56:1

Unsa ang Blueprint sa Simbahan ni Kristo?

Elder Tad R. Callister

Sa Kapangulohan sa Seventy

CES Devotional alang sa mga Young Adults • Enero 12, 2014 • Brigham Young University

Dakong kalipay nga gikauban niining gabhiona ang umaabut nga mga lider ug ginikanan niini nga Simbahan. Tungod niana, nagtuo ko nga sigurado ug hayag ang kaugmaon niini nga Simbahan. Busa, gusto ko nga maghisgut bahin sa Simbahan diin ugma damlag kamo ang modumala.

Sa unang seksyon sa Doktrina ug mga Pakigsaad, ang Ginoo mihimo niining klaro ug importante nga pamahayag: “[Kini mao] lamang ang tinuod ug buhi nga simbahan diha sa ibabaw sa tibuok yuta” (D&P 1:30). Unsa ang ipasabut niini? Wala kini magpasabut nga ang ubang simbahan walay mga kamatuoran, kay aduna gayud sila. Wala kini magpasabut nga ang ubang simbahan walay gihimong maayo, kay sila naghimo og daghang kaayohan. Ang ipasabut mao nga kini lang ang simbahan nga aduna sa tanang kamatuoran nga gipadayag niini nga dispensasyon—mao lang ang simbahan nga dunay mga ordinansa nga gikinahanglan sa kaluwasan ug mao lang ang simbahan nga dunay priesthood sa Dios aron mapahigayon kana nga mga ordinansa nga may balaanong katungod. Unsay atong ebidensya niini nga pamahayag?

Pipila ka tuig ang milabay ang akong asawa ug ako nagkinahanglan og mas dakong balay alang sa among nagkadako nga pamilya, mao nga nangita mi og yuta nga matukuran. Migahin mi og panahon sa paghimo og blueprint nga mohaum gayud sa panginahanglan sa among pamilya. Ang akong asawa ang midesinyo sa mapilo-pilo nga pultahan sa tunga sa lawak sa among pamilya ug sa sala nga maabli alang sa mga kalihokan sa dakong pamilya ug kabatan-onan. Sa sobra nga luna dapit sa garahian, among gihimoan og lawak diin ang among mga anak makahimo og tarung nga mga kalihokan. Usa ka gamayng lawak ang gihimo tupad sa garahian aron katipigan og pagkaon ug uban pa. Kini ug uban pa nga mga elemento nga gidesinyo anaa tanan sa usa ka blueprint. Ang balay gihimo sumala niini nga mga plano.

Samtang gitukod ang balay, usahay mosumiter mi ngadto sa nagtukod og kausaban nga nakausab sa blueprint. Dihang nahuman na ang balay, tukma kaayo kini sa among blueprint nga giusab matag karon ug unya. Kon kuptan ninyo ang among blueprint ug itandi kini sa matag balay sa kalibutan, pila kaha ka balay ang hingpit nga motukma niini? Usa lang—among balay. Tingali dunay susama niini—ang lawak pareho og gidak-on, susama og bintana—apan ang pundasyon, lawak, ug atup, usa lang ka balay ang hingpit nga motukma sa blueprint—among balay.

Sa samang paagi si Kristo mitukod og balay nga mohaum gayud sa espirituhanong panginahanglan sa Iyang mga anak. Gitawag kini og Iyang Simbahan. Ang espirituhanong blueprint niini nga Simbahan makita diha sa Bag-ong Tugon. Usahay ang Manluluwas mihimo og “kausaban” sa blueprint. Ang ingon nga kausaban sa mando miabut sa hulagway sa usa ka pagpadayag. Pananglitan, ang Manluluwas sa sinugdan mimando sa Iyang mga Apostoles sa pagsangyaw sa ebanghelyo ngadto sa balay ni Israel apandilingadto sa mga Hentil (tan-awa saMateo 10:5–6). Apan, human sa Pagbayaw sa Maluluwas, mihatag Siya ni Pedro sa kausaban sa mando—usa ka pagpadayag pinaagi sa panan-awon—nga ang ebanghelyo itudlo na ngadto sa mga Hentil (tan-awa saMga Buhat 10). Kini nga kasinatian ni Pedro nagtudlo og duha ka importanting baruganan sa pagdumala sa Simbahan ni Kristo: una, ang blueprint mahimong usbon, apan pinaagi lang sa pagpadayag ni Kristo, ug ikaduha, ang pagpadayag moabut sa propeta nga tigpama-ba sa Dios dinhi sa kalibutan. Buot ipasabut, ang Simbahan sa Dios pagadumalaon pinaagi sa pagpadayag ug pagmando.

Kon ang tawo gusto nga makadiskubre sa Simbahan ni Kristo karon, kinahanglan nga ang espirituhanong blueprint nga makita diha sa Bag-ong Tugon iyang itandi sa matag Kristohanong simbahan sa kalibutan hangtud iyang madiskubrihan ang simbahan nga motukma sa blueprint—organisasyon, pagtulun-an, ordinansa, bunga, ug pagpadayag. Sa pagbuhat niini, tingali iyang makita ang ubang simbahan nga adunay pagkasusama—ang usa ka pagtulun-an o duha parehas, ang ordinansa managsama, ang mga buhatan parehas og ngalan—apan usa lang ka simbahan ang iyang makit-an, Ang Simbahan ni Jesukristo sa mga Santos sa Ulahing mga Adlaw, nga motukma sa blueprint sa tanang butang. Karon gusto nakong sulayan kana nga pamahayag.

Paklion nato ang unang pahina sa blueprint ug tan-awon unsa ang organisasyon sa Simbahan ni Kristo sigun sa gipadayag dinhi.

Una, ang Simbahan ni Kristo gitukod nga dunay mga apostoles ug mga propeta. Dihang si Pablo misulat sa pipila sa bag-ong mga miyembro sa Simbahan, miingon siya nga sila karon “natukod ibabaw sa patukoranan nga … mga apostoles ug mga propeta, nga niini si Jesukristo mao ang ulohang bato sa pamag-ang” (Mga Taga-Efeso 2:20; mga italic gidugang).

Ang mga Apostoles nakasabut sa kamahinungdanon nga ang Korum sa Napulog Duha ka mga Apostoles kompleto. Dihang ang usa ka Apostol, sama ni Judas, namatay ug ang usa ka bahin sa patukoranan “nawala,” ang 11 ka Apostoles nagpundok ug mipili og ipuli aron ang patukoranan makompleto pag-usab (tan-awa sa Mga Buhat 1:22–25).

Kini nga sumbanan nagpakita sa kaimportante nga magpadayon ang korum sa napulog duha ka mga Apostoles. Importante kaayo kining mga Apostoles sa kaayohan sa Simbahan nga si Pablo mipahayag kon hangtud kanus-a nato sila kinahanglanon: “Hangtud makakab-ot kitang tanan sa pagkahiniusa sa pagtuo” (Mga Taga-Efeso 4:13). Ug dayon mipasabut siya kon ngano: Aron kita dili “igatuyatuya ug igaliyokliyok sa tanang hangin sa tuloohan” (Mga Taga-Efeso 4:14). Sa ingon, ang mga Apostoles higpit kaayo nga magpabiling lunsay ang doktrina.

Pananglit kon mosugilon ko og istorya sa usa ka tawo nga naglingkod sa akong atubangan, ug dayon ipasa niya kini sa tawo nga naglingkod tupad niya, ug ipasa hangtud ngadto sa katapusang lingkuranan. Unsa ang mahitabo niana nga istorya? Mausab kini. Mausab gayud kini; kana ang tawhanong kinaiya. Ingon usab niana ang doktrina nga gitudlo sa mga Apostoles dihang miadto sila sa nagkalainlaing mga lungsod ug lugar. Sa pagpasa-pasa sa doktrina gikan sa usa ka tawo ngadto sa lain, nagsugod ang pagkausab niini. Kon adunay mga Apostoles, makorhian nila ang doktrina pinaagi sa mga sulat o mga wali. Apan dihang ang mga Apostoles wala na, wala nay misuta, wala nay mikorihir, ug wala madugay ang mga doktrina natuis o nawala.

Tungod niini ug sa uban pang rason, ang blueprint nagpadayag nga ang mga apostoles ug mga propeta ang naglangkob sa patukoranan sa Simbahan ni Kristo. Duna ba moy nasayran nga kausaban sa gimando diha sa Bag-ong Tugon, bisan unsang pagpadayag nga mibag-o sa blueprint ug mga pamahayag nga ang mga Apostoles wala na kinahanglana? Wala koy nasayran. Kon mao kana, nan ang tinuod nga simbahan ni Kristo karon kinahanglan dunay mga apostoles ug mga propeta isip patukoranan niini.

Sa pagtabang sa Manluluwas ug sa Iyang mga Apostoles sa pagsangyaw sa ebanghelyo ngadto sa kalibutan, ang Manluluwas mipili og laing mga tawo, gitawag og Seventy, aron pag-andam sa dalan. Mabasa nato ang bahin niining Seventy diha saLucas, kapitulo 10. Duna ba moy nasayran nga simbahan karon nga motukma niini nga blueprint—nga dunay katungdanan nga Seventy?

Ang blueprint sa Bag-ong Tugon nagpadayag sa ubang mga opisyales nga kabahin sa organisasyon sa Simbahan ni Kristo: mga bishop (tan-awa sa 1 Timoteo 3; Tito 1:7), mga elder (tan-awa saMga Buhat 14:23; ; Tito 1:5), mga deacon (tan-awa saMga Taga-Filipos 1:1), mga ebanghelista (tan-awa sa Mga Taga-Efeso 4:11); nagpasabut nga mga patriyarka¹), ug mga pastor (tan-awa saMga Taga-Efeso 4:110; nagpasabut nga sama kana sa mga bishop ug mga presidente sa stake nga nangulo sa panon.²

Ang ikaunom nga artikulo sa hugot nga pagtuo sa Simbahan mipasabut niini nga blueprint: “Kami nagtuo sa sama nga kapunongan nga diha sa Karaan nga Simbahan, sa ato pa, ang mga apostoles, mga propeta, mga pastor, mga magtutudlo, mga ebanghelista, ug uban pa” (Mga Artikulo sa Hugot nga Pagtuo 1:6; mga italic gidugang). Sa ato pa, kita nagtuo nga ang simbahan ni Jesukristo karon kinahanglang dunay samang organisasyon nga diha sa orihinal nga simbahan ni Kristo, nga mausab lang pinaagi sa pagpadayag. Busa, matag usa niini nga mga katungdanan anaa sa atong Simbahan karon.

Sa unsang paagi gipili ang mga Apostoles ni Kristo ug ubang opisyales? Miadto ba ang Manluluwas sa pinakamaayong eskwelahan sa teyolohiya ug mipili niadtong kinatas-an og ranggo nga mga estudyante? Wala. Gani, ang blueprint nag-ingon kanato nga Siya mipili kang Pedro, usa ka mangingisda, ug ni Mateo, tigkolekta og buhis, ug ni Pablo, nga tighimo og tolda. Matag usa gipili gikan sa kinatibuk-ang populasyon—sa pagkatinuod, kini walay sweldo. Karon ang Simbahan dunay korum sa napulog duha ka mga Apostoles nga gipili usab gikan sa kinatibuk-ang populasyon sa Simbahan. Tingali ang usa magtutudlo, ang lain enhinyero, ang lain abogado, ug uban pa.

Ang mga Apostoles ni Kristo ug ang ubang mga opisyales nangaplay ba sa pagpangalagad? Wala. Ang blueprint nag-ingon nato kon giunsa pagpili ni Kristo ang Iyang mga opisyales: “Kamo wala magpili kanako, hinonoa ako mao ang nagpili kaninyo, ug nagtudlo kaninyo” (Juan 15:16; mga italic gidugang). Dihang giordinahan ni Kristo ang Iyang mga Apostoles, unsa ang Iyang gihatag nila? Si Mateo ug si Lucas mirekord sa tubag: “Iyang gihatagan silag kagahum” (Mateo 10:1; tan-awa usab sa Lucas 9:1—ang gahum sa priesthood sa paglihok diha sa Iyang ngalan ug sa paghimo sa Iyang buhat. Mao nga ang blueprint nag-ingon nato “ang Anak sa tawo … makahatag og kagahum ngadto sa iyang mga ulipon” (Marcos 13:34). Ngano? Aron makalihok sila diha sa Iyang ngalan uban sa Iyang pagtugot. Ang matag lalaki nga naghupot sa priesthood sa Dios niini nga simbahan karon makasubay sa iyang katungod sa priesthood balik ngadto ni Jesukristo, ang tinubdan sa tanang katungod ug gahum, aron siya, sa ingon, dunay pagtugot ni Kristo—timaan sa Iyang pag-aprubar—sama sa gikinahanglan sa blueprint.

Unsa ang pangalan sa simbahan nga giorganisar ni Kristo? Kon kita gibunyagan sa pangalan ni Kristo, kon kita nag-ampo sa pangalan ni Kristo, kon kita naluwas sa pangalan ni Kristo, ug kon Siya ang nagmugna ug bato sa pamag-ang sa Iyang Simbahan, unsa man kaha ang ipangalan sa Iyang Simbahan? ang Simbahan ni Jesukristo. Ang Manluluwas, dihang namulong sa katawhan diha sa Basahon ni Mormon, mitudlo sa hinungdan nganong ang Simbahan kinahanglang magdala sa Iyang pangalan: “Ug unsaon kining akong simbahan kon dili kini pagatawgon sa akong ngalan? Kay kon ang usa ka simbahan pagatawgon sa ngalan ni Moises niana kini simbahan ni Moises; o kon kini pagatawgon sa ngalan sa usa ka tawo niana kini simbahan sa tawo; apan kon kini pagatawgon sa akong ngalan niana kini ang akong simbahan, kon kini mao nga sila natukod sa akong ebanghelyo” (3 Nephi 27:8; mga italic gidugang).

Tungod niini si Pablo mibadlong sa unang mga miyembro sa Simbahan—kay sila mitawag sa ilang kaugalingon sa ngalan sa mga disipulo, imbis sa ngalan ni Kristo. Sa ingon, si Pablo misulat:

“Sa laing pagkasulti, ang matag usa kaninyo magakanayon kono, ako iya ni Pablo; o ako iya ni Apolos; o ako iya ni Cefas; o ako iya ni Kristo.

“Nabahinbahin ba ugod si Kristo? si Pablo ba ang gikalansang sa krus alang kaninyo? o gikabautismohan ba kamo sa ngalan ni Pablo?” (1 Mga Taga-Corinto 1:12–13).

Buot ipasabut, dili kita magdala og laing ngalan gawas sa ngalan ni Jesukristo.

Sa ingon, ang blueprint nagtudlo nato nga ang Simbahan ni Kristo kinahanglang magdala sa Iyang ngalan. Daw talagsaon alang nako nga ang Reformation gihimo na sobra sa 300 ka tuig sa wala pa ang panahon ni Joseph Smith ug walay nakahunahuna nga ipangalan kang Jesukristo ang iyang simbahan. Siyempre, sukad sa panahon ni Joseph Smith, ang uban misunod na, apan sa kahibulongang paagi ang Ginoo mipreserbar sa paggamit sa Iyang ngalan hangtud sa panahon ni Joseph Smith ug sa pagpahiuli sa Simbahan ni Kristo.

Karon, paklion nato ang ikaduhang pahina sa blueprint. Unsa ang mga “Pagtulun-an” sa Simbahan ni Kristo? Atong susihon ang pipila:

Ang Dios espiritu lang ba o duna usab Siyay usa ka lawas nga unod ug bukog? Unsa ang gitudlo sa blueprint?

Human sa pagkabanhaw ni Kristo, mipakita Siya sa Iyang mga disipulo kinsa nasayop sa pagtuo nga Siya usa ka espiritu (tan-awa saLucas 24:37). Aron makorhian ang ilang sayop nga hunahuna, Siya miingon, “Tan-awa ninyo ang akong mga kamot ug mga tiil, nga mao gayud ako: hikapa ninyo ako, ug tan-awa; kay ang espiritu walay unod ug mga bukog, ingon sa inyong nakita nga ania kanako” ” (Lucas 24:39; mga italic gidugang).

Aron mawala ang pagduhaduha bahin sa matang sa Iyang nabanhaw nga lawas, nangutana Siya sa Iyang mga disipulo, “Duna ba kamoy makaon dinhi?” (Lucas 24:41). Dayon narekord sa kasulatan:

“Ug Siya ilang gihatagan og isda nga sinugba.

“Ug kini gidawat ni Jesus, ug Iyang gikaon sa ilang atubangan” (Lucas 24:42–43).

Nianang nahimaya, nabanhaw nga lawas sa unod ug bukog, si Kristo gibayaw ngadto sa langit (tan-awa saMga Buhat 1:9), ³ diin naglingkod Siya sa tuo nga kamot sa Dios nga Amahan ug, sama sa gipahayag sa kasulatan, anaa sa “tukma nga hulad sa iyang kinaiya” (Mga Hebreohanon 1:3). Kini ang eksaktong kamatuoran nga gitudlo ni Joseph Smith isip kabahin sa pagpahiuli sa Simbahan ni Kristo: “Ang Amahan adunay lawas nga unod ug mga bukog nga mahikap ingon sa tawo; ang Anak usab” (D&P 130:22).

Ang Dios ug si Jesus managsama ba nga Binuhat, sama sa gitudlo sa kadaghanan sa Kristohanong kalibutan, o duha ka managlahing Binuhat? Unsa ang gisulti sa blueprint?

Ang gidaghanon sa mga pakisayran diha sa Biblia sa managlahing pagkatawo ug managlahing mga tahas sa Amahan ug sa Anak makapahingangha. Sa Tanaman sa Getsemani, nasayud sa hilabihan nga kasakit nga Iyang masinati, ang Manluluwas miingon, “Dili ang akong pagbuot maoy matuman, kondili ang imo” (Lucas 22:42). Kini ang kinadak-ang pagtugyan nga nahibaloan sa kalibutan. Apan unsa nga pagtugyan ang nahitabo kon walay laing Binuhat nga Iyang katugyanan—kon Siya ug ang Amahan usa ra ug managsama ra nga Binuhat? Nganong ang Manluluwas nag-ampo man sa Amahan o mituaw, “Dios ko, Dios ko, nganong gitalikdan mo ako?” (Marcos 15:34). Sa unsang paagi Siya gitalikdan kon walay laing Binuhat nga motalikod Niya? Sa unsang paagi nakita ni Esteban si Jesus nga nagbarug sa tuo nga kamot sa Dios kon Sila dili duha ka personahe (tan-awa saMga Buhat 7:55–56)?

Dihang migawas si Joseph Smith gikan sa kakahoyan, nakat-unan niya ang kamatuoran. Nakita niya ang Dios nga Amahan ug ang Iyang Anak, si Jesukristo, nga nagtupad og barug; nadungog niya ang Amahan nga mipasabut sa usa isip Iyang “Hinigugmang Anak” (Joseph Smith—Kasaysayan 1:17). Nianang mahimayaong adlaw giguba sa kalangitan ang hinimohimo sa tawo nga tuo-tuo bahin sa kinaiyahan sa Dios ug gipadayag ug gipamatud-an ang yanong kamatuoran sama sa orihinal nga gitudlo diha sa blueprint: nga ang Dios nga Amahan ug ang Iyang Anak, si Jesukristo, usa ang tumong ug kabubut-on apan managlahi ang pagkatawo.

Unsa ang giingon sa blueprint niadtong walay patas nga kahigayunan nga makapaminaw sa ebanghelyo samtang ania pa sa kalibutan? Matunglo ba sila? Duna bay gipadayag nga kahibalo ngari nato kalabut sa ilang espirituhanong kahimtang?

Importante kini nga pangutana nga nakaapekto sa binilyon ka kinabuhi. Sa pagkatinuod ang Dios namulong bahin niini. Ug sa kamatuoran, Siya mihimo. Ang blueprint dunay tubag.

Si Pedro misulat, “Kay kini mao ang hinungdan ngano nga ang ebanghelyo giwali hangtud ngadto sa mga patay, aron nga bisan tuod sila nahinukman na diha sa lawas ingon sa mga tawo, sila mabuhi sa espiritu ingon sa Dios” (1 Pedro 4:6). Kini nga doktrina nawala sa Apostasiya human sa kamatayon sa mga Apostoles ni Kristo, apan gipahiuli kini pinaagi ni Propeta Joseph Smith.

Duna bay tulo ka langit o usa ka langit? Sa mga katuigan ang Kristohanong kalibutan mitudlo nga dunay usa ka langit ug usa ka impyerno, apan unsa ang gitudlo sa orihinal nga blueprint?

Si Pablo mitudlo, “Lain ang kasanag sa adlaw, ug lain usab ang kasanag sa bulan, ug lain ang kasanag sa mga bitoon” (1 Mga Taga-Corinto 15:41). Si Pablo dayon mimatuod sa kamatuoran bahin niining tulo ka langit dihang giasoy niya ang panan-awon sa usa ka tawo nga “gisakgaw dala ngadto sa ikatulong langit” (2 Mga Taga-Corinto 12:2). Duna bay ikatulong langit kon walay ikaduha o una nga langit? Usab, kini nga doktrina nga gipahiuli pinaagi ni Propeta Joseph Smith motukma gayud sa orihinal nga blueprint.

Ang kaminyoon magpadayon ba sa kahangturan o matapos sa kamatayon? Unsa ang gisulti sa blueprint?

Sumala sa gahum nga gihatag ngadto sa mga Apostoles nga bisan unsa nga ilang pagabugkuson dinhi sa yuta didto sa langit pagailhon kini nga binugkos (tan-awa saMateo 18:18), si Pablo miingon, “Diha sa Ginoo ang babaye dili gawas sa lalaki ni ang lalaki gawas sa babaye” (11 Mga Taga-Corinto 11:11), nagpasabut nga ang kinahanglanon mao nga ang lalaki ug babaye mabugkos sa kahangturan sa atubangan sa Dios. Si Pedro mikumpirmar niini nga kamatuoran. Nagpasabut sa mga bana ug mga asawa, miingon siya nga sila mahimong, sa pagkutlo, “masigkamanununod man sa gasa nga kinabuhi” (1 Pedro 3:7)—dili tagsa-tagsa, apan magkauban nga maglakaw sa dalan isip manununod sa kinabuhing dayon. Kana ang doktrina nga gitudlo diha sa blueprint, ug kana ang doktrina nga gitudlo sa Simbahan ni Kristo karon.

Sa ikatulong pahina sa blueprint mabasa, “Ang mga ordinansa sa Simbahan ni Kristo.” Ang blueprint klaro kaayo kalabut niini. Pananglitan, kita mopanalangin o mobunyag ba sa mga masuso ug gagmayng mga bata? Unsa ang gitudlo sa blueprint?

Ang Manluluwas mihatag og klarong ehemplo alang kanato. Naghisgut bahin sa gagmayng mga bata, mabasa sa kasulatan, “Ug gikugos niya [Jesus] sila, ug sa gipandungan niya sila sa iyang mga kamot, iyang gipanalanginan sila” (Marcos 10:16 mga italic gidugang). Gimatud-an kana ni Mateo nga, kalabut sa gagmayng mga bata, ang Manluluwas “gitapin-an sila sa iyang mga kamot” (Mateo 19:15). Ang blueprint nagtudlo nga ang mga masuso ug gagmayng mga bata panalanginan, dili bunyagan. Gani, walay nakasulat nga pagbunyag sa masuso nga nahitabo bisan asa sa Bag-ong Tugon. Ngano? Tungod kay dili kana usa ka ordinansa sa Simbahan ni Kristo. Ang tawo nga mangita sa Simbahan ni Kristo karon mangita og simbahan nga mopanalangin sa mga masuso, dili mobunyag nila.

Ang bunyag mahinungdanon ba sa kaluwasan? Unsa ang gitudlo sa blueprint?

Human mipakita si Kristo og ehemplo pinaagi sa pagpabunyag, Siya namahayag sa klarong mga pulong, “Gawas kon ang tawoigaanak sa tubig ug sa Espiritu, dili siya makasulod sa gingharian sa Dios” (Juan 3:5; mga italic gidugang). Si Pedro mitudlo sa samang paagi, “Paghinulsol kamo, ug pagpabautismo kamo ang matag usa kaninyo sa ngalan ni Jesukristo tungod sa kapasayloan sa inyong mga sala, ug madawat ninyo ang gasa nga espiritu Santo” (Mga Buhat 2:38; mga italic gidugang). Ang gitudlo diha sa blueprint mao gayud ang gitudlo diha sa Simbahan ni Kristo karon.

Ang bunyag pagahimoon ba pinaagi sa pagwisik-wisik, pagbu-bu, o pagpaunlod sa tubig? Ang blueprint naghatag og labing minus upat ka ebidensya nga ang bunyag himoon pinaagi sa pagpaunlod sa tubig:

Una, ang Manluluwas, ang atong Ehemplo, “mihaw-as dayon gikan sa tubig” (Mateo 3:16), nagpasabut nga Siya gipaunlod sa tubig.

Ikaduha, si Juan Bautista “nagpangbautismo didto sa Enon duol sa Salim, kay didto daghan man ang mga tubig” (Juan 3:23; mga italic gidugang). Nganong mobiyahe pa man ngadto sa dapit nga “daghan og tubig” kon wisik-wisik o pagbu-bu ra ang gidawat nga pamaagi sa pagbunyag?

Ikatulo, si Pablo nag-ingon nato nga ang bunyag nagsimbolo sa pagkamatay, pagkalubong, ug pagkabanhaw ni Jesukristo (tan-awa saMga Taga-Roma 6:3–5). Samtang ang bag-ong kinabig nagbarug sa tubig sa pagbunyag, nagrepresentar siya sa tigulang nga tawo nga hapit na mamatay. Kon iunlod na siya sa tubig, ang iyang mga sala “gilubong” ug napasaylo pinaagi sa makalimpyo nga gahum sa tubig. Dayon, sa iyang paghaw-as gikan sa tubig, magbarug siya isip representante sa bag-o o nabanhaw nga tawo diha ni Jesukristo. Tanan niana nga simbolo nga gikinahanglan sa bunyag motukma sa bunyag pinaagi sa pagpaunlod sa tubig, apan napulihan kini—hingpit nga napulihan—sa pagwisik-wisik ug pagbu-bu.

Ug ang ikaupat, ang Greek nga pulong sa bunyag gihubad nga nagpasabut nga ituslob o iunlod sa tubig.

Si Will Durrant, usa ka sikat nga historian sa kalibutan, nasayud unsay gipadayag sa blueprint ug sa ingon misulat “Sa ikasiyam nga siglo ang unang Kristohanong pamaagi sa bunyag pinaagi sa hingpit nga pagpaunlod sa tubig hinay-hinay nga gipulihan og … pagwisik-wisik kay dili kaayo delikado sa kahimsog sa amihanang klima.”⁴

Dili ikatingala nga si Joseph Smith nakadawat og pagpadayag bahin sa pamaagi sa pagpahigayon sa bunyag nga hingpit nga motukma sa blueprint ni Kristo (tan-awa sa D&P 20:73–74).

Ang bunyag alang sa mga patay usa ba ka ordinansa sa orihinal nga simbahan ni Kristo? Oo.

Ang mga miyembro sa Simbahan didto sa Corinto miapil sa usa ka ordinansa nga nailhan nga bunyag alang sa mga patay. Apan, kining mga tawhana nagduhaduha sa katinuod sa Pagkabanhaw. Gibati nga wala motukma ang unsay ilang gihimo sa unsay ilang gituohan, gigamit ni Pablo ang ilang pag-apil sa saktong ordinansa sa bunyag alang sa mga patay aron pamatud-an ang saktong doktrina sa Pagkabanhaw: “Kon dili pa unsa man lamay ipasabut sa mga tawo sa ilang pagpabautismo alang sa mga patay, kon ang mga patay dili man ugaling banhawon? nganong bautismohan pa man ang mga tawo alang sa mga patay?” (1 Mga Taga-Corinto 15:29).

Sa higayon nga ang tawo motadlas sa taytayan sa doktrina ug moila nga ang bunyag mahinungdanon sa kaluwasan (nga mao gayud), nan padulong siya nga motuo sa bunyag alang sa mga patay—dili makalingkawas niini. Kay kon dili, unsaon sa tawo pagtubag ang lisud nga pangutana “Unsaon man kadtong namatay nga walay oportunidad nga mabunyagan?” Kadtong gipangutana niini dunay upat ka posible nga mga opsyon nga kapilian:

Una, ang mga lalaki ug mga babaye nga wala mabunyagi tunglohon ug ma-impyerno. Apan, kana nga tubag dili motukma sa kamatuoran diha sa kasulatan nga ang “Dios wala diay pinalabi sa mga tawo” (Mga Buhat 10:34) ug ang Dios nagtinguha nga “tanang tawo mangaluwas” (1 1 Timoteo 2:4).

Ikaduha, tingali dili kaayo tinud-on sa Dios ang unsay Iyang gisulti—tingali ang bunyag dili kaayo importante sa kaluwasan. Apan dili kini tinuod kay tinud-on kanunay sa Dios ang unsay Iyang gisulti: “Unsa nga Ako ang Ginoo namulong, Ako namulong, ug Ako dili mangayo og pasaylo alang sa akong kaugalingon” (D&P 1:38; tan-awa usab sa Mosiah 2:24).

Ikatulo, ang uban nagtuo nga ang bag-ong kondisyon nga gitawag og “bunyag pinaagi sa tinguha” mahimong ipuli sa bunyag pinaagi sa tubig. Sa ato pa, kon ang tawo nagtinguha sa pagsunod ni Jesus apan walay oportunidad nga mabunyagan sa pagkamortal, nan ang iyang takus nga tinguha madawat nga puli sa tubig. Ang problema niini nga opsyon kay kini walay suporta gikan sa kasulatan. Ang kasulatan wala mag-ingon nga, “Gawas kon ang tawo igaanak sa tinguha,” kondili, “Gawas kon ang tawo igaanak sa tubig ug sa Espiritu,dili siya makasulod sa gingharian sa Dios ” (Juan 3:5; mga italic gidugang).

Ang ikaupat nga opsyon mao nga tinud-on gayud sa Dios ang unsay Iyang gisulti dihang siya mimando sa tanang tawo nga magpabunyag, ug tungod niini Siya maloloy-ong mihatag og paagi nga ang tanang tawo mabunyagan bisan kon walay oportunidad nga moabut sa mortal nga kinabuhi. Kana mao ang bunyag alang sa mga patay. Kana ang opsyon nga motukma sa blueprint.

Unsa ang giingon sa blueprint bahin sa paagi diin ang gasa—dili temporaryo nga presensya, apan permanente nga gasa—sa Espiritu Santo ihatag human mabunyagan ang tawo? Awtomatik ba kining mokunsad sa tawo human sa iyang bunyag? Moabut ba kini sama sa naghaguros nga hangin, o duna bay balaanong ordinansa, balaanong pamaagi nga angayng sundon aron madawat kini nga gasa? Ang blueprint naghatag og tubag.

Human mabunyagi si Felipe sa pipila ka kinabig sa Samaria, si Pedro ug si Juan miabut. Dayon ang kasulatan mipadayag kon unsaon sa pagpahigayon kana nga ordinansa: “Ug sila gipandongan nilag [Pedro ug Juan] mga kamot, ug nakadawat sila sa Espiritu Santo” (Mga Buhat 8:17; mga italic gidugang).

Kining samang paagi gisunod human si Pablo mibunyag sa bag-ong mga kinabig sa Efeso:

“Sa ilang pagkadungog niini, sila gipangbautismohan sa ngalan sa Ginoong Jesus.

“Ug sa napandongan na sila ni Pablo sa iyang mga kamot, ang Espiritu Santo mikunsad kanila” (Mga Buhat 19:5–6; mga italic added).

Sa makausa pa ang blueprint ug ang gipahiuli nga Simbahan ni Kristo magkatukma kaayo.

Sa sunod nga pahina sa blueprint mabasa: “Mga Bunga sa Simbahan ni Kristo.” Ang Manluluwas mihatag niini nga pagsulay alang sa kamatuoran: “Maila ninyo sila pinaagi sa ilang mga bunga” (Mateo 7:20). Unsa ang mga bunga sa Simbahan ni Kristo sama sa makita diha sa blueprint?

Una, kadtong unang mga Santos naningkamot nga mahimong himsog nga mga tawo. Si Pablo mitudlo nga ang atong pisikal nga lawas “mga templo” nga puy-an sa atong mga espiritu ug, busa, isipon kini nga balaan: “Wala ba kamo masayud nga kamo templo sa Dios, ug nga ang Espiritu nagapuyo diha sa sulod ninyo?” (1 Mga Taga-Corinto 3:16; tan-awa usab sa 1 Mga Taga-Corinto 6:19). Tungod niini ang mga miyembro sa Simbahan ni Kristo dunay balaod sa kahimsog nga gisunod, sama sa pagdili og inom sa bino nga makita diha sa Mga Taga-Efeso 5 ug 1 Timoteo 3. Subay niining balaanong balaod nga isipon ang atong mga lawas sama sa mga templo, si Joseph Smith nakadawat og balaod sa kahimsog gikan sa Ginoo alang sa mga miyembro sa gipahiuli nga simbahan ni Kristo, nga nailhan isip Pulong sa Kaalam. Agig resulta sa pagsunod niini nga balaod, ang balik-balik nga pagtuon nakapamatuod nga ang mga miyembro sa Ang Simbahan ni Jesukristo sa mga Santos sa Ulahing mga Adlaw usa sa kinahimsugan nga katawhan sa kalibutan. Kini ang usa sa mga bunga sa pagsunod sa balaod ni Kristo bahin sa kahimsog.

Ang ikaduhang bunga sa Simbahan ni Kristo mao ang mga milagro ug mga gasa sa Espiritu. Narekord kini sa daghang higayon diha sa Bag-ong Tugon. Pamatuod kini nga ang gahum sa Dios anaa sa Simbahan ni Kristo (tan-awa sa Mga Hebreohanon 2:4). Apan subo lang, panahon sa Apostasiya, nagkadiyutay ang mga milagro—ang mga historian ug mga reformer miangkon niini. Si Paul Johnson, usa ka sikat nga historian, misulat, “Giangkon kini nga sukad sa panahon sa imperyo [nagpasabut nga sa panahon ni Constantine] nga ang ‘panahon sa mga milagro’ natapos na, nga sa ingon ang Kristohanon nga mga lider dili na makasangyaw sa ebanghelyo, sama sa mga apostoles, nga may tabang sa balaanong gahum.”⁵

Nganong miabut man ang panahon nga wala nay milagro ug mga gasa sa espiritu? Tungod kay ang kahoy nga mamunga, ang Simbahan ni Kristo, wala na sa kalibutan, ang pagtuo sa mga tawo nahanaw. Si John Wesley misulat niining nawala nga mga gasa sa Epiritu gikan sa Simbahan sa iyang panahon: “Dili na makita kining talagsaong mga gasa sa Epiritu Santo diha sa simbahan sulod sa duha o tulo ka siglo.”⁶

Makaingon ko, makapamatuod ko, sama sa kadaghanan ninyo, nga kini ang panahon sa mga milagro ug mga gasa sa Espiritu diha sa gipahiuli nga Simbahan ni Kristo, sama kaniadto sa Iyang orihinal nga Simbahan.

Dunay ikatulong bunga—ang blueprint sa Simbahan ni Kristo mirekord og daghang asoy bahin sa mga anghel ug panan-awon. Ang ubang tawo magduhaduha sa simbahan nga maghisgut sa mga anghel ug mga panan-awon, apan tungod niini nalimtan nila nga ang mga anghel ug ang mga panan-awon mahinungdanon kaayo nga bahin sa orihinal nga Simbahan ni Kristo: ang anghel nga mipahibalo sa pagkatawo ni Kristo kang Maria; mga anghel nga nakauban nila ni Pedro, Santiago, ug Juan sa Bukid sa Transpigurasyon; ang anghel nga mibuhi nila ni Pedro ug Juan gikan sa bilanggoan; ang anghel nga nakigsulti ni Cornelio; ang anghel nga mipasidaan ni Pablo nga kagub-onon ang sakayan; ang anghel nga miadto ni Juan ang Tigpadayag; panan-awon ni Esteban bahin sa Amahan ug sa Anak; panan-awon ni Juan bahin sa katapusang mga adlaw; ug daghan pa. Ang pangutana dili gyud unta nga “Sa unsang paagi nga Ang Simbahan ni Jesukristo sa mga Santos sa Ulahing mga Adlaw mao ang tinuod nga Simbahan nga nangangkon man kini bahin sa mga anghel ug mga panan-awon?” Kondili, ang pangutana mao “Sa unsang paagi ang simbahan karon makapangangkon nga tinuod nga Simbahan ni Kristo kon walay mga anghel ug mga panan-awon—sama sa orihinal nga Simbahan ni Kristo, sama sa gipadayag diha sa Iyang blueprint?”

Dunay daghan pang mga bunga nga motukma sa orihinal nga Simbahan ni Kristo:

Kini usa ka misyonaryo nga simbahan—ang mga Apostoles nga gimandoan nga “busa panglakaw kamo, ug himoa ninyong tinun-an ang tanang kanasuran” (Mateo 28:19). Karon kita dunay sobra sa 80,000 ka misyonaryo nga nagtuman niana nga mando ug namunga sa paghimo niini.

Kini usa ka moral nga simbahan—ang blueprint nagtudlo nato nga ang unang mga Santos sa Simbahan ni Kristo gimandoan nga magsinina og tarung ug molikay sa sekswal nga relasyon samtang dili pa minyo. Pila ka simbahan ang wala lang magtudlo nianang moral nga mga sumbanan apan nagtuman usab niini?

Ang orihinal nga Simbahn ni Kristo usa ka simbahan nga nakasentro sa pamilya. Ang mga bana gimandoan sa paghigugma ug magmatinud-anon sa ilang asawa (tan-awa sa Mga Taga-Efeso 5:23–25), ang mga anak gimandoan sa pagsunod sa ilang mga ginikanan (tan-awa sa Mga Taga-Efeso 6:1), ug ang mga bishop gimandoan sa pagdumala og maayo sa ilang kaugalingong balay (tan-awa sa 1 1 Timoteo 3:4–5). Karon ang atong Simbahan, sama sa orihinal nga Simbahan ni Kristo, giila isip simbahan nga nakasentro sa pamilya. Ang mga bunga sa Simbahan ni Kristo mainampingong nakarekord sa Biblia ug motukma sa gipahiuli nga simbahan ni Kristo karon.

Si Kristo miestablisar sa Iyang Simbahan dinhi sa kalibutan, apan ang katapusang pahina sa blueprint nagpadayag nga mosumpay kini ngadto sa langit—nga mao ang, “Balaang Pagpadayag.” Kon wala kini nga pagsumpay ang Simbahan susama lang sa hinimo sa tawo nga organisasyon nga gidumala sa gahum sa pangatarungan. Si propeta Amos mipahayag, “Sa pagkamatuod ang Ginoong Dios dili magbuhat sa bisan unsa, gawas kon ang iyang tinago ipadayag niya sa iyang mga alagad ang mga manalagna” (Amos 3:7). Gipamatud-an ni Pablo nga ang pagpadayag usa ka importanting bahin sa Simbahan ug kinahanglang magpadayon, kay siya miingon, “hisugatan ko pa ang mga panan-awon ug mga pinadayag sa Ginoo” (2 Mga Taga-Corintho 12:1; tan-awa usab sa Mga Buhat 1:2).

Tukma nianang importanting doktrina, ang Simbahan ni Kristo karon gisumpay ngadto sa langit pinaagi sa padayong pagpadayag. Ang pamahayag sa Simbahan sa gituohan kalabut niini, nailhan nga ikasiyam nga artikulo sa hugot nga pagtuo, mabasa sama sa mosunod: “Kami nagtuo sa tanan nga gipadayag sa Dios, sa tanan nga gipadayag Niya karon, ug kami nagtuo nga Siya mopadayag pa og daghan nga dagko ug mahinungdanon nga mga butang kalabut sa Gingharian sa Dios.”

Kon dunay motandi sa blueprint sa orihinal nga Simbahan ni Kristo ngadto sa matag simbahan sa kalibutan karon, iyang masayran nga sa punto, organisasyon, pagtulun-an, ordinansa, bunga, ug pagpadayag, usa ra ang motukma niini—Ang Simbahan ni Jesukristo sa mga Santos sa Ulahing mga Adlaw.

Kon dunay mosalikway niining Simbahan human niya matun-i ang blueprint, nan kana nga tawo dili moapil sa laing simbahan kay daghan na kaayo siya og nasayran. Mahimo siyang sama ni Pedro, nga gipangutana sa Manluluwas, “Buot ba usab kamong mobiya kanako?” (Juan 6:67). Si Pedro mitubag og usa ka tubag nga angayng ikulit sa matag kasingkasing ug ipreserbar sa matag panimalay: “Kang kinsa man kami moadto? Ikaw mao ang may mga pulong mahitungod sa kinabuhing dayon” (Juan 6:68).

Kon dunay mobiya sa Simbahan, asa man siya moadto aron makat-on bahin sa gipahiuli nga mga kamatuoran sa kinaiyahan sa Dios sama sa gipadayag diha sa Sagradong Kakahoyan, sa pagsangyaw sa ebanghelyo ngadto sa mga patay, ug sa tulo ka ang-ang sa himaya, ug sa mahangturong mga pamilya? Asa siya moadto aron maangkon ang mga ordinansa nga makaluwas niya? Asa siya moadto aron ang iyang asawa ug mga anak i-sealed ngadto niya alang sa kahangturan? Asa siya moadto kon magkinahanglan siya og panalangin sa priesthood sa paghupay o pag-ayo sa sakop sa pamilya? Asa siya moadto aron mangita og propeta sa Dios? Dili siya makakaplag niana nga mga doktrina ug mga ordinansa ug mga gahum ug mga propeta, kay anaa lang kini sa Ang Simbahan ni Jesukristo sa mga Santos sa Ulahing mga Adlaw.

Ang tawo dili makaangkon sa mga doktrina ug mga ordinansa nga gipahiuli pinaagi ni Propeta Joseph Smith nga dili modawat ni Joseph Smith ug sa mahinungdanong kasaysayan nga maoy basihan niana. Dili kini magkabulag. Magkauban kini. Dili ka makaingon nga maayo ang bunga ug moingon nga ang kahoy dili maayo. Ang Manluluwas mitudlo niana dugay na: “Ang maayong kahoy dili makabungag mga bungang walay pulos, ug usab ang kahoyng walay pulos dili makabungag mga maayong bunga” (Mateo 7:18). Sa ingon, kon ang bunga nga atong gihisgutan maayo, nan ang kahoy nga gigikanan niini—si Joseph Smith ug ang kauban nga mahinungdanong kasaysayan sa gipadayag nga mga kamatuoran—maayo usab. Dili kamo makaangkon sa usa kon wala ang usa.

Sa mga pakigpulong sa kinatibuk-ang komperensya pipila ka tuig na ang milabay, si Elder B. H. Roberts namulong sa mga kalampusan ni Joseph Smith, ug dayon, samtang siya nakigsulti sa mga kritiko ni Joseph, siya moingon: “Itandi kini! Itandi kini, ako moingon, o magpakahilom kamo kon hisgutan ang iyang pangalan ipamulong.”⁷

Ang makasaysayanon o mga kabalaka nga maanaa sa uban, ang mga alegasyon nga sukwahi kini sa science—dili kaayo importante; ang pinakaimportante mao ang mga doktrina, mga ordinansa, gahum sa priesthood, ug ubang bunga sa atong Simbahan, kadaghanan niini gihisgutan karon. Apan ang uban tingali motubag, “Mituo ko niining tanan, apan unsaon nako pagtubag ang mga kritiko ug sa ilang mga pangutana?”

Ang usa ka abogado nasayud nga human mapresentar sa prosecutor ang iyang importanting saksi, ang kaso batok sa depensa sagad daw sad-an tan-awon. Ang tawo nga daling makahukom nianang puntoha tingali motumbok nga sad-an ang depensa, apan dunay kulbahinam nga mahitabo sa korte. Ang depensa mosugod sa cross-examination sa samang saksi, ug sagad mahitabo ang mosunod: Ang nindot nga mga tubag sa saksi mosugod og kahuyang tungod sa cross-examination. Ang saksi nga daw dili matarug duna nay mga dili motukma, gani masayop sa iyang paghinumdom sa mga panghitabo. Ang daw lig-on nga istorya sa saksi mosugod og kahuyang ug kaluya tungod sa mga pangutana nga gipangutana ngadto niya. Ang saksi nakatubag sa sayon nga pangutana sa iyang prosecutor, apan dihang ang lisud nga mga pangutana miabut, dili niya makaya ang gibug-aton o pagmatuod niini. Dihang nahuman na ang cross-examination ang saksi wala na mosalir. Ang tig-obserbar nga sa una andam na sa “pagkonbikto” sa depensa naghunahuna na nga ang tawo inosente gayud.

Ingon usab niana, ang ubang kritiko mangutana og mga pangutana aron ang Simbahan mabutang sa kadaut. Apan ang mga pangutana dunay duha ka mga pamaagi.⁸ Ang importanting mga saksi sa prosecutor wala maanad sa cross-examination, ug ingon usab ang banggiitang mga kritiko sa Simbahan. Wala pa koy nakita nga kritiko nga makahatag nako og saktong tubag sa “cross-examination” sa mosunod nga mga pangutana:

Una, giunsa ni Joseph Smith pagkahibalo unsaon sa pagpahiuli ang mga doktrina ug mga ordinansa gikan sa Biblia, sama sa doktrina sa premortal existence, sa kinaiyahan sa Dios, sa ebanghelyo nga gisangyaw ngadto sa mga patay, bunyag alang sa mga patay, ug uban pa nga atong gihisgutan karon, nga kana nga mga doktrina ug mga ordinansa wala man itudlo sa mga simbahan sa iyang panahon? Nganong si Joseph Smith ra man ang nakadiskubre ug mipahiuli niini? Bisan kon ingnon nato nga genius siya sa theology, wala bay laing mga genius sa 1,800 ka tuig human sa pangalagad sa Manluluwas nga makabuhat niana?

Ikaduha, kon kini nga Simbahan dili Simbahan ni Kristo, nan nganong kini nga Simbahan adunay mga bunga nga sama sa orihinal nga Simbahan ni Kristo, nga mao ang, mga milagro ug mga gasa sa Espiritu, kasamtangang pagpadayag gikan sa mga apostoles ug mga propeta, mga anghel ug mga panan-awon, himsog nga katawhan, moral nga katawhan, missionary-minded nga katawhan, ug katawhan nga nakasentro gayud sa pamilya? Wala ba ihatag sa Manluluwas ang pagsulay sa kamatuoran?—“Maila ninyo sila pinaagi sa ilang mga bunga” (Mateo 7:20)

Sigurado gayud, daghan pang pangutana nga ikapangutana atol sa cross-examination. Dunay mga pangutana, hinoon, nga labawng mahinungdanon sa tanang pangutana—sa ingon, kini ang importanting punto sa isyu. Makaingon ko nga, ang ubang pangutana mas importante kay sa uban sa pagdiskubre sa kamatuoran. Kon kamo masayud nga si Joseph Smith mipahiuli sa mga pagtulun-an sa Biblia ug sa mga ordinansa nga gihisgutan karong gabhiona, kon kamo masayud nga Ang Simbahan ni Jesukristo sa mga Santos sa Ulahing mga Adlaw dunay sama nga mga bunga sa orihinal nga Simbahan ni Kristo, o kon kamo masayud nga ang Basahon ni Mormon balaanon ang gigikanan, nan kamo masayud nga si Joseph Smith usa ka propeta. Ug kon si Joseph Smith usa ka propeta, nan kini lang ang tinuod ug buhi nga Simbahan sa tibuok kalibutan. Nianang puntoha, ang ubang mga pangutana dili na mahinungdanon. Sama kini sa Supreme Court nga nagpahayag sa desisyon niini sa pipila ka isyu. Tanang mga desisyon nga gihimo sa lower courts nga sukwahi dili na mahinungdanon. Sa samang paagi, tanang pangutana sa mga kritiko, bisan unsa pa kini ka makadasig o makapahinuktok o makalingaw, dili na mahinungdanon sa kamatuoran. Ngano? Kay natubag na ninyo ang mahinungdanong mga pangutana—ang importanting mga pangutana, ang bug-at nga mga pangutana—nga mao ang lig-ong suporta aron masayud sa kamatuoran.

Makaingon ko nga, makalahutay ra ko uban sa pipila ka tawhanong mga sayop, gani taliwala sa mga propeta sa Dios—gilauman na kana kay kita mga mortal. Makalahutay ra ko sa alegasyon sa siyensya nga mosukwahi Basahon ni Mormon; moabut ang panahon nga makorihian ra kana. Makalahutay ra ko sa daw makasaysayanong anomaliya; ginagmay ra kana itandi sa kamatuoran. Apan dili ko makalahutay kon wala ang mga kamatuoran sa doktrina ug mga ordinansa nga gipahiuli ni Joseph Smith, dili ko makalahutay kon wala ang priesthood sa Dios aron panalanginan ang akong pamilya, ug dili ko makalahutay kon dili masayud nga ang akong asawa ug ang akong mga anak na-sealed nako alang sa kahangturan. Kana ang pagpili nga atong giatubang—pipila ka wala matubag nga pangutana sa pikas itandi sa daghang kamatuoran sa doktrina ug gahum sa Dios sa pikas bahin. Ug alang nako, ug unta mao usab kaninyo, ang pagpili sayon ra ug makatarunganon.

Mopamatuod ko nga ang Simbahan nga sa umaabut inyong pagadumalaon nagdala sa ngalan ni Kristo kay anaa niini ang Iyang giaprubahan nga organisasyon, Iyang mga pagtulun-an, Iyang mga ordinansa, Iyang mga gahum, Iyang mga bunga, ug ang Iyang padayon pagpadayag, ang tanan niini anaa sa Iyang balaanong blueprint. Unta kita adunay espirituhanong mga mata aron makita ang resulta tali sa blueprint ug sa gipahiuli nga Simbahan ni Kristo karon, kay usa kini sa dili gayud malimud nga mga saksi ngari kanato. Niini ako nagpamatuod ug nag-ampo sa pangalan ni Jesukristo, amen.