Veivosaki Vakailawalawa

Vuli Kaburaki Vakayabaki ni S&I 2020

Tusiti, 9 ni June, 2020

Brother Jason Willard: Keitou kidavaki kemuni, ena vanua cava ga ko ni tiko kina, ki na mataveivosaki oqo. Na yacaqu o Jason Willard, kau veiqaravi tiko vaka-ivukevuke iliuliu ni Semineri kei na Inisitute ni Lotu. Keitou marau talega nikua ni mai veitomani tiko o iratou na vulagi dokai oqo: Sister Reyna Aburto, iKarua ni Daunivakasala ena Mataveiliutaki Raraba ni iSoqosoqo ni Veivukei; Sister Michelle Craig, iMatai ni Daunivakasala ena Mataveiliutaki Raraba ni Goneyalewa; Sister Jill Johnson, na watina na noda komisina o Elder Paul V. Johnson; kei Brother Chad Wilkinson kei Bert Whimpey, ka rau veiqaravi talega vaka-ivukevuke iliuliu ni S&I. Vinaka vakalevu na mai duavata kei keimami nikua.

Na inaki ni mataveivosaki oqo, me veivosakitaki eso na taro ka keitou nuitaka ni na yaga vakalevu, ena vei ituvaki raraba eso ni o ni vakasaqara moni vakalougataki ira vakalevu cake na itabagone kei ira era qase cake e vuravura raraba. Keitou a masuta na veivuke mai lagi, ena vakavakarau ki na veivosaki ena siga nikua, ka keitou sureti kemuni moni kitaka vakakina.

Ni mai tukuni oya, eda sa na tekivu sara ena i matai ni noda taro. E vaka me levu cake tikoga na noda qasenivuli, gonevuli, kei na matavuvale era sotava tiko na dredre, nuiqawaqawa, lomabibi, kei na bolebole tale eso ni yalo. Na cava eda rawa ni cakava meda vukei ira kina?

Sister Reyna I. Aburto: Ia au nanuma ni bibi vei keda me vukei ira na noda gonevuli mera kila ni kevaka era sotava tiko se veisole tiko kei na so nai tuvaki ni yalo, ni se tiko na inuinui, era sega ni tawayaga, ka ituvaki ni yalo vakaoqo e tiki ni nodai tuvaki vakalou. Ia, kevaka e yaco wasoma tiko na rarawa, e sa na dodonu beka meda kere veivuke. Kau sa vakatututaka me vakamuri na ivakaraitaki ni iVakabula. A taroga na taro o Koya me vakatara vei ira na tamata mera vakamacalataka na veika era vakila. E vakatara o Koya mera vakaraitaka na nodra mosi na tamata—me vaka, na nona vakatarogi Meri kei Marica na gauna sa mate kina ko Lasarusa. Ka vakakina, ena sala ki Emeo a veitalanoa kei rau na Nona tisaipeli, ka taroga vei rau na taro me vakatara me rau vakaraitaka na nodrau kauwai kei na mosi ni sa mai takali na nodrau iVakabula. E vaka talega vei Meri Makitala ena yasa ni i bulubulu ena Nona a taroga e vica na tamata me vakatara vei ira mera vakaraitaka na veika era vakila.

O koya gona au nanuma ke da bucina edua na ituvaki ka na rawa kina vei ira na gonevuli mera vakaraitaka na itovo ni yalodra ena nuidei—sega walega ena rumu ni vuli, se vei ira vakai ira—ia mera vakila nira taqomaki ni vakaraitaka na veika era vakila ena volavola beka, kivua edua na lewe ni matavuvale, se ki na dua na itokani, ka vakabibi vua na Tamada Vakalomalagi. Eda rawa ni taroga na taro ka vakatara vei ira mera vakaraitaka na veika era vakila, ena sala cava ga. “Na cava soti na nomu kauwai me baleti ira na nomu itokani, nomu matavuvale?” “Ena rawa vakacava meda veivukei?”

Au raica nida kerei ira na tamata me soli vakasama se ivakatakila se veiuqeti ena sala mera vukei kina na tani, era na ciqoma na veiuqeti ke ra masulaka, ka rawa ni ra na lako yani ka veivuke. O koya gona ke da bucina edua na ituvaki ka ra vakila kina na tamata nira sega ni vakalewai, eda sa na vukei ira tiko ena ka vata oya, ka ra kila ni sega nidua nai sau ni taro e cala, me taro ga vakararaba ka ra vakila na galala kei na taqomaki ni ra vakaraitaka na veika era vakila. Ka vakabibi ke ra veisole tiko kei na dua na ka, e sega ni gadrevi mera colata duadua na ka oya, era rawa ni kaci yani vua na Tamada Vakalomalagi, kivua na noda iVakabula, ka vakai ira. Ka veitalia na cava, se cava e yaco tiko ena nodra bula, o keda yadudua eda sa luve ni Kalou, ka rawa ni da gole yani vua na Tamada Vakalomalagi. Eda veitacini kece, ka rawa ni da dau veivukei vakai keda. Eda tisaipeli kece nei Karisito, ka rawa ni da gole Vua.

Brother Bert Whimpey: Au vakavinavinakataki Elder Holland—ke o ni nanuma, ena nona vosa ni koniferedi ni Okotova 2013. A tukuna kina me baleta nona sasaga ena dua na gauna me sereki mai na lomaleqa. Sa qai kaya o koya: “E sega ni dodonu me maduataki na [dredre eda sotava ena vuku ni noda vakasama] e vaka ga na dredre ni tauvi keda na tubu ni dra se kenisa.”¹ E kaya ni sa ka vinaka sara meda veitalanoataka ka vakaraitaka, ka wasea sara ga na veika vaka oqori. Au vakavinavinakataka na veika qai wasea: “Kakua ni guce na vakabauta na Tamada Vakalomalagi. Mo vakasaqara na nodra vakasala o ira na tiko vei ira na idola me baleta nomu bula vakayalo, kevaka e qai gadrevi, “vakasaqara na nodra veivuke na tamata e tiko vei ira na kila vakavuli, vakaivola me ra veivuke.”²

Kau nanuma kina ni bibi vei ira na noda gonevuli kei na qasenivuli mera kila ni kilikili me vakaraitaki na veika vakaoya ka veitalanotaki me rawati kina na veivuke era gadreva. E ka marautaki talega ena neitou cakacaka me sikovi ira na mata ni i VT me laurai kina na kena yaga kei na vanua era rawa ni gole kina me rawata na veivuke, kei na mataveilawa ni Lotu talega edua na vanua vinaka me laurai kina na ivurevure eso.

Brother Willard: Brother Whimpey, vinaka vakalevu na veika oya. Na taro ka tarava e baleti ira na noda itabagone kei ira na qase cake kei na sala eda rawa ni vukei ira kina mera raica na cava na vuna e yaga kina ki na nodra bula na Lotu, na vuna era gadreva kina na Lotu, kei na vuna e gadrevi ira kina na Lotu.

Sister Michelle Craig: Au nanuma ni taro bibi sara oqo, ka’u vakabauta dina sara ni o ira noda itabagone kei ira ka se bera ni vakawati mera vakila ni nodra lewena na Lotu iJisu Karisito ni Yalododonu Edaidai e sega walega ni dua na lisi ni lawa se na veika me caka. Ka uasivi sara mai na dua na kalavo ni sota vata. E gadrevi mera kila ni uto dina ni kosipeli i Jisu Karisito sai koya na loloma. Na loloma vua na Kalou, kei na loloma vei ira na tani. Kei na kena vulici ka bulataki na kosipeli, era na qai kila dina sara ka vakila se o cei o ira kei na kedra yaga.

O ira na noda itabagone nikua era goleva na i vakavuvuli me vaka na lomani ira na tani, ena nodra dolele yani vei ira era sega ni kauwaitaki soti tu vakalevu. Na nodra gagadre levu duadua me vakayacora e dua na veisau e vuravura. Au nuitaka nira na mai kila ni ena nodra yalodina tiko, ena ituvatuva ena loma ni isoqosoqo ni Lotu, era na sotava kina e levu sara na madigi mera vakayacora edua na veisau vinaka ena vuravura, ka mai na nodra lewena edua tale nai soqosoqo.

E dua vei ira na ka au taleitaki Peresitedi Nelson kina kei na sala sa mua tiko kina na Lotu, oya na nodra vakabibitaki ena gauna oqo na itabagone kei ira na se bera ni vakawati, me vakatauvatani kei na veigauna sa sivi kau nanuma rawa. Kei keda na qase e gadrevi meda vakatikitiki, ka solia vei ira na noda itabagone na madigi me liutaka, navuca, ka vakasaqara na ivakatakila ka cakacaka ena veivakatakilai oya. E gadrevi me da rokova na nodra vuku, ka vulica na lesoni eso era na vakavulica vei keda. Eda sega ni gadrevi ira mera mai ikuri ni iwiliwili, baleta na vuravura e gadreva vakalevu sara na veika e tiko vei ira mera vota. Ka sa tiko ena Lotu na ituvatuva me vakarautaka na sala me sotavi kina na veigagadre oya vakatamata yadudua. Kau nuitaka ni veika kece era sa vulica tiko na noda itabagone kei ira na se bera ni vakawati, e nodra itikotiko, ena lotu, ena semineri kei na inisitute ena uqeti ira me ra vakayagataka na yalodra kei na ligadra mera dolele yani ka lomani ira na tani ka veiqaravi vei ira era veitaratara vata. Baleta, oqori na vua dina sara ga ni lomani Jisu Karisito kei na lomani ira na tani.

Au nanuma ni sa dina sara na veika kece ena umani kecega vei Jisu Karisito. Na veika kece eda cakava ka vakavulica vaka qasenivuli ka vaka e dua e lomana ka veimaliwai kei ira na itabagone kei ira na se bera ni vakawati kei na gone, e dodonu me vakauwakauwataka na nodra ivakadinadina ena bula, ilesilesi, kei na veisorovaki i Jisu Karisito. Ka sa ikoya dina oya na veika kece e baleta. Au nanuma ke da cakava vakakina, mera na mai kila kina ni oqo na kosipeli i Jisu Karisito, ni sai koya oqo na Nona kosipeli, kei na veivakalougataki ni noda mai lewena na kosipeli oqo e vakaitamera sara ka gadrevi vei keda kece meda vakacavara na cakacaka. E sa Nona cakacaka dina ga.

Brother Willard: Sa matata dina. Vinaka vakalevu. Brother Wilkinson, na cava ko via vakuria e kea?

Brother Chad Wilkinson: Au duavata sara ga kei na veika se qai cavuta oti o Sister Craig. Au a nanuma ni a vosa tiko o koya me baleta edua na kalasi ni Inisitute ka levu vei ira era sa lesu oti mai ena kaulotu. Era veitalanoataka e dua na dredre era sotava ni ra lesu mai ki vale, sai koya, ena loma ni 18 na vula se 2 na yabaki era vakanamata tu ga vei ira na tamata tani, ia ni ra sa lesu mai vale sa veisau e sa baleti ira ga. Ena loma ni kosipeli kei na loma ni rumu ni vuli, eda rawa ni veisureti me vakatara vei ira mera vakananuma oya se vakasaqara eso na sala mera dodoliga yani ki taudaku.

Brother Willard: Sister Johnson, na cava o via vakuria e kea?

Sister Jill Johnson: Niu vakasamataka na taro oqo, au nanuma edua na ka me baleta na kaukauwa ni veiyalayalati ka na rawa ni tiko walega vei keda, ena dua na lotu ka tiko kina na lewa kei na dodonu ni Kalou. Ka ena vuravura edaidai, ena levu ni veika e vakasosataki ira na itabagone ka dreti ira tani mai na Lotu, me semati ira tale ki na kaukauwa ni maroroya na veiyalayalati. Eda rawa ni vakila ena vuravura oqo nida sa tu taudua ka malumalumu me rawa na veika sa bikai keda tu; na noda vakatovolei kei na noda temaki. Ia na veiyalayalati ko na rawa ni kunea duadua ga ena Lotu i Jisu Karisito ni Yalododonu Edaidai, kei na veivanua tabu, e tiko kina na kaukauwa levu sara mai na kena e tiko vei ira na veikaukauwa oya. Kau nanuma vakaidina ni oqo edua na ka e rawa ni vakarautaka na Lotu. Ka da rawa ni vakatakila oqo vei ira na noda gonevuli ka cavu ivakadinadina kina, ka matanataka vei ira ena noda bula, ni levu sara na veika e tiko e na Lotu mai na caka vinaka ga. E tiko na kaukauwa ena veiyalayalati.

Brother Whimpey: Sister Johnson, vinaka vakalevu na veika o wasea. Keimami sa dau veitalanoa kei na so na itabagone qase cake ka dau vaqo na veika era dau tukuna vei au: “Au rawa ni vakila noqu voleka vua na Tamada Vakalomalagi keu sega mada ga ni laki lotu.” Kau dau kaya, “Au duavata kina. Ia na noqu i nakinaki meu kakua ni voleka walega vua na Tamada Vakalomalagi; au vinakata meu ucuya na Tamada Vakalomalagi. Sa noqu i nakinaki meu vakacerecerei.” Kau nanuma kina mera vukei taucoko na noda itabagone kei ira era qase cake, mera nanuma ni inaki ni bula vakayago sai koya mera ucuya na Tamada Vakalomalagi. Ena lotu era na kunea kina na idola ni matabete kei na cakacaka vakalotu kei na veiyalayalati me vaka sa kaya oti o Sister Johnson. E sai koya oqo na matanitu ni Kalou e vuravura, ka tiko na ka vinaka era na rawata mai kea ka na vukei ira mera ucuya na Tamada Vakalomalagi ka ra na sega ni rawata mai na dua tale na vanua se ena dua tale na sala.

Brother Willard: Ka dina taucoko. Meda kakua ni tiki walega ni dua na inaki, ia—au nanuma ni sa cavuti oti ena noda koniferedi raraba se qai oti oqo—meda tiki ni “inaki cecere i Karisito.” Sa ikoya oya na veika era vakarautaka vei keda na veiyalayalati eso oya. Vinaka vakalevu sara na veika oya. A cava eso na ka lalai ka rawarawa eda rawa ni cakava me vakalevutaka na noda kaukauwa me vakalougatataki ira na noda gonevuli, ka veivakavulici ena kaukauwa e levu cake, kei na veivakavulici e veivakurabutaki?

Brother Wilkinson: Au taleitaka na vidio o ya. Ni da veitalanoataka ka vakavulica ka vakatovolea e vuqa na kila maqosa kei nai walewale kei na ka duidui eso. Ia nida kila, nida digitaka vei keda edua na qasenivuli—kena ibalebale ni Yalotabu sai koya na qasenivuli—nida digitaka na YaloTabu me noda qasenivuli, ka sureti koya ki na noda rumu ni vuli, na kaukauwa oya, na veivakavulici vevakurabuitaki oya sa na yaco.

O Elder Johnson a vakavulica vei au ena dua na gauna ni o Setani ena sega beka ni rawata me levu vei ira na cakacaka ena S&I se tamata mera veidauci se voroka na Vosa ni Vuku se vakayacora edua na ka ca se veivakamavoataki se rerevaki. Ia ena rawa ni vakayacora na veika lalai eso me kautani kina vei keda na kaukauwa. E rawa ni sureti keda beka meda vosa kudrukudru se da dabe ka kakasetaka vakaca edua se vakalialia edua na gonevuli se dredrevaka na ka oqo, se veika lalai eso nida vakayacora e yali kina vei keda na Yalo Tabu, se ena sega ni tiko kei keda ena ivakatagedegede ka rawa se dodonu me tiko kina kei keda.

Au vakananumi Aseri ena Veiyalayalati Makawa, ena nodra vakaroti me ra kua ni kauta e dua na ka tawakilikili ki na ivalu e Jeriko—sega ni dua na iyaya, se iyau—mai Jeriko. O Ekani a vakayacora ka sega tale ni dua e kila. Ia ena ivalu ka tarava ka vaka me kena irairai mera na rawa na korolevu ko Ai, era a druka, ka ra mate kina e 36 na tagane.

E tiko e kea edua na ivakavuvuli ni ka eda cakava e vakabetena. Na veika lalai eda rawa ni cavuta, se na kudru se vosakudrukudru se cava tale e yaco mai ka na rawa ni uqeta na kaukauwa ni Yalo Tabu me yaco vakaukauwa mai kina noda bula, e vakabetena. Ka kautani kina na kaukauwa. Edua na ka e vakabetena. Au sureti keda meda cakava na veika lalai vaka oya. Wanonova matua na veika lalai ka rawarawa ka na sureta na Yalo Tabu se na vukei keda, ena kena ivakatagedegede cecere duadua, me noda kina na veiuqeti nei Qasenivuli.

Brother Willard:Brother Whimpey, o via tukuna edua na ka?

Brother Whimpey: Kevaka eda vakataudonutaki keda dina vua na iVakabula, oya na veika e tiko ena noqu vakanananu niu dabe ka nanumi ira na noqu gonevuli, kau nanuma na noqu lesoni, niu sa usututaki dina vei Karisito. Au vinakata vei ira noqu gonevuli mera kila na Nona itovo ni bula kei na ivakarau. E tekivu e kea kevaka eda vakanamata vua na iVakabula.

Kau nanuma e ikarua ni ka meu vakanamata vei ira noqu gonevuli. Au vakavinavinaka vakaidina vei Elder Bednar—ke o nanuma, ena dua na Leadership Enrichment Series, a tukuna kina edua na ka a sotava vata kei luvena tagane, ni a vinakata na veivuke me kila na cava me tuvalaka baleta edua na itaviqaravi ni Bete kei na iSakisaki. Qai wiliki vua o Elder Bednar na Jekope 1:5: “Ena vuku ni vakabauta kei na nuiqawaqawa levu, sa vakatakilai vakaidina kina vei keirau na ka e baleti ira na neimami tamata, na veika ena yaco vei ira.” Kevaka o nanuma nai talanoa, a taura edua na gauna vei luvei Elder Bednar me qai kila ni a tukuna tiko o Elder Bednar, “Na cava e gadrevi me yaco? Ni bera ni o tuvalaka edua na itaviqaravi, nanuma taumada na cava e gadrevi vei ira noda gonevuli mera sotava?” Ka keda torova yani ena noda vakavakarau mai na yasa ni cava e gadreva edua na gonevuli me sotava.

Kau nanuma ni ikatolu ni ka, me vaka sa cavuta oti o Brother Wilikinson, meda kasamitaka na vakatarai ni Yalo Tabu me vakayacora na Nona itavi kei na cakacaka ena loma ni rumu ni vuli. Sa ka bibi sara oya. Kau nanuma ni ivolavakarau na Gospel Teaching and Learningwase e 2.1, e yaga sara me railesuvi, nida vakasamataka vakaidina sara na itavi kei na cakacaka ni Yalo Tabu. Kei na kena kilai matata ga oya, ka vakatarai na Yalo Tabu me vakayacora na Nona itavi kei na cakacaka ena rumu ni vuli, e sa na yaga, yaga sara vakalevu.

Sister Craig: Edua na ka rawarawa sara kau sa kunea, oya keu veivakavulici tiko kau vakila ni sega ni tiko na Yalo, keu vakadinadinataki Jisu Karisito kei na Tamada Vakalomalagi ena yalodina, e dau lako mai na Yalo Tabu. O ya na ilesilesi ni Yalo Tabu, me vakadinadinataka na ituvaki vakalou i Jisu Karisito kei na Tamada Vakalomalagi. Ka kevaka au soli ivakadinadina, edua nai vakadinadina rawarawa ga, na Yalo ena tiko.

Brother Willard: Edatou a veivosakitaka na veivakavulici e mana ka usutaki vei Karisito. Ia ena noda vakasaqara meda vakanamata vakalevu ki na gonevuli, na cava era rawa ni cakava na qasenivuli me yaco na nodra vakavakarau me yaga vakatabakidua vei ira na gonevuli?

Sister Johnson: Io, ena noqu wilika taumada na taro oqori au liaca, na cava na kena ibalebale oqo me veiqaravi vei ira na gonevuli vakayadudua? E kena ibalebale beka na noda kilai ira vakavinaka? E rawa beka ni da kilai ira ena nodra bula yadua? Veimaliwai vata kei ira ena sala ena rawa kina meda kilai ira kina vakavinaka cake? Au qai nanuma tale ni taro oqo ena duidui vua edua na qasenivuli ka tiko mai Orem ka vakavulici ira e sivia e 100 na gonevuli. Kena sagai me kilai vakayadua nodra bula na gonevuli ena dua na itavi levu ke vakatauvatani vua e dua na qasenivuli e Frankfurt, Jamani, ka ono nona gonevuli ka rawa ni ra lotu vata tiko ka veikilai voleka na matavuvale. Okoya gona, au nauma ni na veivakayalolailaitaki mo vakila ni o dua na qasenivuli, ka nomu i tavi mo veimaliwai vakavoleka sara kei ira na gonevuli yadua me vaka oya, me sikovi na nodra dui matavuvale ka tiko ena nodra soqo. E dau levu na nodra soqo, ka sa na rawa ni veiluvuci vei iko.

Sa tiko vei au e vica na vakasama me dikevi kina na gagadre. Au nanuma, ni gadrevi meda na taroga. Ena gadrevi meda tarogi ira sara ga na gonevuli ena veika eso era gadreva. Meda tarogi ira tale mada eso na qasenivuli na veika era sa vakadikeva mai vei ira tale na gonevuli era yabaki ni bula vata ka tautauvata na nodra itovo vakavanua, baleta na Lotu oqo e tu e vuravura raraba ka vuqa tu na duidui vakavanua. Ia na ka bibi duadua, me kerei na Tamada mai Lomalagi ka vakararavi vua na Yalona kei na yalayala me noda ni kevaka eda cakava tiko na ka kece eda rawata, eda na vakalougatataki ena veivakauqeti eda gadreva meda kilai ira kina na gonevuli ka kila na cava e gadrevi mera vakavulici kina. Ka, ena loma ni dua na vuravura vereverea ka tiko kina e levu na bolebole vei ira na itabagone, sa na bibi vakalevu cake me tiko kei keda na veidusimaki maivua na Tamada Vakalomalagi ena nodra vakavulici.

Sister Aburto: Au nanuma ni kevaka eda veivakasalataki kei ira ka kila na veika baleti ira, era na kilai ira vakavinaka cake. E bibi mera wanonovi talega, ka rogoca na vei ivakatakilakila, se yadrava na ivakatakilakila era na solia vei keda. Na vosa era tauca, se ra sega ni tauca, se na taro era na taroga ena vakavuna meda kilai ira kina vakavinaka cake. Ena rawa beka me laivi ira mera taroga na taro ka kua ni vakaraitaka na yacadra. Mo ni kila, so na gauna era na yalo galala mera cavuta mai na veika e tu e lomadra kevaka eda sega ni kila na yacadra. Ena semati talega na ivakavuvuli kei na ivunau eda sa vulica tiko ena veika e yaco tiko ena nodra bula ena gauna oqo—sega soti me baleta nodra veisiga ni mataka, ia ena gauna sara madaga oqo—me rawa ni ra raici ira ena ivolanikalou, ka raici ira ena vakasokumuni kei Isireli, me rawa ni ra raici ira ena cakacaka ni veivakabulai kei na bula vakacerecerei. Ka railesuva talega na nodra bula ka raica na veigauna sa dau vakalougatataka kina na nodra bula na Turaga, mera rawa ni nanuma kina se o cei o ira ka sa dau tu vakarau o Koya me vakalougatataki ira. Koya gona, vukei ira mera raica rawa na isema oya. Me rawa mo vakayacora oya, o na gadreva mo kila na veika e yaco tiko ena nodra dui bula.

Brother Wilkinson: Kila na cava, au nanuma ni rau sa uasivi dina na veivosa oya. Au dau raica na imatai ni siga ni kalasi mera vola mai vei au edua nai vola o ira na gonevuli. Au sega ni vinakataka me ra tukuna vei au na nodra ivalavala ca se dua na ka vaka oya, ira mera tukuna vei au na veika baleti ira. Na cava au gadreva meu kila baleti iko ka na veivuke vei au meu qaravi iko me vaka niu nomu qasenivuli ena iwasewase se na yabaki oqo? Tukuna vei au baleta nomu vuvale, tukuna vei au baleta nomu cakacaka, tukuna vei au se itaviqaravi cava ko sa vakaogai iko tiko kina. Tukuna vei au me baleta na cava mo na vulica mai na kalasi. Se o tukuna, “Au sotavi dredre tiko ena vuku ni noqu vakabauta,” se “Au veisolesole tiko kei na dua na ka.” Kau qai tabaki ira yadua sara na gonevuli ka vakabira vata kei na pepa oya. Niu wilika na ivola oya, au mai kila kina na gonevuli oya, kau nanuma tiko na veika oya ena gauna au vakavakarau tiko kina. Oqori eso, eso beka na sala rawarawa meda kila kina na cava erau vakavulica tiko vei keda o Sister Johnson kei Sister Aburto.

Brother Willard: Na taro ka tarava me ra veivuke kina na qasenivuli. E rawa vakacava meda raica vakatautauvata na noda itavi me vakavulica vakamatata ka vakaidina na ivunau, ia ena gauna vata oya me uqeti ira na gonevuli kara cavutu mai na vei ituvaki duidui kei na duidui tovo vakamatatamata, mera wasea vakadodonu na nodra nanuma kei na itovo ni yalodra? Na cava o rawa ni tukuna vua edua na qasenivuli ka saga tiko mera kila na gonevuli ni rawa ni rogo na domodra ena kalasi, e rawa mera vosa, era rawa ni wasea na vakanananu kei na itovo ni yalo ka duatani mai na veika e yaco tiko ena kalasi, ia ka vakavulica tikoga na ivunau?

Brother Whimpey: Sa dua na veivakatautauvatataki dredre ena so na gauna ena loma ni rumu ni vuli. Au nanuma ni dodonu meda nanuma tiko ni noda i tavi meda vakavulica na dina, sega ni nomu nanuma. O ira noda gonevuli e gadrevi mera kila ni gauna era lako mai kina ki kalasi, era na mai rogoca kina na dina. O ya na vuna eda gadreva meda yavutaki kina ena ivolanikalou kei na nodra vosa na parofita, nira lako mai na gonevuli, oya na vanua eda na tiko kina, oya talega na vanua eda na kunea kina na noda isau ni taro. Meda nanuma tiko na inaki, ka sai koya sara ga meda vukei ira na itabagone kei na itabagone qase cake me ra kila deivaki ka vakararavi ena ivakavuvuli kei na Veisorovaki i Jisu Karisito. Au gadreva meu vukei ira na noqu gonevuli mera kila.

Au nanuma talega ni dodonu meda nanuma ni o ira noda gonevuli e sa na tiko nodra i tavi. Nanuma tiko ena Vunau kei na Veiyalayalati 50: nida na vunautaka na vosa ni dina, ia o ira talega na noda gonevuli era gadreva mera ciqoma na vosa ni dina. Era na gadrevi mera vakabauta tiko nira gole mai ki kalasi. Ka kevaka e rawa ni vaka edua na vanua ni vakatovotovo na noda kalasi, ka ra yaco mai kina na noda gonevuli, ka ra vakila na ituvaki oqo ni na vakavulici kina na dina, era na qai yalodei kina me wasea na nodra taro se na veika era sotava se na nodra kauwai. Ia, me vaka ni o qasenivuli, e noda itavi na vukei ira me ra vulica na sala mera rawa ni vuli kina—vulica na sala eda rawa ni vakila kina na Yalo, na sala era rawa ni vuli kina ena ituvaki oya, me ra wasea na veika era vakanananutaka. Ka na rairai veimuataki yani ki na noda veivosaki, tuberi keda ki na ivolanikalou, kei na nodra vosa na parofita me vukei keda me kunea na dina, ka sega ni ka ni vakanananu se ka e tukuni tiko e vuravura ena gauna oqo.

Ia meda vakanamata ki na ka e dina. Vakasamataka mada nai vakarau ni kena rawati na kilaka vakayalo. Kevaka e rawa ni da vakanamata ena ivakarau oqo ka vukei ira na noda gonevuli me ra vulica na cakacaka ena vakabauta ka tiko vei ira na rai tawamudu ka qai vakasaqara ena ivurevure vakalou me ra rawata nodra isaunitaro, ni ra lako mai kalasi, sai koya oqori na vuna era tiko kina e kea, me rawa ni ra vulica na veika dina, me rawa ni ra yaco me vaka na Tamadra Vakalomalagi.

Edua vei ira na dairekita ni neitoui wasewase a wasea vei au edua na veika sotavi. A tiko ena dua na rumu ni vuli, ka qai wasea edua nai tabagone qase cake edua na vakasama ka a sega ni salavata sara kei nai vakavuvuli ni Lotu. A qai sauma vakaoqo na qasenivuli. A kaya, “E rau veivuke vaka cava na nomu ivakadinadina kei na nomu kila nai tuvatuva ni veivakabulai me vakavurei mai kina na nomu vakasama? Tekivu mai na dua na vanua ni vakabauta, mai na ka o kila, kei na ka o vakila, kei na ka o kila, meda veitalanoataka oya mai na rai vakaoya.” A qai kaya o koya ni a raica nai tabagone qasecake oqo ni ciqoma nai vakatakila ena gauna vata oya ena nodrau tovolea me cakacaka ena vakabauta ka raica ena rai tawamudu. Erau a veitalanoataka na ka erau kila, na ka erau se bera tiko ni kila, kei na vuna erau vinakata kina me rau tovolea me kila. A sega ni tiko vei rau nai sau ni taro kece, ia enai tuvaki oya, kevaka eda lako vata mai me vulica na dina ka raica vata meda cakacaka ena vakabauta ka vakabauta tikoga, mai na ka o sa kila tiko.

Oqo, ena rawa vakacava meu vukei iko mo vulica mo vuli kei na sala mo kune isau ni taro kina ni ko toso ki liu ena itagede oya? Au nanuma ni so na gauna e dodonu meda qaqarauni, ni kevaka ena so na gauna eda na sega ni vakalaiva nai vakavuvuli kei nai vunau ni kosipeli me veisautaki keda, eda na tovolea me veisautaka nai vakavuvuli kei nai vunau ni kosipeli me ciqi donu kina nodai tuvaki kei na ka eda sotava. Ke rawa meda tukuna vakaidina, “Tamaqu Vakalomalagi, au vinakata meu ucui kemuni. Vukei au meu vulica na sala ena rawa ni vukei au kina na ivakavuvuli ni kosipeli,” ena yalovata oqori “se tikoga noqu vakatataro kei na lomaleqa, ia, au vinakata dina meu kila na veika dina.” Kau nanuma nida qasenivuli eda na rawata vakaidina me bucina na mataqali ituvaki vakaoya, ena sala eda saumi taro kina. Ka vukei ira na noda gonevuli mera goleva nai volanikalou kei ira na parofita me vulica na dina ka vukei ira ena nodra vala tiko me kila vakaidina na dina. Kau via kaya talega, kakua ni beca na kaukauwa ni soli ivakadinadina kei na ivakadinadina. “Ia ena gusu ni rua se vuqa na ivakadinadina na dina kece sa na vakataudeitaki.”³ O koya gona, ena ivolanikalou, nodra vosa na parofita kei na nodra vakadinadinataka na veika dina. Ia ni sa qai soli ivakadinadina na yalo, o ira nodai tabagone, era na cakacakataka, ka ra na vulica na sala mera vuli vakai ira ka yaco me mai kila na dina vakataki ira.

Brother Willard: Au taleitaka na veika e kaya o Nifai, “Au sa kila ni lomani ira na luvena ko koya; ia, au sega ni kila na ibalebale ni veika kece.”⁴ O Nifai a soli ivakadinadina ena ka sa kila tiko, ka sa dua na veivakalougatataki kivei keda kece.

Brother Wilkinson: Kila, Jason, edua na vakasama e lako mai vei au oya na yalewa ka kune ni veibutakoci kei na ivakaraitaki ni iVakabula. E a sega ni tuvakasuka me vakavulica na dina. A vakavulica vua nai vunau ni a sega ni dodonu. Ia a vakayacora ena dua na sala me maroroi koya, vakayacora me dua na vanua taqomaki me vukei koya ena ka e sotava.

Sister Johnson: Au a vakanananu tiko ena sala vata oqori, ni ke rawa mera vakila na gonevuli na loloma ni iVakabula kei na kaukauwa ni Veisorovaki—vakalevu cake me dua na kaukauwa, mai na noda vakavulica nai vakaro kei nai sau ni noda talaidredre kina. Kevaka era vakila mai na kalasi kei na lesoni ni tiko edua ka lomani ira sara vakalevu, ka tiko edua na sala me rawati kina na kaukauwa ni Veisorovaki, ni gauna eda na cakacala kina, ka o keda kece eda na cala, ka da cakacala tiko, ka tiko eso na ka eda gadreva kina na Veisorovaki. Kei na yasavinaka ni veika kece oqo sai koya na ka era vulica rawa na gonevuli mai na kalasi. Ka ra na vakila ni se tiko nai nuinui. Ka ra gadreva dina na ka oya ena vuravura oqo, au nanuma.

Brother Willard: Vinaka vakalevu na veivosa oya. Sa dina, nai otioti ni taro oqo ena oka tiko kina na veika oqori: Ena rawa vakacava meda vukei ira nai tabagone mera vakila dina nira laurai, kei na nodra taro e vakabetena dina? Sister Craig, na cava beka o na vakuria?

Sister Craig: Au nanuma edua na tikina ena Marika ka da sa kila levu tu. E dua na iliuliu cauravou vutuniyau a torova na iVakabula, nona via kila se cava e rawa me kitaka me rawata kina na bula tawamudu. E a qai lisitaka nai Vakabula eso nai vakaro ka sa talairawarawa tiko kina o koya. Ia, ni bera ni qai kerea na cauravou oqo me vakayacora edua dina na ka dredre, dredre dina—ka tiko vei keda e levu na dredre—Au taleitaka tikina 21: “Ko Jisu, ni sa vakaraici koya,” se raici koya, “a sa lomana.”⁵ Kau nanuma vakaidina ni ka bibi duadua eda rawa ni cakava ena noda veimaliwai kei ira nodai tabagone sai koya me vukei ira mera kila nira lomani. Kau kila ni sega ni dau rawarawa oya ka so na gauna ena dau taura e levu nai gu kei na masu ena noda yasana meda raici ira me vaka na rai ni iVakabula.

Edua tale na ka e yaco mai vei au niu vakananuma na veika oqo, sai koya nida gadreva me vakayagataka na kaukauwa ni taro. Na veika oqori sa veitalanoataki nikua, Ia e gadrevi meda vulica me veiyaloni dina sara kei ira noda gonevuli kei ira eda vakavulica ka taroga na veitaro vinaka—na taro ena vakatara vei keda me kila na veika era vakila kei na nodra itutu ka vakayaloqaqataki ira mera taroga na nodra taro dina. Oqo na taro ka dau logaloga ca ena so na gauna, ka sega na kenai sau rawarawa, ka da Donu oqori. Era na sega ni rawa ni vakuwai baleta, ni o kila, au nanuma ni kena tiko vei ira na taro dredre vaqo e ivakaraitaki ni nodra kauwai. Ka da sega sara ni vinaka vei ira mera vakamumuri tu ga. Eda vinakati ira mera taro. Sa nodai tavi me vukei ira mera dusimaki ki na vei ivurevure e ganita, ka vakabibi vua na Turaga, me ciqoma ka cakacakataka nai vakatakila yadua. Ka da gadrevi me vakayacora vakakina nida bucina eso nai tuvaki ni veivakabauti ka na rawa kina vei ira me doudou me vakaraitaka na nodra vakabauta kei na nodra vakatitiqa ena so na gauna. Au kila ni da tauyavutaka na veivanua taqomaki ka yaco meda rokovi ira, nodra vuku, na veika era rawata, na veika era rawa ni vakavulici keda kina, kei na veika sa tu mera cakava se solia, ni da solia vei ira na matadigi mera sauma na kaci ni parofita kei Jisu Karisito ka vakaitavi ena cakacaka ni veivakabulai kei na bula vakacerecerei, au vakila na gagadre ni raici, rogoci kei na gadrevi ena yaco ga mai.

Sister Aburto: Au nanuma ni gadrevi talega vei keda meda kauwai vei ira na gonevuli ka duidui na vei ituvaki ena nodra bula, kei na nodra matavuvale. Ka gadrevi vei keda meda vakadeitaka nira kauwaitaki, ni ra sa tiki ni Lotu oqo kei na tiki ni yagoi Karisito, ka da sa oka kece kina. Au nanuma ni dodonu talega meda qarauna na vosa eda vakayagataka. Me vakaoqo, e tiko beka eso na gonevuli era sega ni tiko kei na nodra itubutubu, sa rawa ga ni da kaya “nomu vuvale” se “na tamata o lomana” kakua ni cavuta na “itubutubu.” Na noda rawa talega ni rawai, au nanuma ni na veivuke vei ira mera raica nida veisole tiko kei na dua na ka, ka tiko vei keda kece na malumalumu. Kau nanuma kina ni nodra vukei na gonevuli me vakila ni ra tiki ni ilakolako oqo ka da okati vata kina, ka sega ni dua e sa vinaka sara, era na qai kila ni tiko na betedra. Kena ikuri oya, meda vakarorogo vei ira, vakarogoca na veika era tukuna, ka vakarogoca na vei taro era taroga. Kevaka era taroga na taro, eda gadreva meda biuta vakatikiki na veika eda cakava tiko ka vukei ira mera kunea vakataki ira na isaunitaro—meda kua ni solia na isaunitaro ka veivuke ena nodra raica mai vakataki ira na isaunitaro ena ivolanikalou kei na masumasu, ena nodra vosa talega na parofita bula.

Sister Jill Johnson: Au vinakata meu tukuna ni noda veitalanoataka tiko na veitaro oqo e vakavuna meu nanumi ira lesu na qasenivuli ena noqu bula—vakasakiti dina. Ka sa ka levu na noqu vakavinavinaka ena vica na siga sa oti ni vakavakarau, meu nanumi ira na qasenivuli kau a donui ira, kei na nodra loloma, kei na nodra yalodina vua nai Vakabula, ka sa vakayaco ka sara vakalevu. Kau vakila na kequ bibi kei na kequ yaga ena vukudra, kei na nodra loloma vua nai Vakabula ka vakakina vei au. Kau na vakavinavinaka tawamudu me baleti ira na vei qasenivuli vinaka ka ra tiko vei keda ena Lotu. Sa dua dina na ka talei meu nanuma lesu na nodra vinaka.

Brother Willard: Me kena isoqoni, nona ivakaraitaki edua na qasenivuli vinaka e sega ni cavuti rawa vakavosa. Ena tukuna e levu cake na ka mai na mataveivosaki oqo se veitalanoa tawamudu me baleta na veivakavulici. Ena taura ga mo vakananuma edua na qasenivuli ka sa vakalougatataka na nomu bula, mo vakananuma edua ka a dolele mai vei iko ka veiqaravi vei iko ena dua na sala e vakalougatataka kina na nomu bula. Kau kila ni oya ena dua nai vunau ka na rogoci vakabalavu sara mai na kena eda rawata ena noda gauna nikua. Vinaka sara ena veivakananumi oya.

Nida mai vakacavara na noda gauna vata nikua, au via vakavinavinaka vei kemudou yadua ena mataveivosaki oqo ena nomudou vakavulici keimami ena nomudou vosa ena noda veitalanoa nikua, ka vakauasivi sara, ena nomudou ivakaraitaki ni bulataka na bula va Karisito. Dou sa tisaipeli i Jisu Karisito, ka sa ka marautaki vei au nikua meu tiko kei kemudou yadua ka vuli mai vei kemudou. Kivei kemuni ka vakarorogo tiko mai na veiyasai vuravura, ena vukui keitou yadua sara na lewe ni mataveivosaki, keitou lomani kemuni. Keitou vakavinavinaka vei kemuni me baleta na veisala e vuqa ko ni vaqara tiko kina me vakalougatataki ira na luve ni Kalou. Au soli ivakadinadina ni bula tiko o Koya; oqo na Nona cakacaka. Kau masuta na Nona veivakalougatataki uasivi me na sovaraki yani ki na nomuni dui bula yadudua, ena vanua cava ga ko ni tiko kina, ena yacai Jisu Karisito, emeni.