អ្នករាល់គ្នាជាស្មរបន្ទាល់របស់យើង

ខារ៉ុល អេហ្វ ម៉ាកខន់ឃី

ទីប្រឹក្សាទីមួយនៅក្នុងគណៈប្រធានយុវនារីទូទៅ

រូបភាព

ការចាក់ផ្សាយតាមផ្កាយរណបអំពីថ្នាក់សិក្ខាសាលា និង ថ្នាក់វិទ្យាស្ថានសាសនា•ថ្ងៃទី៤ ខែ សីហា ឆ្នាំ ២០១៥

ព្រះវិញ្ញាណនៅទីនេះពិសិដ្ឋណាស់ ហើយខ្ញុំមានអំណរគុណចំពោះអ្វីទាំងអស់ដែលខ្ញុំត្រូវបានបង្រៀន ។

នៅក្នុងសំបុត្រចុងក្រោយមួយរបស់ មរមន លោកបានបង្រៀនថា ៖

« ដ្បិតមើលចុះ ព្រះទ្រង់ជ្រាបគ្រប់រឿងទាំងអស់ចាប់តាំងពីភាពអស់កល្បជានិច្ច មើលចុះទ្រង់បានចាត់ឲ្យពួកទេវតា មកធ្វើការងារបម្រើដល់កូនចៅមនុស្ស គឺដើម្បីមកសម្ដែងឲ្យដឹងអំពីការយាងមកនៃព្រះគ្រីស្ទ ហើយនៅក្នុងព្រះគ្រីស្ទ នោះអ្វីដែលល្អគ្រប់យ៉ាងនឹងចេញមក ។ …

« ហេតុដូច្នោះហើយ ដោយការងារបម្រើនៃពួកទេវតា និងដោយគ្រប់ពាក្យទាំងអស់ ដែលចេញមកពីព្រះឱស្ឋនៃព្រះ នោះមនុស្សបានចាប់ផ្ដើមអនុវត្តសេចក្ដីជំនឿជឿដល់ព្រះគ្រីស្ទ ម្ល៉ោះហើយ ដោយសេចក្ដីជំនឿ នោះពួកគេបានក្ដាប់ជាប់នូវគ្រប់ទាំងអ្វីៗដែលល្អ » ។^១

តាមយោបល់របស់ខ្ញុំ គ្រូថ្នាក់សិក្ខាសាលា និងថ្នាក់វិទ្យាស្ថាន ទាំងពេលព្រលឹម និងពេលព្រលប់ ទាំងនៅផ្ទះ នៅព្រះវិហារ នៅមហាវិទ្យាល័យ និងនៅសាកលវិទ្យល័យ បងប្អូនទាំងអស់គ្នានៅក្នុងចំណោមទេវតាដែលព្រះបានបញ្ជូនឲ្យមកបម្រើកូនចៅរបស់ទ្រង់ ម្ល៉ោះហើយ ពួកគេអាចអនុវត្តសេចក្ដីជំនឿលើព្រះគ្រីស្ទ ហើយក្ដាប់ជាប់នូវគ្រប់ទាំងអ្វីៗដែលល្អ ។ ខ្ញុំសូមថ្លែងអំណរគុណដល់បងប្អូនទាំងអស់គ្នាដែលបានបង្រៀនគោលលទ្ធិដ៏បរិសុទ្ធរបស់ទ្រង់ ដោយព្រះចេស្ដានៃព្រះវិញ្ញាណបរិសុទ្ធ ។ សូមអរគុណ សម្រាប់ការបង្រៀនជារៀងរាល់ថ្ងៃ ទាំងព្រឹកទាំងល្ងាច ដោយប្រកាសព្រះបន្ទូលរបស់ព្រះ ដែលជា « ព្រះចេស្ដានៃព្រះចំពោះសេចក្ដីសង្គ្រោះ » ។^២ ខ្ញុំសូមថ្លែងអំណរគុណដល់ស្វាមីភរិយាដ៏អស្ចារ្យរបស់បងប្អូន ដែលជាទេវតាពេញដោយក្ដីសប្បុរស ហើយបានគាំទ្រដល់បងប្អូន ។

វាជាឯកសិទ្ធិដ៏ពិសិដ្ឋ និងឧត្ដុងឧត្ដម ដើម្បីប្រកាសព្រះបន្ទូលរបស់ព្រះ—ដើម្បីឈរជាស្មរបន្ទាល់ម្នាក់របស់ទ្រង់ និងដើម្បីបង្រៀនពីសេចក្ដីពិតដ៏អស់កល្ប ។ ព្យាការី អេសាយ បានប្រកាសប្រាប់ព្រះបន្ទូលនៃព្រះអម្ចាស់ ដល់ប្រជាជននៃសេចក្ដីសញ្ញារបស់ទ្រង់ ។

« ព្រះយេហូវ៉ាទ្រង់មានព្រះបន្ទូលថា អ្នករាល់គ្នាជាស្មរបន្ទាល់របស់យើង ។ …

គឺយើងនេះហើយជាយេហូវ៉ា ក្រៅពីយើង គ្មានអ្នកសង្គ្រោះណាទៀតឡើយ ។ …

« … ហេតុដូច្នោះអ្នករាល់គ្នាជាស្មរបន្ទាល់របស់យើង ហើយគឺយើងនេះដែលជាព្រះ នេះជាព្រះបន្ទូលនៃព្រះយេហូវ៉ា » ។^៣

វាជាឯកសិទ្ធិដ៏ពិសិដ្ឋ ដើម្បីជួយកូនចៅជំនាន់ក្រោយឲ្យសិក្សាព្រះបន្ទូលរបស់ព្រះ ដូច្នេះពួកគេក៏អាចអនុវត្តសេចក្ដីជំនឿ និងក្លាយជាស្មរបន្ទាល់របស់ព្រះគ្រីស្ទដែរ ។

យុវជន និងយុវនារី ដែលបានចូលរៀនថ្នាក់សិក្ខាសាលា និងថ្នាក់វិទ្យាស្ថាននៅជុំវិញពិភពលោក បានធ្វើសេចក្ដីសញ្ញាថា ស្រឡាញ់ និងបម្រើព្រះ ហើយនឹងឈរជាស្មរបន្ទាល់របស់ទ្រង់ ។ ដោយសេចក្ដីជំនឿលើព្រះគ្រីស្ទ នោះពួកគេបានទទួលបុណ្យជ្រមុជទឹក ហើយបានទទួលព្រះវិញ្ញាណបរិសុទ្ធ នោះពួកគេអាចដឹងសេចក្ដីពិត ហើយអាចនិយាយភាសាទេវតា ។^៤ [ពួកគេ] គឺជាកូនចៅរបស់ពួកព្យាការី … នៃវង្សអ៊ីស្រាអែល … [ពួកគេ] នៅក្នុងសេចក្ដីសញ្ញា ដែលព្រះវរបិតាទ្រង់បានធ្វើ … , ដោយមានព្រះបន្ទូលទៅលោក អ័ប្រាហាំ ថា ៖ ។ ដោយសារពូជអ្នក នោះគ្រប់ទាំងពូជមនុស្សនៅផែនដីនឹងបានពរ » ។^៥

ដោយសេចក្ដីជំនឿ យុវជន និងយុវនារីគ្រប់រូប មានសមត្ថភាពនិយាយក្នុងព្រះនាមនៃព្រះគ្រីស្ទ ដោយព្រះវិញ្ញាណ ហើយ « ឈរជាសាក្សីដល់ [ទ្រង់] នៅគ្រប់ពេល និងគ្រប់សេចក្ដី និងគ្រប់ទីកន្លែង » ។^៦

នៅថ្ងៃនេះ ចូរយើងគិតពីអ្វីដែលអាចកើតឡើងនៅក្នុងថ្នាក់សិក្ខាសាលា ឬថ្នាក់វិទ្យាស្ថាន ដើម្បីជួយកូនចៅជំនាន់ក្រោយឲ្យក្លាយជាសាក្សីនៃព្រះដ៏ពិត ។ ពួកគេពិតជាមានបំណងធ្វើដូច្នោះមែន ។

នៅខែ ឧសភា ក្នុងឆ្នាំនេះ ក្នុងការរៀបចំព្រឹត្តិការណ៍ Face2Face Facebook ជាមួយអែលឌើរ ដាវីដ អេ បែដណា និងភរិយាលោកឈ្មោះ ស៊ូសិន យុវវ័យបានផ្ញើសំណួរជាង ១១,០០០ សំណួរមកពីជុំវិញពិភពលោក ។ សំណួរជាច្រើនសួរអំពីរបៀបឆ្លើយតបទៅនឹងមិត្តភក្ដិ និងសមាជិកគ្រួសារ របៀបចែកចាយ លើកកម្ពស់ និងទ្រទ្រង់ការបង្រៀនដំណឹងល្អនៃព្រះគ្រីស្ទ ។ ពួកគេគេចង់ដឹងពីអ្វីដែលត្រូវនិយាយ និងត្រូវធ្វើ ។ អែលឌើរ បែដណា បានពន្យល់ថា លោក និងភរិយាលោក មិនអាចឆ្លើយនឹងសំណួរទាំងអស់បានទេ ដោយនិយាយថាពួកលោកមិនឆ្លាត ឬបទពិសោធន៍គ្រប់គ្រាន់ទេ ។ ប៉ុន្តែ លោកបានបា្រប់យុវវ័យថា នៅពេលពួកគេប្រាស្រ័យទាក់ទងគ្នា ហើយស្វែងរកដៃគូពីព្រះវិញ្ញាណបរិសុទ្ធ នោះពួកគេនឹងទទួលបានគំនិត និងអារម្មណ៍ និងការបំផុសគំនិតដោយព្រះចេស្ដានៃព្រះវិញ្ញាណបរិសុទ្ធ ។^៧

ព្រះវិញ្ញាណបរិសុទ្ធ គឺជាគ្រូបង្រៀន ។ វាគឺជាការចាត់តាំងដ៏ទេវភាពរបស់ទ្រង់ ដើម្បីបង្រៀន ថ្លែងទីបន្ទាល់ និងធ្វើជាសាក្សីនៃព្រះវរបិតា និងព្រះរាជបុត្រា^៨ នឹងដើម្បីបង្ហាញ « សេចក្ដីពិតនៃគ្រប់ការណ៍ទាំងអស់ » ។^៩ ឱ! វាជាអំណោយដ៏អស្ចារ្យយ៉ាងណាសម្រាប់យុវវ័យម្នាក់ ដើម្បីទទួលបានចំណេះដឹង ដោយព្រះវិញ្ញាណបរិសុទ្ធថា ព្រះគឺជាព្រះវរបិតារបស់ពួកគេ ហើយថាទ្រង់ស្គាល់ពួកគេ ទ្រង់ស្រឡាញ់ពួកគេ ហើយមានផែនការសម្រាប់ពួកគេ ! ឱ! វាជាអំណោយដ៏អស្ចារ្យយ៉ាងណា ដើម្បីឲ្យយុវវ័យម្នាក់ទទួលបានចំណេះដឹងដោយព្រះវិញ្ញាណថា ព្រះគ្រីស្ទ គឺជាព្រះរាជបុត្រានៃព្រះ ហើយថាតាមរយៈសេចក្ដីជំនឿលើទ្រង់ និងលើដង្វាយធួនរបស់ទ្រង់ នោះពួកគេអាចប្រែចិត្ត ហើយបានជ្រះពីអំពើបាប បានសះស្បើយពីគ្រប់ការឈឺចាប់ និងការរងទុក្ខទាំងអស់ និងអាចរីកចម្រើន ហើយអាចទទួលបានជោគវាសនាដ៏ទេវភាពរបស់ខ្លួននោះ ។ ព្រះវិញ្ញាណ គឺជាភាសានៃសេចក្ដីស្រឡាញ់របស់ព្រះ ។ យើងផ្សាយដំណឹងល្អ ដោយព្រះវិញ្ញាណ ដូច្នេះយុវជន និងយុវនារីរបស់យើងអាចទទួលបានដោយសារព្រះវិញ្ញាណ¹⁰ម្ល៉ោះហើយពួកគេអាចមើលឃើញ មានអារម្មណ៍ ដឹង និងធ្វើបន្ទាល់អំពីព្រះអង្គសង្គ្រោះ ហើយឈរជាសាក្សីដល់ទ្រង់ ដូចដែលពួកព្យាការីបានព្យាករពីមុនមក ។¹¹

បងប្អូនប្រុសស្រី ខ្ញុំត្រូវរៀនពីការបង្រៀន និងការរៀនជាច្រើនទៀត ប៉ុន្តែខ្ញុំដឹងថាការណ៍នេះពិត ។ ព្យាការី អ្នកមើលឆុត និងអ្នកទទួលវិវរណៈសម័យទំនើប កំពុងបង្ហាញយើងថា យើងអាចបង្រៀន និងរៀនជាមួយគ្នាដោយអំណាចនៃការផ្លាស់ប្រែចិត្តជឿ និងគោលបំណងដែលកាន់តែសំខាន់ជាងមុន ។ ថ្មីៗនេះ នៅមជ្ឈមណ្ឌលបំពាក់បំប៉នអ្នកផ្សព្វផ្សាយសាសនា ក្នុងទីក្រុង ប្រូវ៉ូ រដ្ឋយូថាហ៍ ខ្ញុំបានសង្កេតឃើញពួកសាវករបស់ព្រះអម្ចាស់ អនុវត្តគោលការណ៍នៃការបង្រៀន និងការសិក្សាដែលអនុញ្ញាតឲ្យព្រះវិញ្ញាណបរិសុទ្ធមានបន្ទូលទៅកាន់ដួងចិត្ត និងគំនិតនៃប្រធានបេសកកម្ម និងភរិយារបស់ពួកលោកដោយផ្ទាល់ ដើម្បីឆ្លើយនឹងសំណួរ ហើយចាក់ស្រោចការបំផុសគំនិត និងដើម្បីបំពេញតម្រូវការរបស់ពួកលោក ។ នៅក្នុងកន្លែងសមរម្យខ្លះ អ្នកដឹកនាំសាសនាចក្រ មិនឈរនៅតែលើវេទិកាដើម្បីនិយាយប៉ុណ្ណោះទេ ។ ពួកគេបង្ហាញគំរូដែលបានបង្កើតឡើង ដោយព្រះអម្ចាស់សម្រាប់ការរៀនសូត្រ ដោយការសិក្សា និងដោយសេចក្ដីជំនឿផង ។^១២ ព្រះអម្ចាស់បានត្រាស់បង្គាប់ឲ្យ « តាំងគ្រូបង្រៀនម្នាក់នៅក្នុងចំណោមអ្នករាល់គ្នា ហើយចូរកុំឲ្យទាំងអស់គ្នានិយាយព្រមគ្នាឡើយ ប៉ុន្តែចូរនិយាយម្នាក់ម្ដង ហើយចូរឲ្យទាំងអស់គ្នាស្ដាប់ពាក្យសម្ដីរបស់អ្នកនោះ ប្រយោជន៍កាលណាទាំងអស់គ្នានិយាយ នោះទើបឲ្យទាំងអស់បានស្អាងឡើងទាំងអស់គ្នា ហើយប្រយោជន៍ឲ្យមនុស្សគ្រប់រូបអាចបានសិទ្ធិស្មើគ្នា » ។¹³

គោលបំណងនៃការសិក្សាដូចអ្វីដែលព្រះអម្ចាស់បានរៀបរាប់គឺ ដើម្បីយាងអញ្ជើញព្រះវិញ្ញាណឲ្យធ្វើជាគ្រូបង្រៀន ដូច្នេះយុវវ័យរបស់យើងអាចត្រូវបានបំផុសគំនិតតាមចម្លើយចំពោះសំណួរទាំងឡាយរបស់ពួកគេ និងមានព្រះវិញ្ញាណបរិសុទ្ធ « បង្ហាញដល់ [ពួកគេ] នូវគ្រប់អ្វីទាំងអស់ ដែល[ពួកគេ] ត្រូវធ្វើ » ។¹⁴

១. រៀបចំខ្លួនរៀន

ទីមួយ រៀបចំខ្លួនរៀន អ្វីដែលយើងធ្វើនៅក្នុងជីវិតភាគច្រើន តម្រូវឲ្យមានការរៀបចំទុកជាមុន ។ ដើម្បីទទួលបានការអប់រំដ៏អស់កល្ប យើងត្រូវខិតខំច្រើនជាងការបង្ហាញមុខនៅក្នុងថ្នាក់ ។ ព្រះអង្គសង្គ្រោះបង្គាប់ឲ្យប្រជាជននីហ្វៃ ពិចារណាអំពីព្រះបន្ទូលទ្រង់ ហើយអធិស្ឋានសូមឲ្យយល់ ។^១៥ កាលនៅក្មេង យ៉ូសែប ស៊្មីធ បានឃើញព្រះវរបិតា និងព្រះយេស៊ូវគ្រីស្ទ ក្នុងការនិមិត្ត ដោយព្រោះលោកបានស្រាវជ្រាវខគម្ពីរ ហើយបានពិចារណាពីពាក្យពេជន៍ក្នុងនោះម្ដងហើយម្ដងទៀត ។^១៦ ប្រធានយ៉ូសែប អេហ្វ ស៊្មីធ បានទទួលការនិមិត្តអំពីការប្រោសលោះអ្នកស្លាប់ ដោយព្រោះលោកបានពិចារណាពីខគម្ពីរដែលលោកបានអាន និងសិក្សា ។^១៧

មុននឹងចូលរៀនក្នុងថ្នាក់ យើងសូមឲ្យសិស្សអធិស្ឋាន និងពិចារណាអំពីព្រះបន្ទូលនៃព្រះគ្រីស្ទ ដើម្បីឲ្យគំនិត និងដួងចិត្តពួកគេអាចត្រៀមរួចជាស្រេចទទួលយកចំណេះដឹង ដោយព្រះចេស្ដានៃព្រះវិញ្ញាណបរិសុទ្ធ ។ ព្រះអម្ចាស់បានមានព្រះបន្ទូលថា « ចូរកុំខំប្រកាសព្រះបន្ទូលរបស់យើងឡើយ ប៉ុន្តែចូរខំព្យាយាម ដើម្បីឲ្យបានព្រះបន្ទូលរបស់យើងជាមុនសិនចុះ ហើយខណៈនោះអណ្ដាតរបស់អ្នកនឹងបានធូរ ពេលនោះ បើសិនជាអ្នកមានប្រាថ្នា នោះអ្នកនឹងបានព្រះវិញ្ញាណរបស់យើង និងព្រះបន្ទូលរបស់យើង មែនហើយ គឺជាព្រះចេស្ដានៃព្រះ ដើម្បីបញ្ចុះបញ្ចូលមនុស្សលោក » ។^១៨

២. និយាយស្អាងគ្នា

ទីពីរ និយាយស្អាងគ្នា ។ ដោយការផ្ដល់ឱកាសឲ្យមានការចូលរួមនៅក្នុងថ្នាក់រៀន យើងឲ្យយុវវ័យបញ្ចេញសំឡេង ។ នៅពេលពួកគេរៀនជាមួយគ្នាពីពាក្យសម្ដីរបស់ព្យាការី ឆ្លើយសំណួរដែលបំផុសគំនិតទាំងឡាយ ពិភាក្សាគំនិត និងយោបល់របស់ពួកគេ ហើយឆ្លើយនឹងសំណួរ និងកង្វល់របស់មិត្តរួមថ្នាក់របស់គេ នោះព្រះវិញ្ញាណបរិសុទ្ធនឹងបំភ្លឺគំនិត ហើយពង្រីកការយល់ដឹងរបស់ពួកគេ ។¹⁹ ពួកគេរៀននិយាយនៅក្នុងព្រះនាមនៃព្រះអម្ចាស់ « ដោយការយកចិត្តទុកដាក់ និងដោយការទប់ពីព្រះវិញ្ញាណ » ។²⁰ ចែកចាយអ្វីដែលព្រះវិញាណនៃព្រះអម្ចាស់បានបង្រៀនពួកគេ ជួយពួកអាចឲ្យយកឈ្នះលើការភ័យខ្លាច និងពង្រឹងគ្នាទៅវិញទៅមកក្នុងការការពារបទដ្ឋានគុណធម៌ និងភាពសុចរិត ។ ពួកគេរៀបចំខ្លួនដើម្បីឆ្លើយតបនឹងអ្នកដែលដេញដោលពីសេចក្ដីជំនឿរបស់ពួកគេ សើចចំអកដាក់ពួកគេ ឬចោទពួកគេថាមិនទាន់សម័យ ឬមានចិត្តចង្អៀតចង្អល់ ។

វាគួរឲ្យចាប់អារម្មណ៍ ដើម្បីកត់ចំណាំថា មានប៉ុន្មានដងដែលព្យាការីដែលទទួលការហៅបម្រើថ្មី មានអារម្មណ៍ពុំសូវចេះនិយាយ ។ ហេណុកបានប្រកាសថា « ទូលបង្គំ … គ្រាន់តែជាក្មេងតូចមួយ ហើយប្រជាជនទាំងអស់គ្នាស្អប់ទូលបង្គំ » ។^២១ ប៉ុន្តែ ព្រះអម្ចាស់ហាក់ដូចជាពុំខ្វល់អំពីភាពទន់ខ្សោយ ឬឧបសគ្គទាំងឡាយឡើយ ។ ទ្រង់មានបន្ទូលតបថា « ចូរទៅ ហើយធ្វើដូចដែលយើងបានបញ្ជាដល់អ្នកចុះ ។ … ចូរបើកមាត់អ្នក ហើយមាត់នោះនឹងបានពោរពេញ ហើយយើងនឹងប្រទានសម្ដីដល់អ្នក » ។^២២

ព្រះអម្ចាស់រំពឹងឲ្យអ្នកទាំងអស់ដែលរក្សាសេចក្ដីសញ្ញារបស់ខ្លួនឈរជាសាក្សីរបស់ទ្រង់ ។ ទ្រង់មានបន្ទូលថា « ចូរបើកមាត់របស់អ្នកចុះ នោះមាត់នឹងបានពោរពេញ ហើយអ្នកនឹងក្លាយទៅដូចជានីហ្វៃពីបុរាណ » ។^២៣

ឪពុកលីហៃបានពន្យល់អំពីនីហ្វៃពីបុរាណថា « គឺមិនមែនវាទេ តែជាព្រះវិញ្ញាណនៃព្រះអម្ចាស់ ដែលនៅក្នុងខ្លួនវាទេតើ ដែលបើកមាត់វាឲ្យចេញសម្ដី ដែលវាមិនអាចបិទមាត់បាន » ។²⁴

ក្រៅពីផ្ទះ ប្រហែលជាគ្មានកន្លែងណាដែលប្រសើរ ដើម្បីជម្រុញឲ្យយុវវ័យនិយាយនៅក្នុងព្រះនាមនៃព្រះ « ដោយនូវចិត្តម៉ឺងម៉ាត់ ដោយនូវវិញ្ញាណស្លូតបូត »²⁵ ជាងការនិយាយជាមួយមិត្តភក្ដិ នៅក្នុងថ្នាក់សិក្ខាសាលា និងថ្នាក់វិទ្យាស្ថានឡើយ ។ យើងអញ្ជើញឲ្យពួកគេនិយាយស្អាងគ្នា ដូច្នេះពួកគេអាច « ប្រុងប្រៀបជានិច្ច ដោយសុភាព ហើយកោតខ្លាច ដើម្បីនឹងតបឆ្លើយដល់អ្នកណាដែលសួរ … ពីហេតុនៃសេចក្តីសង្ឃឹមរបស់[ពួកគេ] » ។²⁶

៣. អញ្ជើញឲ្យអនុវត្ត

ទីបី អញ្ជើញឲ្យអនុវត្ត មានតែការរស់នៅតាមដំណឹងល្អប៉ុណ្ណោះ ដែលធ្វើឲ្យពាក្យសម្ដីដែលនិយាយដោយយុវជន និងយុវនារីក្លាយជាការពិត ។ ការអញ្ជើញឲ្យអនុវត្ត គឺជាការអញ្ជើញឲ្យរក្សាសេចក្ដីសញ្ញាដើម្បីធ្វើតាមព្រះអង្គសង្គ្រោះ និងឲ្យអនុវត្តដោយ « ពុំមានការលាក់ពុត ឬការបោកបញ្ឆោតនៅចំពោះព្រះឡើយ » ។^២៧ វាគឺជាការអញ្ជើញដល់យុវវ័យឲ្យឆ្លើយតបទៅនឹងការបំផុសគំនិតពីព្រះវិញ្ញាណ ហើយអនុវត្តគោលការណ៍ទាំងឡាយនៃដំណឹងល្អតាមរបៀបត្រឹមត្រូវ ។ ព្រះអង្គសង្គ្រោះបានបង្រៀនថា « បើអ្នកណាចង់ធ្វើតាមព្រះហឫទ័យ [របស់ព្រះ] នោះនឹងបានដឹងជាសេចក្តីបង្រៀននេះមកពីព្រះ » ។^២៨ ដើម្បីធ្វើជាសាក្សីនៃព្រះអម្ចាស់ យុវវ័យរបស់យើងត្រូវរស់នៅដោយចុះសម្រុងជាមួយអ្វីដែលពួកគេដឹង ។

ខ្ញុំបានសង្កេតសេចក្ដីជំនឿរបស់យុវវ័យរបស់យើងដែលយល់ពីអត្ថន័យនៃការឧស្សាហ៍ចូលរួម ហើយ « ប្រព្រឹត្តអ្វីៗជាច្រើន … ហើយនាំមកនូវសេចក្ដីសុចរិតដ៏ច្រើន » ដូចជាអ្នកដែរ ។^២៩ គំរូមួយនោះកើតនៅឡើងនៅសកម្មភាពដើរត្រួសត្រាយផ្លូវមួយដែលខ្ញុំបានចូលរួម ។

យុវវ័យបានអូសរទេះ តាមផ្លូវដែលត្រួសត្រាយផ្លូវកាលពីមុននៅរដ្ឋ វាយអូមីង សហរដ្ឋ អាមេរិក ។ ពួកគេបានមកដល់ទួលហ្គ្រេវ៉ល « ជាចំណោតដែលវែង និងចោតជាងគេ … តាំងពី [ចាកចេញ] ពី វិនធើរ ខ្វរធើរ » ។³⁰ ជាច្រើនឆ្នាំមុន នៅថ្ងៃទី ៩ ខែ កក្កដា ឆ្នាំ ១៨៤៧ ក្រុមអ្នកត្រួសត្រាយផ្លូវរបស់ប្រធាន ព្រីកហាំយ៉ង់ បានដាក់ច្រវ៉ាក់នៅកង់រទេះ ដើម្បីកុំឲ្យវាជ្រុលចុះចំណោត ។ ប៉ុន្តែសម្រាប់គ្រួសារអ្នកត្រួសត្រាយផ្លូវវ័យក្មេង ដែលអូសរទេះនៅថ្ងៃនោះ មានសមាជិកពីរបីនាក់ពីក្រុមនិមួយៗ អូសនាំមុខ ហើយមនុស្សភាគច្រើនទប់ពីក្រោយដើម្បីកុំឲ្យធ្លាក់ចុះពីចំណោតដ៏ចោទនោះលឿនពេក ។

វាគួរឲ្យភ័យស្រើបណាស់ ។ ជំហរទប់មិនរឹងមាំ និងគ្រោះថ្នាក់ ហើយការដែលទប់រទេះនោះ តម្រូវឲ្យប្រើកម្លាំងទាំងអស់ដែលពួកគេមាន ។ ខ្ញុំមិនអាចជួយអ្វីបានសោះ ម្ល៉ោះហើយ ខ្ញុំឈរនៅក្រោមចំណោត ដើម្បីមើល និងអធិស្ឋានដោយអស់ពីចិត្តសូមឲ្យអ្វីគ្រប់យ៉ាងដំណើរការបានល្អ ។

រទេះទីមួយបានចុះពីចំណោតដោយសុវត្ថិភាព ដោយស្ទើតែជំពប់ដួលដោយថ្មគ្រួសធំមួយ ។ កាលខ្ញុំបែរទៅមើលរទេះបន្ទាប់ចុះមក ខ្ញុំបានឃើញយុវជនបួននាក់រត់កាត់ខ្ញុំឡើងទៅលើជម្រាល ។ ខ្ញុំបានស្រក់ទឹកភ្នែក ហើយដួងចិត្តខ្ញុំពោរពេញដោយអំណរគុណ កាលខ្ញុំដឹងថា ពេលរទេះពួកគេមានសុវត្ថិភាពហើយនោះ យុវជនដ៏ស្មោះត្រង់ទាំងនេះ បានរត់ត្រឡប់ទៅជួយរទេះបន្ទាប់ដោយគ្មាននិយាយអ្វីមួយម៉ាត់ ។ ពួកគេបានជួយនាំរទេះទាំងអស់ចុះមកក្រោមដោយសុវត្ថិភាពម្ដងមួយៗ ។ ការខិតខំរបស់ពួកគេ បានលើកទឹកចិត្តឲ្យមនុស្សដទៃទៀតធ្វើដូចគ្នា ហើយមិនយូរប៉ុន្មាន រទេះទាំងអស់បានធ្វើដំណើរដោយសុវត្ថិភាពទៅកាន់កន្លែងបោះជំរុំនៅពេលល្ងាច ។

អ្វីដែលយុវវ័យយើងមិនដឹងនោះ គឺគំរូដ៏សុចរិតរបស់ពួកគេនៅលើ ទួលហ្គ្រេវ៉ល និងគំរូនៃទីបន្ទាល់ដទៃទៀតនៅតាមផ្លូវ ទាំងពាក្យសម្ដី និងគំនិត គឺជាសាក្សីដល់យុវជនម្នាក់ដែលមិនមែនជាសមាជិកក្នុងសាសនាចក្ររបស់យើង ។ ក្រោយមក ចាក បានចែកចាយ ពេលគាត់ដើរថា គាត់បានស្វែងយល់ឃើញថាពួកមរមនមិនលាក់ពុត ដូចដែលគេបានគិតនោះទេ ។ គាត់បានឃើញ និងបានដឹងថា ពួកគេស្មោះត្រង់ពិត ។ ពួកគេធ្វើតាមអ្វីដែលពួកគេជឿ ។ ចាក មានអារម្មណ៍ពីព្រះវិញ្ញាណបរិសុទ្ធ ហើយគាត់មានគម្រោងនឹងរៀនមេរៀនផ្សព្វផ្សាយសាសនា ។

យុវវ័យរបស់យើងមិនចាំបាច់នាំរទេះចុះពីចំណោតដ៏រដិបរដុបនោះ ដើម្បីធ្វើជាសាក្សីនៃព្រះទេ ប៉ុន្តែជារឿយៗ ពួកគេបានជួបប្រទះឧបសគ្គដ៏ធំ នៅពេលពួកគេព្យាយាមឈរគាំទ្រសេចក្ដីពិត និងសេចក្ដីសុចរិតដោយក្លាហាន ។ គ្រូបង្រៀននៅក្នុងថ្នាក់ អាចជួយយុវជន និងយុវនារីគ្រប់រូបឲ្យអនុវត្តសេចក្ដីជំនឿលើព្រះគ្រីស្ទ និងទទួលបានព្រះវិញ្ញាណបរិសុទ្ធ ។ សូមជួយពួកគេឲ្យរៀបចំខ្លួនរៀនដោយការទទួលទាននូវព្រះបន្ទូលនៃព្រះគ្រីស្ទ ។ និយាយស្អាងគ្នា ដោយព្រះបន្ទូលនៃព្រះគ្រីស្ទ ។ ហើយអញ្ជើញឲ្យអនុវត្ត ដោយការគោរពតាមព្រះបន្ទូលនៃព្រះគ្រីស្ទ ដូច្នេះពួកគេអាចពោរពេញដោយព្រះវិញ្ញាណនៃព្រះអម្ចាស់ ។ ហើយ ដោយព្រះចេស្ដានៃព្រះវិញ្ញាណបរិសុទ្ធ ពួកគេអាចធ្វើជាស្មរបន្ទាល់របស់ព្រះគ្រីស្ទ ហើយនិយាយអ្វីដែលទ្រង់នឹងមានបន្ទូល ធ្វើអ្វីដែលទ្រង់នឹងធ្វើ ហើយក្លាយដូចជាទ្រង់ផងដែរ ។

ខ្ញុំសូមថ្លែងទីបន្ទាល់ថា ព្រះគឺជាព្រះវរបិតា ហើយថា សេចក្ដីស្រឡាញ់របស់ទ្រង់ចំពោះយើងម្នាក់ៗគឺល្អឥតខ្ចោះ ។ ខ្ញុំសូមថ្លែងទីបន្ទាល់ថា ព្រះយេស៊ូវគ្រីស្ទ គឺជាព្រះរាជបុត្រាដ៏ បរិសុទ្ធរបស់ព្រះអង្គសង្គ្រោះ និងព្រះដ៏ប្រោសលោះ ហើយថាទ្រង់មានសេចក្ដីស្រឡាញ់ដ៏ឥតខ្ចោះសម្រាប់យើង ។ ខ្ញុំសូមថ្លែងទីបន្ទាល់ថា ដោយសេចក្ដីស្រឡាញ់ដ៏ឥតខ្ចោះ ព្រះវរបិតា និងព្រះរាជបុត្រាបានបង្ហាញអង្គទ្រង់ចំពោះព្យាការី យ៉ូសែប ស្ម៊ីធ និងបានស្ដារឡើងវិញនូវក្រឹត្យវិន័យ និងពិធីបរិសុទ្ធទាំងឡាយនៃដំណឹងល្អ នៃព្រះយេស៊ូវគ្រីស្ទមកលើផែនដី ។ ប្រធាន ថូម៉ាស អេស ម៉នសុន គឺជាព្យាការីដ៏ពិត ដែលដឹកនាំសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ សព្វថ្ងៃនេះ ។ ខ្ញុំសូមថ្លែងទីបន្ទាល់ថា នៅពេលយើងអនុវត្តសេចក្ដីជំនឿលើព្រះគ្រីស្ទ និងទទួលព្រះវិញ្ញាណបរិសុទ្ធ នោះយើងទាំងអស់គ្នាអាចឈររួមគ្នាជាស្មរបន្ទាល់របស់ទ្រង់ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។