E mafai faapefea e le Faaola ona fesoasoani ia te au i taimi o ou tofotofoga?

I le avea ai o se vaega o Lana taulaga togiola, na aveina ai e le Faaola i ona lava luga o tatou tiga ma mai. Talu ai ona ua Ia oo i o tatou tofotofoga, ua ia silafia ai le auala e fesoasoani ai ia i tatou. Pe a tatou faaalia le faatuatua ia Iesu Keriso, o le a Ia tuuina mai ia i tatou le malosiaga ma faamāmā a tatou avega.

Saunia oe lava ia faaleagaga

Mafaufau i tofotofoga na feagai ma oe. Na faapefea ona e mauaina le malosiaga e ala i le Togiola?

Mafaufau i tamaitai talavou o lau vasega. O a tofotofoga o feagai ma i latou? O a aafiaga patino, mau, ma upusii e te manao e faasoa atu ia i latou? O i ai ni aafiaga patino atonu e mafai e tamaitai talavou ona fefaasoaai e le tasi ma le isi?

A o e sauniuni, suesue ma le agaga tatalo punaoa nei ma isi, ia na fesoasoani ia te oe e liliu atu i le Faaola i taimi na manaomia ai.

Mataio 11:28–30; Filipi 4:13; 1 Nifae 17:3; Helamana 5:12; MF&F 19:23; 68:6(E mafai e Iesu Keriso ona tuu mai ia i tatou le malosiaga, ma faamāmā a tatou avega)

Mosaea 23:21–22; 24:8–17 (Na faamalosia e le Alii tagata o le nuu o Alema ina ia fesoasoani ia i latou e tauaveina a latou avega)

Isaia 53:3–5; Alema 7:11–13 (E malamalama Iesu Keriso i o tatou mafatiaga, aua ua uma ona oo i ai o Ia)

Ulisses Soares, “Tau Atu i le Atua ma le Lemafaagaeetia,” Ensign po o le Liahona, Me 2017, 33–35

Russell M. Nelson, “Olioli ma le Ola ai Faaleagaga,” Ensign po o le Liahona, Nov. 2016, 81–84

W. Christopher Waddell, “O Se Mamanu mo le Filemu,” Ensign po o le Liahona, Me 2016, 90–92

Dallin H. Oaks, “Faamalosia e ala i le Togiola,” Ensign po o le Liahona, Nov. 2015, 61–64

“Puapuaga,” Faamaoni i le Faatuatua (2004), 142–45

Vitio: “O Le A Siitia e le Atua i Tatou i Luga,” “O Mauga e Ae’a”

4:58

5:0

Aoao atu i le ala a le Faaola

Na faaaoga e le Faaola tusitusiga paia e aoao ma molimau atu ai e uiga i Lana misiona. O lenei lesona o loo i ai le tele o mau sili ona mamana e aoao atu ai le ala o le a faamalosia ai e le Faaola i tatou i taimi o tofotofoga. A o suesue ma talanoaina e tamaitai talavou nei mau, o le a molimau atu le Agaga Paia i le moni.

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Valaaulia tamaitai talavou e faitau le vaega ua faaulutalaina “Faalagolago i le Tama Faalelagi ma Iesu Keriso” i itulau 10–11 o le Faamaoni i le Faatuatua. O a mea ua latou aoaoina e uiga i le auala e mafai ai e Iesu Keriso ona fesoasoani ia i latou i o latou tofotofoga?
Tuu atu i tamaitai talavou taitasi se fasi pepa laitiiti, ma fai atu i ai e tusi i lalo se tofotofoga o feagai ma ia i le taimi nei. Fai atu i tamaitai talavou e mafaufau loloto i le ala e mafai ai e Iesu Keriso ona faamalosia i latou, a o feagai ma lenei tofotofoga. Valaaulia i latou e fefaasoaai o latou manatu ma lagona, pe a latou lagonaina le agaga e fai ai.

Aoao faatasi

O gaoioiga taitasi o loo i lalo, e mafai ona fesoasoani i tamaitai talavou e malamalama ai i le ala e mafai ona fesoasoani ai le Togiola ia i latou i taimi o tofotofoga. I le mulimuli ai i le taitaiga a le Agaga, filifili se tasi po o le sili atu o le a sili ona lelei mo lau vasega.

Valaaulia ia tamaitai talavou e faitau pe matamata i le tala a Elder Ulisses Soares e uiga i se faifeautalai na maliu lona tuafafine, o loo maua i le lauga “Tau Atu i le Atua ma le Lemafaagaeetia.” Na faapefea ona fesoasoani le malamalama i le Togiola a Iesu Keriso ma le ata o le faaolataga i le faifeautalai i le taimi o lona tofotofoga? O a nisi malamalamaaga na maua e tamaitai talavou mai le saunoaga a Elder Soares? Fai atu ia i latou e mafaufau e uiga i se tofotofoga o loo latou aafia ai i le taimi nei. E mafai faapefea ona latou maua le malosi mai le Faaola e fesoasoani ai ia i latou?
Valaaulia tamaitai talavou e suesue i vaega o le saunoaga a Peresitene Russell M. Nelson “Olioli ma le Ola ai Faaleagaga,” aemaise lava le aafiaga a Eliza R. Snow. O a ni aafiaga e mananao tamaitai talavou e faasoa atu ina ua latou mauaina le olioli i tulaga faigata? Ina ia fesoasoani i tamaitai talavou e mafaufau i mea e aumaia ia i latou le olioli, vavae le vasega i ni vaega se lua. Tuu atu i vaega taitasi se taimi tapulaa, ma luiina i latou e tusi ni mea se tele latou te mafaia e aumaia ia i latou le olioli. A maea ona latou faia, valaaulia i latou e suesue i le saunoaga a Peresitene Nelson mo ni mea e faaopoopo i lo latou lisi. O a ni mea e mafai ona latou faia e manatua ai ni mea na aumaia ia i latou le olioli i taimi o faigata?
Vaevae tamaitai talavou i vaega. Fai atu i vaega taitasi e faitau se mau po o le sili atu foi mai lenei otootoga, ma otooto mea na latou faitauina. Valaaulia tamaitai talavou e tusi i lalo, pe faapefea ona fesoasoani ia i latou mea ua aoaoina mai nei mau, e manumalo ai i o latou tofotofoga. Uunai i latou e faasoa mai mea na latou tusia, pe a latou lagonaina le agaga e fai ai. Mafaufau e faasoa atu ou lava aafiaga.
I le avea ai o se vasega, faitau le Mosaea 24:8–17. Valaaulia tamaitai talavou e faasoa mai mea ua latou aoaoina mai le aafiaga o Alema ma lona nuu. Faatasi ma le faatagaga mai i le epikopo, valaaulia nisi o o latou tina e o mai i le vasega, ma faasoa mai auala na faamalosia ai e le Faaola i latou i taimi o tofotofoga.
Faaali le ata vitio “O Le a Siitia e le Atua i Tatou i Luga.” Faamata e faapefea ona taliina e tamaitai talavou le fesili na tuuina mai e Elder Robert D. Hales, i le amataga o le ata vitio? O le a le mea na faia e Brittany, e maua ai le malosiaga e manumalo ai i lona tofotofoga? Valaaulia tamaitai talavou e mafaufau loloto ma tusi i lalo auala e mafai ona latou mulimuli ai i le faataitaiga a Brittany, a o feagai ma o latou lava tofotofoga.

4:58
Valaaulia tamaitai talavou e lisi nisi o mala ma faigata e feagai ma tagata. Iloilo o se vasega a le o le saunoaga a Elder Dallin H. Oaks “Faamalosia e ala i le Togiola a Iesu Keriso” po o le saunoaga a Bishop W. Christopher Waddell “O Se Mamanu mo le Filemu,” ma vaavaai mo ni manatu e uiga i le auala e mafai ai e le Faaola ona fesoasoani ia i tatou i taimi o faigata. Tuu atu i tamaitai talavou e faatino se tala o le fesoasoani i se uo o loo feagai ma ni faigata na latou lisiina i lalo. Valaaulia i latou e faasoa mai ni manatu mai le tala a o latou faatinoina le tala. E mafai foi ona e faaalia le vitio “O Mauga e Ae’a” ma valaaulia i latou e faasoa mai o latou malamalamaaga.

5:0

Fai atu i tamaitai talavou e faasoa mai mea na latou aoaoina i le asō. Ua latou malamalama ea i le ala e mafai ai ona fesoasoani le Togiola ia i latou i taimi o tofotofoga? O a lagona po o uunaiga ua latou mauaina? E i ai nisi a latou fesili? Faamata e taua le toe faaalu o se isi taimi i lenei mataupu?

Ola i mea o tatou aoaoina

Tuu atu se taimi i tamaitai talavou e tusi ai i lalo mea e mafai ona latou faia e faatino ai le faatuatua sili atu ia Iesu Keriso, ina ia maua ai le malosiaga i taimi o o latou tofotofoga. Valaaulia i latou e faasoa mai o latou aafiaga i le vasega e sosoo ai.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.