Kamo Mao ang Akong mga Saksi

Carol F. McConkie

Unang Magtatambag sa Kinatibuk-ang Kapangulohan sa Young Women

Satellite nga Sibya sa Seminaries and Institutes of Religion • Agosto 4, 2015

Ang espiritu dinhi sagrado kaayo, ug, sama kaninyo, ako mapasalamaton sa tanan nga gitudlo kanako.

Sa usa sa katapusang epistola ni Mormon, siya mitudlo:

“Kay tan-awa, ang Dios nga nasayud sa tanan nga mga butang, ingon nga gikan sa walay katapusan ngadto sa walay katapusan, tan-awa, siya nagpadala og mga anghel aron pagpangalagad ngadto sa mga katawhan, aron ikapahibalo ang mahitungod sa pag-anhi ni Kristo; ug diha kang Kristo kinahanglan magagikan ang matag maayo nga butang. …

“Busa, pinaagi sa pagpangalagad sa mga anghel, ug pinaagi sa matag pulong nga mogula gikan sa ba-ba sa Dios, ang mga tawo misugod paghupot sa hugot nga pagtuo diha kang Kristo; ug sa ingon pinaagi sa hugot nga pagtuo, sila makahupot sa mga maayo nga butang.”¹

Sa akong opinyon, kamo, ang mga magtutudlo sa mga seminary ug institute, sayo sa buntag ug sa tingpamuhi, diha sa mga panimalay, sa mga simbahan, sa mga eskwelahan, sa mga kolehiyo ug mga unibersidad, kamo nataliwad-an sa mga anghel nga gipadala sa Dios sa pagpangalagad ngadto sa Iyang mga anak aron sila maghupot sa hugot nga pagtuo diha kang Kristo ug makahupot sa mga maayo nga mga butang. Ako mopadayag sa akong pasalamat nganha kaninyo alang sa pagtudlo sa Iyang lunsay nga doktrina pinaagi sa gahum sa Espiritu Santo. Salamat nga kamo anaa sa klasehanan kada adlaw, sa pagpahayag sa pulong sa Dios, diin mao “ang gahum sa Dios ngadto sa kaluwasan.”² Akong ipadayag ang akong pasalamat sa inyong dalaygong mga kapikas, ang inyong mga asawa ug bana, kinsa mga anghel usab sa ilang mabinationg paghigugma ug nagpaluyo nga impluwensya.

Usa kini ka sagrado ug mahimayaon nga pribilehiyo sa pagpadayag sa pulong sa Dios—mamahimong Iyang mga saksi ug magtudlo sa mahangturon nga kamatuoran. Ang propeta nga si Isaias mipahayag sa pulong sa Ginoo ngadto sa tanan Niyang katawhan sa pakigsaad:

“Kamo mao ang akong mga saksi, miingon ang Ginoo. …

“Ako, bisan Ako, mao ang Ginoo; ug gawas kanako wala nay manluluwas. …

“… Tungod niini kamo mao ang akong mga saksi, miingon ang Ginoo, ako mao ang Dios.”³

Usa kini ka sagrado nga pribilehiyo sa pagtabang sa bag-o nga kaliwatan nga makat-on sa pulong sa Dios nga sila usab mahimong maghupot og hugot nga pagtuo ug mahimong nga saksi ni Kristo.

Ang mga batan-ong lalaki ug babaye kinsa nanambong sa klase sa seminary ug institute sa tibuok kalibutan mihimo og mga pakigsaad sa paghigugma ug pag-alagad sa Dios ug sa pagbarug isip Iyang mga saksi. Pinaagi sa ilang hugot nga pagtuo kang Kristo, sila mabunyagan ug makadawat sa Espiritu Santo kamo makapamulong sa mga pinulongan sa mga anghel.”⁴ “[Sila] ang mga anak sa mga propeta; … sa balay ni Israel; … “[Sila] anaa sa pakigsaad diin ang Amahan mihimo … , nag-ingon ngadto kang Abraham: Ug diha sa imong binhi ang tanan nga mga kaliwatan sa yuta mapanalanginan;.”⁵

Pinaagi sa hugot nga pagtuo ang matag batan-ong lalake ug batan-ong babaye adunay abilidad sa pagpamulong sa pangalan ni Kristo, pinaagi sa Espiritu, ug “mobarug ingon nga mga saksi [Kaniya] sa tanan nga mga panahon ug diha sa tanan nga mga butang, ug diha sa tanan nga mga dapit.”⁶

Karon, atong hunahunaon unsay mahitabo diha sa klase sa seminary ug institute sa pagtabang sa bag-ong kaliwatan nga tinud-anay nga mahimong mga saksi sa Dios. Sila sa pagkatinuod adunay tinguha sa pagbuhat sa ingon.

Niadtong Mayo niining tuiga, agig pagpangandam alang sa Face to Face Facebook nga kalihokan uban nilang Elder ug Sister David A. Bednar, ang mga kabatan-onan mipadala og kapin sa 11,000 ka mga pangutana gikan sa tibuok kalibutan. Daghang nangutana kon unsaon sa pagtubag sa mga higala ug mga sakop sa pamilya sa pagpakigbahin, ug papanalipod, pagtuboy, ug pagdepensa sa mga pagtulun-an sa ebanghelyo ni Kristo. Gusto nilang mahibaloan kon unsay isulti ug unsay buhaton. Si Elder Bednar mipasabut nga siya ug ang iyang asawa mahimong dili makatubag sa tanang mga pangutana, nag-ingon nga dili igo ang ilang kaalam o dili igo ang kasinatian. Apan siya misulti sa mga batan-on nga sa ilang panag-istoryahanay, nagtinguha sa pakig-uban sa Espiritu Santo, sila makadawat ug mga hunahuna og mga pagbati, mga impresyon ug pagdasig pinaagi sa gahum sa Espiritu Santo.⁷

;Ang Espiritu Santo mao ang magtutudlo. Kini maoy Iyang balaanong tahas ang pagtudlo, pagpamatuod, ug pagsaksi sa Amahan ug sa Anak⁸ ug sa pagbutyag “sa kamatuoran sa tanan nga mga butang.”⁹ Pagkatalagsaon nga gasa alang sa usa ka batan-on nga modawat og piho nga kahibalo pinaagi sa Espiritu nga ang Dios mao ang Amahan ug nga Siya nakaila kanila, nahigugma kanila ug adunay plano alang kanila! Pagkatalagsaon nga gasa alang sa usa ka batan-on nga modawat og piho nga kahibalo pinaagi sa Espiritu nga si Jesukristo mao ang Anak sa Dios ug nga pinaagi sa hugot nga pagtuo diha Kaniya ug sa Iyang Pag-ula sila makahinulsol ug malimpyohan sa sala, mamaayo gikan sa tanang kasakit ug pag-antus, ug mahimong molambo, mouswag, ug makaangkon sa ilang balaanong padulngan! Ang Espiritu maoy pamaagi nga atong mabati ang gugma sa Dios. Kita mosangyaw sa ebanghelyo pinaagi sa Espirit aron ang atong batan-ong mga lalaki ug babaye makadawat pinaagi sa Espiritu,¹⁰ aron ilang makita, mabati, mahibaloan, ug magpamatuod sa Manluluwas ug mobarug isip Iyang mga saksi sumala sa gipanagna sa mga propeta.¹¹

Mga kaigsoonan, daghan pa ang angay nakong makat-unan mahitungod sa pagtudlo ug pagkat-on, apan ako nasayud: Ang atong modernong mga propeta, manalagna, ug mga tigpadayag nagpakita kanato nga kita makatudlo ug makakat-on uban sa mas dakong makapakabig nga gahum ug mas may kalabutan nga katuyoan. Bag-ohay lang didto sa Mission Training center sa Provo, Akong naobserbaran ang Apostoles sa Ginoo nga mipatuman sa mga baruganan sa pagtudlo ug pagkat-on nga nagtugot sa Espiritu Santo nga motandog sa kasingkasing ug hunahuna sa mga presidente sa misyon ug sa mga asawa, sa indibidwal ug sa personal nga paagi, sa pagtubag sa ilang mga pangutana ug mituhop diha kanila ang pagdasig aron makab-on ang ilang gikinahanglan. Ang mga lider sa Simbahan dili lang basta mibarug sa pulpito aron mamulong, ingon nga maoy tinud-anay nga tukma sa uban nga kahimtang. Ilang gipakita ang mga sumbanan nga giestablisar sa Ginoo alang sa pagkat-on ug usab pinaagi sa hugot nga pagtuo.”¹² Ang Ginoo mitudlo, “Pagtudlo diha sa inyong mga kaugalingon og usa ka magtutudlo, ug dili ang tanan magdungan sa pagpamulong; apan himoa nga ang usa mamulong sa tagsa-tagsa ka higayon ug himoa nga ang tanan maminaw ngadto sa iyang mga gipamulong, nga sa diha nga ang tanan mahuman sa pagpamulong nga ang tanan unta mahatagan og kaayohan sa tanan, ug nga ang matag tawo makabaton og managsama nga kahigayunan.”¹³

Ang tinguha sa pagkat-on sama sa gihulagway sa Ginoo mao ang pagdapit sa Espiritu nga maoy magtudlo aron ang atong mga kabatan-onan madasig sa tubag sa ilang mga pangutana ug ang Espiritu Santo “mopakita nganha [kanila] sa tanan nga mga butang nga kinahanglan [nilang] buhaton.”¹⁴

1. Pag-andam sa Pagkat-on

Una, pag-andam sa pagkat-on. Kadaghanan sa atong gibuhat sa kinabuhi nga nagkinahanglan og unang pagpangandam. Aron maangkon ang mahangturon nga edukasyon, kinahanglan buhaton nato ang mas labaw pa kaysa pagtambong sa klase. Ang Manluluwas mitudlo sa mga katawhan sa Nephite nga sila kinahanglan pamalandongang sa Iyang mga pulong ug mag-ampo aron makabaton og panabut.¹⁵ Isip usa ka batang lalaki, nakita ni Joseph Smith ang Dios Amahan ug si Jesukristo diha sa panan-awon tungod kay siya misiksik sa mga kasulatan ug “gibalik balik sa pagpamalandong, ang mga pulong.”¹⁶ Si Presidente Joseph F. Smith nakadawat og panan-awon sa katubsanan sa mga patay tungod kay namalandong sa mga bersikulo sa kasulatan nga iyang nabasa ug natun-an.¹⁷

Bisan sa dili pa mosulod sa klasehanan, atong dapiton ang estudyante sa pag-ampo ug pagpamalandong sa mga pulong ni Kristo, nga ang ilang mga hunahuna ug kasingkasing maandam sa pagdawat sa kahibalo pinaagi sa gahum sa Espiritu Santo. Ang Ginoo miingon, “Unaha ang pagbaton sa akong pulong, ug unya ang imong dila makasulti; unya, kon ikaw magtinguha, ikaw makabaton sa akong Espiritu ug sa akong pulong, oo, ang gahum sa Dios ngadto sa pagkabig sa mga tawo.”¹⁸

2. Pakig-interact aron Makat-on

Ikaduha, pakig-interact aron makat-on. Pinaagi sa paghatag og oportunidad sa pagsalmot sa klase, kita mihatag sa kabatan-onan kahigayunan sa pagtingog. Samtang magdungan sila sa pagkat-on gikan sa mga pulong sa mga propeta, motubag sa dinasig nga mga pangutana, mohisgot sa ilang mga hunahuna ug mga impresyon ug motubag sa mga pangutana ug kabalaka sa ilang mga kaedad, ang Espiritu sa Ginoo molamdag sa ilang mga hunahuna ug mopalambo sa ilang panabut.¹⁹ Sila makakat-on sa pagpamulong sa pangalan sa Ginoo uban ang “pag-amping, ug pinaagi sa pagtugot sa Espiritu.”²⁰ Ang pagpakigbahin sa mga butang sa Espiritu sa Ginoo motudlo kanila sa pagtabang kanila sa pagbuntog sa kahadlok ug paglig-on sa usag usa sa pagpanalipod sa taas nga sumbanan sa moralidad ug pagkamatarung. Sila nag-andam sa pagtubag niadtong mangutana sa ilang tinuohan, manaway kanila, o mopasangil kanila nga kinaraan o mabaw og hunahuna.

Kini angayng timan-an nga sa pila ka higayon diha sa mga kasulatan usa ka bag-ong gitawag nga mga propeta mibati nga dili sarang sa pagpamulong. Si Enoch mituaw, “apan … ako usa lamang ka batan-on, ug ang tanan nga mga katawhan nagdumot kanako”²¹ Apan ang Ginoo daw wala kaayo mabalaka mahitungod sa kahuyang o sa mga babag. Siya mitubag, “Lakaw ug buhata ingon nga ako misugo kanimo. … Bukha ang imong ba-ba, ug kini mapuno, ug Ako mohatag kanimo og igsusulti.”²²

Ang Ginoo naglaum sa tanan kinsa nagsunod sa ilang mga pakigsaad sa pagbarug isip mga saksi. Siya miingon, “Bukha ang imong ba-ba ug kini mapuno, ug ikaw mahisama gani sama kang Nephi sa karaan.”²³

Bahin ni Nephi sa karaan, si Amahang Lehi mipasabut, “kini dili siya, apan kini mao ang Espiritu sa Ginoo diin anaa kaniya, diin mibuka sa iyang ba-ba sa paglitok nga siya dili makatak-om niini.”²⁴

Gawas sa panimalay, tingali wala nay mas maayong dapit sa paghatag sa kabatan-onan sa pagpamulong sa pangalan sa Ginoo “diha sa kaligdong sa kasingkasing, diha sa espiritu sa kaaghup,”²⁵ kay sa kauban sa ilang kaedad sa mga klase sa seminary ug institute. Ato silang dapiton sa pagkig-interact aron makat-on nga sila mahimong “andam kamo kanunay sa pagtubag kang bisan kinsa nga mangutana … sa hinungdan sa paglaum nga anaa [kanila], hinoon buhata ninyo kini uban sa kaaghup ug kataha.”²⁶

3. Pagdapit aron sa Paglihok

Ikatulo, pagdapit sa paglihok. Anaa sa pagsunod sa ebanghelyo nga ang mga pulong nga gipamulong sa usa ka batan-ong lalaki o usa ka batan-ong babaye adunay bili. Ang pagdapit sa pagbuhat mao ang pagdapit sa pagtuman sa ilang mga pakigsaad sa pagsunod sa Manluluwas ug sa pagbuhat nga “walay pagpakaaron-ingnon ug walay pagpanglimbong sa atubangan sa Dios.”²⁷ Kini usa ka pagdapit sa atong kabatan-onan nga sila motubag sa mga aghat sa Espiritu ug mogamit sa mga baruganan sa ebanghelyo sa praktikal nga paagi. Ang Manluluwas mitudlo, “Kon tuyoon ni bisan kinsa ang pagbuhat sa kabubut-on sa Dios, nan, iyang mahibaloan kon ang akong gitudlo gikan ba sa Dios.”²⁸ Aron mahimong saksi sa sa Dios, ang atong kabatan-onan kinahanglan nga magpuyonga mahiuyon sa unsay ilang nahibaloan.

Sama kaninyo, akong namatikdan nga ang hugot nga pagtuo sa atong kabatan-onan nga makasabut kon unsay ipasabut sa “matinguhaon nga moapil … ug mobuhat og daghan nga mga butang … ug magpahinabo sa daghan nga pagkamatarung.”²⁹ Usa ka pananglitan ang usa ka pagbaktas sa pioneer karong bag-o nga akong gitambongan.

Kabatan-onan mibira sa kariton subay sa usa ka bahin sa orihinal nga dalan sa pioneer sa Wyoming, USA. Miabut sila sa Bungtod sa Gravel Hill, “ang pinakataas ug pinakabalikid … sukad [pagbiya] sa Winter Quarters.”³⁰ Daghang mga tuig na ang milabay, niadtong Hulyo 9, 1847, ang pundok ni Brigham Young sa orihinal nga mga pioneer mibutang og sagansangon nga kadena sa mga ligid sa ilang karwahe aron sa paglikay nga malimbuwad sila sa ilang pagkanaug. Apan alang sa mga pamilya sa batan-ong mga pioneer nga nagbira sa karomata nianang adlawa, ang pipila ka mga sakop sa matag grupo migiya sa karomata diha sa atubangan samtang ang kadaghanan nagpugong sa luyo aron mapugngan nga mawad-an sa kontrol ang pagnaug sa baliklid.

Makahahadlok kadto. Ang dalan dili hapsay ug makuyaw, ug ang pagpugong niadtong mga karomata gikinahanglan kaayo ang ilang kusog. Wala gyud koy natabang, busa ako mibarug didto sa ubos sa bungtod nga nagtan-aw, uban sa matinguhaon nga pag-ampo sa akong kasingkasing nga ang tanan mamaayo ra.

Nagkapandol-pandol sa mga dagkong bato, ang unang karomata luwas nga nakanaug. Sa akong pagtan-aw sa sunod nga karomata nga mikanaog, akong nakita ang upat ka batan-ong lalaki nga nagdagan milabay nako diha bungtod. Ang akong mga mata nagluha ug ang akong kasingkasing napuno sa pasalamat sa dihang akong naamguhan nga pag-abut gayud sa ilang karomata sa ubos, nga walay gisulti, kining matinud-anon nga batan-ong lalaki naglumba og pamalik aron tabangan ang sunod nga karomata. Balik-balik silang mitabang diha sa buhat sa pagpakanaug sa tanang karomata. Ang ilang mga paningkamot nakapadasig sa uban sa pagbuhat sa ingon, ug sa wala madugay, tanang karomata nagpadulong na sa dapit nga kampinganan nianang gabhiona.

Unsay wala maamguhi sa atong mga kabatan-onan mao nga ang ilang matarung nga ehemplo didto sa Gravel Hill ug ubang mga higayon sa pagpamatuod diha sa agianan, sa pulong ug sa buhat, mao ang saksi sa usa ka batan-on nga dili sakop sa atong hugot nga pagtuo. Dayon si Jack mipakigbahin nga samtang siya mibaktas, iyang nakat-unan nga ang mga Mormon dili tigpakaaron-ingnon sama sa iyang gihunahuna. Iyang nakita ug gibati nga sila mga tinuod. Nagpuyo sila sa unsay ilang gituohan. Si Jack mibati sa Espiritu, ug siya nagplano nga magpatudlo sa misyonaryo.

Ang atong kabatan-onan dili gikinahanglan nga magguroy sa mga kariton sa batoon nga bungtod aron mahimong mga saksi sa Dios, apan sila kanunay mag-atubang og dako nga oposisyon samtang sila maisugon nga maningkamot sa pagbarug alang sa kamatuoran ug pagkamatarung. Ang mga magtutudlo diha sa klasehanan makatabang sa matag batan-ong mga lalaki ug batan-ong babaye nga mogamit sa hugot nga pagtuo diha kang Kristo ug modawat sa Espiritu Santo. Tabangi sila sa pagpangandam sa pagkat-on pinaagi sa pagbusog sa mga pulong ni Kristo. Pakig-interact aron makat-on pinaagi sa pagpamulong sa mga pulong ni Kristo. Ug modapit sa paglihok pinaagi sa pagsunod sa mga pulong ni Kristo aron sila mahimo nga mapuno uban sa Espiritu sa Ginoo. Ug, pinaagi sa gahum sa Espiritu Santo, sila unta mahimong mga saksi ni Kristo kinsa mosulti sa unsay Iyang gisulti, mobuhat sa unsay Iyang ipabuhat, ug mahimong sama Kaniya.

Ako mopamatuod nga ang Dios mao atong Amahan ug nga ang Iyang gugma alang kanato hingpit. Ako mopamatuod nga Si Jesukristo mao ang balaang Anak, atong Manluluwas ug Manunubos, ug nga ang Iyang gugma alang kanato hingpit. Ako mopamatuod nga sa hingpit nga paghigugma ang Amahan ug Anak mipakita ngadto ni Joseph Smith ang Propeta ug mipahiuli sa mga balaod ug mga ordinansa sa ebanghelyo ni Jesukristo dinhi sa yuta. Si Presidente Thomas S. Monson mao ang tinuod nga propeta kinsa naggiya sa Ang Simbahan ni Jesukirsto sa mga Santos sa Ulahing mga Adlaw karon.. Ako mopamatuod nga samtang kita mogamit sa hugot nga pagtuo diha kang Kristo ug modawat sa Espiritu Santo, kita tanan mahimong maghiusa isip Iyang mga saksi. Pinaagi sa pangalan ni Jesukristo, amen.