61:53

Humilom Kamo, ug Ilhon Ninyo nga Ako Mao ang Dios

Elder M. Russell Ballard

Sa Korum sa Napulog Duha ka mga Apostoles

CES Debosyonal alang sa mga Young Adult • Mayo 4, 2014 • San Diego, California

Hinigugma kong mga kabatan-onan, malipayon kong namulong kaninyo gikan sa San Diego, California. Kalipay ko nga maanaa niining debosyonal sa CES karong gabhiona. Gi-welcome namo ang tanang mga young adult niining gabhiona, lakip kaninyo nga mga estudyante sa senior high school. Nalipay mi nga kauban mo namo. Amo usab nga gi-welcome ang mga returned missionary. Ang Simbahan ug ang Ginoo mapasalamaton sa inyong serbisyo!

Sa katapusan, among gi-welcome kamong umaabut nga mga misyonaryo. Ang Ginoo nagkinahanglan og matarung nga batan-ong mga babaye ug batan-ong mga lalaki sa pagtabang Kaniya og pundok sa Israel ug sa pag-andam sa kalibutan alang sa Iyang Ikaduhang Pag-anhi.

Gusto kong mahibalo kamo nga ang Ginoo nahigugma kaninyo ug nagsalig kaninyo. Ang Unang Kapangulohan ug ang Korum sa Napulog Duha ka mga Apostoles nagtuo kaninyo ug nag-ampo alang kaninyo sa kanunay. Kamo ang kaugmaon sa Simbahan, ug ang Ginoo adunay daghan nga nindot nga mga panalangin alang kaninyo.

Tuguti ako sa pag-usab ug sa pagpatigbabaw niana nga punto—sugod karon mga 20 ngadto sa 30 ka tuig kamo mahimong mangulo sa Simbahan. Ang uban kaninyo moserbisyo isip mga bishop; mga presidente sa stake; mga presidente sa misyon; mga presidente sa Primary, sa Young Women, ug sa Relief Society; ug mga presidente sa templo ug mga matron. Oo, kadtong makadungog sa akong tingog karon mao kadtong kinsa may kalagmitang mahimo nga mga lider sa mga komunidad ug mga nasud sa kalibutan. Aduna kaninyo nga mahimong sakop sa kapangulohan sa kinatibuk-ang kababayen-an o gani General Authority Seventy o tingali sakop sa Korum sa Napulog Duha ka mga Apostoles.

Karon wala kamo masayud unsa ka talagsaon nga kaugmaon ang nag-atubang kaninyo!

Mga Lider sa Simbahan

Nakadungog ko nga ang ubang mga tawo naghunahuna nga ang mga lider sa Simbahan “walay nahibaloan mahitungod sa kalibutan.” Unsay ilang nakalimtan mao nga kaming mga kadagkoan sa simbahan may daghang mga kasinatian, ug nakapuyo sa daghang mga dapit ug nakatrabaho uban sa daghang mga tawo gikan sa nagkalain-laing mga kahimtang. Ang among mga buluhaton karon sa tinuod nagdala kanamo sa tibuok kalibutan, diin among gikahimamat ang politikanhon, relihiyuso, negosyante, ug humanitarian nga mga lider sa kalibutan. Bisan tuod og kami nakabisita sa White House sa Washington, D.C., ug mga lider sa mga nasud sa tibuok kalibutan, kami usab nakabisita sa labing kabus nga mga panimalay sa kalibutan, diin among nahimamat ug napangalagaran ang mga timawa.

Kon inyong hunahunaon pag-ayo ang among mga kinabuhi ug pagpangalagad, kamo kasagaran mouyon nga kami nakakita ug nakasinati sa kalibutan sa mga paagi nga diyutay ang nakahimo. Inyong masabtan nga kami daghan og “nahibaloan mahitungod sa kalibutan” kay sa kadaghanan sa mga tawo.

Ang uban moingon nga kami tigulang na kaayo. Aw, kini tinuod nga siyam sa mga Apostoles labaw sa 80 ang edad! Ako 85.

Hinoon, adunay butang kabahin sa usa ka tawo ug sa tinipon nga kaalam sa mga Brethren nga kinahanglan nga mohatag og gamayng kahupayan. Among nasinati kining tanan, lakip ang mga sangputanan sa lain-laing mga balaod ug mga polisiya sa publiko, pagkawala sa kadasig, mga trahedya, ug kamatayon sa atong pamilya. Nasabtan namo ang mga panghitabo sa inyong mga kinabuhi.

Sultihan ko usab kamo nga walay usa sa Napulog Duha nga manggiulawon. Kaming tanan may lig-on nga mga personalidad. Busa kon kami nagkahiusa sa usa ka desisyon, kamo makasalig nga kami nagtinambagay ug miabut niana nga desisyon human sa daghang pag-ampo ug mabinantayon nga paghisgot.

Ang akong mga apo gani naghunahuna nga ako “moderno”—kon gamiton ang ilang pulong. Akong nadunggan ang pipila sa mga young single adult nga nag-ingon nga ako “sosyal.” Nanghinaut ko nga ang “pagkasosyal” maayo!

Mga batan-on kami og kasingkasing, ug ang Ginoo nagpanalangin kanamo sa pagpalihok sa Iyang buluhaton sa talagsaon nga mga paagi. Karong gabhiona mohisgot ako kaninyo og tulo ka importanting hilisgutan: una, ang paggamit sa teknolohiya; ikaduha, ang pagbuntog sa pornograpiya; ug ikatulo, ang doktrina sa kaminyoon—tulo ka mahinungdanong mga isyu nga atong giatubang karon.

1. Ang Paggamit sa Teknolohiya

Una ang paggamit sa teknolohiya. Niadtong 2007 ug 2008, namulong ako ngadto sa mogradwar nga mga estudyante sa BYU–Hawaii ug BYU–Idaho. Niana nga mga okasyon miingon ako, “Dili kita magpabiling walay buhaton samtang ang uban, lakip ang atong mga kritiko, mosulay sa pagpasabut unsay gitudlo sa Simbahan.”¹ Niana nga panahon giaghat ko ang mga gradwado sa paggamit sa mga kauswagan sa teknolohiya sa pag-apil sa komunikasyon sa tibuok kalibutan mahitungod sa Simbahan. Kaingon nako og nakaapas ko sa panahon sa dihang misugyot ako nga sila makigbahin sa ilang mga opinyon diha sa mga blog. Sukad niana, gitudlo kanako ang Facebook, Twitter, Pinterest, YouTube, Google+, Instagram, ug akong secretary naghisgot nako, sa akong pagbiya, kabahin sa Snapchat. Wow! Ingon og ang kalibutan sa teknolohiya dili makahunong bisan sa pipila ka minuto.

Ang akong cell phone katingalahan! Ang mga Smartphone sa tinuod makatabang! Naghatag kini kanato og daghang katingalahang mga oportunidad, lakip ang pagpangita og impormasyon, paggamit og mapa para sa direksyon, pakigbahin og mga litrato ug mga mensahe, ug gani usahay ang aktwal nga pakigsulti ngadto sa usa ka tawo.

Ang modernong kalibutan nga atong gipuy-an karon kanunayng nausab, nga sa pipila ka mga paagi maayo ug sa ubang mga paagi dili kaayo maayo.

Kalainan tali sa Kaniadto ug sa Karon

Sukad sa mga panahon ni Adan ug ni Eva hangtud sa mga panahon ni Joseph ug Emma Smith, ang kalibutan nausab ingon og hinay gikan sa usa ka henerasyon ngadto sa lain.

Ang mga katawhan nga nagpuyo kaniadto nagpahimulos og abundang langitnong kahayag ug walay kuyaw nga kangitngit, walay mga suga sa mga dalan, suga sa mga sakyanan, ug artipisyal nga mga suga nga makita sa tanan natong mga siyudad sa tibuok kalibutan. Sa mga siyudad karon, hapit imposible nga makita magabii ang kahayag sa langit sama sa nakita kaniadto ni Abraham, Moises, Ruth, Elisabet, Jesus, ug ang unang mga Santos sa Ulahing mga Adlaw.

Nagpahimulos usab sila og natural nga kahilum, nga may diyutay nga hinimo sa tawo nga mga saba nga naghunong sa ilang mga adlaw ilabi na sa ilang mga gabii. Ang modernong saba gikan sa mga sakyanan, mga eroplano, ug sa usa ka butang nga ang pipila sa inyo moingon og musika hingpit nga motabon sa natural nga saba sa kalibutan. (Kinahanglan ninyong sabton, sa akong henerasyon, ang inyong gihunahuna nga musika ug akong gihunahuna nga musika—adunay dakong kalainan.) Dili na kamo makaadto og kan-anan nga walay background nga musikang gipatukar. Bisan sa kinalayoan nga mga kalasangan sa kalibutan, ang kahilum sa kasagaran mabungkag sa paglupad sa jet diha sa kahanginan.

Sa katapusan, ang katawhan sa unang mga panahon nakasinati og kahilum sa mga paagi nga dili nato mahanduraw sa atong nagtampusisok ug nagkapuliking kalibutan. Bisan kon kita nag-inusara karong panahona, mahimo kitang maminaw sa atong magunitang mga himan, mga laptop, ug mga TV sa paglingaw kanato ug paglinga.

Isip usa ka Apostol, mangutana ako karon kaninyo: Kamo ba adunay personal nga panahon sa kahilum? Ako naghunahuna kon kadtong kinsa nagpuyo kaniadto aduna bay mas daghang oportunidad kay kanato karon sa pagtan-aw, pagbati, ug pagsinati sa presensya sa Espiritu diha sa ilang mga kinabuhi.

Ingon og, samtang ang atong kalibutan mas nagkahayag, mas nagkalangas, ug mas nagkapuliki, kita adunay mas dakong hagit sa pagpamati sa Espiritu sa atong mga kinabuhi. Kon ang inyong kinabuhi walay panahon sa kahilum, buhaton ba ni ninyo karong gabii?

Propetikanhong Tambag

Importante kini nga mohilum ug mamati ug mosunod sa Espiritu. Daghan kaayo kita og mga kalinga nga mokuha sa atong atensyon, dili sama sa bisan unsang panahon sa kasaysayan sa kalibutan.

Ang tanan nagkinahanglan og panahon sa pagpamalandong ug sa paghunahuna. Bisan ang Manluluwas sa kalibutan, sa panahon sa iyang mortal nga pangalagad, may panahon sa pagbuhat niini. “Ug sa napapauli na niya ang mga panon sa katawhan, sa kabungturan mitungas siya nga nag-inusara aron sa pag-ampo: ug sa pagkasawomsom na, siya mao rang usa didto.”²

Tanan kita nagkinahanglan og panahon sa pagpangutana sa atong mga kaugalingon o sa pagbaton og regular nga personal nga interbyu sa atong mga kaugalingon. Kasagaran kita nagkapuliki ug ang kalibutan langas kaayo nga lisud madungog kining langitnong mga pulong “humilum kamo, ug ilhon ninyo nga Ako mao ang Dios.”³

Ang makuptan nga mga himan, sama sa mga smartphone, mga panalangin, apan kini makapalinga usab kanato gikan sa pagpamati sa “malinawon nga diyutayng tingog.” Sila kinahanglan nga atong mga sulugoon, dili atong mga agalon. Sama pananglit, kon unyang gabii kamo makigbahin og makadasig nga mga hunahuna gikan niining debosyonal kalabut sa social media, ang inyong smartphone usa ka sulugoon. Kon kamo sa walay tumong nag-surf sa Internet, ang inyong smartphone usa ka agalon.

Hinumdumi unsay nakat-unan ni Elijah: “Ang Ginoo wala diha sa hangin; … ang Ginoo wala diha sa linog: … ang Ginoo wala diha sa kalayo,” apan ang Ginoo misulti diha sa “malinawon nga diyutayng tingog.”⁴

Ang Atong Paggamit sa Teknolohiya

Lain nga pangutana: Sa tinuod, pila ka oras ang inyong gigahin kada adlaw sa inyong cell phone o tablet, walay labut sa trabaho sa eskwelahan o Simbahan?

Ang ilang kagamitan maayo, ug kini mga panalangin. Bisan pa niana, kon ang mga smartphone mosugod na sa pagbalda sa atong mga relasyon sa mga higala ug pamilya—ug gani labaw kaimportante, sa Dios—kita kinahanglan nga mohimo og kausaban. Alang sa pipila kaninyo, ang pagpahiangay gamay lang, alang sa uban, kini tingali dako kaayo.

Nabalaka usab ako nga ang sobrang pag-text, pag-Facebook, pag-tweet, ug pag-Instagram nagpuli sa pagpakigsulti—pakigsulti direkta sa usag usa ug pakigsulti sa Langitnong Amahan diha sa pag-ampo ug sa paghunahuna mahitungod sa mga butang nga labing importante sa kinabuhi.

Kasagaran kaayo, ang kabatan-onan makita sa samang kwarto uban sa pamilya o mga higala apan nagkapuliki sa pakigsinultihay sa usa ka tawo nga wala diha, sa ingon niana nawad-an sa oportunidad sa pakighinabi ngadto sa anaa sa duol. Kon kini mahitabo, tingali kinahanglan kamong mobiya sa kwarto ug mopadala og text ngadto kanila aron makuha ilang atensyon.

Unsay akong labing nakat-unan sa akong kinabuhi miabut gikan sa pagpaminaw ngadto sa may mahinungdanong kasinatian, kadtong kinsa taas og kinabuhi ug nakakat-on og daghang importanting mga butang nga kinahanglan akong mahibaloan. Palihug paningkamot sa pagbisita ug pakigsulti sa inyong mga ginikanan, mga iyaan ug mga uyoan, mga apohan samtang sila uban pa kaninyo.

Nabalaka usab ako nga ang pipila kaninyo mo-check sa inyong email, Facebook, Twitter, o Instagram o mopadala og mga text atol sa labing importanting pagpundok sa gipahiuli nga Simbahan ni Jesukristo sa mga Santos sa Ulahing mga Adlaw—ang atong sagradong miting sa sakrament. Niining importante nga miting kinahanglan kitang mopunting diha sa Ginoo pinaagi sa pag-ampo, pagkanta og mga himno, og sa pag-ambit sa mga simbolo sa Iyang lawas ug dugo kay sa magtutok diha sa atong himan sa multimedia. Dili kamo makakonektar sa Espiritu sa panahon sa paghalad sa sakrament samtang kamo nagtan-aw o nagpadala og mensahe diha sa inyong cellphone o inyong tablet. Kini nga koneksyon nagkinahanglan og Kahayag ni Kristo, pag-impluwensya sa inyong mga hunahuna ug mga pagbati uban sa gamhanang gugma ug debosyon.

Nasayud ko nga daghan kaninyo adunay mga kasulatan ug ubang mga kapanguhaan sa Simbahan diha sa inyong mga cell phone ug mga tablet. Ug gani nakadungog ko nga pipila sa mga ginikanan ug mga lider sa Simbahan nabalaka mahitungod niining labing bag-ong paglambo, apan ako wala.

Ang Simbahan kanunay naggamit og mga bag-ong teknolohiya sa pagtabang og duso sa buhat sa Ginoo sa unahan. Nagsugod kita sa pagpadala sa atong mga misyonaryo sakay og mga bapor niadtong mga 1830, apan gigamit nato ang tanyag sa mga barko sa mga 1860. Ug dayon gigamit nato ang mga eroplano isip ang labing maayo nga paagi sa pagpadala sa atong mga misyonaryo ngadto sa ilang mga buluhaton sa tibuok kalibutan sa mga 1960.

Ang kasaysayan mobalik pag-usab sa labing madanihong mga paagi. Sa kaniadto, gipreserbar sa Israel ang mga pulong sa mga propeta diha sa mga scroll [linukot nga mga papel]. May mga panahon, nga ang unang mga Kristiyanos migamit og pundok sa mga papel nga gibugkos ang kilid, ang unang bersyon sa modernong basahon.

Ania kita karon 2,000 ang milabay, ug kamong mga kabatan-onan nagbasa sa inyong mga kasulatan diha sa mga smartphone o mga tablet—nagbasa niini sama sa gibuhat ni Jesus sa dihang Siya gihatagan sa scroll ni Isaias nga pagabasahon didto sa Nazaret. Kamo usab maka-“scroll”⁵—apan palihug, ayaw og “scroll” panahon sa sakrament. Sa tinuod, sulod nianang mubo nga mga minuto kamo makapunting sa Pag-ula sa Manluluwas samtang kamo naninguha sa Espiritu sa Ginoo nga mopanalangin kaninyo sa umaabut nga semana. Ug hunahunaa ang pagpa-mute sa inyong cell phone o inyong tablet sulod sa tanang miting sa Dominggo. Kamo gihapon adunay inyong mga kasulatan, mga pakigpulong sa kinatibuk-ang komperensya, hymnbook, ug mga manwal, apan ayaw mo pabalda sa mga text o mga pahibalo.

Dangpanan gikan sa Unos

Agi og dugang sa pagpangita og oras sa paghunahuna ug pamalandong, nagkinahanglan usab kitang mangita og usa ka dapit, ingon nga gihisgutan diha sa Doktrina ug mga Pakigsaad, nga mahimong “usa ka panalipod, ug … usa ka dangpanan gikan sa unos.”⁶

Nagkinahanglan kita og usa ka espesyal nga dapit nga dangpanan diin makadistansya kita sa atong mga kaugalingon gikan sa balda sa elektronik nga mga himan pinaagi sa paghunong niini aron makakonektar kita sa Espiritu sa Dios.

Usa sa labing nindot nga mga dapit nga makakonektar sa Espiritu mao ang templo—ang balay sa Ginoo. Dayag lang, sama ang ikasulti sa atong ubang gipahinungod nga mga building, lakip ang mga klasroom sa seminary ug institute. Makakaplag kita og dangpanan diha sa atong mga panimalay o mga apartment kon pilion lamang nato ang pagpawong ug paghilum ug pagkat-on sa mga butang kabahin sa Dios.

Aron sa pagtabang kanato sa pagdiskobre sa kalibutan diin si Adan ug si Eva, Abraham ug Sara, Jose ug Maria nakakaplag sa Dios, ug aron sa pagtabang kanato sa pagpangita og usa ka dapit nga mabati ug madungog ang tingog sa Ginoo karon, nagdapit ako kaninyo sa pag-adto sa templo. Adto mo kutob sa itugot ug palunga ang inyong mga smartphone ug tagoa kini sa dili pa mosulod sa mga palibut sa templo.

Sa tanang mga ordinansa diha sa balay sa Ginoo, inyong madungog ang nindot nga pinulongan, mga pulong, ug mga saad nga gihatag sa Ginoo ngadto sa Iyang mga anak. Kini mao lamang ang dapit nga kamo makadungog nianang nindot, makadasig nga mga pulong.

Kon kamo dili pa mahatagan og rekomend sa templo karon, bisitahi ang mga palibut sa templo. Tuguti ako sa paghimo og importante kaayo nga punto kon kamo wala pa makadungog niini kaniadto: Walay nagpugong kaninyo o ni bisan kinsa pa sa pagbisita sa mga palibut sa templo. Ang Ginoo buot kaninyo nga mangandam sa inyong mga kaugalingon nga mahimong takus para sa rekomend sa templo ug moadto dayon sa templo kon kamo makahimo. Ang pagsuroy sa palibut motanom diha sa inyong kasingkasing og tinguha sa pagkuha og rekomend ug sa pagtambong sa templo kanunay.

Si Satanas, sa laing bahin, dili buot nga moadto kamo sa templo o gani sa pagtindog diha sa duol sa templo. Buot niya nga molikay mo bisan sa pagpaduol sa templo tungod kay ang templo mao ang balay sa Ginoo.

Ipaniguro ko kaninyo nga samtang kamo moadto sa templo o mobisita sa mga palibut sa templo, kamo maglakaw sa sagrado, balaan nga palibut sama sa gibuhat sa unang mga patriyarka ug mga matriyarka sa dugay nang panahon. Sila nagpunting sa ilang mahangturong panaw ug sa labing importante nga mga butang sa kinabuhi. Sama kanila, makapunting usab kamo sa pagbati sa gahum ug sa presensya sa langit.

Kon inyong gusto, inyong mabati ang malinawon nga diyutayng tingog sa Espiritu diha sa templo o sa sagradong mga palibut niini sa mga paagi nga dili gyud ninyo mabati diha sa mga mall, sa mga kan-anan, ug sa mga publikong mga dapit. Sa tinuod, inyong mahibaloan nga ang templo usa ka nindot kaayo nga dapit nga madawat ang mga tubag sa inyong mga pag-ampo.

Bag-ohay pa, gipahinungod ni Presidente Thomas S. Monson ang Gilbert Arizona Temple. Sa panahon sa pag-ampo sa pagpahinungod gipangayo niya sa Ginoo, “Hinaut nga ang Imong Espiritu mopuyo dinhi, ug hinaut nga ang impluwensya niini mabati sa tanan kinsa moanhi sulod niini nga mga bongbong.” Nag-ampo usab siya: “Hinaut kining, Imong balay, mahimong usa ka puy-anan sa kalinaw, dangpanan gikan sa mga unos sa kinabuhi ug sa kalangas sa kalibutan. Hinaut nga kini usa ka balay sa lawom nga paghunahuna kalabut sa mahangturong kinaiya sa kinabuhi ug sa Imong balaan nga plano alang kanamo.”⁷

Ang tanan nga mga templo gihalad ngadto sa Ginoo mga “puy-anan sa kalinaw, usa ka dangpanan gikan sa mga unos sa kinabuhi ug sa kalangas sa kalibutan … [ug] balay sa pagpamlandong.”

Ang Kaatbang

Ang kalibutan nga atong gipuy-an karon kusog kaayong nagkalayo gikan sa mga pagtulun-an ni Kristo sa mga balaod ug sa mga paagi sa kinabuhi. Agig resulta, si Satanas naningkamot og maayo sa paglibug sa mga anak sa Dios ug sa pagpahisalaag sa mga pinili gikan sa pagtuman sa ilang katungdanan ug sa pagdawat sa kahingpitan sa mga panalangin sa Ginoo.

Gusto ni Satanas nga mohunong kamo sa pagbansay og maayong mga kinaiya nga inyong nakat-unan sa panimalay, sa seminary ug sa institute, ug sa inyong misyon—sama sa paghimo og inadlaw nga pagtuon sa kasulatan, pag-ampo kada adlaw, takus nga moambit sa sakrament kada semana, ug sa paghatag og tinuoray, kinasingkasing nga serbisyo. Gusto usab niya nga molikay kamo karon sa pag-apil sa importante ug malisud nga mga pakigbisog.

Timan-i, mga kabatan-onan, kita nakiggubat—apan dili gubat sa mga pusil ug mga bala. Bisan pa niana, ang gubat tinuod, uban sa dili maihap nga nabiktimang mga tawo. Ang gubat sa pagkatinuod sumpay sa gubat nga nasugdan sa kalibutan sa wala pa dinhi sa yuta.

Gidapit kita ni Pablo sa “pagsul-ob sa tibuok hinagiban sa Dios.” Siya miingon, “Kay ang atong pakigdumog dili batok sa mga binuhat nga unod ug dugo, kondili batok sa mga punoan, batok sa mga kagamhanan, batok sa mga labawng agalon niining mangitngit nga kalibutan karon, batok sa mga dautan nga espirituhanong panon diha sa mga dapit sa kalangitan.”⁸

Isip Apostol ni Ginoong Jesukristo, nagdapit ako kaninyo nga nakadungog sa akong tingog, sa dakong kalibutan asa kita nagpuyo sa “pagsul-ob sa tibuok hinagiban sa Dios” ug apil sa gubat karon, sama sa gibuhat sa anak nga mga lalaki ni Helaman daghang tuig na nga milabay. Ayaw paghulat hangtud kamo maminyo o magsugod sa inyong tibuok kinabuhi nga trabaho o magkahamtong. Ang Simbahan nagkinahanglan sa atong kabatan-onan karon. Ang Ginoo nagkinahanglan ninyo karon!

Inyong mahinumduman nga ang 2,000 ka libo nga batan-ong mga manggugubat “misulod ngadto sa usa ka pakigsaad sa pagpakig-away alang sa kalingkawasan sa mga Nephite.”⁹ Ang Simbahan nagkinahanglan og modernong batan-ong mga manggugubat nga mohimo og pakigsaad “nga mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit.”¹⁰

Ang Basahon ni Mormon naghulagway niining batan-ong mga lalaki sa mosunod:

“Ug silang tanan batan-on … , ug sila hilabihan ka walay kahadlok tungod sa pagkaisug, ug usab sa pagkakusgan ug pagkaabtik; apan tan-awa, kini dili mao ang tanan—sila mga … matinud-anon sa tanan nga panahon sa bisan unsa nga butang nga gisalig kanila.

“Oo, sila mga tawo sa kamatuoran ug kaligdong, kay sila gitudloan sa paghupot sa mga sugo sa Dios ug sa paglakaw nga matarung sa iyang atubangan.”¹¹

Kamong batan-ong mga babaye ug mga lalaki mao ang modernong anak nga mga babaye ug lalaki ni Helaman. Hinaut nga kini masulti bahin kaninyo sama nga kini nasulti bahin kanila. “Sila nahimo niini nga panahon … og usa ka dako nga panabang.”¹²

2. Pagsumpo sa Pornograpiya

Ang ikaduhang butang nga gusto nakong higsutan mao nga kita kinahanglang magkahiusa sa pakigbatok sa pornograpiya. Kini grabeng kadaut nga nagkanap sa tibuok kalibutan. Hangyoon ko kamo sa pagpaminaw nako samtang akong ipasabut ang usa ka ehemplo sa kaalam sa Ginoo.

Sobra sa 180 ka tuig ang milabay, ang Ginoo mipadayag sa Iyang balaod kalabut sa panglawas, lakip ang usa ka pasidaan mahitungod sa paggamit sa tabako.¹³ Minilyon ka mga tawo naminaw sa Ginoo, apan mas daghan ang wala maminaw. Walay usa nga nahibalo niana nga panahon o gani samtang ako sama sa inyong edad sa dugay nga epekto sa pagpanabako. Karon, human sa mga dekadang siyentipikanhon nga pagsiksik, nahibalo na kita karon sa epekto sa pagpanabako diha sa kanser sa baga ug sa ubang makuyaw nga mga sakit. Ang Pulong sa Kaalam sa Ginoo usa ka panalipod nga panalangin.

Sa samang paagi ang Ginoo sa atong panahon nagpasidaan kanato mahitungod sa epekto sa pornograpiya. Minilyon ka mga tawo matinud-anong nagsunod sa tambag sa Ginoo, samtang dili maihap ang wala mosunod. Dili kita kinahanglan nga maghulat, akong mga higala, og 180 o gani 10 ka tuig nga madiskubre ang makalaglag nga mga epekto sa pornograpiya tungod kay ang bag-ong siyentipikanhong pagsiksik nagpadayag nga ang pornograpiya makadaut sa mga young adult sa daghang mga paagi ug nagguba sa ilang mga kahigayunan nga usa ka adlaw niana makabaton og mahigugmaon ug mahangturong relasyon sa kaminyoon.

Ang pagsiksik nagpakita usab nga ang kanunay nga pagtan-aw sa pornograpiya makagiya ngadto sa dili kapugngan nga mga kinaiya ug makausab sa dagan sa utok nga mabilanggo sa pagkaadik ang usa ka tawo.

Ang pagsiksik nakatino usab nga ang pornograpiya nag-awhag og bakak nga mga paglaum ug naghatag ug makuyaw nga sayop nga pagtudlo mahitungod sa panglawas sa tawhanong panghilawas.

Ang labing makadaut, ang pornograpiya nagkondisyon kaninyo sa pagtan-aw sa mga tawo ingon og mga butang nga inyong ibaliwala ug ang walay emosyonal ug pisikal nga pagtahud.

Lain nga aspeto sa pornograpiya mao nga kana sa kinatibuk-an usa ka “sekreto” nga kalihokan. Ang mga tiggamit kasagaran nagtago sa ilang paggamit o sa labing minus pakubsan ang ilang paggamit gikan sa tanan, lakip sa ilang romantikong mga paris ug mga kapikas. Nakaplagan pinaagi sa pagtuon nga kon ang mga tawo mohimo niini nga matang sa pagtago sa kaugalingon—kon sila mobuhat og mga butang nga sila dili mapasigarbuhon ug ipabilin kadtong mga butanga nga sekreto gikan sa sakop sa ilang mga pamilya ug mga higala—dili lamang kini nagdaut sa ilang mga relasyon ug nagpabilin kanila nga nag-inusara apan naghimo usab kanila nga mas madutlan og kaguol, kabalaka ug ubos og pagtan-aw sa kaugalingon. Ang pagtago og mga sekreto nagguba sa pagsalig.

Sa sinugdan, kita kinahanglan sa atong kaugalingon nga molikay gayud sa pornograpiya tungod kay kini makapatay. Kini nagpatay sa tinuod, malumo nga tawhanong mga relasyon—nagguba sa mga kaminyoon ug mga pamilya. Kini nagguba sa espiritu sa tawo kinsa naglamoy niini sama ka tinuod nga ang labing kuyaw nga hilo nagpatay sa lawas ug sa hunahuna.

Akong pinalanggang mga kaigsoonan, ayaw pailad. Ayaw paghunahuna nga kon kamo magmisyon o magminyo makahunong kamo niining makaadik nga kinaiya. Kon kamo naghimo niini karon, kon kamo nalaang niini nga buhat, kuha og espiritwal nga tabang karon. Kamo makabuntog sa pornograpiya uban sa tabang sa Manluluwas. Ayaw paghulat! Mohangyo ko kaninyo nga biyaii kini! Adunay daghang kapanguhaan sa LDS.org nga makabuntog sa mga kadaut sa pornograpiya.

Mahagiton kini nga mga panahon—apan dili sama ka mahagiton sa mga panahon ni Helaman ug sa iyang anak nga mga lalaki sa dihang sila mibarug sa pagpanalipod sa ilang mga pamilya ug sa Simbahan. Kini inyong panahon sa pagpakita ug pagkuyog sa pundok sa ubang mga matarung ug matinud-anong kabatan-onan sa pakig-away sa gubat batok sa pornograpiya.

3. Ang Doktrina sa Kaminyoon

Karon mamulong ko sa ikatulo nga hilisgutan. Ug gusto nako nga inyong masabtan, sa mabinantayong paagi, ang baruganan sa Simbahan kabahin sa kaminyoon sama sa gihatag sa Langitnong Amahan kanato pinaagi sa kasulatan ug sa “Ang Pamilya: Usa ka Pamahayag ngadto sa Kalibutan.” Kana nga dinasig nga dokumento nagpahayag: “Ang pamilya gi-orden sa Dios. Ang kaminyoon tali sa lalaki ug sa babaye mahinungdanon ngadto sa Iyang walay katapusan nga laraw. Ang mga anak adunay katungod nga matawo ngadto sa mga ginikanan kinsa naminyo, ug maamumahan sa usa ka amahan ug sa usa ka inahan nga nagtahud sa mga panaad sa kaminyoon uban sa hingpit nga pagkamatinuoron.”¹⁴

Ang mga Apostoles gisugo nga mahimong magbalantay didto sa mga tore sa pagtan-aw ug pagtudlo sa doktrina ni Kristo. Tanan kamo nahibalo nga ang karaan nga pagpasabut sa kaminyoon giatake karon. Adunay nagmugma og mga diskusyon nga nag-focus sa mga pulong sa sibikong mga katungod. Ang Unang Kapangulohan ug ang Korum sa Napulog Duha ka mga Apostoles mipasabut sa baruganan ug doktrina sa Simbahan kalabut sa katuyoan ug plano sa Dios alang sa Iyang espiritung mga anak sa pagsinati og mortal nga kinabuhi, nga gikinahanglan sa atong walay katapusan ug mahangturon nga kinabuhi.

Ako moingon nga daghan kaninyo tingali wala makabasa sa pahayag nga gipagula sayo niini nga tuig. Ako mokutlo niining pahayag ug mohangyo kaninyo nga maminaw og maayo:

“Ang mga kausaban sa sibil nga balaod dili, sa pagkatinuod dili, makausab sa moral nga balaod nga gitukod sa Dios. Ang Dios naglaum nga kita motuman ug mosunod sa Iyang mga sugo dili igsapayan sa nagkalain-laing mga opinyon o uso sa katilingban. Ang iyang balaod sa kaputli klaro: ang sekswal nga mga relasyon angay lamang tali sa usa ka lalaki ug usa ka babaye kinsa legal ug subay sa balaod nakasal isip bana ug asawa. Nag-aghat kami kaninyo sa pagribyu ug pagtudlo sa mga miyembro sa Simbahan sa doktrina nga anaa sa ‘Ang Pamilya: Usa ka Pamahayag ngadto sa Kalibutan.’”

Ang pahayag nagpadayon:

“Sama niadtong nag-awhag og sama nga sekso nga kaminyoon nga may katungod nga tahuron, mao usab ang niadtong mosupak niini. …

“Isip mga miyembro sa Simbahan, responsibilidad nato ang pagtudlo sa ebanghelyo ni Kristo ug sa pagsangyaw sa dagkong mga panalangin nga nagagikan sa pagsunod sa mga sugo sa Dios ingon man sa dili kalikayan nga mga sangputanan sa pagbaliwala niini. Gidapit namo kamo sa pag-ampo nga ang mga tawo bisan asa mopahumok sa ilang mga kasingkasing ngadto sa mga kamatuoran sa ebanghelyo, ug anga kaalam ihatag ngadto niadtong gitawag diha sa paghukom sa mga isyu nga importante sa kaugmaon sa katilingban.”¹⁵

Nahibalo ako nga naghigugma ug nagsuporta kamo sa Ginoo ug nagpaluyo sa Iyang mga propeta, apan nasayud usab ako nga pipila kaninyo tingali naglibug sa daghang mga kahulugan sa mga desisyon sa Simbahan sa pagpaluyo sa gipadayag nga plano alang sa Iyang mga anak.

Nahibalo usab ko nga pipila sa atong mga kabatan-onan naningkamot sa pagsabut kon unsaon pagpasabut ang doktrina mahitungod sa pamilya ug kaminyoon ug sa gihapon magpabilin nga maloloy-on, malumo, ug mahigugmaon ngadto niadtong kinsa dili mouyon. Tingali nahadlok kamo nga hinganlan og ipokrito ug walay pagtagad sa uban

Tingali nakaila mo og tawo kinsa nanlimbasug batok sa samang sekso nga gugma o nakahimo og desisyon sa pakigpuyo og samang sekso nga relasyon. Ang inyong gugma niana nga tawo isip anak nga lalaki o babaye sa Dios makamugna og panlimbasug samtang kamo maninguha sa paghigugma ug pagsuporta kanila ug sa gihapon mobarug alang sa plano sa Ginoo sa mahangturong kalipay.

Atong klarohon karong gabhiona—Ang Simbahan ni Jesukristo sa mga Santos sa Ulahing mga Adlaw nagtuo nga “ang kasinatian sa samang sekso nga kaibug usa ka lisud nga kamatuoran alang sa daghang mga tawo. Ang kaibug dili usa ka sala, apan ang pagbuhat niini sala. Bisan tuod og ang indibidwal wala magpili sa pagbaton niana nga kaibug, sila nagpili unsaon sa patubag niini. Uban sa gugma ug pagsabut, ang Simbahan nagkab-ut ngadto sa tanang mga anak sa Dios, lakip [niadtong adunay kaibug sa samang sekso].”¹⁶

Ang Simbahan wala magtudlo o magpasiugda sa paglikay o ubang dili kristiyanong mga lihok. Kinahanglan gayud nga atong higugmaon ug maningkamot sa pagtabang sa uban sa pagsabut nga walay usa nga mobaliwala o dili magtagad sa mga sugo sa Dios.

Usa ka Saksi ug usa ka Pasidaan

Sa katapusan, diha sa “Ang Pamilya: Usa ka Pamahayag ngadto sa Kalibutan,” ang Unang Kapangulohan ug ang Korum sa Napulog Duha ka mga Apostoles namahayag: “Kami mopahimangno nga ang tagsa-tagsa kinsa makalapas sa mga pakigsaad sa kaputli, kinsa moabuso sa ilang kapikas o mga anak, o kinsa mapakyas sa pagtuman sa mga kapangakohan sa pamilya moabut ang adlaw nga mobarug nga adunay tulubagon atubangan sa Dios. Dugang pa, kami mopahimangno nga ang pagkabungkag sa pamilya makadala sa tagsa-tagsa, mga komunidad, ug sa mga nasud sa katalagman nga gipanagna sa karaan ug sa bag-o nga mga propeta.”¹⁷

Ako miapil niini nga pasidaan. Isip usa sa mga magbalantay didto sa tore, ako responsable nga “huypon ang trumpeta, ug pasidan-an ang katawhan.”¹⁸ Karong gabhiona ako kusganon ug gipataas ang pasidaan nga tingog. Gibuhat ko kini tungod kay gihigugma ko kamo ug buot kaninyo nga makasabut nga kinahanglan gayud nga atubangon nato ang Ginoo, ug sundon ang Iyang mga sugo. Kana mao ang akong katungdanan.

Ang Maayong Balita

Ang pasidaan sa Ginoo giapilan usab sa pagdapit sa pagduol Kaniya. Ang atong Amahan sa Langit nasayud sa mga sangputanan sa pagpuyo sa napukan nga kalibutan ug, busa, naghatag og Manluluwas, “sa wala pa ang pagkatukod sa kalibutan og gipatay nga Karnero” alang sa Iyang mga anak.¹⁹ Diha sa ebanghelyo ni Juan, atong makat-unan, “Kay gihigugma gayud sa Dios ang kalibutan nga tungod niana gihatag niya ang iyang bugtong Anak, aron ang tanan nga mosalig kaniya dili malaglag, kondili may kinabuhing dayon.”²⁰

Palihug hinumdumi nga ang ebanghelyo mao ang “maayong balita.” Kini usa ka mensahe sa paglaum. Kon kamo anaa sa kagubot karon, pangayo og tabang. Ang Ginoo maloloy-on ug mapasayloon.

Gitudlo ni Apostol Pablo:

“Kinsa ba ang makapahimulag kanato gikan sa gugma ni Kristo? Ang pag-antus ba o ang kasakitan, o ang paglutos, o ang gutom, o ang kahubo, o ang katalagman, o ang espada ba? …

“Dili, hinonoa niining tanang mga butanga labaw pa kita ka mananaog pinaagi kaniya nga nahigugma kanato.

“Kay masaligon ako nga walay kamatayon o kinabuhi, o mga manulonda, o mga punoan, o mga butang karon, o butang nga umaabut, o mga gahum,

“O kahabugon, o giladmon, o bisan unsa diha sa tibuok kabuhatan, nga arang makapahimulag kanato gikan sa gugma sa Dios, sa gugma nga anaa kang Kristo Jesus nga atong Ginoo.”²¹

Tungod ni Jesukristo, ang kalinaw makapuli sa sala. Ang maayo nga mga relasyon mapahiuli. Ang mga adiksyon mabuntog.

Kinahanglan nga ang atong pamilya ug atong mga higala makahibalo niini nga kamatuoran—ang Dios gugma, “ug siya nagdapit kanilang tanan sa pagduol ngadto kaniya ug sa pag-ambit sa iyang kaayo, ug siya wala maglimud kang bisan kinsa nga moduol ngadto kaniya.”²²

Nagkinahanglan kami kaninyo nga moapil sa buhat sa kaluwasan sa wala pa, atol sa, ug human sa inyong mga misyon.

Ang Paggamit sa Teknolohiya sa Pagpanalangin og mga Kinabuhi

Ang Ginoo nagdapit kaninyo nga moapil ug mogamit sa bisan unsa nga online nga social media nga inyong gusto sa pagpakigbahin sa ebanghelyo ug mobarug isip modernong anak nga mga lalaki ug mga babaye ni Helaman diha sa dakong gubat sa katapusang mga adlaw. Siya gusto kaninyo nga mahimong modernong anak nga mga lalaki kinsa mobarug nga maisug ug magkahiusa sa pagpanalipod sa kamatuoran. Siya gusto kaninyo nga isug ug kusgan atubangan sa mga pagdasdas sa kaaway. Kita nahibalo nga sa katapusan ang Ginoo modaug ug si Satanas mapildi.

Pinaagi sa nagkalain-laing online nga social media makahimo kamo og panaghisgutay kabahin sa ebanghelyo uban sa pamilya, mga higala, ug, alang kaninyo nga mga returned missionary, bisan sa mga investigator kaniadto ug sa bag-ong mga miyembro. Kamo makabarug isip mga saksi sa kamatuoran ug makapanalipod sa gingharian.

Pagpanalipod sa Gingharian

Ako nahibalo nga pipila kaninyo naguol mahitungod sa nahukman nga sayop, gibiay-biay, ug gani gibugal-bugalan kon kamo mobarug alang sa Langitnong Amahan ug ni Ginoong Jesukristo ug sa Simbahan. Akong nasabtan ang inyong mga kabalaka.

Miserbisyo ako sa British Mission human sa katapusan sa Ikaduhang Gubat sa Kalibutan isip usa ka batan-ong misyonaryo. Niana nga panahon ang mga Mormon “usa ka yubit ug usa ka pagya,”²³ ug ang mga misyonaryo gikataw-an ug gibiaybiay. Gani ang mga tawo molabay og butang nato, ug luwaan kita sa pipila. Bisan pa niana, wala kami moatras, apan kita mopadayon sa pagpamatuod ug sa pagpakigbahin sa ebanghelyo. Sama ni Abinadi, dili kita mouk-ok, sama ni Pablo, dili kita mouk-ok, ug sama sa Manluluwas, dili kita mouk-ok. Niana nga panahon dili namo mahanduraw ang gibug-aton sa among mga paghago. May 14 ka district kami ug walay mga stake. Karon, 46 ka mga stake sa Zion anaa sa British Isles.

Akong minahal nga batan-ong mga higala, ayaw kaguol mahitungod niadtong anaa sa dako ug lapad nga building. Nakita ni Nephi nga sila nagbiaybiay ug nagtulisok sa ilang mga “tudlo paingon ngadto kanila kinsa miabut ug mikaon sa bunga.”²⁴ Ayaw sunda kadtong kinsa “human sila makatilaw sa bunga sila nangaulaw, tungod niadto nga nagbugal-bugal kanila; ug sila nangahulog ngadto sa gidili nga mga dalan ug nangawala.”²⁵

Kamo dako ug importanting henerasyon, ug kini usa ka importanting panahon nga mabuhi! Ang kaugmaon hayag. Ingna ang inyong mga kaugalingon karong gabii, “Ako nagtabang sa Ginoo samtang ako nagkab-ot sa pagpakigbahin sa akong pagpamatuod ug sa pagtudlo sa mga kamatuoran nga gipadayag sa Dios niining panahona.”

Karon, kamo adunay oportunidad sa paggamit sa tanan niining social media uban sa kaalam aron makigbahin unsay inyong nakat-unan ug gibati karong gabhiona. Hinumdumi nga adunay angay nga panahon ug dapit alang kaninyo sa paggamit sa social media, ug ang pagpakigbahin sa inyong mga hunahuna ug pagpamatuod sa mga butang nga inyong nakat-unan ug nabati mao ang usa niini nga panahon.

Pagpamatuod ug Pagsaksi

Unta ang Ginoo mopanalangin kaninyo og kaalam sobra pa sa inyong mga katuigan, nga kamo makaamgo nga kita anaa niining gubat ug kita magkahiusa, batan-on ug tigulang. Nag-ampo ko nga ang atong Langitnong Amahan mobantay ug mopanalangin kaninyo. Palihug, sayri, ang among dakong gugma para ninyo. Ug ako nangamuyo sa atong Langitnong Amahan sa pagpanalangin kaninyong tanan, bisan asa mo nga dapit niining kalibutan, kinsa naminaw niining debosyonal, uban sa kalinaw sa Ginoo sa inyong kasingkasing ug kasiguroan nga si Jesukristo buhi, nga Siya Anak sa Dios, nga kini Iyang Simbahan. Unta ang kalinaw ug gahum maanaa kaninyo. Unta ang atong Langitnong Amahan mogiya kaninyo. Unta dili ninyo kalimtan, sa inyong panaw, kamo bililhon, kamong tanan, sa umaabut nga pagpangandam sa kalibutan nga si Jesukristo moingon “Igo na” ug mobalik ug modumala isip Manluluwas, ang Ginoo sa mga ginoo, ang Hari sa mga hari, ang Manunubo sa kalibutan, kinsa ako mopamatuod nga buhi. Kita naghisgut niadtong mga butang nga importante Kaniya karong gabhiona. Unta kita mobiya niining miting nga puno sa gugma sa Ginoo ug tinguha sa pagserbisyo Kaniya mao ang akong mapainubsanong pag-ampo, sa sagradong ngalan ni Ginoong Jesukristo, amen.

Mubo nga mga sulat