Gialirongan sa Kalayo
Elder Kim B. Clark
Sa Seventy
Satellite nga Sibya sa Seminaries and Institutes of Religion • Agosto 4, 2015
Minahal kong mga kaigsoonan, nalipay ako sa kahigayunan nga makapamulong kaninyo niining tibuok kalibutan nga sibya. Buhong kitang napanalanginan nga ania dinhi.
Gusto nakong masayran ninyo nga gibati nako ang dakong gugma alang kaninyo nga ako nasayud nga usa ka gasa gikan sa Langitnong Amahan ug sa Iyang Anak, si Ginoong Jesukristo. Ako nasayud nga sila nahigugma kaninyo, ug ako nasayud nga Sila gusto nga makita nako kamo sa paagi nga Sila nakakita kaninyo ug sa paghigugma kaninyo sa paagi sa Ilang paghigugma kaninyo. Ug mao nga Sila mipanalangin kanako niana nga gasa. Nag-ampo ko nga mabati ninyo ang akong gugma ug ang Ilang gugma karon.
Nag-ampo usab ako nga ang Espiritu Santo magauban kanato samtang dungan natong ikonsiderar ang mga implikasyon sa usa ka yano nga mensahe. Ang mensahe personal nga miabut kanako, pero akong gibati nga kinahanglan nakong ipakigbahin ang mensahe nganha kaninyo. Ania kini: Bisan unsa nga lebel sa pagka-espirituhanon nga atong natagamtam karon sa atong kinabuhi; bisan unsa nga ang-ang sa atong pagtuo diha ni Jesukristo; bisan unsa nga kalig-on sa pasalig ug pagpahinungod, bisan unsa nga nga ang-ang sa atong pagkamasulundon o paglaum o gugmang putli; bisan unsa nga lebel sa propesyunal nga kahanas ug abilidad nga atong naangkon, dili kini igo alang sa buhat nga nagpaabut.
Mga kaigsoonan, kamo ug ako kinahanglang mahimo nga mas maayo pa kay sa unsa kita karon. Ang kasulatan nagtudlo kanato nga ang kalibutan karon ug sa umaabut gubot. Ang kadautan ug kangitngit mosaka. Apan niana nga nagkangitngit nga kalibutan adunay magkadugang nga balaanong kahayag. Si Ginoong Jesukristo dunay dakong buhat nga atong himuon uban sa bag-ong henerasyon. Mas dako pa kini nga buhat kay sa nahimo na nato sukad. Ang Ginoo nagtrabaho uban sa gahum sa paglig-on sa pagtudlo ug pagkat-on diha sa Iyang tinuod ug buhi nga Simbahan. Iyang gipadali ang Iyang buhat, ug giandam Niya ang yuta ug ang Iyang gingharian ug kita alang sa Iyang pagbalik.
Kining tanan kabahin sa usa ka matahum nga sumbanan nga atong makita gikan sa pagsugod sa Pagpahiuli. Niadtong 1820, ang Dios nga Amahan mipakita uban sa Iyang Anak, nga si Jesukristo, ngadto sa batan-ong si Joseph Smith. Sukad nianang adlawa didto sa Sagradong Kakahoyan, si Jesukristo mitukod sa Iyang Simbahan ug sa Iyang katawhan pagtulun-an human sa usa ka pagtulun-an, lagda human sa usa ka lagda, nga anam-anam.
Ania ang unsay Iyang gisulti:
“Kay Ako mopasanay ngari kanako og usa ka putli nga mga katawhan, aron moalagad kanako diha sa pagkamatarung.”1
“Aron ang buhat sa pagpundok sa akong mga santos magpadayon, nga Ako motukod kanila ngadto sa akong ngalan diha sa balaan nga mga dapit; kay ang higayon sa pag-ani miabut na, ug ang akong pulong kinahanglan gayud nga matuman.”2
“Ang akong mga katawhan kinahanglan pagasulayan sa tanan nga mga butang, nga sila unta maandam sa pagdawat sa himaya nga Ako aduna alang kanila, gani ang himaya sa Zion.”3
Kini ang sumbanan sa Ginoo: Iyang gipatunhay, gi-establisar, ug giandam ang Iyang katawhan ug ang Iyang Simbahan. Kini nga sumbanan makita sa atong panahon diha sa panawagan ni Presidente Thomas S. Monson ngari natong tanan nga mobarug ug motukod sa gingharian sa Dios. Paminaw sa iyang mga pagdapit ngari nato nga mohimo og dugang pa ug mohimo og mas maayo pa diha sa buhat sa kaluwasan. Gusto kong mobasa kaninyo og kinutlo gika sa daghang mga pakigpulong ni Presidente Monson nga iyang gihatag sa kinatibuk-ang komperensya sukad siya nahimong Presidente Simbahan.
“Kami nagpahayag pag-usab nianang kinasingkasing nga pagdapit: Balik. Kami motabang kaninyo diha sa gugmang putli ni Kristo. … Niadtong nasamaran sa espiritu o kinsa nagkalisud ug nahadlok, kami moingon, Tugoti kami nga moisa ug modasig kaninyo ug mokalma sa inyong mga kahadlok.”4
“Kon duna man kaninyo ang wala kaayo makahimo sa inyong home teaching … , moingon ko nga walay laing panahon kondili karon sa pagpahinungod sa inyong kaugalingon.”5
“Adunay mga tiil nga pabarugon, mga kamot nga tabangunon, hunahuna nga awhagon, kasingkasing nga dasigon, ug mga kalag nga luwason.”6
“Moepekto dayon ang tanang takus ug makahimo nga batan-ong mga lalaki kinsa nakagradwar og high school o kaparehas niini, … may opsyon nga marekomendar sa misyonaryo nga pagserbisyo sugod sa 18 anyos, imbis 19 anyos. …
“… “Ang makahimo, takus nga batan-ong mga babaye nga may tinguha sa pagserbisyo mahimong marekomendar sa misyonaryo nga pagserbisyo sugod sa edad nga 19 anyos, imbis nga 21 anyos.”7
“Ang [atong] hagit mao nga mahimong mas mapuslanon nga mga sulugoon sa ubasan sa Ginoo. Alang kini natong tanan, bisan unsa pay inyong edad, ug dili lang niadtong nag-andam nga moserbisyo isip full-time nga mga misyonaryo, kay kada usa nato gisugo sa pagpakigbahin sa ebanghelyo ni Kristo.”8
“Karon ang panahon sa mga miyembro ug misyonaryo sa pagtinabangay, sa pagtambayayong, sa paghago sa ubasan sa Ginoo sa pagdala og mga kalag ngadto Kaniya.”9
“Ang paghandom dili makahimo niini. Ang Ginoo nagpaabut sa atong paghunahuna. Siya nagpaabut sa atong paglihok. … Siya nagpaabut sa atong debosyon.”10
“Ako mopamatuod kaninyo nga ang atong mga panalangin nga gisaad walay sukod. Bisan og ang unos nga mga panganud magpundok, bisan og ang ulan mobundak kanato. … Walay butang niining kalibutana nga makapildi kanato.
“Minahal kong mga kaigsoonan, ayaw kahadlok. Pagmaya. Ang umaabut sama kahayag sa inyong hugot nga pagtuo.”11
Mga kaigsoonan, mao kini ang panawagan sa propeta ngari kanato. Sa Church Educational system nagpasabut nga kita nagkinahanglan nga og masaligan nga mga sulugoon sa Ginoo nga giandam sa pagtrabaho diha sa mga seminary ug institute, diha sa mga kolehiyo ug mga unibersidad sa Simbahan, ug diha sa mga eskwelahan sa Simbahan. Matag trabaho, matag calling, matag tawo diha sa Church Educational System importante, ug matag usa nato nagkinahanglan nga mahimong mas maayo pa kay sa kaniadto.
Naghunahuna ko og duha ka rason:
Unang rason 1: Kinahanglan natong i-edukar og maayo ang bag-ong henerasyon ug sa mas impluwensyal nga paagi kay sa ato nang nahimo sa una o sa nahimo na sa usa ka tawo sa una.
Ang tinud-anay nga pagkat-on “usa ka pagpalambo sa … gahum sa Pagkasayud, sa Pagbuhat, ug sa Pagkahimo.”12 Nagpasabut kini og napalambo nga kahibalo, pero napalambo usab nga pagsabut sa kasingkasing. Nagpasabut kini og napalambo nga kahanas ug kapasidad nga molihok. Nagpasabut kini og napalambo nga kalig-on sa kinaiya, lakip na ang kaligdong, kaisug, ug kamabination.
Ang tinud-anay nga pagkat-on usa gayud ka espirituhanong kasinatian. Ang bag-ong henerasyon mas makakat-on sa ingon nga matang sama sa paglihok sa matubsanon ug makapalig-on nga mga gahum ni Kristo diha sa ilang kinabuhi, makapalunsay, makapabalaan, ug makapasarang kanila aron makadawat sa Iyang grasya ug mga gasa nga Iyang giandam alang kanila. Kinahanglan silang makugihong mobuhat ug magtinguha sa pagkat-on, pero kinahanglan usab silang malimpyuhan pinaagi sa maulaong dugo ni Kristo aron makadawat sila og dugang kahayag ug matudloan sa Espiritu Santo.
Ang dinasig nga pagtudlo nga moresulta sa tinud-anay nga pagkat-on usa usab ka espirituhanong kasinatian. Kita nagkinahanglan usab sa Pag-ula sa Manluluwas nga molihok sa mas gamhanang paagi diha sa atong kinabuhi. Kinahanglan kitang mahimong sarang ug makadawat sa makapalunsay ug makapabalaan nga mga gasa ug mga panalangin sa Balaang Espiritu aron makatabang kita sa bag-ong henerasyon nga mas makakat-on gayud.
Ang bag-ong henerasyon nagkinahanglan nianang tinud-anay nga pagkat-on tungod kay ang kalibutan nga ilang atubangon parehong talagsaon ug makalilisang—adunay napalambo nga kahayag ug gahum gikan sa langit, ug adunay mas makalilisang pa nga kadautan ug kagubot ug kalibug. Kinahanglan silang makabase diha sa klaro ug simple nga mga kamatuoran sa ebanghelyo, ang ebanghelyo kinahanglang lig-on nga maestablisar diha sa ilang kasingkasing, ug magkinahanglan sila sa unsay gitawag ni Presidente Russell M. Nelson nga malahutayon nga hugot nga pagtuo kang Kristo: “Nganong nagkinahanglan man kita nianang malahutayon nga hugot nga pagtuo? Tungod kay ang malisud nga mga adlaw anaa sa unahan. Panagsa ra unya sa umaabut nga mahimong sayon o sikat ang mamahimong Santos sa Ulahing mga Adlaw. Matag usa kanato pagasulayan. Si Apostol Pablo mipahimangno nga sa ulahing mga adlaw, kadtong matinguhaon nga nagsunod sa Ginoo‘pagalutuson gayud’[2 Timoteo 3:12]. Kana nga paglutos mahimong mobitad kaninyo ngadto sa pagkahuyang o modasig kaninyo nga mas sulundon ug maisugon sa inyong inadlaw-adlaw nga kinabuhi.”13
Ikaduhang rason 2: Mituo ko nga ang mga batan-on nga moduol nato mahimong andam—ug ganahang makadawat—og mas dugang pa kay sa unsay atong gihatag nila karon. Dugang pa, ang uban nga moduol magkinahanglan og dugang tungod kay ang ilang mga panimalay wala makahatag sa unsay ilang gitinguha ni sa unsay ilang gikinahanglan.
Wala ko magpasabut nga ang mga batan-on kinahanglang mosusi sa mga ideya nga komplikado ug pangagpas lang. Magkinahanglan sila sa klaro ug simple nga mga kamatuoran sa ebanghelyo nga gitudlo uban sa napalambo nga gugma ug napalambo nga gahum sa Espiritu Santo.
Mohatag ko kaninyo og ehemplo sa klaro ug simple nga doktrina nga gikinahanglan nga mas makat-unan gayud sa atong mga estudyante. Sulod sa miaging pito ka tuig, ang BYU–Idaho mi-require og usa ka klase bahin sa pamilya isip kabahin sa ilang Foundations program. (Ang maong klase kabahin sa bag-ong Cornerstone series nga gi-require sa tanang estudyante sa institute, kolehiyo, ug unibersidad diha sa Church Educational system.) Tungod kay ang tanang estudyante sa BYU–Idaho mokuha man niini nga klase, ang faculty duna nay matan-aw kon unsay naa sa hunahuna ug kasingkasing sa mga estudyante kalabut sa doktrina sa kaminyoon sigun sa gipresentar diha sa pamahayag bahin sa pamilya.
Unsay nadiskobrehan sa mga magtutudlo makapabalaka. Daghang estudyante, tingali 40 ngadto sa 50 porsento, dunay dili kompleto ug sayop nga panabut bahin niining labing importante nga doktrina. Kini sila mga maayo, aktibo nga batan-ong mga Santos sa Ulahing mga Adlaw nga migradwar sa seminary ug wala kaayo makakat-on sa doktrina bahin sa kaminyoon didto sa ilang balay o sa seminary o sa Sunday School o sa ilang mga klase sa Young Women o korum sa priesthood ug, sa ubang sitwasyon, bisan gani sa ilang misyon.
Ang mga estudyante wala lamang magkinahanglan og mas maayo nga kahibalo bahin sa doktrina sa kaminyoon, kinahanglan usab silang makasabut niini diha sa ilang kasingkasing. Nagkinahanglan sila og espirituhanong pagsaksi sa kamatuoran niini, ug kinahanglan silang molihok base niana nga pagsaksi sa paagi sa ilang pagpangandam karon aron mahimong mga bana o mga asawa ug mga inahan o mga amahan sa usa ka mahangturong pamilya.
Kinahanglan usab silang masayud kon unsaon sa paghisgut bahin sa doktrina sa kaminyoon ngadto sa ilang mga higala ug sa uban nga dili pareho nila og gituohan. Ug kinahanglan silang molambo sa ilang kapasidad sa pag-ila tali sa kamatuoran ug sa sayop. Nagkinahanglan sila og napalambo nga pagtuo diha ni Jesukristo, ug nagkinahanglan sila og napalambo nga paglaum diha Kaniya.
Kini ang gikinahanglan sa bag-ong henerasyon. Ug busa, unsay angay natong buhaton?
Matag usa kanato kinahanglang mobuhat kon unsay gusto sa Ginoo nga atong buhaton sa atong kinabuhi. Nanghinaut ko nga ang mosunod nga kasinatian makatabang kaninyo samtang kamo mamalandong ug mag-ampo kalabut sa unsay gusto sa Ginoo nga inyong buhaton:
Daghang katuigan na ang milabay, sa usa ka lisud kaayo nga panahon sa among kinabuhi, gibati nako nga giataki sa kaaway. Niana nga kasinatian giklaro gayud sa Ginoo ngari nako nga kinahanglan kong mobuhat pa og dugang ug mobuhat nga mas maayo pa. Tuguti ko sa paghatag ninyo og gamayng background.
Si Sue ug ako naminyo sobra na sa 30 ka tuig. Aktibo kami ug nalambigit sa Simbahan sa tibuok namong kinabuhi. Nagserbisyo kami sa Simbahan; nagtambungan sa templo kada semana; nag-ampo uban sa among mga anak, nagtuon sa kasulatan uban nila, uga naghimo og family home evening. Naningkamot kami nga mahimong maayo nga mga Santos sa Ulahing mga Adlaw. Ug sa gihapon, ang Ginoo miingon kanako, Kinahanglan mobuhat ka pa og dugang.
Usa ka gabii duna koy makalilisang nga damgo. Nakamata ko nga wala mahimutang ug nabalaka, ug miluhod ug nag-ampo ko sa akong Amahan sa Langit alang sa panabang. Samtang nag-ampo ko, dunay misantup sa akong hunahuna nga tudling gikan sa Mga Taga-Efeso, kapitulo 6: “Kay ang atong pakigdumog dili batok sa mga binuhat nga unod ug dugo, kondili batok sa mga punoan, batok sa mga kagamhanan, batok sa mga labawng agalon niining mangitngit nga kalibutan karon, batok sa mga dautan nga espirituhanong panon diha sa mga dapit sa kalangitan.”14
Pagkabuntag akong gitan-aw ang kasulatan ug nakabasa niining mga pulong:
“Sa katapusan, magmalig-on kamo pinaagi sa Ginoo, ug sa kusog sa iyang gahum.
“ Isul-ob ninyo ang tibuok hinagiban sa Dios,aron makabarug kamo batok sa mga malipat-lipatong kaugdahan sa yawa.”15
Sa dihang nabasa nako ang mga pulong nga “isul-ob ninyo ang tibuok hinagiban sa Dios,” akong gibati ang gamhanang pagsaksi sa Espiritu nga mao kini ang tubag sa akong mga pag-ampo. Kinhanaglan nakong isul-ob ang yibuok hinagiban sa Dios, matag usa niini.
Ug busa, si Sue ug ako naghisgut bahin sa unsay gipasabut niana, ug nag-ampo kami alang sa giya. Akong nakat-unan nga kinahanglan kaming mangutana sa among kaugalingon og duha ka pangutana. Ako mituo nga kini ang mga pangutana kansang tubag mogiya nato sa pagbuhat sa unsay kinahanglan natong buhaton aron maandam sa unsay moabut. Ania kini: (1) Unsa may akong gibuhat nga kinahanglan nakong hunungon? ug (2) Unsa may wala nako buhata nga kinahanglan nakong sugdan og buhat?
Sa among pagpangutana niadtong mga pangutanaha diha sa pag-ampo, nakadawat mi og piho kaayo nga mga tubag. Giusab namo kon giunsa namo paggahin ang among panahon, unsa nga media ang among gitugutan sa among panimalay, giunsa namo pagserbisyo sa templo, giunsa namo pagtuon ang kasulatan, ug giunsa namo pagserbisyo ang Ginoo, ug daghan pang laing mga butang. Kinahanglan namong palambuon ang among pagka-espirituhanon. Pinaagi niini nga proseso sa paghinulsol, si Ginoong Jesukristo mitabang ug miusab sa among kinabuhi. Among gibati ang Iyang kalooy, ang Iyang grasya, ang Iyang gugma, ug ang Iyang gahum. Pinaagi sa Iyang dili hitupngan nga gahum Iyang giusab ang among kasingkasing ug hunahuna ug mibayaw kanamo ngadto Kaniya. Nasayud ko nga kon wala pa kami maminaw ug wala molihok base sa unsay among nadawat, wala unta ko matawag nga moserbisyo sa BYU–Idaho ug wala unta magbarug dinhi sa inyong atubangan karon. Importante kadto nga yugto sa kausaban sa among kinabuhi.
Mga kaigsoonan, nasayud ko nga namulong ko ngadto sa mga matinud-anon, nagtuman sa pakigsaad nga mga Santos sa Ulahing mga Adlaw. Nasayud ko nga kamo maayo kaayo sa unsay inyong gibuhat. Apan nasayud ko gikan sa akong kaugalingong kasinatian nga kinahanglan natong pangutan-on kanunay ang atong kaugalingon niining duha ka pangutana. Kinahanglan kitang mag-usab ug maghinulsol aron nga ang Pag-ula ni Kristo mosalir sa mas gamhanang paagi diha sa atong kinabuhi. Kon atong buhaton, ang atong Langitnong Amahan mopanalangin kanato og dugang espirituhanong gahum. Ako nasayud nga kana tinuod
Ug niana, ako mituo, nga mao ang gikinahanglan nga elemento sa pagpangandam alang sa dagkong mga oportunidad ug mga responsibilidad nga nagpaabut kanato. Dunay daghang praktikal nga mga butang nga kinahanglan natong buhaton. Kinahanglan kitang maghunahuna og maayo ug magplano ug motrabaho ug magtinambagay ug mangandam sa pagbuhat sa atong pinakamaayo. Apan ang gahum sa Espiritu Santo mao ang mopadangat sa tinud-anay nga pagkat-on ug sa mas dakong pag-ila ug sa matubsanon ug makapalig-on nga gahum ni Kristo ngadto sa kinabuhi sa atong mga estudyante.
Ang bag-ong henerasyon nagkinahanglan og klaro ug simple nga mga kamatuoran sa ebanghelyo nga gitudlo ug nakat-unan uban sa napalambo nga gugma, uban sa mas dakong espirituhanong gahum, ug uban sa mas dakong impluwensya sa ilang kinabuhi. Ako mituo nga ang impluwensya moabut tungod kay ang ebanghelyo ni Jesukristo mas lig-ong maestablisar sa atong kasingkasing ug sa atong hunahuna ug tungod kay ang Espiritu Santo mao ang atong kanunay nga kauban. Ang atong kinabuhi mas hingpit nga mopakita sa mga pagtulun-an sa Manluluwas. Dayon—kon kita modumala og mga programa, o mopalambo og kurikulum, o moimplementar og bag-ong mga pamaagi, o mo-hire o motawag ug mo-train og bag-ong mga magtutudlo, o motambag sa mga estudyante, o magplano og bag-ong mga building, o moabli og bag-ong dapit, o mosulod sa klasehanan aron motudlo sa mga anak sa Dios—makadawat kita sa pagpadayag nga atong gikinahanglan, ug mohimo sa buhat uban sa tiunay nga gugma ni Kristo pinaagi sa gahum sa Espiritu Santo. Ang bag-ong henerasyon mas makakat-on gayud; sila mobarug!
Nasayud kita nga kini mahitabo. Nasayud kita kon unsay mahitabo sa katapusan. Si Ginoong Jesukristo moabut, ug ang iyang katawhan ug ang iyang Simbahan andam na nga modawat Kaniya.
Kon maghunahuna ko kaninyo ug unsay inyong buhaton diha sa gingharian sa Dios, maghunahuna ko nianang talagsaong kasinatian diha sa 3 Nephi 17, sa dihang ang Manluluwas mipundok sa mga bata libut Kaniya. Gusto nako nga hunahunaon ninyo ang talan-awon diha sa inyong hunahuna tungod kay anaa kamo niana nga talan-awon. Ang mga ginikanan midala sa ilang bililhong mga anak ngadto sa Manluluwas. Iya silang gipundok libut Kaniya; Siya anaa sa tunga. Nag-ampo Siya alang kanila ug sa ilang mga ginikanan sa milagrusong paagi, ug gipanalanginan Niya ang mga bata sa tagsa-tagsa. Dayon ang mga anghel nanaug gikan sa Langit “ingon og diha sa taliwala sa kalayo”16 ug nangalagad sa mga bata, ug kanang balaang kalayo mialirong sa mga bata.
Sa gamhanang paagi, kini ang atong gibuhat diha sa seminary ug sa institute. Sa pagkatinuod, kini ang Church Educational System. Ang mga ginikanan modala sa ilang mga anak ngari kanato. Ang Manluluwas anaa sa tunga, ang sentro sa tanang nahitabo sa mga bata. Nag-ampo Siya alang kanila ug alang kanato; Siya ang Manlalaban ngadto sa Amahan. Kita ang mga anghel—kamo ang mga anghel—kinsa miabut aron mangalagad niadtong mga bata diha sa balaang kalayo. Kana, akong minahal nga mga kaigsoonan, kon unsay kinahanglang mahitabo kanato.
Ug kana ang mahitabo kanato tungod kay dunay usa ka Dios nga anaa sa langit. Siya ang atong Amahan. Ang Iyang Anak, nga si Jesukristo, mao ang Manluluwas ug Manunubos sa tanang katawhan. Siya buhi! Ako mosaksi sa Iyang balaan nga ngalan. Ako Siyang nakita nga nagbuhat, ako nahibalo sa Iyang kalooy ug grasya, ug akong gibati ang Iyang gugma. Siya aduna sa tanang gahum sa paglimpyo kanato gikan sa sala, sa pag-usab sa atong kasingkasing ug sa pagbayaw kanato, ug sa paglig-on kanato aron mahimo kon unsay gusto Niya nga kita mahimo. Ako nasayud nga kon kita modangup kang Kristo, kinsa kanunay nga nagbarug nga ang Iyang mga bukton gipatuyhad ngari kanato, Siya mopanalangin kanato nga mahimong mas maayo ug mohimo og dugang pa diha niini, ang iyang balaan nga buhat. Ako mopamatuod sa ingon, sa sagradong pangalan ni Jesukristo, amen.
© 2015 sa Intellectual Reserve, Inc. Tanang mga katungod gigahin. Pagtugot sa Iningles 6/15 Pagtugot sa paghubad: 6/15 6/15. Hubad sa “Encircled About with Fire.” Cebuano PD10054335 853