Rogoca na Domona ena Veigauna Dredre
Vuli Kaburaki Vakayabaki ni S&I 2020
Tusiti, 9 ni June, 2020
Sa dua dina na madigi noqu mai tiko kei kemuni ena siga nikua. E cecere na noqu loloma ena vukumuni kece o ni dau cakacaka vagumatua ena Semineri kei na Inisitute ni Lotu (S&I). Au a tekivu veivakavulici tudei ena semineri ena 42 na yabaki sa oti, kau vakataroga se sa lako ivei na gauna kece oya. Au dau vakamareqeta na balolo ni vakanananu baleti ira na gonevuli, itokani qasenivuli, kei ira tale eso na itokani keimami a veiqaravi vata ena loma ni veiyabaki ena veilesilesi duidui. Au dau qoroi ira na udolu vakaudolu na qasenivuli kacivi era solia na iwase levu ni nodra gauna kei na yalodra ena vakalougatataki ni nodra bula na noda itabagone. Au sa dau tiko ena loma ni so na nodra kalasi e vuravura taucoko ka lauti au na veika e yaco ena loma ni veikalasi oqori. Keirau sa yacova mai kei Jill na itabayabaki era sa rawa ni lakova na semineri kei na inisitute eso na makubui keirau, ka keirau vakavinavinakataki kemuni ko ni na vakayarayarataka na nodra bula. Vinaka vakalevu o kemuni kece o ni vakaitavi ena cakacaka cecere oqo.
Ena itekivu ni yabaki oqo a tavoca kina o Peresitedi Russell M. Nelson e dua na vidio ka yacana “How Do You #HearHim?”1 Ena vidio oya e kaya kina, “Ena yabaki talei oqo ni da vakananuma na ika 200 ni yabaki ni iMatai ni Raivotu, au sureti kemuni mo ni vakasamataka vakatitobu ka vakawasoma na taro bibi oqo: Ko dau rogoci Koya vakacava? Au sureti kemuni talega mo ni taura na ikalawa mo ni rogoci Koya vakavinaka cake ka vakawasoma.” Au sa vakananuma vakatitobu na veisureti oqo, vakauasivi ena gauna sa tekivu roboti vuravura raraba tiko kina na matedewa oqo na COVID-19 kei na kena revurevu voleka ki na gauna a tavoci kina na vidio.
Au vakasamataka talega na vica na vula sa sivi sa madigi uasivi me vakasavasavataki na ivakarau ni noqu rogoci Koya. E vuqa na tamata era sa mai takali na nodra daulomani ena mate rerevaki oqo. Sa veisautaka na noda bula na matedewa oqo kei na noda ituvatuva ka kauta laivi na itovo ni noda bula e veisiga eda sa matau vakalevu kina. Sa veisautaka na vanua ni noda veivakavulici, sokalou, kei na noda gauna ni vakacagicagi. Eda sa vakasaurarataki me duatani na ivakarau ni noda cakava na ka. E dolava vei keda, ena S&I, e dua na katuba me da dikeva lesu na veika eda cakava kei na ivakarau eda cakava kina ka raica kevaka e vinakata na Turaga me da veisautaka eso na ka. Ena tuberi keda o Koya kevaka eda rogoci Koya.
E vaka ni veigauna dredre kei na gauna ni lomaocaoca era gauna digitaki ni veidusimaki vakalomalagi vei ira era dolavi ira tu kina. Vakasamataka mada na veika a sureta mai na iMatai ni Raivotu. E dua na gauna ni “yavavala kei na tawase, e sega ni ka lailai ena kedra maliwa na tamata”2ka dua na gauna ni “veilecayaki kei na yalo ca.”3 E kaya na Parofita o Josefa Simici ni a “dau vakasama sara vakatitobu ka veilecayaki vakalevu.”4 E “nanuma me tagicaka na [nona] ivalavala ca kei na ivalavala ca ni vuravura.”5 Ena gauna oqo ni bolebole vua a lako kina ki na veikau ka tadola na lomalagi.
Vakaivei na nona gauna ena valeniveivesu e Lipati? A vakasisila vua na ituvaki e kea, ka tarabi sara na icolacola e vakila ena nodra sa vakasavi tani mai Misuri na Yalododonu ni tiko voli e valeniveivesu. Ia, ena ituvaki dredre oya, a dolava na Turaga na kilaka nei Josefa.
Ni sotava o Alama Levu na bolebole me walia na leqa e tiko ena Lotu ena nodra cakava tiko na ivalavala ca e vuqa na lewenilotu, “o koya sa rarawa kina na [yalona]”6ka vakataroga se me walia vakacava na lewenilotu era talaidredre ki na lawa ni Kalou. E “rere de kitaka na ka sa sega ni dodonu ena mata ni Kalou,”7 sa mani “sovaraka [kina] na yalona vua na Kalou,”8 qai vakavulica vua na Turaga na ivakarau me wali ira kina na tamata ivalavala ca.
Vakasamataka mada na itutu rerevaki sara ena mate vakayauyau kei na veivakarusai ena Ra ni Vuravura ka salavata mai kei na nona vakamatei na iVakabula. Ena loma ni butobuto sega ni raibasikati rawa, era a rogoca ka kila taucoko na domona na iVakabula.9 E muri, ni ra soqoni wavolita mai na valetabu na tamata, era rogoca na domoi Tamada ia era sega ni kila rawa me yacova na ikatolu ni gauna ena nodra “vakatudaliga me ra rogoca sara; ka rai matua na matadra ki na vanua ka rorogo tiko mai kina.”10 Oqori na gauna era rogoca kina ni vakamacalataki Luvena na Tamana ka rogoca na vosa “dou rogoci koya.”11 A dolavi kina na nona veiqaravi veivakurabuitaki na iVakabula vei ira na tamata era a rawa ni rogoci Koya.
Ena ivakaraitaki yadua oqo a sovaraki na ivakatakila ka veivakalougatataki ki na Lotu vakakina ki vuravura—ruarua vei ira na tamata ena gauna koyakei na veiyabaki mai muri. O ira talega na tamata era oka kina era a ciqoma talega eso na ivakatakila ni tamata yadua kei na veivakalougatataki.
Ena veika a sotava o Josefa ena Veikau Tabu—me ikuri ni nona qai kila me kakua ni curu ki na dua vei ira na lotu oya—a vakavulici vua e “vuqa tale na ka.”12 A tukuna talega vua na Turaga ni sa vosoti na nona ivalavala ca.13
A yalataki vei Josefa ena Valeniveivesu e Lipati ni ko ira sa “savasava na lomadra, kei ira sa vuku, kei ira sa itovo vakaturaga, kei ira sa yalododonu, era na vakasaqara na ivakasala, na kaukauwa, kei na veivakalougatataki ena veigauna mai na ligamuni.”14
A sega walega ni soli vei Alama Levu na idusidusi ena ivakarau me qaravi ira kina na ivalavala ca ia a ciqoma talega e dua na itukutuku me baleti koya. A tukuni vua ni na nona na bula tawamudu.15
O ira na tamata era a rogoca na iVakabula ena Nona veisiko ki Vanuasautu a sega walega ni vakavulici vei ira na ivunau i Karisito kei na ivakavuvuli bibi tale eso ia a vakatarai vei ira yadudua me ra tara na mavoa e Yagona ka me ra ivakadinadina bula yadua ni tiko dina na iVakabula.16
E sega ni rawa ni da namaka walega me da tuberi ka vakauqeti ena veivakatulewa baleta na noda ilesilesi kei na veikacivi, ia na nona lomani keda na Turaga sa vakuria mai kina ena veivakalougatataki yadua kei na veivakauqeti ena gauna ni dredre.
Ena mua ni ivola i Alama eda wilika kina “ena vuku ni kena sa rui balavu na nodra veivaluvaluti tiko na Nifaiti kei ira na Leimanaiti e ra sa yalokaukauwa kina e vuqa vei ira, … ia e vuqa tale era sa yalomalumalumu ena vuku ni veika rarawa era a sota kaya, ka ra sa vakayalomalumalumutaki ira vua na Kalou, io ena yalomalumalumu sa titobu sara.”17Ni da sotava tiko na gauna dredre oqo e rawa ni da vakamalumalumutaki ka yalolokomi kina. Ni da sotava tu na veigauna veibolie vakaoqo, e rawa ni da vaka malumutaki ka yalomalumalumu. Oqori na vuna e gauna donu oqo—e dua na gauna vakasakiti—me da rogoci Koya kina.
Sa veirauti na veisau eda sotava ena vica na vula sa oti qo me vukei keda me da vulica na veika e rawa ni biu laivi—na veika beka a vukei keda vakavinaka ia e sega soti ni yaga ena noda toso kiliu ka na rawa ni vakaberaberataka na noda toso kevaka eda kauta voli. Eda donumaka beka e dua na gauna e rawa ni da veisau ka vakarautaki keda ki na veisiga ni mataka ni vica wale na veika dredre mai na kena eda dau sotava e liu.
Au dau vakataroga ena so na gauna kevaka au sa dau kacivi ena vuqa na gauna ia “kau sega ga ni rogoca.”18 Na ituvaki eda sotava tiko ena gauna oqo e rawa ni vukei keda me da uabaleta oqori. Au nanuma ni dua na noda madigi ni veisau kei na vakavakarau “ena kena ivalavala e sa sega ni bau kilai vakadua.”19
Au duavata kei na sasaga sa vakayacori me rawati na noda inakinaki ena noda vakanamata ena ivakarau vinaka duadua me vakalougatataki kina na nodra bula na itabatamata era tubucake tiko mai oqo ena noda gauna veiveisau. Au a taleitaka ni gauna e vakavulica tiko na Turaga na Lotu me baleta na isolisoli vakayalo “sa soli vei ira eso tale ena cakacaka ni Yalo Tabu me ra kila na duidui ni itavi ni veiqaravi … me vakatokara na nona loloma cecere ki na kedra ituvaki na luve ni tamata.”20 Na kedra ituvaki na luve ni tamata e dau veisau, ka dau vakaveisotaritaka o Koya na Nona loloma cecere me vaka na ituvaki oqori. Eda gadreva na isolisoli oqo ni kila na duidui ni itavi ni veiqaravi me rawa kina ni da veiqaravi me vaka na nodra ituvaki na luve ni tamata. Sa veisau na ituvaki eso oqo ka na veisau ena veisiga ni mataka.
Ni da vulica me da rogoci Koya vakavinaka cake ka ciqoma na veivuke eda gadreva me da vakavulici ira na noda gonevuli vakamareqeti, au vakila ni na vakarautaki talega na iyautalei vakatamata yadua vei keda—me vaka eratou a vakayacora o Josefa Simici, Alama, kei ira na lewei Vanuasautu. Ena yaco mai vei keda na itukutuku eso oqo ni da sa yalomalumalumu ka dolavi keda tu ki na veituberi ni Turaga. Era na yaco vakidacala beka mai, me vaka e dau yaco vei ira era dau vakanamata vakalevu vei ira na tani, ia era veivakalougatataki cecere.
Ena vulaikatakata sa oti a vakaitavi vata kei na Matasere ni Valecavu kei na Mataivakatagi ena Lomanibai ni Valetabu na daulagasere mai Nowei o Sissel. A lagata kina e dua na sere totoka ka yacana “Slow Down.”21 E veilauti ka qaqa. Au sureti kemuni mo ni vasaqara ka sarava ena YouTube.com. E vaka me veiganita vinaka na gauna sara ga oqo na itukutuku. Oqo eso na qaqana:
Ena noqu veilecayaki
Ena gauna niu gagadre kina
Ni sega ni matata na vakasama
Na domo malua sa rogo mai.
Vakamalua, vakamalua, ka tiko lo.
Tiko lo ga, ka waraka na Yalo ni Turaga.
Vakamalua, ka rogoca na Domona
Kila ni o Koya na Kalou.
Ena gauna ni dredre
Niu sega na ivakadei,
Ka luluqa e tataba wavoliti au
Yaco na domo e malua, ka uasivi.
Vakamalua, vakamalua, tiko lo, na luvequ.
Tiko lo ga, ka waraka na Yalo ni Turaga.
Vakamalua ka rogoca na Domona
Kila ni o Koya na Kalou
Me da vakayagataka vinaka na gauna vakairogorogo oqo. Vakamalua mada. Mo rogoci Koya. Qai toso ki liu. Oqo ena vakayaco veisau vei ira na itabagone eda segata tiko me da vakalougatataka na nodra bula, ka na vakayaco veisau vei keda yadudua.
Sa noqu masu me vakalougatataki kemuni yadudua na Turaga, ena yaca i Jisu Karisito, emeni.