Tatou te Le’i O Mai i Lenei Mamao e Tau Na Ona Oo Mai i Lenei Mamao
S&I Faasalalauga o Aoaoga Faaletausaga mo le 2020
Aso Lua, 9 Iuni, 2020
E matagofie le faatasi ai. Matou te faamoemoe o loo saogalemu ma manuia outou ma tou aiga. I lenei tausaga atoa, ua tatou faamanatuina ai le 200 tausaga o le Uluai Faaaliga. Ou te faafetai mo Iosefa Samita ma lana faataitaiga o le faatuatua ma le manao e iloa le upumoni, ma ou te faafetai ua lava le alofa o lo tatou Tama Faalelagi ma Lona Alo o Iesu Keriso ia i tatou e tali mai ai i le tatalo faatauvaa a Iosefa. Na tatou lagonaina le mana o upu a o tatou faalogo atu i le “Viia Le na fetaiai ma Ieova.”1 Ou te fia faaopoopo atu, vivii atu ia Ieova mo le toe fetalai mai i le tagata. Ou te matua faafetai mo le moni o le mea na oo i ai Iosefa i le Vao Paia.
I le maea ai o lana faaaliga, sa toefoi atu Iosefa i le fale lea na feiloai ai ma lona tina ma ta’u atu ia te ia, “O loo lelei mea uma … ua ou iloa nei mo a’u lava.”2 O le mamanu lea na tuliloaina e Iosefa i lana sailiga mo le upumoni o le mamanu lava e tasi lea e tatau ona mulimulitaia e a tatou tamaiti aoga. Ma e pei lava ona fesoasoani le aafiaga o Iosefa ia te ia e iloa ai mo ia lava, o lo tatou faamoemoega foi, ia iloa e a tatou tamaiti aoga uma mo i latou lava ua silafia e le Tama Faalelagi i latou ma alofa ia i latou, o Iesu o le Keriso, ma o loo tu o Ia i le ao o Lana Ekalesia i nei aso mulimuli.
Talu mai le amataga o Seminare ma Inisitituti, e tele mea ua talanoaina e uiga i le aoao atu ma le aoao mai. Mai le Fuafuaga Faataatia e oo mai i Mea Faavae o le Aoao Atu ma le Aoao mai o loo i ai nei, o le taitaiga musuia ua tatou maua ua fesoasoani ia i tatou e aoao atu ma le mataalia le talalelei toefuataiina e pei ona maua i tusitusiga paia ma aoaoga a perofeta i le mana o le Agaga Paia. E le tatau lava ona tatou o ese mai nei faavae. Ae e le tatau foi ona tatou fefefe e aoao ni mea fou pe faaopoopo atu i lo tatou malamalamaaga ni auala e fesoasoani sili ai i a tatou tamaiti aoga ia iloa mo i latou lava.
Ou te faafetai mo le alualu i luma o loo tatou faia. Ou te lagona i nisi auala e pei o loo tatou fe’a’ei faatasi i se mauga. Semanu e le mafai ona tatou oo mai i lenei mamao pe ana le seanoa le aafiaga ma le faaaliga o le tuanai, ae e le tatau ona faamalieina ai i tatou ma tuu ai le aapa atu i lugā. O le fasifuaitau e oo mai i le mafaufau o le mea na saunoa i ai Elder Jeffrey R. Holland i le konafesi aoao na sei mavae atu nei: “[Tatou te] le’i o mai i lenei mamao e tau na ona oo mai i lenei mamao” [Judith Mahlangu (konafesi a siteki tuufaatasi e lata i Johannesburg, Aferika i Saute, Nov. 10, 2019), i le Sydney Walker, “Elder Holland Visits Southeast Africa during ‘Remarkable Time of Growth,’” Church News, Nov. 27, 2019, thechurchnews.com].3 Ua tatou i ai nei i le afa o le ala agai i luga o le mauga, ma ua saunia le Alii e tuu mai ia i tatou nisi mea se tele atu.
I lea tulaga, sa valaaulia ai i tatou e Elder Kim B. Clark ia le iloiloina na o mea ma le auala tatou te aoao atu ai ae faapena foi le auala tatou te taulai atili atu ai i le tagata aoao ma le faagasologa ma taunuuga o le aoaoina. Sa ia valaaulia i tatou ia fesili ifo ia i tatou lava, “O a ni aafiaga e manaomia e a’u tamaiti aoga ina ia faateleina ai lo latou mana ma le gafatia e aoao loloto ai?” O le tuufaatasia o le tatou talafaasolopito ofoofogia faatasi ma le taitaiga talu ai nei atonu tatou te fesili ai, “O le a se mea tatou te ono faia ia faatotonugalemu atili ai ia Keriso ma taulai atili ai i le tagata aoao?”
Sa tuu mai e Elder David A. Bednar ia i tatou se faataitaiga maoae o mea e foliga mai e taulai atili i le tagata aoao talu ai nei i le tatou Afiafi ma se Pulega Aoao. Sa manino lava o lona faamoemoega e le o le ta’u maia ia i tatou o se mea ae mo i tatou ia iloa se mea. Sa ia fai maia ni fesili, matau, ma faafofoga ina ia mautinoa ua tatou malamalama. Sa ia aoao foi i tatou i le auala na te faia ai le aoaoga ina ua ia saunoa, “Nai lo o le mafaufau ‘o le a se mea o le a ou ta’u atu ia i latou?’ ae o le taulaiga o loo i le, ‘O le a se mea o le a ou fesili atu ai ia i latou?’ Ma e le na’o le “O le a se mea o le a ou fesili atu ai ia i latou?” ae faapea foi le “O le a se mea o le a ou valaaulia i latou e fai?’”4
Sa saunoa se Polofesa ma se Rapi lauiloa o Jacob Neusener, “O faiaoga maoae e le aoao atu. Latou te fesoasoani i tamaiti aoga ia aoao.” O le mea mautinoa, o loo i ai se sootaga faamanuiaina i itu e lua i le va o le aoao atu ma le aoao mai mataalia. Ae ou te manatu o le saunoaga a Dr. Neusener ua fautuaina ai e tatau ona tatou faalautele atu mea ua tatou mafaufau i ai e tusa ma le mataalia o le aoao atu ma le taulai atili atu, ae le o le faamatala atu, ae i le fesoasoani i a tatou tamaiti aoga ia maua ni aafiaga e valaauliaina ai le aoaoina. Mo i tatou, o lona uiga o le fesoasoani ia tatou tamaiti aoga ia lagonaina le Agaga Paia o molimau atu i le upumoni ma i le alofa o le Atua mo i latou. O lona uiga tatou te fatuina se siosiomaga latou te lagona ai le saogalemu e fai ni fesili, iloaina le upumoni, faia ni fesootaiga faaleaoaoga faavae, faalogo i ni molimau mai i a latou uo, ma iloilo ma faaleoina o latou lava manatu, lagona, ma uunaiga o upumoni o loo latou aoaoina. O lona uiga tatou te fatuina ni aafiaga e musuiaina i latou e ola i le talalelei ma ia iloa ai le auala e faatino ai i le faatuatua, aoao mai i a latou measese, ma toe taumafai i le faamoemoe ia Keriso. O le auala lenei o le a latou iloa ai mo i latou lava.
Ina ia malamalama atoatoa atili i aafiaga e manaomia e a tatou tamaiti aoga a o latou i ai faatasi ma i tatou, sa tonu ai ia i tatou o le mea sili e mafai ona tatou faia o le fesili atu lea ia i latou. Sa talanoa atu se vaega suesue i le faitau afe o talavou i ni konetineta se fa. Sa latou feiloai atu ia i latou o loo auai i vasega faapea ma i latou e le’i lesitalaina i le taimi nei. A o matou galulue e aotele le anoanoai o faamatalaga maoae, na matou faavasegaina ai tali i ni vaega se tolu.
O le vaega muamua ua matou faaigoaina “Liuaina.” Sa ta’u mai e le autalavou ma talavou matutua ia i matou latou te mananao ma manaomia ni aafiaga e fesoasoani ia i latou ia lagonaina le alofa o le Atua ma faamalosia ai lo latou sootaga ma Ia. Latou te mananao ia faalolotoina lo latou faatuatua ma le molimau ia Iesu Keriso ma Lana talalelei toefuataiina. Ioe, o le mea tonu lava lena tatou te mananao ai mo i latou.
O le tala fiafia e faapea, ua faaalia i le sailiiliga o loo fesoasoani a tatou vasega ia tupu lenei mea. O i latou o loo auai pea ma punouai i avanoa e aoao ai o loo iloga le faamalosia o a latou molimau ma faateleina lo latou faatuatua ia Iesu Keriso. O se tasi lenei o le tele o mafuaaga tatou te mananao ai e valaaulia le tele atu o talavou ia auai. A o latou aoao faatasi ma outou, e faatupulaia lo latou faatuatua ma le molimau.
Faafetai atu mo mea uma o loo outou faia e fesoasoani ai ia i latou e faalolotoina lo latou liua. Ua tatou faia le tele o le alualu i luma a o tatou faatofuina i tatou lava i mataupu faavae o le aoao atu lea e fesoasoani i a tatou tamaiti aoga ia aoao loloto ai. Ma ou te talitonu o loo tele isi mea o loo finagalo le Alii e aoao ai i tatou pe a tatou ōle atu mo Lana taitaiga. A o e mafaufau loloto i avanoa, e mafai ona e iloilo ma le agaga tatalo ia aafiaga e manaomia e tamaiti aoga e faateleina ai lo latou mana ma le gafatia e malamalama ai i le fuafuaga a le Tama Faalelagi ma aoaoga ma le Togiola a Iesu Keriso? Iloilo pe faapefea ona e fesoasoani ia i latou e saili, iloa, ma faatino ia faatosinaga a le Agaga Paia ona faatino lea i le faatuatua, salamo, ma osia ma tausia feagaiga paia. O le tumutumuga, o lo tatou faamoemoega o le a fesoasoani aafiaga latou te maua latou te iloa ai ma alolofa ia Iesu Keriso ma tauivi ai ia avea e faapei o Ia.
O le vaega lona lua e sau mai le faalogo atu ia i latou na auai i le sailiiliga ua matou faaigoaina i le “Fitoitonu i le Tuputupu Ae Patino Faaleagaga.” O ē sa suesueina sa faailoa mai e faapea e lagona e vasega le fitoitonu pe a iloa ma faataua e faiaoga se eseesega o tulaga o tamaiti aoga ma talaaga ma fetuunai aafiaga faaleaoaoga e taulima ai manaoga patino. Sa latou faailoa mai se manaoga mo se nofoaga e mafai ona latou faia ai ni fesili faamaoni e uiga i aoaoga faavae, talafaasolopito o le Ekalesia, ma faafitauli faaagafesootai e taua ia i latou. Latou te le o faamoemoe e finau e uiga i nei mea. E i ai a latou fesili faamaoni ma e manaomia ai se siosiomaga saogalemu, faatumulia i le faatuatua ma saoloto e iloa ai na mea. Latou te manaomia faiaoga e tali atu i a latou fesili, e le na o le faatuatua ae o lagona saoloto ma le agaalofa foi. Latou te mananao foi e iloa le auala e aoao ai ma ola-tutoatasi atili faaleagaga. Latou te mananao e atiae ni tomai e fesoasoani ia i latou e suesue manatu faavae ma fatuai ia mea i se vaaiga e faavavau. Latou te mananao i se fesoasoani ia lagona atili le talitonu i o latou tomai e faamalamalama atu ai mataupu faavae o le talalelei ma aiaiga a le Ekalesia i isi. Ma e latou te mananao e atiae ni tomai e faaaoga ai mataupu faavae o le talalelei e fesoasoani ai i luitau i aso uma.
O mea na ta’u mai e tamaiti aoga ia i matou latou te mananao ma manaomiaina ua ogatusa ma le taitaiga na tatou maua i le tausaga ua te’a mai ia Elder Jeffrey R. Holland. Sa ia faamanatu mai ia i tatou “o se tagata aoga e le o se koneteina e faatumuina; o se tagata aoga o se afi e faamumuina.”5
O le tatou matafaioi o ni faiaoga o le fesoasoani lea i tamaiti aoga ia faafaileleina se manao e aoao; maua faaaliga patino; ma iloa, malamalama, ma ola i le upumoni ua latou maua mo i latou lava. E le na o le sasaa atu o le iloa ua tatou maua mai i a tatou lava suesuega po o aafiaga. Ma e tatau ona tatou manatua o mea e foliga mai e fitoitonu ia i tatou atonu e le anoa tele i a tatou tamaiti aoga o loo i ai i tulaga eseese o le olaga. O lea la, e matua manaomia lava ona tatou faalogo atu ia i latou, ia matau, ma tatalo mo le iloatino.
Ae paga lea, e toatele talavou ma talavou matutua, aemaise i latou e le o auai, e lagonaina e le o lava le fitoitonu o a tatou vasega. Latou te talitonu ua sili atu ona tatou popole i le kavaina o a tatou anomea ua saunia nai lo le tatou taulimaina o o latou manaoga tonu. Fai mai i latou e tele ina taulai atu a tatou lesona i le faatulagaga ae le faailoaina lelei mea moni o o latou olaga pe talanoaina foi a latou fesili.
Mo se faataitaiga, mafaufau i se faiaoga inisitituti o loo talanoaina le aoaoga faavae o le faaipoipoga faaselesitila, ua lagonaina ua matua fitoitonu le autu i talavou nofofua matutua. O tamaiti aoga i le vasega ua talitonu lava i le taua o le faaipoipoga faalemalumalu, ae o nisi e le o mautonu i le auala e faatatau ai lenei aoaoga faavae i o latou olaga. Ua popole nisi ona latou te o mai mai aiga malepelepe ma e le o mautinoa pe mata e aoga le faaipoipoga ia i latou. O isi o le vasega atonu o tomanatu pe latou te gafatiaina tautupe ona faaipoipo ma tausi se aiga. O isi atonu e fesiligia pe mata latou te maua ea lena avanoa. O isi e tauivi ma lagona tosina i le itupa e tasi ma tuufesili e uiga i lo latou tulaga i totonu o le Ekalesia. E alu lava le lesona e pei ona fuafuaina ae ua le faatagaina ai le auai anoa o tamaiti aoga. E lagona e le faiaoga, ona o le autu, ua ia fesootai ma tamaiti aoga i ni ala fitoitonu. Ae o le mea moni, e ui sa aoaoina le aoaoga faavae, ae sa le’i faia i se ala e faailoa ai ni lē mautonu o tamaiti aoga, talanoaina ai o latou manaoga, pe fesootai ma mea moni o o latou olaga. Sa misia se avanoa e fesoasoani ai ia i latou ia iloa le taua o le aoaoga faavae i o latou tulaga patino.
O se faiaoga e mafaufau e uiga i le alualu i luma faaleagaga o ana tamaiti aoga e naunau e fetaui ma i latou i mea o loo latou i ai. Na te avatu ia i latou le faamoemoe ma fesoasoani ia latou vaai pe mafai faapefea e le ola i le talalelei ona faamanuiaina i latou ma fesoasoani ia latou alualu i luma agai i a latou sini autu. Na te fesoasoani ia i latou ia atiae le talitonuga e tuuina mai moni e tusitusiga paia ma aoaoga a perofeta o aso e gata ai ia tali i fesili o o latou agaga.
Ina ia fesoasoani i a tatou tamaiti aoga ia iloa le taua ma le fitoitonu o le talalelei i o latou olaga, pe o le a e iloiloina ma le agaga tatalo pe faapefea ona uunaia au tamaiti aoga ia fai ni fesili faamaoni ma faasoa mai o latou malamalamaaga ma vaaiga? E manaomia ona latou faatuatuaina e te iloa ma malamalama ia i latou ma o loo e loto e fetuunai ia taulima ai o latou manaoga. Saunia ni aafiaga e musuia ai i latou e suesue tusitusiga paia i aso taitasi ma liliu atu i tusitusiga paia ma aoaoga a perofeta o aso nei mo le taitaiga. Fesoasoani ia i latou e aoao ni tomai ma mamanu e maua ai le malamalama faaleagaga ina ia mafai ai ona latou iloa mo i latou lava.
O le vaega lona tolu na matou malamalama i ai mai le faalogo atu i a tatou tamaiti aoga aemaise lava ia i latou e le auai [i vasega] ua fautua mai ai e faapea latou te mananao ma manaomia i tatou e fatuina se lagona o le auai. O le lagona o le auai e fatuina e ala i mafutaga ma fesootaiga ma lo tatou Tama Faalelagi, ma le faiaoga, ma isi tamaiti aoga i le vasega. O se lagona o le auai e oo mai pe a i ai se siosiomaga e lagona ai e tagata uma le talileleia, lagolagoina, manaomiaina, ma le faatauaina. E faateleina foi se lagona o le auai pe a lagona e tamaiti aoga o i latou o se vaega o se galuega anoa.
Ou te toe faafetai atu ia te outou. Ou te talisapaiaina tele lau tali mai i le aoaoga o le “Vaai i le Toatasi” faapea ai ma au taumafaiga patino e fesoasoani i tamaiti aoga uma ia lagonaina le alofaina ma le faaaloalogiaina. E manaomia ona tatou faaauau pea nei taumafaiga ona o se vaega tele o i latou e le o lesitalaina i le taimi nei o loo lagonaina pea latou te le auai ai. E toatele i latou e lipoti mai e faapea o vasega seminare ma inisitituti e mo na o e latou te vaai i ai o ni Au Paia atoatoa o Aso e Gata Ai e leai lava ni o latou faafitauli po o ni fesili. O lenei vaaiga sese ua mafua ai ona latou talitonu e le fetaui ia i latou. O nisi e lagona faapea afai latou te fesiligia se fesili faamaoni pe faasoa atu se vaaiga moni, o le a faamasinoina i latou pe manatu i ai ua le agavaa. Sa latou fai mai foi e sili ia i latou le auai pe afai o se nofoaga e talileleia ai tagata uma po o le a lava se faatuatua o i ai le loto po o se foliga vaaia i fafo.
Talu ai nei, sa iloa atu ai e Brother Linford se tamaitai talavou o tutu i luma o se tasi o a tatou fale. Sa ia faailoa atu o ia lava ma fesili i ai pe ua lesitala o ia i se vasega. O lana tali e faapea o ia o se tagata o le Ekalesia ma sa iloa e uiga i le inisitituti ae sa le’i auai. Sa ia faaopoopo mai, “Afai e te iloaina a’u ma iloa lo’u tuanai, o le a e iloa ai e le talafeagai lo’u auai iina. E le fetaui i ai a’u.” O le mea e lelei ai, sa taliaina e lenei tamaitai talavou le valaaulia a Uso Linford e sau i totonu, lea sa faafeiloai ai ma le mafanafana o ia. Sa lesitala o ia i se vasega ma amata loa ona auai. Ae ou te tomanatu, pe fia ni selau, pe fia afe, o tatou talavou o loo tutu i fafo o o tatou fale, o loo manaomia tonu mea o loo ofo atu e a tatou vasega, ae o loo lagonaina le fefe e le fetaui i ai i latou.
E le gata latou te manomiaina mea e ao ona tatou ofo atua iai, ae tatou te manaomia foi i latou. O faiaoga latou te fatuina se lagona o le auai e iloaina ma le faamaoni ua i ai i tamaiti aoga taitasi se sao e fai lea o le a faia ai se aafiaga lelei atu i le vasega.
Sa ou vaai i se faataitaiga matagofie o lenei mea ina ua ou feiloai atu i se alii talavou i le vasega a Uso Andrea. Sa vave foi mai Michael mai lana misiona mo ni mafuaaga faalesoifua maloloina. A o saunia e toefoi atu, sa so’a o ia e se taavale, ma mafatia i le tele o ivi gaui, ma sa i ai i le falemai mo se taimi umi. E oo ifo i le taimi na ia tuua ai le falemai ua ia faavaivai i lana miti e faamaea lana misiona. Sa ia lafo atu o ia i taaloga matuia ma see ese atu ai mai le Ekalesia. I le tasi aso, sa tuua na o ia ma tonu ai e alu e savali na o ia i se maea tuaiti i luga o se tofē e aunoa ma se neti saogalemu. O le taimi lava na ia kolosi ai, sa ia lagona e alaga ma le fiafia, ae ina ua ia tilotilo ifo i lalo ma iloa ai afai e pa’u o ia, o le a uma ai lona ola.
I lena taimi, sa amata ai ona ia mafaufau i lona tina ma lona tuafafine laitiiti ma le lotonutimomoia o le a la oo i ai pe afai e oti o ia. O le isi ona manatu na sosoo ai o le Faaola ma mea uma na Ia faia mo ia, ma sa tumu lona loto i le Agaga. Sa ia toe pe’a ese mai le tofē ma toe amata lana malaga e foi atu i le Ekalesia. Sa oo ina malamalama o ia, i ni auala ofoofogia, i le alofa mutimutivale, alofa, ma le mana o le Faaola e togiola ai i tatou.
I se taimi mulimuli ane, sa i ai Michael i le matafaga ma manatua lona auai ai i le inisitituti a o le’i alu i lana misiona. Sa ia alu atu sa’o mai le matafaga ma savali atu i le fale inisitituti i ni minute a o le’i amataina se vasega. I lena taimi, sa le’i iloa e Uso Andre le tele o mea ia faatoa ou faasoa atua ia te outou. O le mea na ia iloa sa manaomia e Michael ona i ai iina ma e tele ni mea sa ao ona ia ofo atua. Sa valaaulia e Uso Andre ia Michael e nofo, ae sa lagona e Michael atonu o le a le talileleia o ia e tagata. Sa fai ona ofu taele ma le mitiafu limapupuu ma ona lima sa aliali uma, sa faaalia ai mai i ona tapulima i ona tauau na lilofia i pe’a. Sa ia fai mai e sili ia te ia le fai lelei o ona ofu ma fai se ofutino lima uumi a o le’i sau i le vasega. O le tali a Uso Andre e faapea, “E leai ma se tasi o le a mataua.” Sa nofo Michael. Ae ina ua o mai isi tamaiti aoga i totonu, sa leai ma se tasi na nofo i ona talaane. Ina ua maea le faigalotu, sa talosagaina e Uso Andre ia Michael e sau i luma o le vasega, lea na ia faailoa atu ai o ia. Sa ia fai atu i isi tamaiti aoga e alofa o ia ia Michael, o Michael e tele se mea na te fia ofo atua, ma e lelei lona loto. Ona ia talosaga lea ia Michael pe fia faasoa atu lana molimau. Faatasi ma ona loimata, sa saunoa ai Michael e uiga i le alofa o le Atua, Lona agalelei ma le agaalofa ma le naunautaiga e faamagalo. O i matou uma taitoatasi sa i ai iina i lena aso sa faamanuiaina i le molimau a Michael.
Sa vaai Uso Andre i se mea ia Michael sa le’i mafai e isi ona vaaia. I le avea ai ma se faiaoga, ua ia faatauaina se eseesega o talaaga ma tulaga ma malamalama e tofu tagata uma ma se mea e ofo atu. O lea ua ia fatuina ia ni aafiaga ua mafai ai e ana tamaiti aoga ona utu mai le malosiaga mai le tasi ma le isi ma mai i o latou manaoga tutusa ia maua le filemu, faamalologa, ma le alofatunoa o le Faaola. O se isi mea mata’ina na oo mai i le maea o se vasega a o o’u matamata atu i nisi o tamaiti aoga o siomiaina Michael e faafeiloai o ia ma faamautinoa ua ia iloa na manaomiaina o ia.
E pei ona ou ta’ua muamua, o le isi vaega o le fatuina o se lagona o le auai o le punouai lea i se faamoemoega anoa. Ua i ai i a tatou tamaiti aoga se manao ia auai i galuega alofa ma siitia isi i olaga o le malualii, tutusa, ma avanoa, O le mea e masani ai, latou te le fesootai atu i mea o loo latou aoaoina po o ni avanoa ua tuuina atu i se faamoemoega faapena. Ma e ui o le galuega aupito sili i le lalolagi o le galuega a Keriso ma le faapotopotoina o Isaraelu i itu uma e lua o le veli, ae o le toatele lava e le fesootai o latou aafiaga i Seminare ma Inisitituti i lena galuega.
Pe o le a e iloiloina ni suiga e mafai ona e faia i lau aoao atu, au fegalegaleaiga, e oo lava i faatulagaga o potuaoga ina ia valaaulia atili ai fanau uma a le Tama Faalelagi? Atonu foi o le a mananao ai ou matua e auai atu i ai. Ae o le mea e taua atu, pe o le a e saili atu ma le agaga tatalo e saunia aafiaga e fesoasoani i tamaiti aoga ia lagonaina le alofa o le Tama Faalelagi ma iloaina lo latou faasinomaga ma le gafatia paia? Fesoasoani ia latou iloa e te popole ia i latou ma iloaina lo latou taua faaletagata lava ia. Fesoasoani ia faia ni fesootaiga ma tagata o le vasega ma lagonaina le saogalemu ma le manaomiaina. Uunaia i latou ia punouai i le galuega a Keriso e ala i le fesoasoani atu i isi ia alualu i luma i luga o le ala o feagaiga. A o e faafaileleina nei ituaiga o aafiaga, o le a latou iloa o i latou o ni ō.
Ou te malamalama e le mafai ona tatou faia nei mea uma i aso uma. Ae e mafai ona tatou mafaufau i na mea i a tatou tapenaga, a tatou aoaoga, ma a tatou fegalegaleaiga ma a tatou tamaiti aoga. E le afaina pe o e faiaoga i le seminare po o le inisitituti, faafesagai po o luga o le initoneti, vaveao po o le afiafi, ae o le faaaofiaina o nei mataupu faavae o le a faamanuiaina ai au tamaiti aoga ma fesoasoani ia saunia ni aafiaga latou te manaomiaina.
E anoanoai mea lelei o loo tutupu, ae o mea aupito silisili o le a oo mai. Manatua, tatou te le’i o mai i lenei mamao e tau na ona oo mai i lenei mamao. Ou te iloa pe a tatou saili atu ma le faamaoni mo faaaliga, o le a fesoasoani mai le Alii ia i tatou ia iloa le auala e faamanuia ai Ana fanau. Ua sauni o Ia e fesoasoani ia i tatou taitoatasi pe toatele ia saunia aafiaga e faaloloto ai le liuaina, e fitoitonu i le tuputupu ae patino faaleagaga, ma fatuina se lagona o le auai. Ua sauni o Ia e foai mai nisi mea se tele. Tau ina ia tatou faaauau pea ona liliu atu ia te Ia i le faatuatua ia iloa ai le auala e fesoasoani ai i a tatou tamaiti aoga ia iloa moni mo i latou lava, o la’u tatalo lea, i le suafa o Iesu Keriso, amene.