Lagonaina o Lona Siufofoga i Taimi Faigata

S&I Faasalalauga o Aoaoga Faaletausaga mo le 2020

Elder Paul V. Johnson

O Le Fitugafulu

Aso Lua, 9 Iuni, 2020

E ma’eu le avanoa o le faatasi ma outou i le asō. E tele so’u alofa mo outou uma o loo galulue ma le filiga tele i Seminare ma Inisitituti o Mataupu Faalelotu (S&I). Sa amata ona faiaoga tumau i le seminare i le 42 tausaga talu ai i lenei tausaga, ma ou te tomanatu po o fea ua mou i ai lena taimi atoa. Ou te faamemelo i manatuaga o ia te a’u o tamaiti aoga, uso a faiaoga, ma isi paaga sa matou auauna faatasi i le tele o tausaga i tofiga eseese. Ou te tu ma ofo i le fia sefulu afe o faiaoga valaauina o loo foai atu le tele o o latou taimi ma le loto e faamanuia olaga o le autalavou. Sa ou i ai i nisi o a latou vasega i atunuu i le lalolagi atoa ma na ootia i mea na tutupu i na vasega. Ua ma i ai ma Jill i le tulaga o le olaga lea ua lava ai le matutua o nisi o le ma fanau a fanau e auai i le seminare ma le inisitituti, ma e ma te faafetai mo outou o loo faatosinaina i latou. Faafetai atu ia te outou uma ua auai i lenei galuega tele.

I le amataga o lenei tausaga sa faalauiloa mai ai e Peresitene Russell M. Nelson se vitio na faaulutalaina “E Faapefea Ona E “FaalogoiateIa?”¹ I lena vitio sa ia saunoa ai, “I lenei tausaga faapitoa a o tatou faamanatuina le 200 tausaga o le Ulua’i Faaaliga, ou te valaaulia outou ina ia mafaufau loloto i ai e le aunoa, e uiga i lenei fesili autu: E faapefea ona efaalogo ia te Ia? Ou te valaaulia foi outou e uia laasaga e faalogo lelei ai e le aunoa ia te Ia.” Ua ou mafaufau loloto i lenei valaaulia, aemaise i le tulaga o le faama’i pipisi o le KOVITI-19 lea na amata pipisi i le lalolagi atoa e lata i le taimi na faalauiloa ai le vitio ma ona aafiaga.

Sa oo foi ina ou mafaufau o masina ua alu sa avea ma se avanoa faapitoa e faaleleia ai le auala ou te faalogo ai ia te Ia. E toatele tagata ua maliliu nisi o e pele ia i latou i lenei faama’i matautia. Ua suia e le faama’i o tatou olaga ma faatulagaga ma ua tafiesea le tele o faiga masani o lea aso ma lea aso ua tatou masani ai. Ua suia ai nofoaga mo aoaoga, tapuaiga, ma faafiafiaga. Ua faamalosia i tatou ia faia ni mea e ese ai. Ua tatou maua ai, i le S&I, se faamalama e toe suesue ai mea tatou te faia ma le auala tatou te faia ai ma vaai ai pe o finagalo le Alii tatou te faia nisi o suiga. O le a Ia taiala i tatou pe afai o le a tatou faalogo ia te Ia.

E foliga mai o taimi faigata ma taimi o le atuatuvale e tele lava o taimi faapitoa ia o le taitaiga faalelagi ia i latou o loo tatala atu i ai le loto. Mafaufau e uiga i le mea na taitai atu i le Uluai Faaaliga. Sa le o se taimi o se “vevesi ma se fevaevaeaiga itiiti na tupu mai i totonu o tagata”² ma o se taimi o le “faanunununu tele ma le loto leaga.”³ Sa saunoa le Perofeta o Iosefa Samita “sa faaosoina [lona] mafaufau e manatunatu mamafa ma le [le] mautonu tele.”⁴ Sa ia “lagona le faanoanoa i [ana] lava agasala ma mo agasala a le lalolagi.”⁵ O le taimi lea o luitau mo ia lea sa ia alu ai i totonu o le togavao ma na matala mai ai le lagi.

A e a lona taimi i totonu o le Falepuipui o Liperate? O tulaga mo ia lava sa matautia, ma o le mamafa na ia lagonaina ina ua tutuliese le Au Paia mai Misuri a o i ai o ia i le falepuipui masalo sa matua mamafatu lava. Ae, i lena tulaga faigata na tatala ai e le Alii le malamalamaaga o Iosefa.

Ina ua feagai Alema le Matua ma le luitau o le taulimaina o faafitauli i totonu o le Ekalesia lea sa toatele ai tagata na solia agasala, sa “atuatuavale ai [o ia] i lona agaga”⁶ma tomanatu pe faapefea ona taulima na tagata ua solia tulafono a le Atua. Sa “mata’u o ia ne’i fai e ia se mea sese i le silafaga a le Atua,”⁷ o lea sa ia “sasaa atu [ai] lona agaga atoa i le Atua,”⁸ ma sa aoao o ia e le Alii i le auala e taulimaina ai tagata solitulafono.

Iloilo ia tulaga lamatia matuia faatasi ma le anoanoai o e maliliu ma le faafanoga i le Hemisifia i Sisifo lea sa o faatasi ma le faasatauroga o le Faaola. I le lotolotoi ai o le pouliuligia o le pogisa, na latou faalogo uma ma malamalama i le siufofoga o le Faaola.⁹ Mulimuli ane, ina ua faapotopoto tagata i talaane o le malumalu, sa latou faalogo i le siufofoga o le Tama ae sa le’i malamalama i ai seia oo i le taimi lona tolu ina ua latou “tatala atu o latou taliga e faalogo i ai; ma sa faasasaga atu latou mata i le mea na sau ai lea leo.”¹⁰ O le taimi la lena na latou faalogo ai i le Tama ua faailoa mai le Alo ma faalogo atu i le fetalaiga “faalogo ia te ia.”¹¹ O lenei mea na tatala ai mea ofoofogia na tutupu e uiga i le auaunaga a le Faaola i tagata na maua le avanoa e faalogo ai ia te Ia.

I nei faataitaiga taitasi sa i ai se liligi mai o faaaliga lea sa avea ma se faamanuiaga i le Ekalesia ma i le lalolagi—sa mo tagata i lena taimi ma mo tausaga a sau. O tagata na auai sa maua foi nisi o faaaliga patino tele ma faamanuiaga.

I le taimi o le aafiaga o Iosefa i le Vao Paia—e faaopoopo atu i le iloaina e le tatau ona ia auai i se tasi o lotu—sa aoao atu ia te ia le “tele o isi mea.”¹² Sa ta’u atu foi e le Alii ia te ia ua faamagaloina ana agasala.¹³

I le Falepuipui o Liperate sa folafola atu ai ia Iosefa e faapea, “aʼo e loto mamā ma e atamamai, ma e agamalu, ma e amiomama, o le a saili fautuaga, ma le pule, ma faamanuiaga mai lou lima e lē aunoa.”¹⁴

Sa le’i gata na faatonuina Alema le Matua i le auala e taulimaina ai tagata solitulafono ae sa ia maua foi se savali patino tele. Sa ta’u atu ia te ia o le a ia maua le ola e faavavau.¹⁵

O tagata na faalogo i le Faaola a o Ia asiasi atu i le laueleele o Nuumau sa le’i gata na aoaoina e uiga i le mataupu faavae a Keriso ma isi aoaoga taua, ae sa faatagaina patino foi i latou taitoatasi e pa’i atu i manu’a i Lona tino ma avea ma molimau patino o le moni o le Faaola o Iesu Keriso.¹⁶

E le mafai ona tau na ona tatou faamoemoe e maua le taiala ma le musumusuga mo faaiuga i o tatou tofiga ma valaauga, ae ua lava le alofa o le Alii e faaopoopo ai faamanuiaga patino ma musumusuga i taimi o luitau.

E lata i le tausiusiuga o le tusi a Alema tatou te faitau ai e faapea “ona o le umi tele o le taua i le va o sa Nifae ma sa Lamana, sa toatele na faamaaaina, … ae e toatele foi sa faamaluluina ona o o latou puapuaga, sa oo ina latou faalotomaualalaloina i latou lava i luma o le Atua, sa oo lava i le loloto o le lotomaualalo.”¹⁷ A o tatou feagai ai ma nei taimi luitauina e mafai ona faamaluluina ma faamaualaloina ai i tatou lava. O lena mea ua avea ai lenei taimi ma se taimi talafeagai—o se taimi ofoofogia—e faalogo ai ia te Ia.

Ua lava a tatou suiga i nei masina e lua ua alu e fesoasoani ai ia i tatou e iloa ai po o a mea e mafai ona aveese—o mea atonu na lelei ona tautuaina i tatou ae e le taua i le agai i luma ma atonu e faatelegeseina ai lo tatou alualu i luma pe afai tatou te taofimau pea i ai. Atonu o loo tatou i ai i se taimi e mafai ai ona tatou fetuunai ma saunia mo le lumanai faatasi ma ni nai tapu itiiti nai lo tapu atonu na tatou vaaia i le tuanai.

Sa ou tomanatu i nisi taimi pe ai sa valaauina au i le tele o taimi ae “sa ou le fia faalogo.”¹⁸ O le tulaga o loo i ai nei e mafai ona fesoasoani ia i tatou e faatoilaloina lena mea. Ou te lagona o loo i ai so tatou avanoa mo suiga ma sauniuniga “i se ala sa lei iloa lava.”¹⁹

Ou te faamaonia taumafaiga ua faia e ausia ai la tatou sini faamoemoeina e ala i le taulai atu i le auala sili e faamanuia ai olaga o lenei tupulaga faiae i o tatou taimi fesuisuiai. Ua faagaeetia lava a’u ina ua aoaoina e le Alii le Ekalesia e uiga i meaalofa faaleagaga na Ia faamalamalama mai “ua tuuina mai i ni isi e le Agaga Paia ia latou iloa le eseesega o pulega … i le faatatau o ona alofa mutimutivale e tusa ma tulaga o le fanauga a tagata.”²⁰ O tulaga o le fanauga a tagata e sui, ma Na te faatatau Ona alofa mutimutivale e tusa ma na tulaga. Tatou te manaomiaina lenei meaalofa o le iloaina o eseesega o pulega ina ia mafai ai ona tatou fesoasoani e tusa ma tulaga o le fanauga a tagata. O nei tulaga ua suia ma o le a suia lava i le lumanai.

A o tatou aoao ia faalogo lelei ia te Ia ma maua le fesoasoani tatou te manaomiaina e aoao atu ai a tatou tamaiti aoga pele, ou te lagona o le a tatou maua foi ni oa ma le malamalama patino ua avanoa mo i tatou—e pei lava ona maua e Iosefa Samita, Alema, ma tagata o Nuumau. O nei savali patino o le a oo mai ia i tatou pe a tatou lotomaualalo ma lotomatala i le taitaiga a le Alii. Atonu e oo mai faafuasei, e pei ona tupu soo ia i latou o loo taulai atu i isi, ae o ni faamanuiaga mamana tele.

I le taumafanafana talu ai sa pepese faatasi ai le tamaitai pese Nouei o Sissel ma le Aufaipese a le Tapeneko ma le Faaili i le Lotoa o le Malumalu. Sa ia usuina se pese matagofie ua faaulutalaina “Ia Faalemu.”²¹ Sa musuia ma mamana. Ou te valaaulia outou ia saili ma maimoa i ai i luga o le YouTube.com. O le savali e foliga mai e faatatau faapitoa i lenei taimi patino. O nisi nei o upu:

I le lotolotoi o lo’u lē mautonu,
I le taimi e matuā manaomia ai,
Pe a le manino tele lo’u mafaufau,
E oo mai se leo lemū.

Faalemū, faalemū, ia filemu.
Ia filemu ma faatali, i le Agaga o le Alii.
Faalemū ma lagona Lona siufofoga
Ma iloa o Ia o le Atua.

I le taimi o faigata,
Pe a ou lagona le lē mautinoa,
Pe a lofituina a’u
E oo mai se leo lemū e matuā filemu, matuā mamā.

Faalemū, faalemū, ia filemu, lo’u atalii.
Ia filemu ma faatali, i le Agaga o le Alii.
Faalemū ma lagona Lona siufofoga
Ma iloa o Ia o le Atua.

Ia tatou faaaogaina lenei taimi faasolopito. Ia faalemu. Faalogo ia te Ia. Ona agai lea i luma. O le a faia e lenei mea se eseesega mo le autalavou o o latou olaga ia o loo tatou tauivi ina ia faamanuiaina, ma o le a faia ai se eseesega mo i tatou taitoatasi.

Ou te tatalo ia faamanuia e le Alii outou taitoatasi le suafa o Iesu Keriso, amene.