Fokotuʻutuʻu ki he Akó

ʻOku fakatefito e fokotuʻutuʻu takitaha ki he akó ʻi ha ngaahi fehuʻi ʻoku ala fai ʻe he toʻu tupú pea mo ha tokāteline ʻe ala tokoni ke nau maʻu ai e ngaahi tali ki he ngaahi fehuʻi ko iá. ʻOku ʻikai fakataumuʻa e ngaahi fokotuʻutuʻu ia ki he akó ke tuhuʻi pau atu ai e meʻa ke ke lea ʻaki mo fai ʻi hoʻo faiakó. ʻOku fakataumuʻa ia ke tokoni atu ki hoʻo ako ʻa e tokāteliné pea mo teuteu ai ke fehangahangaimo e toʻu tupú ʻi ha founga ako ʻoku ongo ki he lotó. Fulihi e ngaahi aʻusia ko ʻení ke feʻunga mo e meʻa ʻoku nau mahuʻingaʻia aí pea mo ʻenau ngaahi fie maʻú. Fakakaukauʻi ha ngaahi founga ʻe lava ke ke ueʻi fakalaumālie ai kinautolu ke nau fekumi, ʻilo ʻiate kinautolu pē mo nau vahevahe mai e ngaahi tali ki heʻenau ngaahi fehuʻi fekauʻaki mo e ongoongoleleí.

ʻOku ʻoatu e fokotuʻutuʻu takitaha mo ha ngaahi potufolofola fekauʻaki mo ha ngaahi fehokotaki ki ha ngaahi akonaki ne toki fai kimuí ni ʻe he kau palōfita moʻuí mo e kau taki kehe ʻo e Siasí, tautautefito ki he ngaahi lea ne toki fai ʻi he konifelenisi lahí pea mo e fakataha lahi ʻa e Kau Finemuí. ʻOku toutou ʻoatu pē ʻa e ngaahi akonaki fakamuimuitahá hili pē hono fakahoko iá, ke lava ʻo tokoni atu ke ako mo moʻui ʻaki ʻe he toʻu tupú e naʻinaʻi ʻa e kau palōfita moʻuí. Toutou vakai ki he ngaahi fokotuʻutuʻu ko ʻení ke maʻu mei ai e ngaahi akonaki fakamuimuitaha ʻa e kau taki ʻo e Siasí.