Au na vaqaqacotaka vakacava na noqu ivakadinadina?

Na ivakadinadina sai koya na ivakadinadina vakayalo ni ka dina e solia mai na Yalo Tabu. Sa soli tu vei keda na lewe ni Lotu na madigi tabu kei na itavi meda rawata vakaikeda yadua na noda ivakadinadina. Kevaka eda na vakasaqara na ivakadinadina ena vulici ni ivolanikalou, masumasu, kei na bulataki ni kosipeli, ena vukei keda na Yalo Tabu meda kila vakaikeda ni sa dina sara na kosipeli.

Mo vakarautaki iko vakayalo

O sa mai rawata vakacava na nomu ivakadinadina? Sa vakayarayarataki iko vakacava na nomu ivakadinadina ena nomu ilesilesi vaka-luvena yalewa na Kalou, vaka-marama vakawati, tina, dua na taci keimami, se qasenivuli?

Na cava o sa kila tu me baleta na nodra ivakadinadina na goneyalewa ena nomu kalasi? Ena veivakauqeti vakacava na ivakadinadina kaukauwa ki na nodra bula ena gauna oqo kei na veisiga ni mataka? Na cava o rawa ni cakava mo vakayaloqaqataki ira kina mera vaqaqacotaka na nodra ivakadinadina?

Vulica ena masumasu na ivolanikalou kei na ivurevure oqo. Na cava o raica e rawa ni ra vakauqeti kina na goneyalewa mera rawata e dua na ivakadinadina?

Joni 7:16–17 (Kevaka eda na cakava na lewa ni Turaga, eda na rawata rawa e dua na ivakadinadina)

1 Korinica 2:9–13; Alama 5:45–46; V&V 8:2–3 (Na Yalo Tabu e dau vakatakila na ka dina)

Jemesa 1:5; 1 Nifai 10:17–19; 15:11; 3 Nifai 18:20; Moronai 10:3–5 (Me rawati e dua na ivakadinadina, e dodonu meda kerea ka vakasaqara)

Mosaia 26:3; Alama 12:11 (Na veivakataotaki ni kena rawati e dua na ivakadinadina)

Alama 32:27–34 (E tekivu ena gagadre ni vakabauta)

V&V 9:7–9 (Meda vuli vakaikeda ni bera ni da kerea)

Ronald A. Rasband, “De Ko ni Guilecava,” Ensign se Liaona, Nove. 2016, 113-15.

Thomas S. Monson, “Vakadinata, Talairawarawa, ka Vosota,” Ensign se Liaona, Me 2012, 126–29

Dieter F. Uchtdorf, “Na Kena Ciqomi e Dua na iVakadinadina ni Rarama kei na Dina,” Ensign se Liaona, Nove. 2014, 20-23

Bonnie L. Oscarson, “Mo Dou Saumaki Mai,” Ensign se Liaona, Nove. 2013, 76-78

“iVakadinadina,” Tudei ena Vakabauta (2004), 30–32

Veisemati ni iTaviqaravi ni iTabagone

Tuva e dua na itaviqaravi ni Muavata ka na rawa ni vukei ira na goneyalewa mera bulataka na veika era sa vulica ena lesoni oqo.

Wasea na veika o sa sotava

Ena itekivu ni veikalasi yadua, sureti ira na goneyalewa mera wasea, vakavulica, ka vakadinadinataka na veika eso era sa sotava oti mai ena nodra bulataka na veika era sa vulica ena lesoni ni macawa sa oti. Oqori ena vakauqeta na saumaki ni tamata yadua ka na vukei ira na goneyalewa mera raica na yaga ni kosipeli ena nodra bula e veisiga.

Vakamacalataka na ivunau

Digidigi mai na veivakasama oqo se nomu nanuma eso mo vakamacalataka kina na lesoni ni macawa oqo:

Kerei ira na goneyalewa me ra tukuna rawa ni bera ni yaco e so na vakatovotovo rawarawa. Me ivakaraitaki, e rawa ni o taroga, “Ke au vakalutuka na iyaya oqo, na cava ena yaco?” kei na “Ke au waqaca na cina oqo, na cava ena yaco?” Tarogi ira era kila vakacava na veika ena yaco ena vakatovotovo eso oqo ni bera madaga ni se caka. Vakamacalataka na kena vaqaqacotaki na ivakadinadina ena gadrevi vei keda meda vakatovotovotaka na vosa (raica na Alama 32:27), ka ni da na vakayacora tiko, eda na vulica meda nuitaka na macala ni noda vakatovotovo.
Kerei ira na goneyalewa mera vola e dua na ibalebale ni vosa ivakadinadina. Sureti ira mera wasea na ibalebale o ya ki na kalasi. Sa rawa mo vakayaloqaqataki ira mera wilika na “iVakadinadina” ena Tudei ena Vakabauta.

Vulica vata

Na itaviqaravi yadua e ra ena vukei ira na goneyalewa mera vulica mera rawata na nodra dui ivakadinadina. Muria na veivakauqeti ni Yalotabu ena nomu digitaka e dua se sivia ka na ganita na nomu kalasi:

Vakaraitaka vei ira na goneyalewa na sorenikau kei na dua na itei. Tarogi ira se cava ena gadrevi me yaco, me rawa ni na tubu kina na sorenikau me dua na itei. Wilika na Alama 32:27–34, ka kerei ira na goneyalewa mera vakatautauvatataka na kena tubu e dua na itei ki na kena rawati e dua na ivakadinadina. Sa tubu cake tiko vakacava na nodra ivakadinadina? Na cava e rawa ni ra cakava mera vakabulabulataka kina na nodra ivakadinadina? Sureti ira mera vola ena nodra ivolaniveisiga na sala eso e sa tubu tiko kina na nodra ivakadinadina kei na cava e rawa ni ra cakava me vaqaqacotaki kina.
Me vola na kalasi na yacadra na tamata ena ivolanikalou era a rawata na nodra ivakadinadina. Me veivosakitaki na veika era a cakava o ira oqo kei na sala era a ciqoma kina na nodra ivakadinadina vakayalo (raica na 1 Nifai 10:17–19; Alama 5:45–46). Sureti ira na goneyalewa mera wasea na veika era sa sotava oti ka a vaqaqacotaki kina na nodra ivakadinadina.
Sureti ira na goneyalewa me ra tuva mai eso na ka e rawa ni vakaukauwataka ni ra tiko na goneyalewa wilika na ivolanikalou ena idusidusi oqo, na vosa nei, Elder Ronald A. Rasband“De Ko ni Guilecava,” se na 12 kei na 13 ni parakaravu ni vosa nei Peresitedi Thomas S. Monson “Vakadinata, Talairawarawa, Vosota.” Sureti ira na goneyalewa me ra wasea eso na vakasama ena nodra ituvatuva, ka qai veivosakitaka vakalasi na iwalewale e rawa ni ra vukei ira kina eso tale na goneyalewa ni vaqaqacotaka na nodra ivakadinadina. Era na vukei ira vakacava na lewe ni matavuvale? itokani?
Kerei ira na goneyalewa mera vakasamataka e dua era kila ka sotava tiko na leqa ni nona ivakadinadina. Vakayaloqaqataki ira mera vakasaqara ena vosa nei Peresitedi Dieter F. Uchtdorf “Na Kena Ciqomi e Dua na iVakadinadina ni Rarama kei na Dina,” na veika ena rawa ni veivuke ki na tamata o ya. Na cava soti e rawa ni ra wasea vua?
Ena loma ni macawa, kerea e dua na goneyalewa me lako mai ki kalasi ka vakavakarau ni wasea na italanoa kei Agnes Hoggan mai na vosa nei Sister Bonnie L. Oscarson “Mo Dou Saumaki Mai,” oka kina na ivakadinadina nei Agnes ena vakayarayarataki ni nona digidigi. Solia ki na goneyalewa yadua e dua na pepa tikidua vata kei na dua na iyatuvosa mai na vosa nei Sisita Oscarson ka vakatavulica e dua na ivakavuvuli me baleta na vaqaqacotaki ni ivakadinadina. Kerea na goneyalewa yadua me wasea na nona iyatuvosa ki na kalasi ka qai veivosakitaka na ka e vulica mai kina kei na raiyawa eso me na wasea okoya.
Kerei ira yadua na goneyalewa mera wilika e dua na ivolanikalou ena ituvatuva oqo mera raica kina na sala me rawati ka vaqaqacotaki kina na ivakadinadina se na veika e dau tarovi keda meda rawata e dua na ivakadinadina. Ni oti na nodra wasea na vakasama eso, kerei ira mera vakasamataka na sala e rawa ni ra vukei ira kina eso mera vaqaqacotaka na nodra ivakadinadina. Era na vukei ira vakacava na lewe ni matavuvale? itokani e koronivuli?

Kerei ira na goneyalewa mera wasea na veika era sa vulica nikua. Era sa kila deivaki tiko beka na sala mera rawata kina na nodra dui ivakadinadina? Na cava era sa bau vakila se vakanananu kina? E tiko beka eso tale na nodra vakatataro? Ena veivuke beka me tauri vakalevu na gauna ena ivunau oqo?

Bulataka na ka eda vulica tiko

Sureti ira na goneyalewa mera vakasamataka na sala mera bulataka kina na veika era sa vulica nikua. Me kena ivakaraitaki, e rawa ni ra:

Cavuta na nodra ivakadinadina ena kalasi.
Lalawataka mera vaqaqacotaka na nodra ivakadinadina ena nodra bulataka e dua vei ira na ivakavuvuli era sa vulica.
Wasea na nodra ivakadinadina vua e dua na itokani se lewe ni matavuvale ena macawa mai oqo.

Wasea vei ira na goneyalewa na ka era na vulica ena macawa mai oqo. Na cava e rawa ni ra cakava mera vakavakarau kina ki na vuli? Me kena ivakaraitaki, e rawa ni ra wilika e dua na vosa, sarava e dua na vidio, se vulica e dua na ivolanikalou e semati ki na lesoni ena macawa mai oqo.

Veisemati ni iTaviqaravi ni iTabagone

Yavutaka e dua na itaviqaravi ni Muavata ka na rawa ni vukei ira na goneyalewa mera bulataka na veika era sa vulica mai na lesoni oqo.