iTavi Vua na Kalou

Meu kila vakacava na Tamaqu Vakalomalagi?

E lomani keda na Tamada Vakalomalagi ka gadreva meda toro voleka yani Vua. Sa solia tu o Koya vei keda na madigi me da masu Vua ka sa yalataka me rogoca ka sauma na noda masu. Eda na rawa ni kilai Koya talega ena noda vulica na ivolanikalou kei na nodra vosa na parofita edaidai ni da sasagataka tiko meda vakataki Koya vakalevu cake ena noda vakamuria na Nona lewa.

Mo vakarautaki iko vakayalo

Vakasamataka na nomu veimaliwai vata tiko kei Tamamu mai Lomalagi Na gauna cava beka o a vakila ni o sa voleka sara Vua? Na cava beka o a cakava tiko ka yaco kina mo vakila ni o sa voleka sara Vua?

Na veika cava beka e rawa ni ra cakava na cauravou mera toro voleka kina vua na Kalou? E ra sa vakayacora vinaka tiko beka vakacava na veika oqo? Na cava o rawa ni cakava mo vukei ira kina ena nodra vakatorocaketaka na nodra vakabauta kei na nodra vakadinadinataka na Kalou?

Ni ko vulica na ivolanikalou kei na ivurevure tale eso me baleta na nomu kila na Tamada Vakalomalagi, mo raica na veika ena vukei ira na cauravou mera vakila ni lomani ira tiko na Tamadra Vakalomalagi ka vinakata mera toro voleka yani Vua.

Joni 17:3 (Na noda kila na Tamada Vakalomalagi kei Jisu Karisito e veimuataki ki na bula tawamudu)

1 Joni 2:3–5 (Eda kila na Kalou kevaka eda maroroya na Nona ivakaro)

1 Joni 4:7–8 (Ena vukea meda kila na Kalou na noda lomani ira na tamata)

2 Nifai 32:9; Inosi 1:1–7; Alama 34:17–28; 37:37 (Na masu ena rawa ni vukei keda meda toro voleka vua na Tamada Vakalomalagi)

Mosaia 4:9–12 (E vakamacalataka o Tui Penijamini na sala meda tubucake kina ena noda kila na Kalou)

Mosaia 5:13 (Ena vukea na noda kila vakavinaka na Kalou na noda qaravi Koya)

Alama 30:44 (Sa vakadinadinataka na veika kecega ni bula tiko e dua na Kalou)

V&V 88:63 (Kevaka eda na toro voleka yani vua na Kalou, ena toro voleka mai o Koya)

M. Russell Ballard, “Na Veitamani: E Dua na iSema Vakasakiti,” Ensign se Liaona, Nove. 2009, 47–50

Vakayacora Noqu iTavi Vua na Kalou (2010), 14–15, 38–39, 62–63

Vidio: “ Fulfilling Your Duty to God ”

4:56

Veivakavulici ena ivakarau ni iVakabula

E lomani ira na Nona tisaipeli na iVakabula ka dau masulaki ira ka qaravi ira tikoga. E vakaraica na madigi me tiko kina vata kei ira ka vakaraitaka na Nona lomani ira. E kila na veika era taleitaka, inuinui, kei na gagadre kei na veika e yaco tiko ena nodra bula. Vakaraica na sala eso mo vakaraitaka kina na nomu lomani ira na cauravou ka vukea mera vakila ka kila ni sa lomani ira talega vakalevu vakakina na Tamadra Vakalomalagi.

Raica mera veiliutaki na cauravou

Ena veiliutaki ena soqoni ni kuoramu e dua na lewe ni mataveiliutaki ni kuoramu. Ena liutaki ira na cauravou mera veivosakitaka vata na veika me baleta na cakacaka ni kuoramu, vakavulica vei ira na nodra ilesilesi ni matabete (mai na ivolanikalou vata kei na ivola iTavi Vua na Kalou), ka sureta e dua na daunivakasala se dua tale na lewe ni kuoramu me vakavulica e dua na lesoni ni kosipeli. Ena rawa me vakavakarau o koya ena nona vola e dua na ituvatuva ni soqoni ni kuoramu ena gauna ni bose ni mataveiliutaki.

Tekivuna na gauna ni vuli-ka

Digidigi mai na veivakasama oqo se vakasamataka ga na nomu vakai iko mo raicalesu kina na lesoni ni macawa sa oti ka mo vakaraitaka kina na lesoni ni macawa oqo:

Kerei ira yadua na cauravou mera tukuna mai e dua na vosa me tekivutaki kina e dua na iyatuvosa me ivakaleka ni lesoni ni macawa sa oti. Vola na nodra yatuvosa ena papa ni volavola.
Ena veivakadonui nei bisopi, sureta e dua na tama ni dua na lewe ni kuoramu me mai wasea na nona nanuma me baleta na nona itutu vaka-tama. Sa rawa vua me tukuna na nona nanuma baleti luvena tagane, na veika e nuitaka tiko me na rawata rawa o luvena ena bula oqo, kei na sala e nuitaka me na vukei koya me rawata rawa kina. Kerei koya na cauravou me veidutaitaka vata na veika sa tukuna na tama oqo kei na veika e nanuma o Tamadra Vakalomalagi me baleti ira.

Vulica vata

Na inaki ni lesoni oqo me vukei ira na cauravou yadudua mera tauyavutaka e dua na ivakarau tudei ni masu kei na vulici ni ivolanikalou. Solia na gauna vei ira na cauravou ena gauna ni soqoni ni kuoramu mera vola na ituvatuva eso ena nodra iTavi Vua na Kalou. Vakauqeti ira mera veiwaseitaka vakai ira na nodra ituvatuva oqo, kei na veisoqoni ni kuoramu e tarava, sureti ira mera wasea se a vaqaqacotaka vakacava na nodra veimaliwai kei na Kalou na nodra masu yadudua kei na vulica na ivolanikalou.

Me vaka ni sa tiki ni nodra ituvatuva ni iTavi Vua na Kalou, era sa rairai tuvanaka na cauravou na inaki mera vulica vakaiira yadudua na ivolanikalou. Na lesoni oqo sa rairai gauna vinaka mera wasea kina na cauravou na veika era sa cakava tiko me baleta na nodra ituvatuva kei na veika era sa vulica tiko mai na nodra vulica na ivolanikalou (raica na iTavi Vua na Kalou,14–15, 38–39, ). Sa rawa mera raicalesu talega na nodra ituvatuva ke gadrevi vakakina. Kerei ira na cauravou mera wasea na veivuke cava ni nodra ivakarau tudei ni masu kei na vulici ni ivolanikalou sa vakatorocaketaka na nodra veimaliwai kei na Tamadra Vakalomalagi.
Sureti ira na cauravou mera vakasamataka e dua era kila vakavinaka. Na cava era a cakava mera kilai koya kina na tamata o ya? Taroga na cava era nanuma baleta na duidui ni nodra kila na Tamada Vakalomalagi kei na kila na veika me baleti Koya. Vola na veitiki ni ivolanikalou oqo ena vava ni volavola, ka kerei ira na cauravou mera vakasaqara ka raica na sala eda na rawa ni kilai koya vakavinaka cake kina na Tamada Vakalomalagi: 1 Joni 2:3–5; 4:7–8; Mosaia 4:9–12; 5:13; Alama 30:44. Sureti ira na cauravou mera wasea na veika era sa vulica kei na sala era sa vakila ni ra sa toro voleka yani kina vua na Tamada Vakalomalagi ena nodra muria na ivakasala era tiko ena veivolanikalou oqo.
Vakaraitaka na vidio “Fulfilling Your Duty to God,” ka mera vakaraica na cauravou na ivakaraitaki era tiko ena vidio ena nodra vukei na cauravou kei na so tale mera kila vakavinaka cake na Tamada Vakalomalagi. Kerei ira na cauravou mera wasea na nodra nanuma ena sala a vukei ira kina na nodra itavi vua na Kalou me vaqaqacotaka na nodra veimaliwai vata kei Koya.

4:56
Sureti ira na cauravou mera wilika e tolu na vakatutu nei Elder M. Russell Ballard baleti ira na cauravou ena nona vosa “Na Veitamani: E Dua na iSema Vakasakiti” (se vakaraitaka na vidio “ Fathers and Sons”). Ni sa caka e dua na ka oqo e sa vukei ira mera voleka sara yani vei tamadra? Kerei ira mera wasea na sala eso mera taurivaka kina na ivakasala nei Elder Ballard me baleta na nodra veimaliwai kei Tamadra Vakalomalagi.

5:42
Me veivosakitaki na sala era veitaratara tiko kina nikua na cauravou kei ira tale eso. Eda veitaratara tiko beka vakacava kei na Tamada Vakalomalagi? E veitaratara tiko beka mai vakacava o Koya vei keda? Na cava e rawa ni da cakava me vakatorocaketaki kina na noda veitaratara kei Koya? Sureti ira yadudua na cauravou mera wilika e dua vei ira na ivolanikalou oqo me baleta na masu: 2 Nifai 32:9; Inosi 1:1–7; Alama 34:17–28; 37:37. Kerei ira na lewe ni kuoramu mera wasea na veika era sa vulica. Na isema cava e tiko maliwana na masu kei na nomu sa mai kila na Tamada Vakalomalagi? Sureti ira na cauravou mera cega na nodra ivola iTavi Vua na Kalou ki na draunipepa 15 (dikoni), 39 (ivakavuvuli) se 63 (bete) ka tuvanaka na veika me vakatorocaketaka na nodra masu ena veisiga.

Kerei ira na cauravou mera wasea na veika era sa vulica nikua. Na cava era sa bau vakila se nanuma? Era kila vakavinaka beka na sala mera kila kina na Tamada Vakalomalagi? E tiko beka e so tale na nodra vakatataro? Ena yaga dina beka me tauri vakalevu na gauna ena ulutaga oqo?

Me veivuke ena veivakavulici

Na nodra vakauqeti na cauravou mera tauyavutaka e dua na ivakarau tudei ni masu kei na vulici ni ivolanikalou sa na rawa ni sala veivuke maucokona me vaqaqacotaka na nodra veimaliwai kei Tamada Vakalomalagi.

Veisureti mera bulataka

Ena qai tinia na soqoni o lewe ni mataveiliutaki ni kuoramu e veiliutaki tiko. Sa rawa vua me:

Wasea na nona ituvatuva me vakatorocaketaka kina na nona masu vakai koya.
Vakauqeti ira na cauravou mera vakataucokotaka na nodra ituvatuva era sa vakayacora nikua ka vakarautaki ira mera na wasea ena veisoqoni ni kuoramu e tarava na kena sa mai vakatorocaketaka na nodra veimaliwai kei na Tamada Vakalomalagi.