O le a le perisitua?

O le perisitua o le mana faavavau ma le pule a lo tatou Tama Faalelagi. Na foafoaina e le Atua ma pulea le lagi ma le lalolagi, e ala i le mana o le perisitua. O le mana lenei ua Ia faaolaina ma faaeaina ai Lana fanau. Na te tuuina atu le pule i e agavaa o umia le perisitua e faatautaia ai sauniga o le faaolataga. E mafai ona agavaa fanau uma a le Tama Faalelagi ina ia maua nei sauniga ma maua le mana ma faamanuiaga o le perisitua.

Saunia oe lava ia faaleagaga

O le a se mea ua e iloa e uiga i le perisitua? O le a se mea ua musuia ai oe e aoao e uiga i le perisitua?

O iloa e tamaitai talavou le taua o le perisitua i o latou olaga? O le a se mea e mafai ona e faia a o lei amataina le vasega ia iloa ai pe o a mea ua iloa e tamaitai talavou e uiga i le perisitua? E mafai faapefea ona uunaia e lenei mea lau filifiliga i mea e aoao atu?

Ao e sauniuni, ia suesue ma le agaga tatalo ia mau ma punaoa nei. O a mau ma lauga o le a fesoasoani i tamaitai talavou e malamalama ai po o le a le perisitua.

Eperu 5:4; MF&F 107:1–5; Mataupu Faavae o le Faatuatua 1:5 (E ao ina valaauina tagata e le Atua ma faauuina e se tasi o i ai le pule)

MF&F 84:17–22 (O le mana faaleatua o loo faaalia e ala mai sauniga o le perisitua)

MF&F 121:34–46 (O le pule o le perisitua e faaaogaina tau lava i mataupu faavae o le amiotonu)

Henry B. Eyring, “Savali Faatasi ma A’u,”Ensign po o le Liahona, Me 2017, 82–85

M. Russell Ballard, “O La’u Galuega ma Lo’u Mamalu Lenei,” Ensign po o le Liahona, Me 2013, 18–21

Neil L. Andersen, “Mana o le Perisitua,” Ensign po o le Liahona, Nov. 2013, 92–95

“Perisitua,” Faamaoni i le Faatuatua (2004), 133–40

“Perisitua Arona,” Faamaoni i le Faatuatua, 138–39

“Perisitua Mekisateko,” Faamaoni i le Faatuatua, 139–40

Vitio: “Faamanuiaga o le Perisitua e Maua e Tagata Uma”

2:23

Aoao atu i le ala a le Faaola

Na faaaoga e le Faaola tusitusiga paia e aoao ma molimau atu ai e uiga i Lana misiona. Na Ia aoaoina Ona soo e liliu atu i tusitusiga paia mo tali i fesili ma ia maua ai le malosi faaleagaga. O a ni auala e mafai ona e faamalosiau ai i tamaitai talavou ina ia liliu atu i tusitusiga paia e sue ai tali o a latou fesili ma luitau?

Faasoa atu ni aafiaga

I le amataga o vasega taitasi, valaaulia ia tamaitai talavou e faasoa mai, aoao atu, ma molimau atu e uiga i aafiaga na latou maua i le faaaogaina o mea sa latou aoaoina i lesona o vaiaso ua mavae atu. O le a uunaia e lenei mea se liua patino ma o le a fesoasoani ai i tamaitai talavou ia iloa le taua o le talalelei i o latou olaga i aso uma.

Faailoa atu le aoaoga faavae

Filifili mai manatu nei pe mafaufau ni a oe lava manatu e faalauiloa atu ai le lesona o lenei vaiaso:

Fesili i tamaitai talavou po o a ni mea ua latou iloa e uiga i le perisitua. Faasoa atu ma i latou le parakalafa i le amataga o lenei otootoga po o le vitio “Faamanuiaga o le Perisitua e Maua e Tagata Uma,” ma fesili atu ia i latou pe o a nisi mea moni na latou aoaoina mai ai e uiga i le perisitua

2:23
Fai i tamaitai talavou, ia taitoalua po o le vasega foi, e faatino se talanoaga o loo fesili ai se uo o se isi tapuaiga po o le a le perisitua. Pe faapefea ona faamatalaina e tamaitai talavou le perisitua? Faaaoga le faamatalaga i le amataga o lenei lesona e fesoasoani ai ia i latou ina ia malamalama i le uiga o le perisitua.

Aoao faatasi

O le a fesoasoani gaoioiga taitasi nei i tamaitai talavou e malamalama ai i le perisitua. I le mulimuli ai i le musumusuga a le Agaga, filifili se [gaoioiga] se tasi pe sili atu o le a sili ona aoga mo lau vasega:

I lana saunoaga “‘Savali Faatasi ma A’u’,” sa faasoa mai ai e Peresitene Henry B. Eyring ni isi o mau lea sa ia saunoa mai, e mafai ona “faateleina [ai] lo tatou lagona o le ofo tele e faatatau i le perisitua paia” (Ensign po o le Liahona, Me 2017, 82–83). Fai atu i tamaitai talavou taitasi e suesue i se tasi o nei mau ona faamatala mai lea i le vasega mea na ia aoaoina e uiga i le perisitua. Tuu atu i tamaitai talavou ni nai minute e mafaufau loloto ai i fesili na fesili ai Peresitene Eyring i le parakalafa lea e amata i le “O se tasi o auala e tali atu ai i ia faamatalaga faagaeetia.” E faapefea ona musuia e nei fesili i latou i a latou auaunaga?”
Vaevae tamaitai talavou i ni vaega se fa. Totofi vaega taitasi e suesue i se mau se tasi po o le sili atu o loo fautuaina atu i lenei otootoga po o se vaega o le saunoaga a M. Russell Ballard “O La’u Galuega ma Lo’u Mamalu Lenei,” vaavaai mo mea sa latou aoaoina e uiga i le perisitua. Fai atu ia i latou e faasoa mai po o a ni mea na faagaeetia ai i latou. O a ni aafiaga o le perisitua na maua e tamaitai talavou?
Fai atu i tamaitai talavou e lisi ni auala na maua ai e tagata o le lalolagi le malosi (tupe, aoaoga, lauiloa, aulelei, ma isi mea). Faitau faatasi le Mataupu Faavae ma Feagaiga 121:36–46, ma fai atu i tamaitai talavou e lisi ni mataupu faavae o loo faavae ai le mana o le perisitua. Faatusatusa le auala a le lalolagi e maua ai le malosi ma le auala a le Alii. E faapefea e le iloaina e uiga i nei mataupu faavae ona aafia ai le auala e vaavaai atu ai tamaitai talavou i le perisitua ma e umia le perisitua?
Fai i nisi o tamaitai talavou e faitau e uiga i le Perisitua Arona i le Faamaoni i le Faatuatua (itulau 138–39), ma valaaulia i latou e faitau e uiga i le Perisitua Mekisateko (itulau 139–40). Fai atu i tamaitai talavou taitasi e faasoa mai se mea na ia aoaoina mai mea na ia faitau i ai. Aisea latou te manatu ai e taua mo tamaitai talavou le malamalama i le perisitua?
Fai atu i tamaitai talavou taitasi e faitau mai se tasi o vaega o le saunoaga a Elder Neil L. Andersen “Mana o le Perisitua.” Ona fai lea i tamaitai talavou taitasi e faasoa mai i le vasega atoa se mea sa latou aoaoina e uiga i le perisitua ma lona uiga ia te ia.
Fai i tamaitai talavou e faitau le vaega ua faaulutalaina “Perisitua” i le itulau 135 o le Faamaoni i le Faatuatua. O a ni mea e tutusa ai le faatulagaga o le korama a le Perisitua Arona ma vasega a tamaitai talavou? O a ni eseesega? Fesoasoani i tamaitai talavou ia latou iloa ua faatulagaina ia tamaitai o le Ekalesia i le mamanu o le perisitua (tagai O Afafine i Lo’u Malo: O le Talafaasolopito ma le Galuega a le Aualofa [2011], 150).

Fai atu i tamaitai talavou e faasoa mai mea na latou aoaoina i le aso. Pe ua sili atu ea lo latou malamalama e uiga i le perisitua? O a ni o latou lagona po o ni manatu? E i ai nisi a latou fesili faaopoopo? Mata e aoga le faaaluina o se isi taimi i lenei aoaoga faavae?

Ola i mea o tatou aoaoina

Valaaulia ia tamaitai talavou e mafaufau i le auala o le a latou ola ai e ala i mea ua latou aoaoina i le asō. Mo se faataitaiga, e mafai ona latou:

Saunia ma aoao atu se lesona o se afiafi faaleaiga e uiga i le perisitua.
Tusi i totonu o a latou api talaaga se mea na latou aoaoina e uiga i le perisitua.

Faasoa atu i tamaitai talavou mea o le a latou suesueina i le vaiaso a sau. O le a se mea e mafai ona latou faia e saunia ai e aoao? Mo se faataitaiga, e mafai ona latou faitauina se lauga, matamata i se vitio, pe suesue i se mau e faatatau i le lesona o le vaiaso a sau.