Tauivi ina ia Avea Ai
S&I Faasalalauga o Aoaoga Faaletausaga 2020
Aso Lua, 9 Iuni, 2020
Elder Ulisses Soares: o’u uso e ma tuafafine pele, po o fea lava o outou i ai, o se faamamaluga moni mo ma’ua ma lo’u toalua le faatasi ai ma outou i lenei afiafi. Ou te momoli atu faamanuiaga ma alofaaga mai le Au Peresitene Sili ma le Korama a Aposetolo e Toasefululua ia te outou uma. O loo momoli faapitoa mai e Peresitene Nelson ana faamanuiaga sili ia te outou uma. E talosaga mai lava o ia e le aunoa ia i matou e faasoa atu ona lagona sili ma le alofa ia i latou matou te feiloai iai. Na te talisapaia moni la outou tautua mo fanau a le Atua.
A’u paaga pele, ae ma te le’i laaloa ou te fia faailoa atu lo’u lotofaafetai patino ma le loloto mo la outou auaunaga ofoofogia i seminare ma inisitituti. Ua faamanuiaina outou e a’oa’o atu ma fesoasoani i le tupulaga faia’e ia savavali i tulaga aao o le Faaola e agai atu i le faavaau. Ua outou a’oa’oina nisi o agaga sili ona malualii o le Atua, o e na faapolopoloina e o mai i le lalolagi i lenei vaega o le talafaasolopito. O le tatou perofeta pele, Peresitene Nelson, e faasino i nei agaga malualii o le vaega sili ona lelei a le Atua, o Lana au taaalo sili ona lelei, o toa, o e e auai i lenei faapotopotoina faaiu ma le maoae—le faapotopotoina o Isaraelu.1 E mafai e lenei au maoae ona faataunuuina mea faigata ma fesoasoani e mamanu le taunuuga o le aiga atoa o tagata.2
Ua ma faatasi ma lo’u toalua pele i lenei fonotaga faapitoa i le asō. Ua avea lava o ia ma malamalama i lo’u olaga mo le 39 tausaga. Ona o lona lelei ma faataitaiga matagofie, ua avea ai o ia ma uunaiga i lo ma aiga e fesoasoani ia i matou taitoatasi ia avea atili e faapei o Keriso. O ma’ua ma Rosana o ni tagata ua mauaina faamanuiaga na oo mai i o ma olaga mai le faaaogaina o aoaoga na maua i le taimi o le ma talavou mai ni faiaoga seminare ma inisitituti tuuto tele. O le latou auaunaga faamaoni sa i ai se aafiaga maoae i o ma olaga a o ma savalia a ma laasaga muamua i le talalelei a Iesu Keriso. Sa fesoasoani nei faiaoga tuuto ia i ma’ua ia mamanuina o ma olaga e tusa ma upumoni o le talalelei a Iesu Keriso ma taiala i ma’ua a o ma taumafai e savavali i le ala e toefoi atu i lo tatou Tama Faalelagi. Ou te fia valaauliaina la’u manamea e faasoa atu ona lagona i le auala na faamanuiaina ai o ia e le seminare ma le inisitituti o se tagata fou liliu mai i le Ekalesia ma i ana taumafaiga e atiae uiga FaaKeriso. E mafai ona faasoa mai ou manatu, la’u pele?
Sister Rosana Soares: Faafetai tele, lo’u au, mo le valaauliaina o a’u e faasoa atu la’u molimau.
O le taimi muamua lava na ou faalogo ai i le Ekalesia, sa 9 o’u tausaga pe ā. Ma mo le 8 tausaga sa ou talosaga ai i le faatagaga a lo’u tama ina ia papatiso, ma o taimi uma e fai mai ai o ia e leai. Sa ia fai mai sa ou laitiiti tele e fai se faaiuga taua faapena ma sa manaomia ona ou faamaonia atu ia te ia o le mea moni lenei sa ou manao i ai.
E ui sa le’i avea a’u ma se tagata o le Ekalesia ae sa ou faamaeaina le fa tausaga o le seminare i aso taitasi. O le vasega Seminare sa aoaoina i le falesa i le 6:00 i le taeao o aso uma lava. Sa na o le pau le mea na faataga ai a’u e lo’u tama ou te alu o le tuutuuga e piki a’u e le faiaoga. O le mea e lelei ai, sa i ai sa’u faiaoga lelei tele na sau i aso uma i le 5:30 i le taeao e piki a’u i le taavale. Sa fafagu a’u e lo’u tama i aso uma i le 5:00 i le taeao, ma fai lo’u ofu ma faatali mo le faiaoga. O taimi uma ou te tautulemoe lava ma ou faapea ifo ia te a’u lava, “Faamolemole aua e te sau. Faamolemole aua e te sau,” ae e sau lava o ia i taimi uma. Ma le fiafia, sa sau ai lava o ia i taimi uma.
Sa ou lagona le faamanuiaina ma le lotofaafetai mo la’u faiaoga seminare filiga o lē sa ono faigofie lava ona fiu ia te a’u. Peitai e le’i fiu o ia.
I le tolu sefulu tausaga mulimuli ane,sa ou maua ai le avanoa e aoao atu ai le seminare i la’u tama teine mo se vaitaimi i le fale. Sa le mafai ona auai o ia i le seminare i le falesai lena tausaga ona o taimi faatulagaina o lana a’oga. O ia o se teine sa tiotio tele ma sa le’i fiafia e nofo filemu mo le 45 minute, aemaise lava ia te a’u o lona faiaoga. O lea sa ou filifili ai e saunia ni vasega tulagaese ma taulimaina la’u tama teine e pei o ia le tamaitiiti seminare silisili e ui sa na o ia lava le teineitiiti a’oga. I le faaiuga o lena tausaga sa fiafia o ia, ma sa ia lagonaina le alofa o lo tatou Tama Faalelagi mo ia, ma sa ou lagonaina foi.
Uso e ma tuagane, e pei lava o la’u tama teine, ou te iloa le afioga a le Atua e mafai ona faia le eseesega atoa i o tatou mafaufau, i o tatou uiga, ma i le ala tatou te vaai ai ia i tatou lava ma isi.
Ou te fia faamaea atu i se upusii matagofie mai ia Peresitene Henry B. Eyring:
“O outou faiaoga ofoofogia ua uma ona outou tuua se taumafaiga maoae ma osigataulaga i a outou tapenaga e aoao atu le upu, i a outou aoaoga, ma i le tausiga o tamaiti aoga. … Ua mafai nei ona outou faaopoopo atu lo outou faatuatua o le a faia e le toatele atu o a tatou tamaiti aoga filifiliga e tau atu i le liua moni.”3
Ou te molimau atu ai i le suafa o Iesu Keriso, amene.
Elder Soares: Faafetai lava, la’u pele, mo au upu matagofie. E ofoofogia o ia, a ea?
Ou te faamoemoe e te le o manatu faatauvaa i lou gafatia e faatosina ma faatauanau tatou talavou e tulituli’aupu le amiotonu i o latou olaga. E pei ona masani ona saunoa ai lo tatou Peresitene pele o Packer, o loo latou ola a’e i totonu o teritori a le fili. E ala i la outou auaunaga tuuto i le aoaoina o i latou, e mafai ona latou tuputupu a’e i le faatuatua ma le usiusitai ma oo ai ina malolosi faaleagaga. O le a latou a’oa’o auala e taulimaina ai ma faatoilaloina faaosoosoga.
O’u uso e ma tuafafine pele, o polokalama o le seminare ma le inisitituti, o le lua lea o saofaga aupito taua i le mautu ma le malosi o le Ekalesia. Ou te faamautinoa atu ia te outou o loo faataunuuina e le Alii “[Lana] galuega ma [Lona] mamalu—ia aumai le tino ola pea ma le ola faavavau o le tagata”4—e ala i la outou auaunaga taua ia te Ia ma Lana fanau. O le mea lea, o la tatou sini autu e tatau lava ona i ai i taimi uma o le faaolataga ma le faaeaga o fanau a lo tatou Tama Faalelagi.
O lenei tusitaulima maoae mo faiaoga ma taitai i Semianre ma Inisitiuti o Mataupu Faalelotu, Aoaoina Atu ma le Aoaoina Mai o le Talalelei, tatou te maua ai lenei faamatalaga faagaeetia: “O lo tatou faamoemoega o le fesoasoani lea i le autalavou laiti ma talavou matutua ia malamalama ma faalagolago i aoaoga ma le Togiola a Iesu Keriso, ia agavaa mo faamanuiaga o le malumalu, ma ia saunia i latou lava, o o latou aiga, ma isi mo le ola e faavavau faatasi ma lo latou Tama i le Lagi.”5
O lenei poloaiga ua vaavaalua ma le mea ua ta’ua i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai:“Seminare ma Inisitituti o Mataupu Faalelotu (S&I) ua lagolagosua lea i matua ma taitai o le Ekalesia i le fesoasoani atu i talavou laiti ma talavou matutua ia faateleina lo latou faatuatua ia Iesu Keriso ma Lana talalelei toefuataiina.”6
O se tasi o luitau aupito silisili mo i tatou o loo auai i lenei galuega ofoofogia o le laveaiina o agaga o le sailiga ia avea ai, o lona uiga ia tuputupu a’e pe liliu atu i le ituaiga o soo ua faamoemoeina i tatou e le Alii e avea ai. Ona, faagafatiaina lea o i tatou e le Alii e faia se aafiaga i olaga o i latou tatou te aoaoina a o latou savavali i luga o le ala mo le ola e faavavau. O lenei mataupu o le avea ai, e fesootai atoa i le tasi o elemene e tolu o le auala e ausia ai Lona faamoemoega, e pei ona faamatalaina i le tusitaulima o le Aoaoina Atu ma le Aoaoina Mai o le Talalelei e faapea: “Tatou te ola i le talalelei a Iesu Keriso ma tauivi mo le mafutaga a le Agaga. O a tatou amio ma fegalegaleaiga o ni faataitaiga ia i le aiga, i le potuaoga, ma le alaalafaga. Tatou te saili e le aunoa ia faaleleia atili la tatou faatinoga, iloa, uiga faaalia, ma uiga faaletagata.”7
Ua apoapoai mai le Aposetolo o Paulo ia i tatou e uiga i le taua o le mauaina o le matua lava e tasi o Keriso. I lana tusi i Efeso, sa ia faapea atu ai:
Na ia tuuina mai foi nisi e fai ma aposetolo; o isi foi, e fai ma perofeta; o isi foi e folafola le tala lelei, o isi foi e fai ma leoleo atoa ma aoao;
“Ina ia faaatoatoaina ai le au paia, latou te fai ai le galuega a auauna, ia atiina ae ai le tino o Keriso:
“Seia tatou oo atu o i tatou uma lava ma le loto gatasi ma i le faatuatua ma le iloa lelei o le Alo o le Atua, ina ia fai ma tagata matua ia oo i le fua o le ua matua, e tatau ma le tumu o Keriso.”8
O le tatou fesili taua atonu o le mafai faapefea ona tatou ausia le fua o le ua matua e tatau ma le tumu o Keriso, e ala i le tatou auaunaga, a o tatou tauivi e fesoasoani atu i isi ia faia lea mea e tasi. Ua tuuina mai e le talalelei a Iesu Keriso ia i tatou le fesoasoani i lena tulaga. Se’i o tatou iloiloina faatasi nisi o mataupu faavae i se taumafaiga e talanoaina lenei fesili.
O le mataupu faavae autu muamua lava o le mulimuli lea i taimi uma i le Faiaoga Sili, o Iesu Keriso. O le atagia atu ma le naunautai o Iesu Keriso i o tatou uiga faaalia, upu, ma amioga e faateleina ai lo tatou gafatia e faatosina ma faatauanau isi ia saunia ma agavaa mo le ola e faavavau faatasi ma lo latou Tama i le Lagi. I le faia o lea mea, e mafai ai ona tatou fesoasoani i a tatou talavou ia aoao e alolofa i le Alii, aua o mea latou te fiafia i ai o le a iloa ai mea latou te sailia. O mea latou te sailia o le a iloa ai mea latou te mafaufau i ai ma fai. O mea o le a latou mafaufau i ai ma fai o le a iloa ai po o ai o le a avea ai i latou.
O oe ma a’u e fai ma sui O Le Ekalesia a Iesu Keriso o le Au Paia o Aso e Gata Ai i le lalolagi. O mea uma tatou te faia ma tautatala ai e atagia ai foliga o le Ekalesia, o ana upumoni, ma le tulaga silisili, o le Faaola. A o tatou saili ia malamalama atili ma faaogatusa o tatou olaga ma le talalelei, o taumafaiga sili atu e tatau ona tatou uunaia e fai, o le avea lea e faapei o Iesu Keriso. Na aoao mai Peresitene Dallin H. Oaks i se tasi taimi:
“O le talalelei a Iesu Keriso o le fuafuaga lea e mafai ai ona avea i tatou ma ituaiga fanau a le Atua e tatau ona avea ai i tatou. O lenei tulaga lē pisipisia ma le atoatoa o le a oo i ai mai se faaauauina tumau o feagaiga, sauniga, ma amioga, ma se faaputuga o filifiliga sa’o, ma mai le faaauauina o le salamo.”9
Talu ai nei sa matou talanoa ai ma nisi o le matou vasega seminare ma le inisitituti mai Pasila, i le mea sa ou ola a’e ai. Sa faagaeetia lava a’u i mea sa latou fai mai ai e uiga i faatosinaga FaaKeriso sa faia e o latou faiaoga ia i latou i se taimi o faaiuga taua i o latou olaga. Se’i o tatou faalogo atu i mea sa fai mai ai nisi o i latou.
Sister Barreto: Lelei, toe tepa i tua i lo’u talavou. Ou te manatu—ia, ou te le manatu, ae ua ou mautinoa—o faaiuga uma ma mea uma na ou faamoemoe i ai, sa ou moemiti i ai, na iai se faavae mautu ina ua ou suesue i le talalelei. Aemaise ou te matua manatuaina lelei le seminare. Sa ou laitiiti lava—seminare sa amata iinei i Pasila—ou te manatua pea o’u faiaoga lelei tele, ma tuuto, na amata ai ona ou alofa i le Faaola. Ou te manatu o le molimau na ou mauaina a o avea ma se tamaitiiti seminare na atiaeina ma tuputupu ae tele, ma o le tagata ua ou avea ai nei ua mafua ona o na taimi, ma aoaoga, ma faiaoga, ma faaiuga na ou faia.
Sister Silva: Mo a’u, ou te manatu o lo’u faiaoga sa taua tele i lena taimi, ona faatoa ou liliu mai i lena taimi, sa ia fesoasoani tele ia te a’u ia malamalama i na mataupu faavae ma le faaaogaina i lo’u olaga ma saili uiga auau mama o ia Iesu Keriso—e pei o le onosai, faateleina o le iloa, usitai i perofeta soifua. O nei mea uma sa fesoasoani ia te a’u i lena taimi e atiae le tomai e lagona ai le Agaga Paia, o musumusuga a le Agaga. O le ki la lea mo a’u ona sa avea a’u ma se tagata fou liliu mai. O le faiaoga le pogai. Sa tele sona iloa, ma sa fesoasoani foi i le tele o tamaiti e atiae lena iloa. Sa ia taliina a matou fesili ma isi mea. Sa fesoasoani lenei mea ia te a’u e maua se molimau ma ia malosi i le talalelei.
Elder Gonçalves: Ia, o le taimi lava na ou papatiso ai, ma i le taimi na ou ulufale ai i le falesa mo le taimi muamua, sa vave ona faaaofia a’u e le autalavou ma le faiaoga seminare. Sa ia valaaulia a’u e sau i vasega. Ua leva ona amata le kosi, o lea sa faananati ai ona faatumu nisi o ta’ui ia mafai ai ona maua la’u tusi pasi mo lena tausaga. Sa ou le’i aoaoina se mea i le faatumuina o na ta’ui, ae sa ou aoaoina e faaauai a’u lava, ma sa taua lena faaauaiga. O lena faaauaiga sa taua ina ia ou lagonaina se manao e aoao atili i tusitusiga paia, ia sa ou le’i mafaufauina muamua, ma sa ou le’i malamalama iai. Ina ua mavae lena uluai lagona faafiafiaina, o le olioli o le auai ai na amata ona avea ma se vaega o lo’u olaga. Sa oo ina masani ai, ma sa ou lagonaina le manao ia aoao atili i tusitusiga paia ma ia faataitai na mea na foliga mai e moni ma faamanuiaina tele ai olaga o na talavou na mafai ona e vaaia i a latou amioga. O le toe tepa i tua, ou te manatuaina ai lenei mea: o amioga a na talavou na ou vaai ai i se mea moni.
Elder Soares: O le tusi a le Aposetolo o Paulo ia Timoteo ua faamanatu mai ai ia i tatou le fautauga taua e ao ona tatou faalogo iai ina ia mafai ona tatou faatosinaina moni lava isi mo le lelei: “Ia fai oe ma faaa’oa’o i e ua faatuatua, i le upu, ma le amio, ma le alofa, ma le loto, ma le faatuatua, ma le le gaoia.”10
O le mataupu faavae lona lua ou te fia ta’ua, o le a’oa’o atu lea o le upumoni ma le lototele ma le manino. Ua valaauina oe ma a’u e a’oa’o atu le talalelei a Iesu Keriso. E le tatau ona tatou a’oa’o atua o tatou lava manatu po o ni filosofia, pe fefiloi ma tusitusiga paia. O le talalelei o “le mana lava lea o le Atua e ola ai,”11 ma ua na o Iesu Keriso lava ma Lana talalelei e faaolaina ai i tatou. Faatasi ma le taitaiga ma le fesoasoani a le Agaga Paia, e ao ona tatou a’oa’o atu mataupu faavae o le talalelei e pei ona maua i tusi faavae o le Ekalesia, ma i upu a perofeta ma aposetolo o aso nei e pei ona aoaoina ai i aso nei. E ao ona avea i tatou ma meafaigaluega o le upumoni ma a’oa’o atu i le manino ina ia le fenumia’i [le upumoni] ma filosofia o le lalolagi. E matagofie le faitau i le auala na faamatalaina ai e Alema le mana o le afioga a le Atua i loto o tagata ma le auala e faamalosia fua ai le faatuatua. Tatou faitau faatasi le Alema 32:42:
“Ma ona o lou filiga ma lou faatuatua ma lou onosai i le afioga i lona tausiga, ina ia mafai ona mauaa i totonu ia te oe, faauta, e lata le aso o le a e tauina ai lona fua, lea ua sili ona pele, lea ua sili ona suamalie i luga o mea uma ua suamalie, ma lea ua sili ona paepae i luga o mea uma ua papae, ioe, ma mama i luga o mea mea uma ua mama; ma o le a outou taumamafa fiafia i lenei fua seia oo lava ina outou maoona, o le a outou le fia aai, pe fia feinu ai.”
Uso e ma tuafafine, ua faaali mai e lenei mau maoae le mana o le upumoni lea e mafai ona mauaina i totonu o loto o o tatou talavou ma faatauanauina i latou e fai mea lelei i o latou olaga. Faamolemole ia manatua o le a’oa’o atu ma le mataalia o le ute tonu lena o le taitaiga i le Ekalesia. O le a oo mai le ola e faavavau pe afai ua lelei ona aoaoina alii ma tamaitai, e suia ai i latou ma pulea o latou olaga. E le mafai ona faia faamalosi i latou ia amiotonu pe o i le lagi. E tatau ona taitai i latou, ma o lona uiga o aoaoga mataalia.”12
I le konafesi aoao ia Aperila talu ai, sa aoao mai ai Peresitene Russell M. Nelson e uiga i le “O Le Toefuataiga o le Atoatoaga o le Talalelei a Iesu Keriso: O Se Folafolaga o le Faamanatuina o le Lua Seneturi i le Lalolagi.” I le faaiuga o lana savali, na ia tuu mai ai se tofiga i le Ekalesia atoa ia suesue i ai ma mafaufau loloto i upumoni ma manatunatu i aafiaga o na upumoni i o tatou olaga. Ou te talitonu o le tatou tiute e sili atu nai lo lena tofiga. O oe ma a’u o se vaega o le potopotoga o tagata ua tofia e molioo atu upumoni musuia o lenei folafolaga i loto o o tatou talavou ma talavou matutua. I se tasi lagona, o faiaoga seminare ma inisitituti o se faaopoopoga o perofeta, tagatavaai, ma talifaaaliga e 15 i la latou matafaioi o le folafolaina o nei upumoni i le autalavou i sauniuniga mo la latou malaga i se lalolagi ua matua fenumiai. Ua ia te oe ma a’u le tiutetauave taua ia faia faamanuiaga o lenei folafolaga ma se mea moni i o latou olaga. Ua tatou iloa uma lava o loo tatou ola i aso faigata. Ua galo i le lalolagi le taua o le matafaioi a le Tama Faalelagi ma Iesu Keriso i o latou olaga ma ua le iloa ai le vaaiga mamao o lo latou natura paia. Ua suia e le tele ma le tele o filosofia faalelalolagi ia upumoni paia a’ia’i o le talalelei a Iesu Keriso i loto o tagata. Ua ia te oe ma a’u le avanoa sili e avea ai ma meafaigaluega i aao o le Alii e faamanuia ai a tatou talavou ma aumai upumoni ia na tautino mai ma le manino ma le mamana i lenei folafolaga i o latou loto.
Se’i o’u faasoa atu ia te outou nisi o faamatalaga na faia e a’u uo lelei e uiga i le auala na mauaa moni ai i latou i le talalelei a Iesu Keriso ona o upumoni na aoaoina ma le manino ma le lototele.
Elder Siliva: Mo a’u, o le mea muamua e oo mai i le mafaufau o le faataitaiga a faiaoga, ona o le puna lenei lea tatou te vaai iai, ma tatou mananao ai ia pei o i latou. Sa ou mafaufau pea, “Mata e mafai ona ou faia se aiga faapela i se aso? Mata e mafai ona ou faia moni la mea i se aso?” O nisi o aafiaga o le aoaoga faavae, o mea e muai aoaoina e ala i faataitaiga, e pei ona latou fai mai—e manaomia ona tatou taliaina le aoaoga faavae ma fetuunai e tusa ma o tatou tulaga. Sa ou taumafai e faia lenei mea i le ala sili e mafai ai, e tusa ma lo’u gafatia ma le tomai, ina ia mafai moni ona ou lelei atu i aso taitasi ma ia mafai ona faia filifiliga silisili ona lelei—e pei ona ou faia iinei i a’u filifiliga silisili, i le filifilia o lo’u toalua, o se tasi lea o mea na fesoasoani foi ia te a’u.
Sister Barreto: Ou te vaai pea i a’u faiaoga o ni faataitaiga. Ou te manatua pea aemaise lava le toatasi. Sa talavou lava o ia, sa le’i faaipoipo. O ia o se faifeautalai tamaitai ua maea le misiona, ae a ou vaai atu ia te ia pe a ia a’oa’o i matou sa ou mafaufau, “Ou te fia pei o ia. Ou te fia pei atili o ia” ona sa pei o ia o le Faaola. Sa alofa tele o ia ia i matou, ma o taimi uma na te a’oa’o ai i matou ou te lagona lava lona alofa ma lona tuuto atu i mea sa ia faia. O se tasi mea ou te manatu sa taua i lo’u olaga—e le o a’u o se tagata liliu mai, ae sa i ai so’u taimi o le liuaina. Sa ou fanau i totonu o le Ekalesia, a matou talanoa la e uiga i a matou tala, e fai si ese teisi o la’u tala ona ou te le manatua le i ai o ni masalosaloga po o se lē talitonu i le Ekalesia ma le talalelei. O mea uma sa mea fua ia te au. Ae ou te manatu—Ou te mautinoa e oo mai se taimi e ao ona e iloa ai mo oe lava ia ma o le mea tonu lava lena—o la’u seminare ma le inisitituti lena aemaise lava le taimi o le seminare. Pe a ou toe foi i tua ma mafaufau i ai, o se taimi taua lena na ao ai ona ou filifili pe aisea na ou i ai i le lotu—pe moni ea le Ekalesia mo a’u, pe o i ai ea sa’u molimau o le talalelei ma se molimau ia Iesu Keriso. Ina ia mafai ona avea a’u o a’u i le taimi nei ona o na aso.
Sister Gonçalves: Muamua, a i ai o tatou faiaoga ma taitai, e le faapea ua atoatoa i latou, ae tatou te vaai faalemafaufau ia i tatou lava e pei o i latou, faia o se aiga e pei o o latou aiga, ma mulimuli i a latou faataitaiga, le i ai o le malamalama e tasi, mauaina o lena iloa. Na i ai nisi o taitai sa faia se aafiaga ia te a’u ma tuu mai se faataitaiga lea sa ou faapea ai, “Ou te fia pei o i latou pe a ou matua.” Ae ua faia e lenei mea a’u ia taumafai e le aunoa e fai ni filifiliga atamai i lo’u olaga. Ma sa ou faasolosolo pea, i lea laasaga ma lea laasaga. E pei ona saunoa Elder Bednar e uiga i le liuaina, e le tupu vave; ae i lea laasaga ma lea laasaga, o se suiga o le loto, o se suiga o mafaufauga, o se suiga o amioga, ma e taulai atu e le aunoa i le finagalo o le Atua. O lea la o le finagalo o le Atua e muamua, ma sa fesoasoani nei faiaoga ia te a’u ia malamalama i mau, ia a’oa’o e fiafia i tusitusiga paia. O lea sa avea ai lenei mea ma se vaega o lo’u olaga. Sa ou saili e fai ni filifiliga atamai e tusa ai ma le finagalo o le Atua.
Elder Soares: O le isi mataupu faavae ou te fia ta’ua i le asō o lo tatou tiute o le a’oa’o atu o a tatou tamaiti a’oga e ala i le Agaga. O oe ma a’u, ua tatou i ai i le feau a le Alii. O i tatou o Ona sui, ma ua faatagaina ma poloaiina i tatou e suitulaga ia te Ia ma galulue e fai ma Ona sui. I le avea ai ma Ona sui, ua tatou agavaa ai i Lana fesoasoaniga. O le mea mautinoa ua faamoemoeina i tatou e saunia ma le filiga lesona taitasi, ia atamai i metotia eseese faafaiaoga ma a’oa’o i le auala e fesoasoani ai i a tatou tamaiti a’oga e faatino lo latou faitalia i le amiotonu. Peitai, ua manino foi ina ia maua le fesoasoaniga a le Alii e ala mai i le Agaga Paia i lesona tatou te a’oa’o atua, e taua le ola i se olaga e agavaa ai mo lena fesoasoani.
I le saunoa atu ai i faiaoga o le Ekalesia, sa ta’ua ai e le Au Peresitene Sili e faapea: “O le vaega aupito taua o lau auaunaga, o lau oe lava tapenaga faaleagaga i aso taiasi, e aofia ai le tatalo, suesueina o tusitusiga paia, ma le usiusitai i poloaiga. Matou te uunaia oe ia tuuto atu oe lava ia ola i le talalelei ma se faamoemoega sili atu nai lo o se isi lava taimi muamua.”13 Ona tatou ōle atu lea mo le fesoasoani a le Alii, ma o le a Ia faamanuiaina i tatou i Lona Agaga ia iloa ai le mea e fai. Faamolemole ia manatua i taimi uma o le a’oa’o atu i le Agaga e fesoasoani lea ia i tatou e a’oa’o atu tagata o le vasega i se ala e mafai ai ona latou malamalama atili i mataupu faavae o le talalelei ona uunaia e faaaoga i o latou olaga: “O le mea lea, o ia o lē e talai atu atoa ma ia o lē e mauaina, e malamalama i le tasi, ma e faagaeetiaina ma olioli faatasi i laua uma.”14 Atonu o lenei mea ua uma lava ona malamalama i ai, ae ou te faamautinoa atu ia te outou e na o le pau le ala e mafai ai ona maua e a tatou tamaiti a’oga ia upumoni e faavavau e ala i le Agaga pe afai lea e a’oa’o atu e lena Agaga.
Ou te fiafia i le ala na faamalamalama ai e Nifae lenei manatu matagofie: “Ma o lenei, o aʼu o Nifae, e lē mafai ona ou tusia mea uma sa aoaoina i totonu o loʼu nuu; pe ua ou malosi tele foi i le tusitusi, e pei o le tautala; ona pe a tautala se tagata e ala i le mana o le Agaga Paia, e molioo e le mana o le Agaga Paia i loto o le fanauga a tagata.”15 E ma’eu le matafaioi taua lea e fai e le Agaga i a tatou aoaoga, o le molioo atu lea o le upumoni i loto o fanauga a tagata!
O’u uso e ma tuafafine pele, e mafai ona matua susua a tatou upu ma popoto e tautatala i nofoaga faitele, ae a aunoa ma le Agaga o le a le faia e o tatou tomai se eseesega. Sa aoao mai talu ai nei Peresitene Russell M. Nelson, “E leai lava se isi taimi ua sili ona matua taua ai le iloa o le auala e fetalai mai ai le Agaga ia [i tatou] nai lo le taimi nei.” Sa ia faaopoopo mai “i le Aiga Atua, o le Agaga Paia o le avefeau lea. O le a Ia aumaia mafaufauga i [o tatou] mafaufau ia e finagalo le Tama ma le Alo [tatou] te mauaina. O Ia o Lē Faamafanafana. O le a Ia aumaia se lagona o le filemu i [o tatou] loto. E molimau mai o Ia i le upumoni ma o le a faamautu mai mea e moni a o [tatou] faalogo ma faitau i le afioga a le Alii.”16
O le mataupu faavae lona fa ou te fia ta’ua, o le a’oa’o atu mai le loto. O loo i ai faiaoga e mafai ona latou faia ni fuaiupu e faaupuina lelei ma susua e faagaeetia ma matagofie i le faalogo. Ae o faiaoga e i ai manatu faatauanau, e talanoa i le loto i le loto, o faiaoga ia e mafai moni ona musuiaina i tatou e faatino mea ua tatou aoaoina. O nisi o nei faiaoga atonu e le o se failauga lelei tele i nofoaga faitele, ae a faalogo tamaiti a’oga ia i latou, latou te tatala o latou mata mo se malamalamaaga sili atu. E mafai e nei faiaoga ona totoina se manao i o latou loto ma mafaufau ia o le a faatosinaina ma faatauanauina tamaiti a’oga i a latou sailiga mo le lelei ma le tulitulimatagauina o le faaeaga. O faiaoga na sili ona aafia ai lo’u olaga o ē na aoaoina a’u mai i o latou loto. E le o i latou o ni tagata sili ona lelei i metotia faafaiaoga, ae na mafai ona latou talanoa mai i le loto i le loto. O a latou faatosinaga sa itiiti lava se mea e faatatau i le mulimulitai tonu i fuafuaga o lesona ua faatonuina po o manatu faaleaoaoga ae sa matele ona faia i le popole faamaoni, magafagafa, naunautai, ma le talitonuga. E pei ona ta’ua e le tusitala ma se faiaoga Amerika o Parker Palmer, “O faiaoga lelei e ia i latou se gafatia mo fesootaiga. … O fesootaiga e faia e faiaoga lelei e le faia i a latou metotia ae i o latou loto—o lona uiga loto i lona uiga faaanamua, o le nofoaga e tuufaatasi uma ai le atamai ma lagona ma le agaga ma le loto i totonu o le tagata soifua.”17
O lo tatou Alii, o Iesu Keriso, o le faataitaiga atoa lava o lena mataupu faavae. Sa Ia tuua tulagaaao faaletino i le oneone o le matafaga ae tuua faailoga faaleagaga o Ana aoaoga i luga o loto ma i olaga o tagata uma o ē na Ia aoaoina. Sa Ia aoaoina Ona soo i na ona po ma ua Ia fetalai mai foi ia i tatou i na lava upu e tasi: “Ia e mulimuli mai oe ia te au.”18
Se’i o tatou faalogo atu i manatu faaalia faaiu o tagata o la’u vasega ma uo. Masalo, ou te le’i faailoa atua i latou ia te outou. O ulugalii e toatolu nei o Glaucia ma Reinaldo Barreto, Lucelia ma Mauro Gonçalves, ma Celia Maria ma Ramilfo Silva. Ua ou iloaina le toatele o nei tagata matagofie talu mai lo’u tamaitiiti. Ua ou matauina i latou i o latou olaga ma a’oa’o mai i a latou faataitaiga amiotonu. O i latou o ni tagata faatuatua, onosai, ma tuuto O Le Ekalesia a Iesu Keriso o le Au Paia o Aso e Gata Ai o ē na tausi a’e o latou aiga i le talalelei ma auauna atu ma le loto atoa i tiutetauave na valaauina iai i latou e le Alii.
Elder Barreto: E iai ni a’u faataitaiga lelei tele i lo’u olaga mai polofesa ma faiaoga seminare ma inisitituti, faapea foi ma taitai faamaopoopo ma faatonu o seminare ma inisitituti. Ua lelei tele matou faigauo ma i latou talu mai lena taimi. E lē lava lo’u lotofaafetai mo i latou ma a latou faataitaiga i lo’u olaga. O i latou foi o ni uo lelei tele. Ou te lagona lava i taimi uma le toafimalie e talanoa ia i latou i soo se mea lava. Latou te faatonu a’u, latou te a’oa’o a’u, latou te a’oa’o mai le talalelei, ae o a latou faataitaiga sa ofoofogia. Sa latou faatosinaina tele a’u.
Sister Goncalves: Ou te matua faafetai i le mauaina o le talalelei ma le mafai ona tausi a’e ai lo’u aiga ma vaaia i aso nei fua o na galuega uma mai le taimi sa matou laiti ai. Ou te manatua se tasi taimi sa ou i ai i luma o le malumalu ina ua faapaiaina, ma sa ou maua le avanoa e pese ai iina faatasi ma Peresitene Kimball. Sa avea Sister Lobo ma a matou taitai pese. Sa toalaiti nai tagata na mafai ona ō i totonu o le potu selesitila, ma mafai ona lagonaina i totonu o le malumalu e faapea, o mea uma sa ou aoaoina iina, o mea uma sa ou aoaoina i lo’u talavou, sa taua lea, sa ou manao moni lava e faaauau pea ona agai atu i le faavavau. O mea uma la i le olaga e iai sona faamoemoega, ma o lo’u faamoemoega o le mafai lea ona toefoi atu i le afioaga o le Tama Faalelagi faatasi ma lo’u aiga ma a’u uo.
Elder Silva: O o’u manatu muamua lava, o le lotofaafetai mo na faiaoga totoa, na tagata na ofo fua atu e tuuto ma faaauau moni ona tuuto atu le taimi e saunia ai i latou lava e a’oa’o atu. E le mafai ona ou fuaina le faatosinaga lelei e mafai ona iai i faiaoga ma latou faia i a latou tamaiti aoga. O nisi taimi faato’a tatou iloaina lava i le tele o nei tausaga mulimuli ane. Ae latou te filifili moni lava e fai mea e sa’o ma tumau i le ala. Ma ou te matua faafetai lava mo lenei mea. E i ai sa’u molimau o Iosefa Samita o se perofeta o le Atua. Ua iai nisi o o’u aafiaga e le mafai ai ona ou faafitia o Iosefa Samita o se perofeta a le Atua. O le Tusi a Mamona o le afioga a le Atua. O le asō ua i ai se tatou perofeta o loo taitaia i tatou ma mauaina faaaliga, ma ou te iloa o loo mataalia Iesu Keriso i le taitaiga o le Ekalesia. O o’u manatu ia, i le suafa o Iesu Keriso, amene.
Elder Soares: Faafetai atu, a’u uo pele. Ia faamanuia atu le Alii ia te outou uma a o outou faaauau ai ona avea ma faataitaiga lelei o mea sa outou aoaoina a o tou talavou ma faaauau ai pea ona faauigaina le talalelei a Iesu Keriso i loto o isi.
O le mataupu faavae mulimuli ma taua tele ou te manao e faasoa atu o le molimau atu lea i mea ua tatou iloa e moni. A’u soa pele i le talalelei, o le mana o a outou molimau malolosi o le a suia ai e faavavau olaga o au tamaiti a’oga. O le mea tonu lea sa tupu ia i tatou taitoatasi, po o o tatou tuaa, ina ua faalogo i faifeautalai o faasoa mai a latou molimau. O se molimau malosi e ala mai i le mana o le Agaga Paia o le mana faatumauina lea o se olaga faamanuiaina ma e maua ai le filemu, mafanafana, ma le faamautinoaga. Na te fatua’ia le talitonuga maumaututu e faapea, a usita’ia pea lava pea ia aoaoga a le Faaola, o le a matagofie le olaga, mautu le lumanai, ma o le a i ai le gafatia e faatoilalo ai luitau e faasalaveia lo tatou ala. O a outou molimau malolosi o le a faatumauina le faatuatua a tou tamaiti a’oga ma o le a fesoasoani ia i latou e atia’e a latou lava molimau o le talalelei. O a latou molimau o le a avea ma se tasi o poutu o le a fesoasoani ia i latou ia iloaina le mana o le taulaga togiola paia a Keriso i o latou lava olaga. A o latou faatinoina a latou molimau i le amiotonu, e mafai ona ou faamautinoa atu ia te outou o a latou molimau e mafai ona avea ma a latou talita e tetee atu ai i taumafaiga a le fili e faavaivaia lo latou faatuatua ma uunaia le lē talitonu i o latou mafaufau i o latou olaga atoa. O lenei faavae o le a latou maua ai le lototele e tautino atu ai ma le lototoa upumoni o le talalelei i le lalolagi.
Fai mai le pese Peraimeri: “Ua ou iloaina o soifua lo’u Tama, ma Ia alofa ia te a’u. / Le Agaga e ta’u mai, / Le Agaga e tau mai.” 19
I lenei agaga, ou te fia faamae’a atu ai la’u tautalaga i le asō i le faasoaina atu o la’u molimau ia te outou; o se molimau sa fausiaina i lea laina ma lea laina ma faaauau ai pea ona tuputupu ae a o ou saili pea ma se loto faamaoni ia malamalama atoatoa atili i le afioga a le Atua. O le fatu o lena molimau sa muai totoina i lo’u loto e ni faifeautalai lelei tele o ē na aoaoina lo’u aiga a o o’u tamaitiiti. Ona faafaileleina lea e o’u matua faatuatua, o ē na aoaoina a’u e ala i a la faataitaiga ma le tuuto i le Alii. Na i’u ina fotu a’e le fatu o lena molimau a o ou faalogologo i aoaoga a o’u faiaoga seminare maoae ma lagonaina le uunaiga e faatino aoaoga i lo’u olaga i lo’u talavou.
Ou te iloa o Iesu o le Keriso. Ou te iloa o loo soifua o Ia. Ou te iloa na mafatia o ia mo a’u agasala ma sa toetu ma aumai ia te a’u se avanoa e sui ai la’u amio. Ou te iloa sa Ia faagaloina o Ia lava mo a’u; sa Ia liliuese mai Ona lava manao ma faia tonu le mea na talosagaina o Ia e le Tama e fai. E oo lava i lena taimi tonu o puapuaga e tele, sa Ia faafitia ai lava o Ia ma faia le mea na finagalo le Tama Na te faia.
Ou te iloa o loo soifua lo tatou Tama Faalelagi ma e faafofoga i a tatou tatalo. Ou te molimau atu ia te outou e malamalama o Ia i le tiga. Ou te iloa o le Ekalesia moni lenei a Iesu Keriso i le lalolagi. Na amatalia moni lava e le Alii le Toefuataiga o Lana talalelei ma Lana perisitua e ala mai i le Perofeta o Iosefa Samita. Ou te alofa i lo’u Faaola ma lo’u Tama Faalelagi, ma ou te fiafia e auauna ia te i La’ua. Sa ou taumafai lava e faaali atu lo’u alofa i lo’u Alii pele i lo’u olaga atoa e ala i a’u auaunaga i fanau a le Atua. O’u uso e ma tuafafine pele, e ma’eu lo’u lotofaafetai mo o’u faiaoga seminare ma inisitituti o ē sa le’i faavaivai e faatosina a’u e ala i a latou auaunaga tuuto ma le alofa i le Alii. O mea uma na amataina i lena taimi, ma ou te matua faafetai lava mo lena mea.
Ou te alofa ia te outou, uso e ma tuafafine. Ua ou fiafia i le avanoa e faatasi ai ma outou i le asō. Toe faafetai atu mo mea uma o loo outou faia mo le Alii ma Lona nuu i le lalolagi. Ou te tautala atu i nei mea i le suafa o Iesu Keriso, amene.