Aisea e taua ai le faaipoipoga faalemalumalu?

I le fuafuaga o le fiafia a lo tatou Tama Faalelagi, ua na o le feagaiga fou ma le faavavau o le faaipoipoga faaselesitila o le a maua ai le faaeaga (tagai MF&F 131:1–3). Pe a faamauina le alii ma le tamaitai i le tasi ma le isi mo le olaga nei ma le faavavau atoa i totonu o le malumalu, ua la maua se faamautinoaga o le a faaauau pea e faavavau la laua mafutaga pe afai la te faamaoni i a laua feagaiga. Ua la iloa e leai se mea, e oo lava i le oti, e mafai ona tuueseeseina i laua.

Saunia oe lava ia faaleagaga

Aisea e taua ai ia te oe le faaipoipoga e faavavau? O a faamanuiaga o saunia e lenei sauniga mo oe ma lou aiga?

O a faataitaiga amiotonu o se faaipoipoga faalemalumalu o maua ei tamaitai talavou? E mafai faapefea ona e fesoasoani e tuuina i totonu o i latou se naunautaiga maoae ina ia faamauina i le malumalu?

Ia suesue ma le agaga tatalo ia mau ma punaoa nei. O a ni punaoa o le a fesoasoani i tamaitai talavou ina ia malamalama i le taua o le faaipoipoga faalemalumalu ma faateleina ai lo latou naunautai ina ia faaipoipo i le malumalu i se aso?

MF&F 49:16–17 (O le faaipoipoga e fesoasoani e faataunuu le faamoemoega o le foafoaga)

MF&F 131:1–4; 132:15–21 (O le faaipoipoga e faavavau e manaomia mo le faaeaga)

“O Le Aiga: O Se Folafolaga i le Lalolagi,” Ensign po o le Liahona, Nov. 2010, 129

L. Tom Perry, “Aisea e Taua ai le Faaipoipoga ma le Aiga—i Soo Se Mea i le Lalolagi,” Ensign po o le Liahona, Me 2015, 39–42

Henry B. Eyring, “O Aiga ua Osi Feagaiga,” Ensign po o le Liahona, Me 2012, 62–65

Richard G. Scott, “O Faamanuiaga e Faavavau o le Faaipoipoga,” Ensign po o le Liahona, Me 2011, 94–97

“Sa Talafeagai Lava le Ma Faaipoipoga faalemalumalu ma Soo Se Tau,” Liahona, Oke. 2010, 69–70

“Faaipoipoga,” Faamaoni i le Faatuatua (2004), 38–42

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

Ao lei taunuu atu tamaitai talavou i le vasega, tusi i le laupapa, “Aisea e taua ai le faaipoipoga faalemalumalu?” Valaaulia i latou e mafaufau e uiga i le fesili lenei ao latou faitau i le “Sa Talafeagai Lava le Ma Faaipoipoga Faalemalumalu ma Soo Se Tau.” Aisea na matuai taua ai le faaipoipoga faalemalumalu i le ulugalii o loo i le tala lenei? Uunaia ia tamaitai talavou e faasoa mai ni o latou manatu.
Afai e maua, faaali atu se ata mai le aso na faamauina ai oe i le malumalu, ma faamatala atu ni manatu ma ni lagona na e mauaina (pe faaali atu se ata o se tamaitai ma se alii faaipoipo i luma o le malumalu [tagai i le Tusi Ata o le Talalelei, 120]). Fesili atu i tamaitai talavou pe aisea latou te talitonu ai e taua le faaipoipoga faalemalumalu.

Aoao faatasi

O le a fesoasoani gaoioiga taitasi nei i tamaitai talavou e aoao ai i le mafuaaga e taua ai faaipoipoga i le malumalu. I le mulimuli ai i le taitaiga a le Agaga, filifili se tasi po o le sili atu o le a sili ona aoga i lau vasega:

Valaaulia tamaitai talavou e vaai faalemafaufau faapea e i ai se latou uo o loo masalosalo pe aisea ua i ai ai se latou sini o le faaipoipo i le malumalu nai lo le na o se faaipoipoga faalemalo. Fai atu ia i latou e faitau ia mau o loo fautuaina atu i lenei otootoga po o le “O Le Feagaiga Fou ma le Faavavau o le Faaipoipoga” i le Faamaoni i le Faatuatua (itulau 39-40) ma tagai mo upu ma fuaitau e mafai ona latou faaaoga e tusi ai se tusi i le latou uo. Uunaia i latou e faamatala i le tusi le taua o le faaipoipoga e faavavau. Valaaulia i latou e faasoa atu i le vasega mea sa latou tusia i a latou tusi.
Aumai ni mea faitino se lua pe tolu (po o ni ata o mea faitino) lea e faaalia ai le eseese o latou tulaga anagata (mo se faataitaiga, o se sipuni palasitika ma se sipuni uamea). Fai atu i tamaitai talavou e talanoaina le mafuaaga e sili atu ai le lelei o le mea faitino e sili atu lona anagata nai lo le mea faitino e itiiti le anagata. E faapefea la ona faatatau lenei mea i le faaipoipoga? Fai atu i tamaita talavou e faitau, matamata, pe faalogologo i ni vaega o le saunoaga a Elder L. Tom Perry “Aisea e Taua ai le Faaipoipoga ma le Aiga—I Soo Se Mea i le Lalolagi.” Fesili atu i tamaitai talavou po o le a le mafuaaga latou te mananao ai i se faaipoipoga i le malumalu.
Tuu atu i tamaitai talavou taitasi se kopi o le saunoaga a Elder Richard G. Scott “O Faamanuiaga e Faavavau o le Faaipoipoga.” O a lagona o Elder Scott e uiga i lana soa e faavavau? O a ni mea na fiafia ai tamaitai talavou e uiga i lana mafutaga a lona faletua? Fai atu ia i latou e mafaufau loloto po o le a se mea o le a ausia ai se mafutaga faapei o Elder ma Sister Scott.
Faitau faatasi o se vasega le MF&F 131:1–4 ma le “O Le Feagaiga Fou ma le Faavavau o le Faaipoipoga” i le Faamaoni i le Faatuatua (itulau 39-40), ma vaavaai mo ni tali i le fesili “Aisea e taua ai le faaipoipoga i le malumalu?” Afai e manaomia, fesoasoani i tamaitai talavou e saili uiga o soo se upu po o fuaitau e le masani ai. Fai atu i tagata o le vasega e lisi mai nisi o mea e ono taofia tamaitai talavou mai le faaipoipo i le malumalu. O le a se mea e mafai ona latou faia i le taimi nei e faamautinoa ai latou te faaipoipo i le malumalu?

Fai i tamaitai talavou e faasoa mai mea sa latou aoaoina i le aso. Pe ua latou malamalama i le taua o faaipoipoga i le malumalu? O a ni o latou lagona po o uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea ua tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Tusi se tusi ia i latou lava e tatalaina i le aso ao loma le aso o lo latou faaipoipoga, ia faamatala ai le taua o se faaipoipoga o le malumalu ma o latou moomooga o i ai nei i le ausiaina o lenei sini amiotonu.
Faapipii se ata o le malumalu i se mea o le a latou vaai soo i ai, ma tuu i autafa o le ata se faamatalaga faigofie e faailoa mai ai lo latou sini ma le naunautaiga ina ia faaipoipo i le malumalu i se aso.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i tamaitai talavou e faaaoga ai mea sa latou aoaoina i lenei lesona.