O le a se mea e mafai ona ou faia e fesoasoani ai i tagata fou o le Ekalesia?

Mo le toatele o tagata, o le avea ma se tagata o le Ekalesia e mafai ona luitauina. Atonu e aofia ai le tuuesea o faigauo ua leva ma le tau faamasani i se olaga e fou. O tagata fou taitoatasi o le Ekalesia e manaomia le faaaumeaina, se tiutetauave, ma le faafaileleina i “afioga lelei a le Atua” (Moronae 6:4). E mafai ona tatou fesoasoani i tagata fou e ala i le faaaumeaina o i latou, auauna faatasi ma i latou, ma faasoa atu ia i latou a tatou molimau.

Saunia oe lava ia faaleagaga

O le a se mea ua e faia e fesoasoani ai e faamalosia tagata fou? O a mea na fai e isi e fesoasoani ai ia te oe ina ua uma ona e papatiso?

Pe o i ai ni tamaitai talavou i lau vasega o ni tagata fou? Pe na faapefea ona latou faamasani i le avea ma tagata o le Ekalesia? Pe na faapefea ona fesoasoani isi tamaitai talavou ia i latou?

O a mau ma isi punaoa o le a uunaia tamaitai talavou e faamalosia tagata fou o le Ekalesia?

Luka 22:32; Roma 15:1–2; Moronae 6:4–5; MF&F 81:5; 108:7 (Faamalosia le Au Paia)

Ioane 21:15–17 (Fafaga au mamoe)

Neill F. Marriott, “Se A Se Mea Tatou Te Faia?” Ensign po o le Liahona, Me 2016, 10–12

Neil L. Andersen, “Ai Se Talia i Latou ua Talia Au,” Ensign po o le Liahona, Me 2016, 49–52

Dieter F. Uchtdorf, “O Outou o O’u Lima,” Ensign po o le Liahona, Me 2010, 68–75.

Vitio: Galuega Faafaifeautalai ma le Faatumauina: Georgia Elias “Fesoasoani i Tagata Fou e Ave se Igoa i le Malumalu”

4:46

1:46

Aoao atu i le ala a le Faaola

A o aoao atu e le Faaola Ona soo, na Ia tali atu i a latou fesili ma faalogo i o latou aafiaga. Sa Ia matua naunau moni atu lava i a latou tali i Ana fesili, ma na Ia olioli i lo latou faaleoina o le faatuatua. O le a se mea e mafai ona e faia e faaalia ai le alofa ma le naunau atu mo tamaitai talavou i lau vasega?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Faitau pe faasoa atu le tala i le amataga o le lauga a Peresitene Dieter F. Uctdorf “O Outou o O’u Lima.” Fai i tamaitai talavou e faasoa mai o latou manatu i le ala e mafai ona avea ai i latou ma aao o le Faaola mo isi. Faasoa i tamaitai talavou le palakalafa i le amataga o lenei otootoga, ma fesili i tamaitai talavou po o le a le mea e mafai ona latou faia e avea ai ma aao o le Faaola mo tagata fou o le Ekalesia.
Valaaulia tamaitai talavou e faamatala mai ni lagona e oo mai ma aafiaga fou, e pei o le aso muamua o se vasega, auai atu i se kalapu po o se au, po o le amataina o se galuega fou. Fai atu ia i latou e talanoaina pe faapefea ona ono tutusa nei lagona ma lagona e oo i tagata fou o le Ekalesia. Valaaulia i latou e faasoa mai ni aafiaga faapena na latou oo i ai, a le o le avea ai o i latou lava ma ni tagata fou po o le faatasi foi ma isi tagata fou.

Aoao faatasi

O gaoioiga taitasi nei e mafai ona fesoasoani i tamaitai talavou e aoao le ala e faamalosia ai tagata fou o le Ekalesia. I le mulimuli ai i le taitaiga a le Agaga, filifili se tasi po o le sili atu o le a sili ona aoga i lau vasega:

Valaaulia tamaitai talavou e vaai faalemafaufau pe mafaufau e uiga i se tagata o le Ekalesia e aapa atu i tagata fou liliu mai, atonu e o mai mai i tulaga eseese nai lo le tagata. E mafai e tamaitai talavou ona faia se lisi i luga o le laupapa o mea e mafai ona fai e lenei tagata o le Ekalesia pe le faia ina ia lagona e tagata fou liliu mai le toafimalie. Sa tau atu e Elder Neil L. Andersen ni nai tala i le “Ai Se Talia i Latou ua Talia Au” e uiga i tagata o e aapa atu i tagata fou, ma sa faamatala e Sister Neill F. Marriott i le “Se A Se Mea Tatou te Faia?” e uiga i le toafimalie sa ia mauaina i le avea ai ma se tagata fou liliu mai mai le tinamatua fai a lona toalua. O le a le mea e mafai e tamaitai talavou ona aoao mai i nei tala e mafai ona latou faaopoopo i a latou lisi?
Faaali atu se ata o le Faaola o loo siiina se tamai mamoe (tagai Tusi Ata o le Talalelei, 64). Tusi i le laupapa upu “Fafaga au mamoe.” Fesili i tamaitai talavou po o a ni mea ua latou iloa e uiga i lenei fuaitau. Valaaulia i latou e faalogo mo nisi manatu faaopoopo a o e faitau atu i le vasega Ioane 21:15–17. O ai mamoe “mamoe” ma “tamai mamoe” i lenei fuaitau? O faapefea ona pei tagata fou o le Ekalesia o ni tamai mamoe? O le a le uiga o le fafaga tamai mamoe a le Faaola? Valaaulia tamaitai talavou e faasoa mai aafiaga na latou maua i le faamalolosia o tagata fou. O a mea faapitoa e mafai ona latou faia e fesoasoani ai i tagata fou i le lumanai?
Valaaulia tamaitai talavou e matamata i le vitio “Galuega Faafaifeautalai ma le Faatumauina: Georgia Elias” ma vaai mo mea na fai e le uarota fou a Georgia na fesoasoani ai ia te ia ia tumau le malosi i le talalelei ina ua uma lona papatisoga. O le a se isi mea ua latou aoao mai le aafiaga a Georgia e mafai ona fesoasoani ia i latou e faamalolosia ai tagata fou? Valaaulia tamaitai talavou e mafaufau i tagata fou i la latou uarota. O a ni a latou fesili o i ai? E mafai faapefea e tamaitai talavou ona fesoasoani ia i latou? I le avea ai ma se vaega o lenei talanoaga, atonu e te manao e faaali ma talanoaina le vitio “ Fesoasoani i Tagata Fou e Ave se Igoa i le Malumalu.”

4:46

1:46
Tusi i le laupapa mau fesootai (e pei o na o loo lisiina i lenei otootoga) e uiga i a tatou tiutetauave e faamalolosia le Au Paia. Fai atu i tamaitai talavou taitasi e faitau se tasi o mau fesootai, ma mafaufau pe faapefea ona faatatau i tagata fou o le Ekalesia. Fai atu ia te ia e tusi i le laupapa se aotelega puupuu o lana fuaitau ma faasoa mai se faataitaiga o le mataupu faavae o loo aoao mai ai. Fesili i tamaitai talavou pe aisea e taua ai le faamalolosia o tagata fou o le Ekalesia.
Fesoasoani i tamaitai talavou e mafaufau i fesili latou te mananao e fai atu i se tasi faatoa auai talu ai nei i le Ekalesia. Faatasi ai ma le faatagaga mai le epikopo, valaaulia se tagata liliu mai se tasi pe lua i le vasega. Fai atu ia i latou e faasoa mai tala o lo latou liua ma a latou aafiaga o ni tagata fou o le Ekalesia. Valaaulia tamaitai talavou e fai atu a latou fesili ma talanoaina pe faapefea ona latou fesoasoani i tagata fou i le liliu mai i le Ekalesia.
Valaaulia tamaitai talavou e faitau le “Uo” i le Mo Le Malosi o le Autalavou ma vaai mo tali i le fesili “O le a le uiga o le avea ma uo moni?” Fai atu ia i latou e faasoa mai mea ua latou maua ma faasoa mai se aafiaga na avea ai se tasi ma se uo moni ia i latou. Aisea e matuai taua ai mo i tatou le avea ma uo lelei i tagata fou o le Ekalesia? Valaaulia tamaitai talavou e fai se lisi o tagata fou latou te iloa ma talanoaina pe faapefea ona latou faaaoga le fautuaga i le Mo Le Malosi o le Autalavou e faaaumea ai i latou.

Fai i tamaitai talavou e faasoa mai mea sa latou aoaoina i le aso. Pe ua latou malamalama pe faapefea ona faamalolosia tagata fou o le Ekalesia? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Valaaulia se tagata fou e sau i se gaoioiga a le Mutuale po o se isi gaoioiga a le uarota.
Faasoa atu a latou molimau i se tagata fou.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.