Aisea e taua ai le aiga?

O le aiga ua faauuina e le Atua ma e autu i ai Lana fuafuaga mo le taunuuga e faavavau o Ana fanau. O lenei fuafuaga paia ua mafai ai e tagata taitoatasi ona toe foi atu i Lona afioaga ma tuufaatasia ai aiga e faavavau.

Saunia oe lava ia faaleagaga

Aisea e taua ai ia te oe lou aiga? Aisea e te manatu ai o aiga o le ogatotonu lea o le fuafuaga o le faaolataga a le Tama Faalelagi?

O a savali o loo maua e tamaitai talavou lea e feteenai ai ma mea na saunoa mai ai perofeta e uiga i le taua o le aiga? E faapefea ona e fesoasoani ia i latou ia malamalama i le taua faavavau o le aiga?

Ia suesue ma le agaga tatalo ia mau ma punaoa nei. O a mau ma isi punaoa o le a fesoasoani i tamaitai talavou ia malamalama ai i le taua o aiga?

Roma 8:16–17; Eperu 12:9 (O fanau i tatou a le Tama Faalelagi)

Kenese 2:18–24; MF&F 131:1–4; 138:48 (Upumoni o le talalelei e faatatau i le aiga)

Mosaea 4:14–15; MF&F 93:40, 43, 48–50; 68:25, 27–29 (E aoao e le fanau le talalelei mai o latou matua)

“O Le Aiga: O Se Folafolaga i le Lalolagi,” Ensign po o le Liahona, Nov. 2010, 129

Carole M. Stephens, “O Le Aiga e Ou Le Atua,” Ensign po o le Liahona, Me 2015, 11–13

D. Todd Christofferson, “Aisea e Faaipoipo Ai, Aisea e Fai Ai se Aiga,” Ensign po o le Liahona, Me 2015, 50–53

L. Tom Perry, “Avea ma ni Matua Lelei,” Ensign po o le Liahona, Nov. 2012, 26–28

“Aiga,” Mo Le Malosi o le Autalavou (2011), 14–15

Vitio: “E Mafai Na Faavavau Aiga”; “O le Aiga O Se Fa'alapotopotoga Faale Atua”

3:11

1:49

Aoao atu i le ala a le Faaola

Na fetalai mai le Faaola i ni fesili lea na mafua ai ona loloto mafaufauga ma lagona a Ona soo, ma sa Ia olioli i le faaaliga o lo latou faatuatua. O a ni fesili e te ono fesiligia ai tamaitai talavou e fesoasoani latou te mafaufau ai ma le lagona loloto e uiga i le taua o aiga? Mata e mafai ona uunaia e nei fesili le faaalia o le faatuatua?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Valaaulia tamaitai talavou e vaai faalemafaufau faapea sa fesili atu se uo ia i latou, “Aisea e matuai taua ai aiga i la outou Ekalesia?” Mata e faapefea ona latou tali mai?
Tusi i le laupapa “O le _________ o se vaega tutotonu o le fuafuaga a le Foafoa mo le faavavau _______ o Ana ________.” Valaaulia tamaitai talavou e faitau le parakalafa muamua o i le “O Le Aiga: O Se Folafolaga i le Lalolagi” ma faatumu le fuaiupu. Talanoa faatasi o se vasega le mafuaaga e moni ai lenei faamatalaga.

Aoao faatasi

E mafai ona fesoasoani gaoioiga taitasi nei e aoao ai tamaitai talavou i le taua o le aiga. I le mulimuli ai i le taitaiga a le Agaga, filifili se tasi po o le sili atu o le a sili ona aoga i lau vasega:

Tusi se li'o i luga o le laupapa: Valaaulia se tamaitai talavou e tusi se aiga i totonu o le li'o. I fafo o le li'o, tusi ai le muai olaga, olaga faaletino, ma le olaga pe a mavae le oti. Fai atu i se tamaitai talavou e faitau le parakalafa lona tolu o le “O Le Aiga: O Se Folafolaga i le Lalolagi” ma tagai mo ni auala e fetaui ai le aiga i nei vaega o le ata o le faaolataga. Valaaulia ia tamaitai talavou e faasoa mai ni o latou lagona mo o latou aiga ma pe aisea latou te mananao ai ina ia faatasia ma i latou pe a mavae lenei olaga.
Fai atu i tamaitai talavou e faitau le saunoaga a Elder D. Todd Christofferson “Aisea e Faaipoipo Ai, Aisea e Fai ai se Aiga” po o parakalafa mulimuli e valu o le saunoaga a Elder L. Tom Perry “Avea ma ni Matua Lelei,” vaavaai ai mo ni tali i le fesili “Aisea e taua ai aiga?” Valaaulia i latou e faasoa mai mea na latou maua. O a mea e mafai ona faia e tamaitai talavou e faaalia ai lo latou malamalama i le taua o aiga? E faapefea e lo latou malamalama i le taua o aiga ona aafia ai le auala o latou taulimaina ai ia tagata o latou aiga?
Atofa atu i tamaitai talavou taitasi se tasi o mau o i lenei otootoga. Fai atu i le vasega e sue i le “O Le Aiga: O Se Folafolaga i le Lalolagi” ma vaavaai mo se fuaitau lea e fesootai ma le latou mau. Valaaulia tamaitai talavou taitasi e faasoa mai lana mau ma le vaega o le folafolaga e fesootai i ai. Fai atu ia i latou e faasoa mai soo se aafiaga sa latou mauaina lea e faaalia ai le taua o aiga.
Faatasi ma se faatagaga mai le epikopo, valaaulia se tasi po o le sili atu o tamaitai mai le uarota o e malolosi a latou faaipoipoga e faasoa mai i le vasega ni o latou lagona e uiga i le faaipoipoga ma le aiga. O le a se mea latou te tau atu i se tasi e le o lelei le tulaga o lona aiga i le taimi nei? (Tagai “Aiga,” Mo le Malosi o le Autalavou, 15.) O le a se latou tala e fai atu i se tasi o le na te leiloa pe aisea e tatau ai ona faaipoipo ma maua se fanau? Uunaia ia tamaitai talavou e fai mai soo se fesili o ia i latou e uiga i le saunia mo le faaipoipoga ma le aiga.
Vaevae le vasega i ni vaega se fa: Tuu atu i vaega taitasi e suesue se tasi o vaega o le lauga a Carole M. Stephens “O Le aiga e Ou Le Atua” (e amata vaega taitasi ma se upumoni malosi e uiga i le aiga). Fai atu i vaega taitasi e sauni e aoao atu isi vaega i mea sa latou aoaoina mai a latou vaega. E mafai faapefea ona latou aoao atu ma faataitaia nei upumoni i o latou aiga ma alalafaga?

Fai i tamaitai talavou e faasoa atu mea sa latou aoaoina i le aso. Pe ua latou malamalama i le mafuaaga e taua ai le aiga? O a ni o latou lagona po o ni uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Mafaufau i se aiga amiotonu latou te faamemelo i ai ma tusi i lalo ni auala faapitoa e mafai na latou faataitai ai i lena aiga.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.