iTavi Vua na Kalou

E rawa vakacava meu tiko e vuravura ka sega ni vakavuravura?

“Ena veika a dau veivolekati kina ena dua na gauna na ivakatagedegede ni Lotu kei na veivakatagedegede ena itikotiko, ena gauna oqo sa dua na maliwa levu e koto kina, ka sa rabailevu cake tiko ga” (Thomas S. Monson, “Kaukauwa ni Matabete,” Ensign se Liaona, Me 2011, 66). Na Turaga e vinakati keda meda dina tikoga ena Nona ivakatagedegede ka sega ni vakayagataka na ivalavala ca vakavuravura. Ena gauna vata talega, e namaki keda o Koya meda veivakayarayarataki vinaka kivei ira era vakavolivoliti keda.

Mo vakarautaki iko vakayalo

Na cava eso na ivakatagedegede e vuravura era sega ni salavata kei na ivakatagedegede ni Lotu? Na veivakalougatataki cava sa yaco mai vei iko ena nomu bulataka na ivakatagedegede ni Turaga? Ena vakayarayarataki ira vakacava era tiko wavoliti iko na nomu tudei tu ena nomu ivakatagedegede?

E tovolea vakacava o vuravura me vakayarayarataka na sala era raica kina na cauravou na itagede ni Turaga? Era na tomana rawa vakacava na cauravou mera tutaka na ivakatagedegede ni Turaga ena gauna sa torosobu mai kina na ivakatagedegede vakaitikotiko? Ena rawa vakacava mera veivakauqeti vinaka na cauravou vei ira era tiko voliti ira?

Vulica ena masumasu na veiivolanikalou kei na veiivurevure oqo. Na cava o vakila ni na vakaibalebale vakalevu duadua vei ira na cauravou o vakavulica?

“Bula Kilikili,”Qarava Vinaka na NoquiTavi Vua na Kalou (2010), dikoni, 16–17; ivakavuvuli,40–41; bete, 64–65

Nai Vakatekivu 39:1–20 (A valuta rawa o Josefa mai Ijipita na gagano nei wati Potifa)

2 Tui 6:14–17 (O ira na tamata i Ilaisa era kila ni sa sega ni tu taudua o koya)

Maciu 26:41; V&V 10:5 (Dou vakatawa ka masu me kakua ni dou veretaki rawa)

Joni 15:19; 1 Nifai 8:24–28 (O ira era muri Karisito e wasoma nodra vosa vakacacataki ka sevaki mai na vuravura)

1 Korinica 10:13 (Eda na sega ni vakatovolei mai na kena eda sega ni drotani rawa mai kina)

V&V 3:6–8 (Kevaka eda na vakararavi vua na Kalou ka kakua vua na tamata, ena tokoni keda o Koya mai na meca)

V&V 62:1 (Sa kila tu na Turaga na noda malumalumu kei na sala mena vukei keda kina mai na veitemaki)

V&V 87:8 (Tudei tu ena vanua tabu)

Neil L. Andersen, “Vakadrukai Vuravura,” Ensign se Liaona, Me 2017, 58–62

Mark A. Bragg, “Io ena Tubu Cake tiko ga na nona Rarama me Yacova na Siga Uasivi ko ya.,” Ensign se Liaona, Me 2017, 36–38

Dieter F. Uchtdorf, “Kakua ni Yalolailai, Vakadinata Ga,” Ensign se Liaona, Nove. 2015, 76–79; raica talega na vidio “God Gave Them Knowledge”

Thomas S. Monson, “Bolea Mo Tu Taudua,” Ensign se Liaona, Nov. 2011, 60–67

Vidio: “Bloom Where You’re Planted”; “Dare to Stand Alone”

Veivakavulici ena ivakarau ni iVakabula

A vakarautaki Koya na iVakabula me veivakavulici ena nona dau tiko duadua voli ena masumasu kei na lolo. Ena veisiga, ni Nona gauna vakataki koya, a vakasaqara na veidusimaki nei Tamana Vakalomalagi. Ni ko vakarau vakavulici ira na cauravou, mo na masumasu ka kerea na veidusimaki nei Tamada Vakalomalagi mo kila na sala mo vukei ira na cauravou mera kila vakavinaka na veivakalougatataki e dau yaco mai ni da bulataka na ivakatagedegede ni Turaga.

Raica mera veiliutaki na cauravou

Me liutaka na bose ni kuoramu e dua na lewe ni mataveiliutaki ni kuoramu (se ivukevuke vua na bisopi ena kuoramu ni bete). Ena liutaki ira na cauravou o koya ena veivakasalataki vakaiira me baleta na bisinisi ni kuoramu, vakatavulici ira ena nodra itavi vakamatabete (mai na ivolanikalou kei na ivola iTavi Vua na Kalou ), vakayaloqaqataki ira ni ra wasea na veika era sotakaya ena vakayacori ni itavi vua na Kalou, ka sureta e dua na daunivakasala se dua tale na lewe ni kuoramu me vakatavulica e dua na lesoni vakosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakanananu oqo se vakasamataka ga vakaiiko na nomu mo raicalesu kina na lesoni ni macawa sa oti ka vakatakila na lesoni ni macawa oqo:

Sureti ira yadua na cauravou mera vola ena dua na tiki ni pepa e dua na yatuvosa e ivakaleka ni ka sa vulica mai na lesoni ni macawa sa oti. Me vica na cauravou mera wilika e cake na nodra ivakaleka o ya.
Vakarautaka ki na kuoramu e dua na moli (se dua tale na vuata). Sureti ira mera cavuta mada e so na ivakatagedegede era tiko ena Me iSakisaki ni iTabagone. Ni ra sa cavuta mai, vola sara ena moli. Biuta sara na moli ki na dua na vokete wai lailai (ena ciri na moli). Taura tani mai na moli ka civita. Biuta tale ena vokete wai, ena dromu na moli. Sureti ira na cauravou mera wasea na veika era sa vulica kina me baleta na maroroi tiko ni ivakatagedegede ni Turaga. Wasea e dua na ivakaraitaki matata ni kena sa vakalougatataki na nomu bula ni ko maroroya e dua na ivakatagedegede.

Vulica vata

Na inaki ni lesoni oqo mena vukei ira yadua na cauravou me kila vakavinaka na sala ni sa rawa me tiko ena vuravura oqo ia me kakua ni vakavuravura ka na rawa ni vukei koya kina me bula kilikili kaya ena cakacaka ni matabete. Me tiki ni lesoni oqo, e dodonu mera tuva-ka na lewe ni kuoramu ena nodra ivola lailai iTavi Vua na Kalou mera vulica ka bulataka na ivakatagedegede e tiko ena Me iSakisaki ni iTabagone. Ni bera na soqoni ni kuoramu, sureti ira na cauravou mera kauta mai ki lotu na nodra ivola iTavi Vua na Kalou vata kei na dua na ilavelave ni Me iSakisaki ni iTabagone. Ena veisoqoni ni kuoramu mai muri, sureti ira mera mai wasea na veika era sa sotava tiko ena nodra qarava na nodra ituvatuva.

E dua na sala me da vukei ira na cauravou me ra kila na vaqara na rarama ena vuravura butobuto oqo, sai koya na kena kau mai e tolu na cinalivaliva ena gauna ni kalasi. Wasea vaka tolu na kalasi ka lesia na iwasewase yadua me ra wilika e dua na iwase ni vosa nei Elder Mark A. Bragg “Io ena Tubu Cake tiko ga na nona Rarama me Yacova na Siga Uasivi ko ya.” Ni oti nodra vulica na vosa oqo, bokoca na cina ka solia e dua na cinalivaliva kina tolu na iwasewase. Ena gauna era wasea kina na ka era vulica, era rawa ni waqaca na nodra cinalivaliva ka biuta ena lomadonu ni rumu. E vukei keda vakaca na rarama ni cina oqo ena butobuto ni vuravura?
Ena papanivolavola toqa kina oqo “Vakadruka na vuravura e … ” kei na “Vakadruka na vuravura ena rawata mai … ” Kerea vei ira na goneyalewa me ra vulica na vosa nei Elder Neil L. Andersen “Vakadruka na Vuravura” ka vaqara e vuqa na sala me vakaoti kina na veiyatu vosa oqo. Me veivosakitaki na veika era sa kunea. Sureta e dua na cauravou ni bera na gauna me vakarautaki koya mai me mai wasea na italanoa me baleti Elder Bruce D. Porter ena vosa nei Elder Andersen (se saravi Elder Andersen ena nona talanoataka na italanoa oqo ena vidio ena nona vosa). Na cava era na cakava beka o ira na tani ena dredre vata oqo? E vakadruka vakacava na vuravura o Elder Porter?
Ena loma ni macawa, sureti ira na cauravou mera wilika na 1–2 ni Taniela se sarava na vidio “God Gave Them Knowledge” ka vakavakarau mera mai wasea na sala a vakalougatataki Taniela kina na Kalou ni yalodina tikoga ena veivanua ca. Ena gauna ni kalasi, solia na gauna mera wasea na veika era sa vulica. Mera raicalesu vata vakakuoramu na wase “Eda sa Vakataki Taniela Beka?” mai na vosa nei Peresitedi Dieter F. Uchtdorf “Kakua ni Yalolailai, Vakadinata Ga.” Wasea vakailawalawa na kuoramu ka kerea na ilawalawa yadua mera vakatasuasuataka e dua na gauna era rawa ni yalodina tikoga me vakataki Taniela.
Sureti ira na cauravou me ra wilika na ivolanikalou e volai tu ena ituvatuva oqo (vakayadudua se me vakalasi) ka veivosakitaka se cava era vulica me baleta na vorati ni veitemaki. Era na bulataka vakacava na itagede ni Turaga ni temaki ira tiko o vuravura me ra cakava na kena veibasai se ni ra vosa ni veiwalitaki ena cecere ni nodra itagede? Na cava era vakila ena nodra bulataka na itagede ni Turaga ka vorata na veivakatovolei? Na veika cava soti e sotavi e rawa me ra wasea?
Sureti ira na cauravou mera vakasaqara ena lewe ni ivola ni Me iSakisaki ni iTabagone ka mera digitaka e dua se sivia na ivakatagedegede era gadreva mera na veivosakitaka. Sureti ira yadua na cauravou mera taura e vica na miniti mera vulica na ivakatagedegede era sa digitaka ka vakarau mera wasea na veika sa vulica. Kerei ira yadua na cauravou me dolava na nona ivola iTavi Vua na Kalou ka vola ena iwasewase “Cakava” na nona ituvatuva me bulataka na ivakatagedegede oqo (draunipepa 17, 41, se 65). Vakayaloqaqataki ira na cauravou ke gadrevi mera veiwaseitaka vakai ira na nodra ituvatuva. Sureti ira na cauravou mera vakarau tiko mai ena vica na macawa mai oqo mera wasea kina na kena sa vukei ira na nodra vakamuria na nodra ituvatuva ni ra “sa tiko e vuravura ia sa sega ni vakavuravura” (raica na Joni 15:19).
Mo ni wilika vata vakakuoramu, naVunau kei na Veiyalayalati 87:8ka tarogi ira na cauravou na cava na ibalebale ni tu ena veivanua tabu. Sureti ira me ra vakasamataka vakatitobu na taro oqo sarava e dua na vidio ka vakarautaki ena ituvatuva oqo. Na ikuri ni veivakararamataki cava era sa rawata mai na nodra tu ena veivanua tabu? Kerei ira na cauravou na cava era sa rawa mera cakava ena nodra matavuvale, nodra koronivuli, se na nodra itikotiko raraba me vanua tabu vakalevu cake.

Kerei ira na cauravou mera wasea na veika era sa vulica nikua. Era sa kila vinaka beka na vuna, vaka-lewe ni matabete, mera kakua ni vakavuravura ni ra sa tiko e na vuravura oqo? Na cava era sa bau vakila se vakanananu kina? E tiko tale beka eso na nodra vakatataro? Ena yaga dina beka me tauri vakalevu na gauna ena ivunau oqo?

Veisureti me caka

Me na tinia na soqoni na cauravou ka veiliutaki tiko. Sa rawa vua me:

Wasea na nona ivakadinadina me baleta na bibi ni kena bulataki na ivakatagedegede ni Turaga.
Vakadeitaki ira na cauravou mera vakayacora na nodra ituvatuva era sa cakava ena iwasewase “Bula Kilikili” ena ivola iTavi Vua na Kalou.