Eda Sega ni Mai Yaco Eke Meda Mai Yaco Ga Eke
Vuli Kaburaki Vakayabaki ni S&I 2020
Tusiti, 9 ni June, 2020
Sa ka talei noda mai soqoni vata. Keitou nuitaka ni o ni bulabula vinaka tiko kei na nomuni vuvale. Ena yabaki taucoko oqo, eda sa vakananuma tiko kina nai ka 200 ni yabaki ni iMatai ni Raivotu. Au vakavinavinaka vei Josefa Simici kei na nona ivakaraitaki ni vakabauta kei na gagadre me kila na dina, kau vakavinavinaka ni lomani keda na Tamada Vakalomalagi kei na Luvena, o Jisu Karisito, me sauma na masu yalomalumalumu nei Josefa. Eda sa vakila taucoko na kaukauwa ni qaqanivosa ni da lagata, “Dokai koya ka kilai Jiova!”1 Meu na semata ga kina, me dokai ga ko Jiova ni sa mai veivosaki tale kei na tamata. Au sa vakavinavinaka vakalevu ena dina a mai sotava o Josefa ena Veikau Tabu.
Ni oti na raivotu oqo, a lesu o Josefa i vale ka laki sotavi tinana ka kaya vua, “Ni sega ni dua na leqa niu sa kila vakataki au.”2 Na iwalewale a saga o Josefa me vakadikeva kina na dina me tautauvata ki na kena e dodonu mera vuli kina na noda gonevuli. Me vaka na veika a sotava o Josefa a vukei koya me vulica vakai koya, eda nuitaka ni ra na vulica kece na luveda vakai ira ni o Tamada Vakalomalagi sa kilai ira ka lomani ira, ni o Jisu na Karisito, ni sa tu veiliutaki o Koya ena Nona Lotu ena iotioti ni gauna oqo.
Mai na kena tekivutaki na Semineri kei na Inisitute, e vuqa na veika a tukuni baleta na veivakavulici kei na vuli. Mai na iTuvatuva Vakavuli ki na Yavu Bibi ni Veivakavulici kei na Vuli nikua, na veidusimaki veiuqeti sa ciqomi sa vukea noda veivakavulici e mana baleta na kosipeli vakalesuimai era tiko ena ivolanikalou kei na nodra veivakavulici na parofita ena kaukauwa ni Yalo Tabu. Meda kakua vakadua ni gole tani mai na veiyavu oqo. Ia meda kakua talega ni rerevaka na vulica na veika vou se kuria noda kila na sala meda vukei ira vinaka kina na noda gonevuli mera vulica vakai ira.
Au sa vakavinavinaka ki na toso eda sa cakava tiko. Ena so na sala au vakila ni vaka meda sa cabeta vata tiko e dua na ulunivanua. Ena sega ni rawa ni da mai yacova na veika oqo kevaka e sega na veika e sotavi mai kei na ivakatakila ni veigauna sa oti, ia e sega ni dodonu meda vakawelewele ka mai tarovi kina na noda sasaga tiko meda yacova na veika cecere. E lako mai ki noqu vakasama na veika e kaya o Elder Jeffrey R. Holland ena koniferedi sa qai oti tikoga oqo: “Eda sega ni lakova mai na ilakolako balavu oqo meda yacoga mai eke” [Judith Mahlangu (multistake conference near Johannesburg, South Africa, Nov. 10, 2019), ena Sydney Walker, “ Elder Holland Visits Southeast Africa during ‘Remarkable Time of Growth,’” Church News, Nove. 27, 2019, thechurchnew.com].3 Eda sa tu ena veimama ni ulunivanua e cake, ka sa tu vakarau na Turaga me solia vei keda vakalevu cake.
Oqo na vuna, sa sureti keda o Elder Kim B. Clark meda sega walega ni raica ka veika eda vakavulica ia meda raici ira matua era vuli tiko kei na ivakarau kei na macala ni vuli. Sa veisureti tiko meda tarogi keda, “Na veika cava mera sotava na noqu gonevuli me torocake kina na nodra kaukauwa kei na igu mera vuli titobu kina?” Ni da semata na keda itukutuku makawa totoka kei na veidusimaki vou eda taroga kina, “Na cava eda rawa ni cakava meda usutu-vaKarisito ka vakanamata vei koya e vuli?
E solia vei keda o Elder David A. Bednar e dua na ivakaraitaki totoka ni irairai meda dauvuli titobu ena noda Dua na Bogi Vata kei na Vakaitutu Raraba sa oti. E kilai levu ni nona inaki me kakua ni tukuna vei keda e dua na ka ia meda vulica e dua na ka. A vakatataro, raimatua, ka vakarorogo me vakadeitaka ni da sa kila vinaka. A vakavulici keda talega ena sala e raica kina na veivakavulici ni a kaya, “Mo kua ni vakasamataka ‘na cava meu na kaya vei ira?’ me raicimatua ga ‘na cava meu na taroga vei ira?’ Ka sega walega ni, ‘Cava au na kerei ira kina?’ ia ‘Cava au na sureta me ra ni cakava?’”4
A kaya taumada o Parofesa ka Rabbi kilai levu o Jacob Neusener, “Era sega ni dauveivakavulici na qasenivuli cecere. Era vukei ira na gonevuli mera vuli.” E dina, e tiko na veimaliwai waki vata vei rau na veivakavulici kei na vuli mana. Ia au vakabauta ni itukutuku nei Vuniwai Neusener e kaya tiko meda tetevaka na veika eda nanuma ni veivakavulici mana ka raimatua cake, sega ena tukuna, ia ena nodra vukei na gonevuli ena veika e sureta na vuli. Vei keda, sai koya meda vukei ira na gonevuli mera sotava na Yalo Tabu ni vakadinadinataka na dina kei na loloma ni Kalou vei ira. O ya na noda cakava e dua na ituvaki era vakila nodra taqomaki mera taro kina, kunea na dina, veisemati vakaivunau, rogo ivakadinadina ni nodra icaba, ka dikeva ka tukuna na nodra vakasama, lomadra, kei na vakanananu ni dina era sa vulica tiko. Sai koya na noda cakava na veika mera sotava e uqeta mera bulataka na kosipeli ka kila na sala mera cakacaka ena vakabauta, vuli mai na caka cala, ka tovolea mera nuitaka na Karisito. Oqo na sala mera vulica kina vakai ira.
Me kilai vinaka taucoko na veika e gadrevi mera sotava na gonevuli ni ra tiko kei keda, sa lewai ni vinaka duadua ga o ya mera tarogi. E dua na timi ni vakadidike a vosa ki na udolu na itabagone ena va na konitineti. Era a sotavi ira era lewe tiko ni kalasi vakakina e vuqa era se sega tiko ni volayaca ena gauna oqo. Ni sa cakacakataki me komuni e dua na iwiliwili levu ni data, sa mai vakailawalawataki na lewa ki na tolu na iwasewase.
Na imatai ni iwasewase eda vakatoka me “Saumaki.” Era a kaya na itabagone kei na qase cake ni ra vinakata ka gadreva mera sotava na veika mera vakila kina na loloma ni Kalou ka qaqaco na veimaliwai kei Koya. Era vinakata me titobu nodra vakabauta kei na ivakadinadina baleti Jisu Karisito kei na Nona kosipeli vakalesui mai. E dina, oqo sara ga na ka eda vinakata vei ira.
Na itukutuku vinaka o ya ni vakadidike sa vakaraitaka tiko ni noda kalasi sa vukea tiko me yaco oqo. O ira sa dautiko kina ka vakaitavi ena vuli eso sa vaqaqacotaka vakabibi na nodra ivakadinadina ka tubu na nodra vakabauti Jisu Karisito. Sa dua na inaki e vuqa eda sa vinakata kina meda sureta vakalevu na itabagone mera vakaitavi. Ni ra vuli vata kei kemuni, na nodra vakabauta kei na ivakadinadina ena tubu.
Vinaka vakalevu na nomuni veiqaravi tiko mera vukei me titobu nodra saumaki. Eda sa toro cake sara tiko ni da dromuci keda ena ivakavuvuli ni veivakavulici e vukei ira na gonevuli mera vuli vakatitobu. Kau vakabauta ni se vo levu na lewa ni Turaga me vakavulici keda kina ni da kerea na Nona veidusimaki. Ni ko tugana na kena rawati, o na masu beka mo raica na veika mera sotava na gonevuli me torocake kina na nodra kaukauwa kei na igu mera kila na ituvatuva nei Tamada Vakalomalagi kei na veivakavulici kei na Veisorovaki i Jisu Karisito? Mo raica na sala mo vukei ira kina mera vakasaqara, kila, ka cakacaka ena veivakauqeti ni Yalo Tabu ka qai cakacaka ena vakabauta, veivutuni, ka cakava ka maroroya na veiyalayalati tabu. Ena qai yaco, meda nuitaka ni veika era sotava ena vukea mera kila ka lomani Jisu arisito ka saga mera na vakataki Koya.
Na ikarua ni iwasewase o ya na vakarorogo vei ira na vakaitavi ena vakadidike eda sa vakatoka me “Semati ki na Tubu Vakayalo ni Tamata Yadua.” O ira a dikevi era kaya ni dau vakaibalebale na kalasi ni ra vakila na qasenivuli ka doka na veimataqali ituvaki ni gonevuli kei na itukutuku taumada ka taurivaka na veigauna ni vuli me sotava na nodra dui gagadre. Era tukuna ni gadrevi na vanua mera taroga vakadodonu kina na veivunau, itukutuku ni Lotu, kei na veika raraba vakatamata e bibi vei ira. Era sega ni raica tiko mera veibataka na veika oqo. E tiko na nodra taro vakadodonu ka vinakata e dua na ituvaki taqomaki, sinai ena vakabauta, e galala mera dikeva. Era gadreva na qasenivuli mera sauma nodra taro, sega ena vakabauta walega ia ena galala kei na yalololoma. Era vinakata talega mera vulica na sala mera vuli kina ka yaco mera bula-rawati ira vakayalo cake. Era vinakata mera tara cake na kila-ka me vukea nodra vakadikeva na ituvatuva ka okati ira ki na lewa tawamudu. Era vinakata mera vukei mera yalonuidei cake ki na nodra igu mera vakamacalataka na ivakavuvuli ni kosipeli kei na lawa ni Lotu vei ira eso. Ka ra gadreva mera tara cake na kila-ka me taurivaki na ivakavuvuli ni kosipeli me veivuke ena ibolebole ni veisiga.
Era kaya vei keda na gonevuli ni ra vinakata ka gadreva mera sema ki na veidusimaki eda ciqoma ena yabaki sa oti maivei Elder Jeffrey R. Holland. A kaya vei keda ni “gonevuli e sega ni dua na koniteina me tawani; o gonevuli e bukawaqa me waqari.”5
Sa noda itavi na qasenivuli meda vukei ira na gonevuli mera teivaka na gagadre mera vuli; ciqoma nodra dui ivakatakila; ka kunea, kila vinaka, ka bulataka na dina era sa rawata baleti ira. E sega walega ni solia yani na kila-ka eda sa rawata mai na noda dui vuli kei na veika e sotavi. Ka meda nanuma tiko ni veika sa baleti keda e rairai sega ni vakaibalebale vei ira na gonevuli e duidui nodra ituvaki ni bula. Koya gona, sa gadrevi dina meda rogoci ira, meda raimatua tiko, ka masulaka meda kila-ka vakayalo.
E ka ni rarawa, e vuqa na itabagone kei na qase cake, vakabibi o ira era sega ni dau tiko, era nanuma ni noda kalasi e sega sara ni baleti ira. Era vakabauta ni da vakatabakidua ga ena noda kovuta taucoko na ivola vakarautaki ka da sega ni sotava na nodra gagadre dina. Era kaya ni noda lesoni sa vakatabakidua tikoga ena ivakarau ka sega ni raica vinaka na ka dina ena nodra bula se wali na nodra lomatarotaro.
Me vakataka, ni raitayalotaki e dua na qasenivuli ni inisitute e tukuna tiko na vunau ni vakamau vakasilesitieli, e vakila ni sa nodra ulutaga na itabaqase cake. O ira na gonevuli ni kalasi era sa vakabauta na bibi ni vakamau ena valetabu, ia eso era sega ni vakadeitaka mera bulataka vakacava na vunau oqo. Eso era rere baleta ni ra lako mai na vuvale kavoro ka sega ni vakadeitaka ni na cakacaka rawa nodra vakamau. Eso na lewe ni kalase era lomatarotarotaka tiko na nodra rawa ni vakailavotaka nodra vakamau ka susuga nodra vuvale. Eso ena vakataroga era na rawata beka na madigi o ya. Eso era vesuki tu ena veidomoni vakamataqali vata ka vakataroga tiko nodra lewena na Lotu. Sa tuvai na lesoni ena kena ivakarau ia e sega ni vakatara na vakaitavi vakainaki nei gonevuli. E raica o qasenivuli ni vuku ni ulutaga, sa semati koya vei ira na gonevuli ena sala veiganiti eso. Ia na ka dina, ni dina ga sa vakavulici na vunau, a sega ni caka ena sala e raici kina na nodra tiko veilecayaki na gonevuli, wali na nodra gagadre, se sema ki na veika dina ni nodra bula. A calati e dua na madigi mera vukei kina mera raica na bibi ni vunau ki na nodra dui ituvaki ni bula.
Na qasenivuli e dau nanuma tiko na nodra torocake vakayalo na gonevuli sa lomana me sotavi ira ena nodra vanua. E solia vei ira na inuinui ka vukea mera raica ni bulataki na kosipeli ena vakalougatataki ira ka vukea mera toro cake ki na nodra lalawa lavaki. E vukea mera tara cake na nuidei ni ivolanikalou kei na nodra ivakavuvuli na parofita edaidai era sa vakarautaka dina na isau ni lomatarotaro ni yalodra.
Mera vukei na gonevuli mera kila na bibi kei na ganiti ni kosipeli ena nodra bula, sa rawa mo raica ena masumasu na sala mera vakayaloqaqataki kina na gonevuli mera taro vakaidina ka wasea na rarama kei na vakasama. E gadrevi mera vakabauta ni ko sa kila ka kilai ira vinaka ka sa lomamu mo veisau mo sotava na nodra gagadre. Mo vakarautaka na veika eso mera uqeti mera vulica na ivolanikalou e veisiga ka gole ki na ivolanikalou kei na nodra veivakavulici na parofita nikua mera dusimaki. Vukei ira mera vulica na kila kei na iwalewale me rawati kina na kila-ka vakayalo mera na vulica kina vakai ira.
Na ikatolu ni iwasewase eda sa kila vinaka sara ni da vakarorogo vei ira na gonevuli vakabibi vei ira era sega ni tiko era kaya ni ra vinakata ka gadreva meda bulia e dua na yalo ni veivakataukeni. Na veivakataukeni e buli ena veimaliwai kei na veisemati kei na Tamada Vakalomalagi, kei qasenivuli, vata kei ira na gonevuli ena kalasi. Na yalo ni veivakataukeni e yaco ni tiko e dua na ituvaki era vakila kina na tamata ni ra sa vinakati, tokoni, gadrevi, ka yaga sara. Na yalo ni veivakataukeni e tubu talega ni ra vakila na gonevuli ni ra sa tiki ni dua na inaki e vakaibalebale.
Au vakavinavinaka tale kina vei kemuni. Au taleitaka vakalevu na nomuni cau ena vuli “Raici Koya O Ya” kei na nomuni sasaga yadua mera vukei na gonevuli yadua mera vakila na loloma ka dokai. E gadrevi meda tomana tiko na sasaga oqo baleta e vuqa vei ira era sega tiko ni volayaca era nanuma ni ra sega tiko ni okati. E vuqa era tukuna ni kalasi ni semineri kei na inisitute sa baleti ira ga era raica era sa Yalododonu Edaidai savasava e sega na nodra leqa se vakatataro. Na nanuma cala oqo e vakavuna mera vakabauta ni ra sega ni okati rawa. Eso era nanuma ni ra taroga e dua na taro dina se wasea e dua na vakasama veitaraiyalo, era na vakalewai se ra sa lailai sobu maivei ira sa yalodina. Era kaya talega era na laki tiko ke sa vanua era na vinakati kece kina na tamata se cava ga nodra vakabauta e loma se kedra irairai vakayago.
A raica o Baraca Linford e dua na goneyalewa e tucake tu ena dua na mata ni noda valelevu. A vakatakilai koya ka taroga ke sa volayaca oti o goneyalewa ena kalasi. A sauma o goneyalewa ni o koya e lewe ni Lotu ka kila na veika ni inisitute ia e sega ni dau tiko kina. A kuria, “Ke o kilai au kei na noqu bula makawa, o na kila niu sega ni oka rawa eke. Au na sega ni curu rawa.” E ka marautaki, ni a ciqoma o goneyalewa na veisureti nei Baraca Linford me curu yani, ka a kidavaki ena loloma. A volayaca o koya ena dua na kalasi ka sa tekivu me tiko kina. Au vakataroga, e vica beka na drau, se udolu, na itabagone era tu e tautuba ni noda katuba, era gadreva dina tu na isolisoli ni noda kalasi, ia era nanuma ni ra sega ni okati rawa.
E sega walega ni ra gadreva na veika meda solia, ia eda sa gadrevi ira talega. O ira na qasenivuli era bulia na yalo ni vakaitaukeni era kila vakaidina ni gonevuli yadua ni tiko nodra cau ki na kalasi me laki dua na kila-ka vinaka cake.
Au a raica e dua na kena ivakaraitaki totoka ena noqu sotava e dua na cauravou ena kalasi nei Baraca Andre. A lesu totolo mai vale o Michael mai na kaulotu ena vuku ni tauvimate. Ni sa vakarau tiko me lesu mai, a coqai koya e dua na motoka, a ramusu na veisui ni yagona, ka curu tu vakadede e valenibula. Ena gauna sa biuta kina na valenibula sa luluqa na nona tatadra me vakacavara na nona kaulotu. Sa laki vakaogai koya ena qito levu eso ka sa gole tani mai na Lotu. Dua na siga, a laki tu duadua me sa taubale takoso ena dali dodo ena baba qaqilo levu ka sega na lawa veitaqomaki. Ni sa takoso rawa, sa nanuma mesa kaila ka marautaka, ia a qai rai sobu ka kila ni ke a lutu, sa na oti kina na nona bula.
Ena gauna o ya, sa tekivu me vakasamataki tinana kei ganena lailai ena levu ni nodrau yalorarawa ke sa mani mate. A vakasamataka sara na iVakabula kei na veika kece a cakava baleti koya, ka sa vakasinaita na yalona na Yalo. A kaba lesu mai na baba vatu ka tekivu ena ilakolako lesu ki na Lotu. Sa tekivu me kila kina, ena sala totoka, na loloma veivueti, loloma, kei na kaukauwa ni iVakabula me vueti keda.
Dua na gauna, a gade o Michael e baravi ka nanuma sara na nona a tiko ena inisitute ni bera na nona laki kaulotu. A biuta sara mai na baravi ka gole yani ki na valelevu ni inisitute ni vo toka e vica na miniti me tekivu na kalasi. Ena gauna o ya, a sega tu ni kila o Baraca Andre e vuqa na ka au se qai wasea oqo vei kemuni. Na ka e kila o koya ni sa gadreva sara o Michael me tiko e kea ka levu na ka me cau kina. A sureti Michael o Baraca Andre me tiko, ia a nanuma o Michael ni ra na sega ni ciqomi koya na tamata. A vakaisulu ni sili ka vakasiqeleti ka laurai levu na ligana, era tu mai na ilokiloki ni ligana ki tabana sara e cake na veimataqali samuqawe. A kaya ni vinakata ga me vakaisulu vinaka ka dara e dua na sote liga balavu ni lako mai ena kalasi. A qai sauma vaqo o Baraca Andre, “Ena sega ni dua ena raica rawa.” A mani tiko o Michael. Ia ni ra sa curu mai na gonevuli, a sega ni dua a dabe e yasana. Ni sa oti na lotu, a tarogi Michael o Baraca Andre me gole mai ena mata ni kalasi, me na vakatakilai koya. A kaya vei ira na gonevuli ni lomani Michael, ni o Michael e dau yalololoma ka levu na ka e rawa ni cau kina. A qai kerea vei Michael me wasea na nona ivakadinadina. Ena tonawanawa ni matana, a tukuna o Michael na loloma ni Kalou, na Nona lomavinaka kei na yalololoma kei na lomana me veivosoti. Oi keimami yadua a tiko ena siga o ya a vakalougatataki ena ivakadinadina i Michael.
A raica o Baraca Andre e dua na ka vei Michael era a sega beka ni raica na vo ni tamata. Ni qasenivuli, a vakamareqeta na veimataqali bula kei na ituvaki ka kila vinaka ni tamata yadua sa tiko na ka me cau mai kina. Sa qai bulia na kila-ka eso mera qaqaco kina na nona gonevuli vakai ira kei na gagadre sa wasei mera rawata kina na vakacegu, veivakabulai, kei na loloma ni iVakabula. A yaco e dua tale na ka vakasakiti ni oti na kalasi ni ra sa voliti Michael eso na gonevuli mera kidavaki koya ka vakadeitaka me kila ni sa gadrevi.
Me vaka au a kaya oti, ni dua tale na tiki ni kena buli e dua na yalo ni vakaitaukeni o ya na vakaitavi ena inaki e vakaibalebale. O ira na noda gonevuli era gadreva mera vakaitavi ena vukei ni kawatamata ka veilaveti ki na bula dodonu, tautauvata, kei na madigi. Vakararaba, era sega ni semata na veika era vulica tiko se madigi sa soli vei ira ki na inaki vakaoqo. Ni sa inaki cecere e vuravura na inaki i Karisito kei na sokomuni o Isireli ena yasa ruarua ni ilati, e vuqa era sega ni semata na veika era sotava ena Semineri kei na Inisitute ki na inaki oqo.
O na raica beka na veisau o na cakava ena nomu veivakavulici, nomu veimaliwai, vakakina ena ituvaki ni kalasi mena veisureti vakalevu cake vei ira na luvena na Tamada Vakalomalagi? Ena so na gauna, o na vinakata beka mo daramaka e dua na sote karakarawa. O na vakasaqara li ena masu mo vakarautaka na nodra vukei na gonevuli mera vakila na loloma nei Tamada Vakalomalagi ka kila rawa na nodra ivakadinadina vakalou kei na rawa-ka? Vukei ira mera kila ni ko kauwaitaki ira ka sa raica tiko na kedra yaga yadudua. Vukei ira mera semati ira kivei ira na lewe ni kalasi ka tiko taqomaki ka gadrevi. Vakayaloqaqataki ira mera vakaitavi ena inaki i Karisito ena nodra vukei ira eso mera toso ki liu ena sala ni veiyalayalati. Ni ko cakava na mataqali kila-ka vakaoqo, era na kila ni ra sa vakaitaukeni.
Au kila vinaka ni sega ni rawa meda cakava kece oqo e veisiga. Ia sa rawa meda nanumi ira ena noda vakavakarau, noda veivakavulici, kei na noda veimaliwai kei ira. E sega ni dua na ka ke o veivakavulici ena semineri se inisitute, e matanavotu se onolaini, ena mataka lailai se ena yakavi bogi, na cokotivata ni ivakavuvuli oqo ena vakalougatataki ira na gonevuli ka vukea mera kila-ka era gadreva.
Sa yaco sara tiko e vuqa na veika vivinaka, ka vuqa tale na veika talei ena yaco mai. Meda nanuma tiko, eda sa sega ni mai yaco eke meda yaco ga eke. Au kila ni da vakasaqara vakaidina na ivakatakila, ena vukei keda na Turaga ena sala meda vakalougatataki ira na Luvena. Vakatamata yadua se vakalewelevu, sa tu vakarau o Koya me veivuke meda vakarautaka na kila-ka e titobu kina na saumaki, sa ganita na tubu vakayalo, ka bulia na yalo ni vakataukeni. Sa tu vakarau o Koya me solia vakalevu mai. Meda sa qai gole tikoga Vua ena vakabauta meda kila na sala meda vukei ira na gonevuli mera vulica dina vakai ira ka sa noqu masu, ena yaca i Jisu Karisito, emeni.