“ʻOkú Ke Manatu Nai ki he Mana ʻo e Ongoongoleleí?,” Liahona, ʻOkatopa 2024.
Kakai Lalahi Kei Talavoú
ʻOkú Ke Manatu Nai ki he Mana ʻo e Ongoongoleleí?
Naʻá ku mavahe mei he Siasí pea naʻe ʻikai ke u fakatokangaʻi ʻa e meʻa naʻe mole meiate aú.
Kuo ʻi ai nai ha taimi naʻá ke taʻetokanga ai ki ha meʻa, ʻo ʻikai ke ke fakatokangaʻi ʻa e lelei naʻá ke maʻu mei aí kae ʻoua kuo mole ia?
Ne u pehē tuʻo taha—ʻi he ongoongolelei ʻo Sīsū Kalaisí.
ʻI heʻeku tupu hake ʻi Mongikōliá, naʻá ku kau mo hoku fāmilí ki he Siasí. Ka ʻi he fakalau ʻa e taimí, naʻe fakaʻau ke siʻisiʻi ange ʻa e ʻalu ʻeku ongomātuʻá ki he lotú. Naʻe kamata māmālie ke u ongoʻi taʻetokanga foki mo au ki he ongoongoleleí.
Naʻe ʻikai ke u fakamahuʻingaʻi ʻa e meʻa ne u akó pea faifai pē pea ʻikai ke u toe maʻulotu. Naʻe ʻikai ke u fakakaukau te u manatu ki he ongoongoleleí, koeʻuhí he naʻe teʻeki ai pē ke ʻaonga moʻoni ia ki heʻeku moʻuí.
Ta fakatātaaʻi ʻe David Green
Ko e Mamata ki he Māmá
ʻI heʻeku kei tāutahá, naʻe fetaulaki hoku tokoua lahí mo ha kau faifekau. Naʻa nau taʻofi ia ke kole pe te ne lava ʻo liliu ha meʻa maʻanautolu ʻi he lea faka-Mongikōliá. Naʻa nau fepōtalanoaʻaki taimi siʻi, pea ʻi heʻene foki ki ʻapí, naʻá ne ʻiloʻi ko hai kinautolu.
Naʻá ne fie ʻalu ki he lotú ʻi he uike ko iá peá ne fakaafeʻi au ke ma ō.
Naʻá ku matuʻaki fakafepakiʻi ʻa e fakakaukaú ni ʻi he kamataʻangá. Ne u pehē ʻoku lelei pē ʻeku moʻuí taʻe kau ai ʻa e Siasí! Ka naʻá ne fakalotoʻi au ke ma ʻalu tuʻo taha pē.
ʻI heʻeku fuofua hū atu ki he houalotu sākalamēnití hili ia ha ngaahi taʻu lahí, naʻe ʻikai ke u fuʻu fiefia heʻeku ʻi aí. Ka neongo ia, ʻi heʻeku vakavakai holó, naʻá ku fakatokangaʻi ha ngaahi kaungāmeʻa ʻe niʻihi ne u tupu hake mo kinautolu. Naʻe hāsino mai ʻa e maama ne nau maʻú. ʻI heʻeku siofi kinautolú, naʻá ku manatu ki he fanga kiʻi aʻusia fakalaumālie naʻá ku ongoʻi ʻi heʻeku tupu haké.
Ne lahi fau ha ngaahi moʻoni ne u liʻaki ne kamata ke u toe manatu ki ai, pea fakafokifā pē kuó u ongoʻi liʻekina mo loto-mamahi. Naʻá ku fakakaukau, “ʻOku ʻikai ke u tatau au mo kinautolu. Ko e hā e ʻuhinga ne u liʻaki kotoa ai ʻení?”
Naʻá ku fakatokangaʻi kuó u hoko ko ha tokotaha kehe ʻi he ngaahi taʻu siʻi kuohilí. Naʻe ʻi ai ha faʻahinga fakapoʻuli ʻi heʻeku moʻuí naʻá ku tukunoaʻi. Ka ʻi heʻeku tangutu aí, ne u ongoʻi ha leʻo nonga ʻi hoku ʻatamaí naʻe hangē ʻokú ne pehē mai, “Te ke lava foki mo koe ʻo ulo atu. ʻOku ʻikai fuʻu tōmui.”
Naʻá ku fakakaukau ki he talanoa fakatātā ʻo e sipi heé. Ko e sipi ʻe taha naʻe fakafoki mai ʻe he Fakamoʻuí ki he tākangá (vakai, Luke 15:4–7).
Ko au ʻa e sipi ko iá. Pea naʻe muimui mai ʻa e Fakamoʻuí ʻiate au he naʻá Ne ʻofa ʻiate au ʻo hangē pē ko ʻEne fanga sipi kehé.
Naʻá Ne finangalo ke u foki ange.
Naʻe ʻomi ʻe he meʻá ni ha loto-houngaʻia lahi ki hoku Fakamoʻuí. ʻI heʻeku fuofua ongoʻi ʻa e Laumālié ʻi ha ngaahi taʻu lahí, naʻá ku fili ai ke u foki ki he Siasí, pea ʻi he taimi ko ʻení, ke fakahoko fakamātoato ia.
Naʻe fakamoʻoni ʻa ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá kimuí ni ʻo pehē, “Ko e momeniti te ke fili ai ke foki mo fononga ʻi he hala ʻo hotau Fakamoʻuí mo e Huhuʻí, te ke maʻu Hono mālohí ʻi hoʻo moʻuí pea liliu ai [vakai, ʻAlamā 34:31].”
Naʻá ku ongoʻi ʻa e moʻoni ko iá peá u ʻiloʻi kapau te u muimui fakamātoato ki he ongoongoleleí, ʻe liliu ʻeku moʻuí.
ʻOua ʻe Sio fakalaka ʻia Sīsū Kalaisi
ʻI he kamata ke u moʻui ʻaki ʻa e ongoongoleleí, naʻá ku toe maʻu ha taumuʻa ʻi heʻeku moʻuí. Naʻe faifai peá u tui ʻoku ʻofa ʻa e Tamai Hēvaní ʻi Heʻene fānaú takitaha pea ko e ongoongolelei ʻo Sīsū Kalaisí ʻa e kī ki he foki ki hotau ʻapi fakalangí.
ʻOku mahuʻinga fau ʻeni kiate au ʻi he taimí ni.
Naʻe akoʻi ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá:
“Te tau lava foki mo kitautolu ʻo fakahehema ke taʻefakatokangaʻi ʻa e ngaahi meʻa ʻoku mahuʻingá. ʻOku fiemaʻu ke tau tokanga ʻi he fakahehema ko ʻení telia naʻa mole ʻa Sīsū Kalaisi mei heʻetau moʻuí pea ʻikai ke tau fakatokangaʻi ʻa e ngaahi tāpuaki lahi ʻokú Ne foaki maí. ʻOku tau fiemaʻu Ia. …
“Ko Ia ʻetau taumuʻá. Kapau te tau fakakaukau hala ʻoku ʻi ai ha fiemaʻu ki ha meʻa mavahe mei he meʻa ʻokú Ne foakí, ʻoku tau fakaʻikaiʻi pe holoki ai ʻa e taumuʻa mo e mālohi ʻe lava ke Ne maʻu ʻi heʻetau moʻuí.”
Naʻá ku fakahehema ke taʻefakatokangaʻi ʻa e meʻa ʻoku foaki mai ʻe Sīsū Kalaisi maʻakú, pea ko ʻeni ʻoku ʻikai ke u lava ʻo fakakaukau atu ki haʻaku tukuange ʻa e fiefia ʻoku ou maʻu koeʻuhí ko Iá.
Kapau ʻokú ke ongoʻi ʻokú ke taʻetaau, kapau ʻokú ke fefaʻuhi mo ha ngaahi fehuʻi ʻoku ʻikai hano tali, pe kapau ʻokú ke pehē ʻoku fuʻu lahi e ngaahi fiemaʻu meiate koe ʻi hoʻo hoko ko e ākonga ʻa Kalaisí, vakai ofi ange ki he ngaahi mana ʻoku foaki mai ʻe hotau Fakamoʻuí. ʻOku ou ʻiloʻi ʻoku ʻafioʻi koe ʻe he Tamai Hēvaní. Te Ne tokoniʻi koe ke ke tuʻu maʻu ʻi hoʻo tuí ʻi hoʻo tafoki kiate Iá.
ʻOua naʻá ke tukuange ʻa e meʻaʻofa mo e mana maʻongoʻonga taha ʻa e Fakamoʻuí koeʻuhí ko ha meʻa ʻoku siʻi hifo hono mahuʻingá. ʻOkú ke mātuʻaki mahuʻinga kiate Ia.
Kuó u mātātonu ʻa hono fakakoloaʻi moʻoni ʻe he ongoongolelei ʻo Sīsū Kalaisí ʻa e moʻui ʻa kinautolu ʻoku muimui ʻiate Iá.
ʻOku kei hokohoko atu pē ʻene fakakoloaʻi ʻeku moʻuí.
ʻOku nofo ʻa e tokotaha naʻá ne faʻú ʻi ʻIulanipata, Mongokōlia.