E mafai faapefea ona ou saunia e faatulaga se aiga e totonugalemu ia Keriso?

O le fausiaina o le malo o le Atua e amata i le fausiaina o se aiga ma se auaiga amiotonu. O le aiga o le iunite sili lea ona taua o le Ekalesia. I le avea ai ma tagata o le Ekalesia, e tatau ona tatou faatuina se aiga e maua ai le Agaga. O se aiga e totonugalemu ia Keriso e ofoina mai ia i tatou se nofoaga o le puipuiga mai le agasala, sulufaiga mai le lalolagi, ma le alofa atoatoa, ma mama. Pe tele pe laitiiti o tatou fale, e mafai ona avea ma se “fale tatalo lea, o se fale o le anapogi, o se fale o le faatuatua, o se fale o le aoaoga, o se fale o le mamalu, o se fale maopoopo, o se fale o le Atua” (MF&F 88:119).

Saunia oe lava ia faaleagaga

O le a se mea e te faia ia avea ai lou aiga o se puipuiga mai le agasala ma se sulufaiga mai le lalolagi? O le a se mea e te faia e aoao ai lau fanau ma le aiga i le talalelei?

Mafaufau i aiga o loo nonofo ai tamatai talavou. O a aafiaga o loo latou maua nei o le a fesoasoani ia i latou e tausia ai ni o latou lava aiga amiotonu?

O a mau ma lauga o le a fesoasoani i tamaitai talavou e saunia ai e faatulaga ni aiga e totonugalemu ia Keriso?

Esekielu16:44 (O le taua o le faataitaiga a se tina)

Salamo 127:3; 2 Nifae 25:26; Mosaea 4:14–15; MF&F 68:25–28; 88:119; 93:40 (Ua poloaiina matua e aoao ma faafaileleina a latou fanau)

Alema 53:20–21; 56:47–48 (Na aoaoina le autau talavou a Helamana e o latou tina)

“O Le Aiga: O Se Folafolaga i le Lalolagi,” Ensign po o le Liahona, Nov. 2010, 129.

Henry B. Eyring, “I Fanau a La’u Fanau,” Ensign po o le Liahona, Nov. 2013

Richard G. Scott, “Mo Le Filemu i le Aiga,” Ensign po o le Liahona, Me 2013

L. Tom Perry, “Avea ma ni Matua Lelei,” Ensign po o le Liahona, Nov. 2012, 26–28

“Aiga,” Mo Le Malosi o le Autalavou (2011), 14–15

Vitio: “Faatina: O Se Paaga e Faavavau ma le Atua”

3:47

Vitio: “O se Fale Maopoopo, o se Fale o le Atua”

1:38

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Valaaulia tamaitai talavou e faamatala mai o latou manatu pe faapei se aiga e totonugalemu ia Keriso. O le a se mea o le a latou vaaia iina? O le a se mea o le a latou lagona iina? Fai ia i latou e fautua mai tali i le fesili “E faapefea ona ou saunia e faatulaga se aiga e totonugalemu ia Keriso?”
Fai i tamaitai talavou po o le a so latou manatu i le matafaioi a tina i le fausiaina o le malo o le Atua. Valaaulia i latou e mafaufau i o latou lava tina ma isi tina latou te iloa ma faasoa mai ni uiga o loo ia i latou o le a mananao tamaitai talavou e mulimuli i ai (mo faataitaiga o uiga, tagai Faataoto 31:10–31).

Aoao faatasi

O gaoioiga taitasi nei o le a fesoasoani i tamaitai talavou e malamalama pe faapefea ona faatulaga se aiga e totonugalemu ia Keriso. I le mulimuli ai i le uunaiaga a le Agaga, filifili se tasi pe sili atu e aoga mo lau vasega:

Vaevae le vasega i ni vaega se tolu, ma atofa atu i vaega taitasi e faitau se tasi o mau fuaitau nei: Mosaea 4:14–15, Alema 53:20–21, 56:47–48. Valaaulia ia tamaitai talavou e fai se lisi i le laupapa o mataupu faavae i nei mau o le a fesoasoani ia i latou e faatulaga ni aiga e faaogatotonu ia Keriso. Faaali se vitio se tasi po o vitio uma o loo fautuaina atu i le otootoga lenei.Fautua atu ia mafaufau tamaitai talavou ia i latou lava o ni tina a o latou matamata. A maea vitio taitasi, fai i tamaitai talavou e talanoaina po o le a le savali autu ma po o a nisi mataupu faavae na latou aoaoina o le a fesoasoani ia i latou e faatulaga ni aiga e totonugalemu ia Keriso. Mafaufau e faaopoopo nei mataupu faavae i le lisi i le laupapa. Valaaulia i latou e faasoa mai ni faataitaiga o nei mataupu faavae mai o latou lava aiga po o isi aiga.
Fai atu i tamaitai talavou e lisi i le laupapa le latou fautuaga sili ona lelei mo se ulugalii o le a faaipoipo. Vaevae le lauga a Peresitene Henry B. Eyring “I Fanau a La’u Fanau” i ni vaega, ma tuu atu i tamaitai talavou ni vaega o le lauga e faitau. Fai atu ia i latou e faaopoopo ni mea i le lisi o i le laupapa sa latou mauaina i le lauga a Peresitene Eyring ma talanoa i mea e mafai ona latou faia i le taimi nei e saunia ai e faatulaga se aiga e faaogatotonu ia Keriso.
Faitau o se vasega mea e lima e mafai e matua ona fai ia fatu ai ni agaifanua e malolosi atu faaleaiga e pei ona faamatalaina i le lauga a Elder L. Tom Perry “Avea ma ni Matua Lelei .” Fai i tamaitai talavou e filifili se tasi o fautuaga a Elder Perry ma faasoa mai se faataitaiga na ia vaaia o ni aiga o faataitaia le fautuaga ma pe faapefea e le faia o lena mea ona fesoasoani e faatulaga ai se aiga e totonugalemu ia Keriso. Fai i tamaitai talavou e faitau palakalafa mulimuli e fitu o le lauga ma faasoa mai mafuaaga e taua ai le faatulagaina o se agaifanua malosi faaleaiga. O le a se mea e mafai e tamaitai talavou ona fai nei e faatulaga ai se agaifanua malosi faaleaiga i o latou aiga?
Aisea e taua ai mamanu? O le a le mamanu ua tuuina mai e le Tama Faalelagi ia i tatou mo le faatulagaina o se aiga e totonugalemu ia Keriso? (tagai “O Le Aiga: O Se Folafolaga i le Lalolagi, ” palakalafa 7). O le a le mea e mafai e tamaitai talavou ona fai nei e saunia ai e fausia se aiga ma se auaiga e tusa ai ma lenei mamanu? Fesili i tamaitai talavou pe o le a se latou tala i se tasi e le tutusa le tulaga o lona aiga ma le mamanu a le Tama Faalelagi. Valaaulia i latou e faitau le palakalafa mulimuli o le “Aiga” i le Mo Le Malosi o le Autalavou mo ni manatu.
Vaevae le vasega i ni vaega, ma vaevae le lauga a Elder Richard G. Scott “ Mo Le Filemu i le Aiga ” i vaega. Fai i vaega e suesue a latou vaega o le lauga, ma vaai mo faamatalaga po o uiga o se aiga e totonugalemu ia Keriso. Valaaulia i latou e faasoa mai mea ua latou maua e ala i le tusia o ni ata o se aiga e foliga mai e totonugalemu ia Keriso. O le a se mea e mafai e tamaitai talavou ona fai e fesoasoani ai i o latou aiga ia sili atu nei le totonugalemu ia Keriso? E mafai faapefea ona latou saunia e faatulaga ni aiga e totonugalemu ia Keriso i le lumanai?

Fai i tamaitai talavou e faasoa mai mea sa latou aoaoina i le aso. O a ni o latou lagona po o ni uunaiga? Pe ua latou malamalama pe faapefea ona faatulaga se aiga e totonugalemu ia Keriso? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Fesoasoani i o latou matua e ala i le avea ma se faatosinaga lelei i o latou aiga i le taimi nei.
Faailoa mai ni tina lelei latou te iloa, aoao mai ia i latou, ma mulimuli i a latou faataitaiga.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.