Lako mai, Mo Muri Au
Ena rawa vakacava meu tagane dauveiqaravi vinaka cake?

Ena rawa vakacava meu dauveiqaravi vinaka cake?

Mo Vakarautaki Iko Vakayalo

Me vaka na veika kecega, sa noda ivakaraitaki uasivi duadua o Jisu Karisito. Ena gauna ni Nona veiqaravi, e yacovi ira yani na tamata yadua, sotava na nodra gagadre vakayago, vakayalo talega, ka vakaraitaka na loloma dina ki na tamata kece. Me vaka ni da daumuri Jisu Karisito ka taura tu Nona matabete, eda sa sureti meda veiqaravi me vakataki Koya, vakabibi vei ira eda sa kacivi meda veiqaravi vakaveitacini vei ira. Sa rawa ni da lomana, wanonova, ka vakaqaqacotaki ira na tamata yadua me vakataki Karisito. Sa nodra ilesilesi, vakatabakidua, na Matabete i Eroni me ra “veisureti ki na tamata kecega me ra lako mai vei Karisito” (Vunau kei na Veiyalayalati 20:59). Sa nodra ikuri ni itavi na matabete kei na qasenivuli sa ikoya me ra “dausikova na nodra vuvale na lewenilotu ka “dau vakatawai ira na lewe ni lotu ena na veigauna kece sara, dauvukei ira ka vakaukauwataki ira” (Vunau kei na Veiyalayalati 20:47, 53). Me vaka na cauravou ena Lotu, sa tiko nai tavi bibi me vakavotukanataki me “vakavuna na tawa mate rawa kei na bula tawamudu ni tamata” (Mosese 1:39).

Nai Vurevure me Vukei Iko mo Vakavakarau

Nai vurevure eso oqo e vukei iko mo vakavakarau ki na tabana ni “Vulica vata” ni soqoni.

Taro eso Mo Vakasamataka Vakatitobu ni Bera ni o Veivakavulici

Na cava o sa cakava mo vakamuria na ivakaraitaki ni Vakabula ni o veiqaravi vakatagane dauveiqaravi? Esa vakalougatataka vakacava na nomu bula na veiqaravi kei na nodra bula o ira o veiqaravi kina? Na cava o rawa ni wasea vei ira na cauravou me baleta na veika o sa sotava?

Na cava era vakila na cauravou me baleta na veiqaravi? Na cava na veika era sotava oti e rawa ni ra veiwasei kina vakaiira?

Na cava e rawa ni ra cakava na cauravou mera vuli kina? Me ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni oqo.

Me Kilai: Ena vakarautaki ni lesoni oqo, sa rawa mo kerei ira na lewe ni kuoramu ka ra veiqaravi mera sureti ira na nodra itokani dauveiqaravi mera tiko ena soqoni vakuoramu ka vakaitavi ena veivosaki mera yaco kina mera dauveiqaravi tagane vinaka cake.

Veivakavulici ena iVakarau ni iVakabula

Ena veigauna kece sara, a sa dauivakaraitaki ka daunivakasala totoka vakaoti vei ira e dauvakavulici ira na iVakabula. Era na vuli vakacava ena nomu ivakaraitaki na cauravou—vakakina na nodra ivakaraitaki na lewe ni Matabete i Melikiseteki tale eso ena nodra segata tiko mera vakayacora na nodra itavi vakadauveiqaravi tagane?

Na iDusidusi ni Soqoni

1. Veitalanoa ka Veiwasei taka na Veika e Sotavi

Ena liutaka e dua na lewe ni mataveiliutaki ni kuoramu; me rauta e 5–10 na miniti

Liutaka na veitalanoataki ni veitikina era koto oqo:

  • Noda kuoramu: Ocei e sega ni tiko nikua? Ocei soti e gadrevi meda veisiko kina? Ocei meda sureti ki na itaviqaravi e tarava? Ocei e gadreva na noda veivuke kei na veimasulaki?

  • Noda itavi: Na itavi cava e gadrevi meda cakava? Na itavi cava eda sa vakayacora? Eda sa veisureti vakacava vei ira na tani me ra lako mai vei Karisito, ka na rawa ni sureti ira vakacava ena gauna oqo?

  • Noda bula: Vakananuma ki na kuoramu na veitalanoa mai na soqoni sa oti. Na cava soti eda sa sotava ena noda vakayacora na veika era sa vulica? Na cava soti eda sa sotava ena veimacawa sa sivi ka sa vakaqaqacotaka na noda ivakadinadina ni kosipeli?

Kevaka e rawa, veitalanoataka na veika oqo ni se bera ni yaco na soqoni ni mataveiliutaki.

2. Vulica Vata

Ena liutaki mai vua e dua nai liuliu se qasenivuli se e dua na lewe ni kuoramu; me rauta e 25-35 na miniti

Ni sa vulici oti nai vurevure eso oqo e cake kei na vakamuri ni veivakauqeti ni Yalo, e rawa ni o digitaka e dua se sivia na itaviqaravi e ra me vukei ira na lewe ni kuoramu me ra kila vakavinaka cake na vunau.

  • Na cava nai balebale ni vosa na veiqaravi vei ira na cauravou o vakavulica tiko? Me kilai, sa rawa mo vola ena papa ni volavola na Veiqaravi ka sureta na lewe ni kalasi mera vola wavokita kina na veivosa e sema ki na veiqaravi. Sa rawa mera vakasaqara na vosa se malanivosa me ikuri ni veika era sa vola mai na ivolanikalou vakaoqo: Maciu 25:34–40; Luke 10:25–37; 2 Nifai 25:26; Mosaia 18:8–9; 3 Nifai 18:25; kei na Vunau kei na Veiyalayalati 81:5. Na cava era sa vulica mai na veitikina oqo me baleta na veiqaravi? E rawa ni o tarogi ira na cauravou me ra wasea na ivakaraitaki era sa raica me baleta na nodra veiqaravi ki vei ira na tani. Na cava era rawa ni cakava na cauravou me ra vukei ira na tamata me ra toro voleka vei Karisito?

  • Kerei ira na cauravou me ra veisa ka wilika na 3 Nifai 17, me ra vakasaqara na veika era vulica mai vua na iVakabula ka na rawa ni vukei ira me ra tagane dauveiqaravi. Sureta na veisa yadua me ra wasea na veika era kunea. Me ivakaraitaki, e veiqaravi “yadua” vei ira na iVakabula? Na cava soti na gagadre e qarava o Koya?

  • Wilika vata Vunau kei na Veiyalayalati 20:53, ka sureti ira na cauravou mera vola (se droinitaka) eso na sala e rawa kina vei ira na dauveqaravi mera “vakatawai ira na leweni lotu ena veigauna kece sara, dauvukei ira ka vakaukauwataki ira.” Na cava eso na sala era rawa ni veiqaravi kina vei ira na lewe ni Lotu o ira na cauravou? Navuca mo sureta na bisopi se peresitedi ni talatala qase me vosa ki na kuoramu me baleta na sala era rawa ni vakamuria kina na ivakaraitaki nei Karisito ena veiqaravi vei ira na lewe ni tabanalevu. Era rawa ni vakasamataka rawa na cauravou eso na taro mera taroga vei ira na iliuliu oqo me baleta na veiqaravi. Sureti ira na cauravou me ra tuva na ituvatuva me vakavinakataka na nodra sasaga me veiqaravi vei ira na lewe ni tabanalevu.

  • Taroga e dua vei ira na cauravou me wilika e dua na italanoa mai na itukutuku nei Elder Jeffrey R. Holland “Tiko Vata kei ira ka Vakaukauwataki Ira” se itukutuku mai vei Sister Jean B. Bingham “Veiqaravi me Vakataka na iVakabula.” Kerei ira na cauravou mera lako mai ki na mata ni kalasi, tukuna tale na italanoa ena nona vosa ga vakaikoya, ka wasea na ka e vakatavulica ka rawa me na dua kina na dauveiqaravi vinaka cake. Na cava tale e tarai ira na cauravou ena itukutuku oqo?

  • Wasea vakarua na kuoramu, ka kerea ruarua na ilawalawa me cakava e dua na ituvatuva ni veisala era na rawa ni vakavinakataka cake kina na nodra veiqaravi. Ni oti e vica na miniti, sureta e dua na ilawalawa me vakuria eso tale na vakasama ki na nodra ituvatuva mai na itukutuku nei Peresitedi Russell M. Nelson “Veiqaravi ena Kaukauwa kei na Lewa ni Kalou.” Sureta na ilawalawa kadua me tomana na nodra ituvatuva mai na itukutuku nei Peresitedi Henry B. Eyring “Veiqaravi Veivakauqeti.” Kerea na ilawalawa mera wasea na ka era sa vola, ka vakauqeti ira na cauravou yadudua mera digia e dua na ka mai na ituvatuva, me cakacaka.

  • Ena macawa ni bera na soqoni ni kuoramu, sureti ira na cauravou me ra lako ki na ministering.lds.org ka kunea e dua na ka e vakauqeti ira me veiucui Vakarisito vakalevu cake ena nodra veiqaravi ka vakavakarau mai me wasea na veika era sa kunea. Na cava soti era sa sotava ka rawa ni ra wasea na cauravou me baleta na kena sa vakalougatataki ira na tani na nodra veiqaravi?

3. Sureta mo Cakacaka

Ena liutaka e dua na lewe ni mataveiliutaki ni kuoramu; me rauta e 5–10 na miniti

  • Kerei ira na cauravou me ra veitalanoataka eso na ka era vakila se vakauqeti kina ena gauna ni soqoni. Na cava e vakaibalebale vei ira? E tiko beka eso na ka era rawa ni cakava yadudua se vakuoramu me ra bulataka na veika era sa vulica?

  • Solia vei ira na cauravou e vica na miniti me ra vola na veika era na cakava ena veimacawa ka tarava me ra cakacakataka na veivakauqeti ena yaco mai vei ira. Sureti ira me ra wasea na veika era nanuma.

  • Vakananuma vei ira na cauravou ni na soli vei ira na gauna me ra wasea na veika era sotava ni sa tekivu na soqoni.