻi he houa kakato ʻe ua ʻo e fakatahaʻanga takitaha. Mahalo ʻe faingataʻa ia ki he fānaú pe ngaahi tūkunga makehé, ka te tau lava ʻo fakakaukau pe ʻoku ʻi ai ha faʻahinga meʻa te tau lava ʻo teuteu ki ai (hangē ko ha fanga kiʻi kai maʻamaʻa pe ʻekitivitī maʻá e fānaú pe fakapapauʻi ʻoku tau mohe efiafia ke ʻāʻā maʻu pē) koeʻuhí ke tau lava ʻo fakasiʻisiʻi ʻa e loto ke mavahe mei he konifelenisi lahí lolotonga ʻa e ngaahi fakatahaʻangá kae “nofo maʻu … pea fanongo” (Mōsaia 2:6) ʻo hangē ko ia naʻe fai ʻe he kakai ʻo e Tuʻi ko Penisimaní.
ʻAho 7: Teuteuʻi ha palani ki hono ako ʻo e konifelenisí ʻi he kahaʻú. Hangē ko e kuonga ʻo e Tuʻi ko Penisimaní, ʻoku fakaʻatā ʻe heʻetau kau palōfita ʻo e ʻaho ní ʻenau ngaahi leá ke maʻu ʻe he taha kotoa ʻo fakafou ʻi he Liahoná pe polokalama Gospel Library. Faʻu ha palani ʻi he taimí ni ke ke ako ʻa e ngaahi lea ʻa e kau palōfitá hili ʻa e konifelenisí koeʻuhí ke ke mateuteu ke fakaʻaongaʻi! Hangē ko ʻení, ako ʻa e founga ki hono faʻu ha palani ako ʻi he polokalama Gospel Library, pe lesisita ki he Liahona kuo pākí pe faʻunga fakaʻilekitulōniká ʻi he MagazineSubscriptions.ChurchofJesusChrist.org.
Te ke lava foki ʻo toe vakaiʻi ʻa e fakamatala ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ko e “Our General Conference Walk and Talk” ki ha ngaahi fakakaukau lahi ange ki he founga te tau lava ai ʻo mateuteu ki hono fakaʻaongaʻi ʻa e ngaahi akonaki mei he kau palōfitá mo e kau taki kehe ʻo e Siasí.