O a ni ou tiutetauave i le galuega o le perisitua?

O le galuega a le perisitua e aofia ai le sili atu nai lo tiute o e umia le perisitua. O le galuega a le Atua—le galuega o le faamanuiaina ma le faaeaina o Ana fanau—e faataunuuina e Ana fanau tausi feagaiga. E taua tamaitai i le faataunuuina o le galuega a le au perisitua. Tatou te auauna atu ia i latou e i ai manaoga, aoao atu le talalelei, ma valaaulia tagata uma e o mai ia Keriso.

Saunia oe lava ia faaleagaga

O latou malamalama i le auala e mafai ai ona latou auai i le galuega a le au perisitua? O a aafiaga e mafai ona e faasoa maia o le a fesoasoani e faamalamalama i tamaitai talavou o latou tiutetauave i le galuega a le Alii?

Mata o vaai tamaitai talavou i lau vasega ia i latou lava o ni tagata auai taua i le galuega a le au perisitua? O a ni aafiaga sa latou maua i le faia o le galuega a le Alii—i totonu o o latou aiga, i le lotu, ma ia latou uo—e mafai ona latou fetufaai atu i le tasi ma le isi?

A o e sauniuni, suesue ma le agaga tatalo ia mau ma punaoa nei.O le a se mea ua musuia oe e faasoa atu i tamaitai talavou?

MF&F 20:38–60 (Tiute o e umia le perisitua)

Luka 8:1–3; Galuega 9:36–40; Roma 16:1–2 (Faataitaiga o le auauna atu i isi)

Alema 56:47–48; 57:21; MF&F 25:6–8; Mose 5:11–12 (Faataitaiga o le aoao atu o le talalelei)

Luka 2:36–38; Ioane 20:11–18; Alema 19:16–17 (Faataitaiga o le valaauina o isi ia o mai ia Keriso)

Dallin H. Oaks, “O Ki ma le Pule o le Perisitua,” Ensign po o le Liahona, Me 2014

“Aualofa: O Se Toefuataiga o se Mamanu Anamua,” O Afafine i Lou Malo: O Le Talafaasolopito ma le Galuega a le Aualofa (2011), 3–7

Aoao atu i le ala a le Faaola

Na valaaulia e le Faaola Ona soo e molimau atu, ma ao latou faia o lea, na pai atu le Agaga i o latou loto. O a ni aafiaga o le perisitua na e maua e mafai ona e faasoa atu i tamaitai talavou?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Tagai i isi manatu e aoao mai ai ma aoao atu .

Filifili mai manatu nei pe mafaufau ni ou lava manatu e faalauiloa atu ai le lesona o lenei vaiaso:

• Tusi i luga o le laupapa, “O a tiute o e umia le perisitua?” Fai i tamaitai talavou e lisi mai ni tiute se tele e mafai ona latou mafaufau i ai ona faaopoopo lea i le latou lisi ia tiute na latou mauaina i le Mataupu Faavae ma Feagaiga 20:46–60. Fai i ai e mafaufau po o fea o nei tiutetauave latou te faasoaina ma alii talavou.

• Faitau faatasi o se vasega le parakalafa i le amataga o lenei otootoga, ma valaauina ia tamaitai talavou e tusi i luga o le laupapa ia upu ma fuaitau e mafai ona fesoasoani e faamalamalama ia i latou po o le a le galuega a le perisitua.O a ni fesootaiga o latou vaaia i le va o le autu a Tamaitai Talavou ma tiute o e umia le perisitua o loo lisiina i le Mataupu Faavae ma Feagaiga 20:46–60?

Aoao faatasi

Tagai i isi manatu e aoao mai ai ma aoao atu.

O gaoioiga taitasi nei o le a fesoasoani e uunaia tamaitai talavou ina ia avea ma tagata auai i le galuega a le perisitua. I le mulimuli ai i le taitaiga a le Agaga, filifili se tasi pe sili atu e aoga mo lau vasega:

• Ao lei amataina le vasega, valaaulia ia tamaitai talavou e aoao e uiga i se tamaitai taua—i tusitusiga paia (e pei o i latou o loo fautuaina atu i lenei otootoga), i le talafaasolopito o le Ekalesia, po o i totonu o o latou lava aiga—o le sa avea ma se faataitaiga o le auauna atu, aoao atu o le talalelei, po o le valaaulia o isi ia o mai ia Keriso. I le amataga o le vasega, valaaulia i latou e faasoa mai se mea sa latou aoaoina. O a auala na auai ai nei tamaitai i le galuega a le au perisitua? O le a se mea na uunaiaina ia tamaitai talavou e uiga i nei tala? O faapefea ona latou vaai ia i latou lava i le galuega a le au perisitua?

• Faitau faatasi o se vasega le “Aualofa: O Se Toefuataiga o se Mamanu Anamua.” Valaaulia ia tamaitai talavou e faasoa mai ni o latou lagona e uiga i le matafaioi a tamaitai i le galuega a le au perisitua. E faapefea i le faitau e uiga i mea na faia e tamaitai i le aluga o le talafaasolopito ona uunaia ia tamaitai talavou ina ia auai i lenei galuega i le aso? Uunaia ia tamaitai talavou e faitau e le tagata lava ia le vaega o totoe o le O Afafine i Lou Malo. Afai e mafai, atonu e te manao e saunia ni kopi mo i latou.

• Faitau faatasi le vaega IV i le lauga a Elder Dallin H. Oak “O Ki ma le Pule o le Perisitua,” ma fai atu i tamaitai talavou e faasoa mai ni faamatalaga na faagaeetia ai i latou. Faatasi ai ma se faatagaga mai le epikopo, fai atu i se tuafafine i le uarota e talanoa atu i le vasega e uiga i le auala na faateleina ai e le pule o le perisitua lona gafatia e faataunuu lona valaauga. Atonu e te manao e valaaulia lenei tuafafine i nai aso o i luma.

• Faaali se tasi o vitio o loo fautuaina atu i le otootoga lenei ma valaaulia tamaitai talavou e faailoa atu ni auala o loo auai atu ai tamaitai talavou i vitio i le galuega o le perisitua. Na faapefea ona uunaia e nei faataitaiga ma le fautuaga a taitai o le Ekalesia i nei vitio i latou ina ia auai atoatoa atili i lenei galuega? 

Fai i tamaitai talavou e faasoa mai mea sa latou aoaoina i le aso. O latou malamalama i le auala e mafai ai ona latou auai i le galuega a le au perisitua? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“Ao e sauni ma le agaga tatalo e aoao atu, e mafai ona taitaiina oe e faamamafa atu ni mataupu patino. E mafai ona e maua se malamalama i le auala sili e tuu atu ai ni manatu faapitoa. E mafai ona e maua ni faataitaiga, lesona faatino, ma ni tala musuia i gaoioiga faigofie o le olaga. Atonu e te lagonaina le faagaeetia ina ia valaaulia se tagata faapitoa e fesoasoani i le lesona. Atonu o le a toe faamanatu atu ia te oe se mea na e oo i ai lea e mafai ona e fetufaai atu” (O Le Aoao Atu, E Leai Se Isi Valaauga E Sili Ai [1999], 49, 50).

Vitio: “Faaaogaina o Fesoasoaniga Vaaia”

Matamata atili

Ola i mea ua tatou aoaoina

Tagai i isi manatu e aoao mai ai ma aoao atu.

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

• Faia se fuafuaga e faataunuu ai a latou tiutetauave i le galuega a le au perisitua.

• Fetufaai ma o latou aiga i mea sa latou aoaoina i le aso e uiga i le galuega a le perisitua.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.