2:3

Talanoaga Faavaega

S&I Faasalalauga o Aoaoga Faaletausaga 2020

9 Iuni, 2020

Brother Jason Willard: E faafeiloai atu, pe o fea lava o e faafofoga mai ai i lenei talanoaga. O a’u o Jason Willard, ma o a’u o se taitai lagolago mo Seminare ma Inisitituti o Mataupu Faalelotu. E fiafia e mafuta ma malo faapitoa nei: Sister Reyna Aburto, Fesoasoani Lua i le Au Peresitene Aoao o le Aualofa: Sister Michelle Craig, Fesoasoani Muamua i le Au Peresitene Aoao o Tamaitai Talavou, Sister Jill Johnson, faletua o lo tatou komesina, Elder Paul V. Johnson; ma Uso Chad Wilkinson ma Bert Whimpey, o ni taitai lagolago o le S&I. Faafetai susū mai i le asō.

O lenei faatofala’iga e talanoa ai ni fesili ua faamoemoe e fesoasoani i tulaga eseese a o tou saili ia manuia ma mamana talavou ma talavou matutua i le lalolagi atoa. Sa matou saili atu i le lagi e tāpena ai mo lenei talanoaga, e talo atu ia tou faia foi lena.

Tatou amata i le fesili muamua. Peisea’i ua atili tele faiaoga, tamaiti a’oga, ma aiga o tauivi ma le popole, atuatuvale, lotoatu, ma isi lu’i o lagona. Se a se mea tatou te faia e fesoasoani atu ai?

Sister Reyna I. Aburto: Ia, ou te manatu o le mea moni tatou temanaomia uma lava se toomaga mai se mea, ae taua le fesoasoani ia malamalama tatou tamaiti a’oga afai o latou tauivi ma o latou lagona, e le’o nutimomoia i latou, pe lē atoatoa foi, o lagona o se vaega o lo tatou natura paia. Ae, a faanoanoa pea, e ao la ona tatou fesili atu mo se fesoasoani. Ou te fautuaina la, mulimuli i le faataitaiga a le Faaola. Na te faia fesili e mafai ai ona faaali atu lagona o tagata. Na Ia faatagaina tagata e faailoa o latou tiga—mo se faataitaiga, ina ua Ia fesili atu ia Maria ma Mareta ina ua maliu Lasalo. Faapea foi le auala i Emau, sa Ia fesili i Ona soo ia mafai ai ona la faaali atu o la popolega ma lo la tiga ona ua leai lo la Faaola. Faapena foi ia Maria le Makatala i le tuugamau ma ina ua Ia fesili i tagata eseese ia mafai ai ona faaali atu o latou lagona.

A tatou fatuina la se siosiomaga e lagona ai e tamaiti a’oga le saogalemu e faaali o latou lagona—e le faapea o le potua’oga, po o le tasi i le isi ae o le saogalemu e ta’u atu o latou lagona pe i se tusi, po o se tagata o le aiga, po o se uo, aemaise i le Tama Faalelagi. E mafai ona tatou faia fesili e mafai ai ona ta’u mai o latou lagona. “O a ni ou popolega i au uo, lou aiga?” “Faapefea ona tatou fesoasoania’i?”

Ua ou maitauina a tatou fesili i tagata mo manatu po o faaaliga po o uunaiga i auala e fesoasoani ai i isi, latou te maua uunaiga pe a tatalo, ma latou o atu ma fesoasoani. A tatou fatua la se siomaga e le lagona ai se faamasinoina, o le a tatou fesoasoani i lea itu, ma malamalama e leai ni tali sese, e tau ina faia fesili tatala latou te lagona ai le sa’oloto e ta’u mai o latou lagona. Aemaise pe a tauivi ma se mea, latou te le tau taulimaina na o i latou, lea e mafai ona latou aapa atu i le Tama Faalelagi, i lo tatou Faaola, ma isi. Ma po o le a lava, se mea e tupu i o latou olaga, o i tatou o fanau a le Atua, ma e mafai ona tatou liliu atu i lo tatou Tama Faalelagi. O i tatou uma o uso ma tuafafine tatou te sulu atu i le tasi ma le isi. O i tatou uma o soo o Keriso, ma e mafai ona tatou liliu atu ia te Ia.

Brother Bert Whimpey: Faafetai ia Elder Holland—manatua, Oketopa 2013 i lana saunoaga i le konafesi. Sa ia ta’ua ana lava tauiviga i se tasi taimi ma le lotoātu. Ona ia fai mai lea: “E le tatau ona toe mā e faailoa [o tatou faafitauli faalesoifua maloloina faalemafaufau] nai lo le faailoa atu o se tauiviga ma le toto maualuga po o le iloa faafuasei o se tuma matuia.”¹ Sa ia fai mai e le afaina le talanoa i ai, ma le faasoa atu o na mea. Ou te faafetai lava i mea e tolu na ia faasoa maia: “Aua ne’i mou lou faatuatua i lou Tama i le Lagi. … Saili fautuaga mai ē umia ki mo lou manuia faaleagaga,” ma a talafeagai, “saili le fautuaga mai tagata tomai o i ai ni aoaoga faamaoniaina, tomai faalematata, ma ni tulaga faatauaina lelei.”²

E le gata e taua mo tatou tamaiti a’oga ae faapea foi tatou faiaoga ia iloa e lelei le ta’u mai o na mea ma talanoa ai ia maua ai le fesoasoani moomia. Se mea matagofie foi i la tatou galuega le mafai ona talanoa ma se sui o le HR e iloa ai pe o a penefiti ma mea e ō i ai e maua ai le fesoasoani, ma e manaia foi le uepisaite a le Ekalesia mo punaoa.

Brother Jason Willard: Uso Whimpey, faafetai. O le isi fesili e mo tatou autalavou ma talavou matutua, e faapefea ona tatou fesoasoani ia latou iloa le taua o le Ekalesia i o latou olaga, aisea latou te moomia ai le Ekalesia, ae moomia foi i se a e le Ekalesia i latou.

Sister Michelle Craig: O se fesili taua tele lenei, ma ou te talitonu e ao ona lagona e tatou talavou ma talavou matutua o lo latou auai i Le Ekalesia a Iesu Keriso o le Au Paia o Aso e Gata Ai ua le na o se lisi o tulafono po o pusa e maka. E sili atu i lo se kalapu faaagafesootai. E ao ona latou iloa o le fatu o le talalelei a Iesu Keriso o le alofa. Alofa i le Atua, ma le alofa i isi. I le aoao ma ola i le talalelei, latou te iloa moni ai lo latou faasinomaga ma lo latou faamoemoega.

Ua tali atu o tatou talavou i nei aso i mataupu faavae pei o le alolofa i isi, aapa atu i ē faatauvaa i nuu. Latou te mananao i se tiute, e fai se eseesega i le lalolagi. Faamoemoe ia latou malamalama a latou faamaoni, i totonu o le mamanu o le faatulagaga o le Ekalesia, o le a tele o latou avanoa e faia ai se eseesega mo le lelei i le lalolagi nai lo se isi faapotopotoga.

O se tasi o mea ou te fiafia ai ia Peresitene Nelson ma le itu o agai i ai le Ekalesia o le, i ai o se faamamafa i le autalavou ma talavou nofofua matutua, nai lo se isi lava taimi muamua. E tatau ona tatou faatali o ni tagata matutua, ae tuu i o tatou talavou ia avanoa e ta’ita’i, e fuafuaina, e saili faaaliga ma faatinoina. E ao na tatou faaaloalogia lo latou atamai, ma aoao i lesona latou te a’oa’o mai. Tatou te moomia i latou, e lē ina faatoatele ai le numera, ae ona ua matua moomia e le lalolagi mea latou te ofoina atu. Ma ua i le Ekalesia le mamanu e maua ai auala e taulima ai na manaoga taitasi tagata i le taimi. E faamoemoe o mea uma o a’oa’o e o tatou talavou ma talavou nofofua matutua i le fale, i le lotu, seminare ma inisitituti o le a musuia ai e faaaoga o latou loto ma lima e aapa atu ai ma alolofa i isi ma tautua ē latou te fesootai. Aua o le taunuuga masani lena o le alofa mo Iesu Keriso ma isi.

Ou te iloa o mea uma e faatatau ia Iesu Keriso. O mea uma tatou te fai ma aoao atu o ni faiaoga ma ē fiafia e fegalegaleai ma le autalavou ma talavou matutua ma tamaiti, e ao na faamalosia ai molimau i le olaga, misiona, ma le Togiola a Iesu Keriso. Ma o le mea tonu lava lena. Ou te manatu a tatou faia lena, e faamoemoe latou te iloa ai o le talalelei lenei a Iesu Keriso, o Lana talalelei lenei, ma e maoae faamanuiaga o le avea ma ni ō le talalelei ma e manaomia i tatou uma e faataunuu le galuega. E Moni o Lana Galuega.

Brother Jason Willard: Matagofie tele. Fa’afetai lava. Uso Wilkinson, le a le mea sa e manao e faaopoopo?

Brother Chad Wilkinson: Leai se isi mea e sili nai lo mea faatoa saunoa i ai Sister Craig. Sa tau lo’u mafaufau a o saunoa o ia, e uiga i a’u vasega inisitituti sa iai, o le tele lava o faifeautalai ua maea misiona. Sa latou talanoa i se tasi o faigata sili o le fetuuna’i i le foi mai i le aiga aua sa latou taulai mo le 18 masina po o le lua tausaga i se isi tagata ae lea ua oo mai le fale o mea uma lava ua foliga mai e faatatau ia i latou. I totonu o le talalelei ma i potua’oga e mafai ona tatou faia valaaulia latou te mafaufau i ai, pe saili ai ni auala e fai ai na mea ma aapa atu ai i isi.

Brother Willard: Sister Johnson, sau faaopoopo?

Sister Jill Johnson: A’o mafaufau i lea fesili sa ou mafaufau i le mana o feagaiga e na o se ekalesia e i ai le pule ma le mana o le Atua tatou te maua ai. I le lalolagi i nei onapo, i le tele o mea o uuna’ia ai ma tosoese ai i latou mai le Ekalesia, ia toefaafesootai i latou i le mana i le tausia o feagaiga. Tatou te lagona i lenei lalolagi e tuuatoatasi i tatou ma leai se mana e faatoilalo ai mea tatou te pauu ai; o tofotofoga, ma faaosoosoga. Ae o feagaiga e na o Le Ekalesia a Iesu Keriso o le Au Paia o Aso e Gata Ai e maua ai, ma i nofoaga paia, e tele naua le mana nai lo na malosiaga. Ou te manatu o se mea lena e mafai ona avatu e le Ekalesia. Mafai foi ona tatou faailoa atu i tamaiti a’oga ma molimau ai, ma faaali atu i ai i o tatou lava olaga, e tele atu mea i le Ekalesia nai lo le na o le faia o mea lelei. E i ai le mana i feagaiga.

Brother Whimpey: Sister Johnson, faafetai mo lena manatu. I matou talanoaga ma talavou matutua sa fai mai ai: “E mafai ona ou latalata i le Tama Faalelagi e aunoa ma le alu i le lotu.” Ma sa’u fai atu, “Te ioe i ai. Ae o la’u sini e le na o le latalata i le Tama Faalelagi; ou te manao ia pei o le Tama Faalelagi. O la’u sini ia faaeaina.” Ma e ao na tatou fesoasoani i a tatou autalavou ma talavou matutua ia manatua le faamoemoega o le olaga o le avea faapei o lo latou Tama Faalelagi O le Ekalesia latou te maua ai ki o le perisitua ma sauniga ma feagaiga pei ona saunoa ai Sister Johnson. O le malo o le Atua i le lalolagi, ma o le a latou maua se mea iinei e fesoasoani latou te avea ai faapei o le Tama Faalelagi ma e latou te le maua i se isi nofoaga po o se isi ala.

Brother Willard: E moni lava. E le na o le avea ma se vaega o le galuega, ae—na ta’ua i le konafesi aoao talu ai—ia avea o se vaega o le “galuega a Keriso.” O le mea lena e aumaia e a tatou feagaiga. Faafetai tele lava. O a ni mea iti faatauvaa tatou te fai e faatele ai lo tatou mana e faamanuia o tatou tamaiti a’oga, aoao atu ma le mana tele, ma i ai aoaoga maofa moni?

Brother Wilkinson: Ou te fiafia i lena fesili. Ua tele mea ua tatou talanoaina, ma aoao atu e uiga i tomai ma metotia ma mea eseese, ma e taua uma. Ae pei a tatou tofia se tasi e faiaoga iai tatou—lona uiga o le Agaga Paia o le faiaoga—a tatou tofia le Agaga Paia e fai ma tatou faiaoga, ma valaaulia o ia i o tatou potua’oga, o le a i ai lena mana ma lena aoao atu maofa.

Na aoao a’u e Elder Johnson i se tasi aso, atonu e le mafai e Satani ona maua ni tagata faigaluega se toatele o le S&I po o ni ē mulilua pe soli le Upu o le Poto pe faia se mea leaga tele pe matuia. Ae mafai na ia faia mea iti e aveese ai lo tatou mana. E mafai ona ia valaaulia i tatou e faitio pe nofo i se laulau e fai ai tala leaga o se isi pe ulagia se tamaitiiti a’oga pe talie i ai, po o mea iti a tatou taliaina ua tatou le maua le Agaga Paia, po ua le mafai ona mafutaina i tatou e le Agaga Paia i le tulaga e tatau ona i ai o Ia.

O lea ou te mafaufau ia Akana i le Feagaiga Tuai, na poloaiina ina ua latou ō e tau ma Ieriko, e aua ne’i avea se mea ua fetuuina—leai ni oloa, leai ni ‘oa—mai Ieriko. Sa ave e Akana, ae leai se tasi na iloa. I le isi taua sa tatau ona latou manumalo i le aai o Ai, ae sa latou faia’ina, e 36 tamaloloa na maliliu.

E i ai se mataupu faavae iina e taua mea tatou te faia. O mea iti tatou te fai atu, pe faitio pe muimui po o a lava mea e oo mai e ono tosina ai le mana o le Agaga Paia ia uunaia malosi ai o tatou olaga—e taua. E alu ai le malosiaga uma. O se mea e taua. Ou te valaaulia ia tatou faia na mea iti. Nofouta i mea iti faigofie e valaaulia ai le Agaga Paia pe fesoasoani tatou te maua ai, i le gafatia sili, le tosinaga a le Faiaoga.

Brother Willard: Uso Whimpey, sou finagalo?

Brother Whimpey: A tatou taulai i le Faaola, o o’u mafaufauga na a o nofo ma mafaufau i a’u tamaiti a’oga, ma a’u lesona, ou te taula’i moni lava ia Keriso. Ou te mana’o ia iloa e a’u tamaiti Ona uiga paia. E amata la iina pe a ou taulai i le Faaola.

O le mea lona lua o lo’u taulai moni i a’u tamaiti. Faafetaia Elder Bednar—afai tou te manatua, i se Soloa’iga o le Faa’oaina Faaletaitai, sa ia ta’ua ai sona aafiaga ma lona atalii; na manao lona atalii i se fesoasoani ia iloa le mea e fuafua mo se gaoioiga a Ositaulaga ma Lora. Ona faitau lea i ai e Elder Bednar o le Iakopo 1:5: “Aua ona o le faatuatua ma le popole tele, o lea na faaali moni mai ai ia te i matou, e uiga i o matou tagata, mea o le a tutupu ia te i latou.” A tou manatua le tala, e tele ni taimi na i’u ai ina iloa e le atalii o Elder Bednar sa fai atu Elder Bednar, “O le a le mea e ao ona tupu? A o le’i e fuafuaina se gaoioiga, mafaufau muamua po o le a se aafiaga e moomia e tatou tamaiti.” Taulimaina mai le “O a mea e moomia ona iloa e se tamaiti?” i la tatou tapenaga?

Ona manatu lea o le mea lona tolu, pei ona ta’ua e Uso Wilkinson, ia manatu i le faatagaina o le Agaga Paia e fai Lana matafaioi a o tatou i ai i le potua’oga. E taua tele. Ou te manatu o le tusitaulima o le Aoao Atu ma le Aoao Mai o le Talalelei, vaega 2.1, e ao ona matua iloilo, a o tatou manatu i le matafaioi ma le galuega al e Agaga Paia. Tau foi ina malamalama iai ma o le tuu o le Agaga Paia e faatino Lana matafaioi ma le galuega i le potua’oga, e matua taua tele.

Sister Craig: Na o si mea faigofie na ou maua, afai ou te faiaoga ma lagona e le o iai le Agaga iina, afai ou te molimau atu ma le faamaoni ia Iesu Keriso ma le Tama Faalelagi, e afio mai le Agaga Paia. O le misiona lena a le Agaga Paia o le molimauina o le paia o Iesu Keriso ma le Tama Faalelagi. O lea a ou molimau atu, se molimau faigofie, o le a afio mai le Agaga.

Brother Willard: Sa tatou talanoa e uiga i le aoao atu ma le mamana tele, e taulai atili ai ia Keriso. Ae a tatou saili ia atili taulai i ē aoaoina, o a mea e mafai ona fai e faiaoga ia atili talafeagai ma patino a latou tapenaga i tamaiti?

Sister Johnson: Ia, ina ua ou faatoa faitau i lea fesili, sa’u mafaufau o le a lona uiga o le auauna atu i tamaiti ta’itoatasi? Po o le uiga o le iloa faapitoa o i latou? Pe mafai na tatou iloa patino i latou? Faaalu taimi ma i latou ia tatou iloa lelei ai i latou? Ona ou mafaufau lea o le a ese lea fesili mo se faiaoga e i Orem e silia ma le 100 tamaiti e faiaoga ai. O le taumafai e aafia patino i olaga o na tamaiti uma o le a avea ma se galuega fita e faatusatusa i se faiaoga i Frankfurt, Siamani, e to’aono lana vasega tou te o faatasi i le lotu ma tou te felata’i, ma nisi o aiga. Ou te manatu e faalotovaivaia le avea o se faiaoga, o lou tiute o le faaaofia patino faapena ma tamaiti taitasi, pei o le asiasi i aiga ma auai ia latou gaoioiga. E tele na’ua latou gaoioiga, ma e te lofituina ai.

O nai a’u aitia la ia e fua iai manaoga. Sa’u manatu, e ao ona tatou fesili. E ao ona tatou fesili i tamaiti po o a o latou manaoga. Tatou fesili i isi faiaoga, i mea sa latou mataua i tamaiti e tupulaga faatasi ma vaitausaga ma aganuu, ona o lenei Ekalesia ua i ai i le lalolagi atoa mae tele eseesega i aganuu. Ae sili ona taua, fesili i lo tatou Tama i le Lagi ma faalagolago i le Agaga ma o tatou folafolaga, ma a tatou faia mea uma tatou te mafai, o le a manuia i tatou i musumusuga e ao ona tatou iloa na tamaiti ma iloa mea e tatau ona tatou aoao ai i latou. I se lalolagi lavelave ma luitau fou uma o le autalavou, e sili ona taua lo tatou maua o le taitaiga mai lo tatou Tama Faalelagi e aoao ai i latou.

Sister Aburto: Te manatu a tatou fefautuai ma iloa i latou, o le a sili ona latou iloa i latou. E taua foi le matau o i latou, ma faalogologo ia faailo, pe vaai faailo latou te aumai. O o latou manatu, po o le leai foi o ni manatu, po o a latou fesili tatou te iloa lelei ai i latou. Pe tuu foi i latou e fesili mai ae le ta’ua le igoa. O nisi taimi latou te saoloto ai e ta’u mai mea o i o latou loto pe a tatou le iloa o latou igoa. Ia mautinoa foi ia faafesootai mataupu faavae ma aoaoga faavae o loo tatou aoaoina i mea o loo tutupu i o latou olaga ile taimi nei—ae le o le lumanai, o le taimi nei—ina ia latou vaaia i latou i mau, ma vaaia i latou i le faapotopotoina o Isaraelu, ina ia latou vaaia i latou i le galuega o le faaolataga ma le faaeaga. Ma mafai foiu ona latou toe tepa i tua i o latou olaga ma iloa ai taimi na faamanuia ai e le Alii i latou, ia latou manatua ai i latou lava, ma e sauni pea o Ia e faamanuia i latou. Fesoasoani ia latou iloa le taua. Ina ia faia, e ao ona e iloa mea o tutupu i o latou olaga

Brother Wilkinson: Ou te manatu e maeu le matagofie o na manatu. O le aso muamua o le vasega na i ai tamaiti sa tusi mai ia te au. Ou te le manao latou te ta’u maia a latou agasala po o ni mea faapena, ae e uiga ia i latou lava. Se a se mea e ao ona ou iloa e uiga ia oe, ia sili ai lo’u auauna ia oe o sau faiaoga i lenei semesa po o lenei tausaga? Ta’u mai lou aiga, lau galuega, ma pe o a gaoioiga o e aofia ai. Le a le mea o e faamoemoeina mai le vasega Pe fai mai foi, “O loo ou tauivi ma lo’u faatuatua,” pe “O loo i ai se mea o ma tauivi.” Ona ou pueina lea o ata o tamaiti taitasi ma faapine i lena pepa. A ou faitaua lena tusi, ua ou iloa lena tamaitiiti, ma ou manatua pea a o fai a’u tapenaga. O nisi na o ala patino e oo atu ai i mea ua aoao mai e Sister Johnson ma Sister Aburto.

Brother Willard: O le isi tatou fesili e mo tatou faiaoga ia fesoasoani atu. E faapefea ona tatou faapalenia lea tiute e aoao manino atu ai ma le faamaoni le aoaoga faavae a o uunaia tamaiti mai tulaga eseese, ma aganuu eseese e faasoa mai ma le talafeagai o latou manatu ma lagona? O le a sau tala i se faiaoga o loo taumafai ia lagona e tamaiti o i ai so latou leo i le vasega, e mafai ona latou tautatala, faasoa o latou manatu ma lagona e ono ese mai mea o fai i le vasega ae aoao atu pea le mataupu faavae?

Brother Whimpey: O se paleni faigata lena i nisi taimi i le potua’oga. E tatau ona tatou manatua o lo tatou tiute o le aoao atu o upumoni, ae le o manatu. E ao ona iloa e tamaiti a o mai i le vasega, o le a latou faalogo i upumoni. O le ala lea e ao ai ona tatou taulai atu i tusitusiga paia ma upu a perofeta, a o mai tamaiti, o iina tatou te i ai, o iina foi tatou te maua ai tatou tali. Ia manatua foi le sini, o lo tatou faamoemoega foi lea o le fesoasoani i le autalavou ma talavou matutua ia malamalama ma faalagolago i aoaoga ma le Togiola a Iesu Keriso. E ao ona ou fesoasoani ia malamalama a’u tamaiti.

Ae ou te manatu foi ia tatou manatua e i ai le tiute o tamaiti. I le Mataupu Faavae ma Feagaiga 50: tatou te tala’i atu le upumoni, ae ao foi i tamaiti ona maua le upumoni. E ao ona latou talitonu pe a o mai i le vasega. A mafai la ona avea tatou vasega e pei o se fale suesue, e o mai i ai tamaiti, ma lagonaina o le a aoaoina i lea siosiomaga le upumoni, ona lagona foi lea o le saogalemu e faasoa mai latou fesili poo aafiaga po o popolega. Ae o ni faiaoga, ua tatou i ai moni iina e fesoasoani i tatou tamaiti ia iloa a’oa’o—a’oa’o ia lagona le Agaga, iloa aoao mo i latou lava, i lena siomaga, e faasoa mai o latou mafaufauga. Atonu e tau atu ai i la tatou talanoaga, tau atu ai i mau, ma i upu a perofeta e fesoasoani ai ia tatou iloa le upumoni, ae la na o se manatu, po o mea o ta’ua nei e le lalolagi.

Ae tatou taulai atu i le mea e moni. Mafaufau i le mamanu mo le mauaina o le poto faaleagaga. A mafai ona tatou taulai atu i lena mamanu ma fesoasoani ia tatou tamaiti e aoao le ala e faatino ai le faatuatua ma maua se vaaiga faavavau, ma vaai i puna ua tofia mai le lagi e maua ai latou tali, a o mai la i le vasega, o le pogai lena ua latou i ai iina, ia aoao le upumoni, ia pei ai o lo latou Tama Faalelagi.

Sa faasoa mai e se faatonu eria se aafiaga. Sa nofo o ia i se potua’oga, ma sa faamatala e se talavou matua se manatu e le ogatusa ma aoaoga a le Ekalesia. Ona tali atu lea o le faiaoga faapea: “E faapefea e lau lava molimau ma le malamalama i le ata o le faaolataga ona faailoa lou manatu? Amata mai se tulaga o le faatuatua, mai mea ua e iloa, ma e lagona, tatou talanoa iai mai lena vaaiga.” Ona fai mai lea, sa ia vaaia lea talavou matua ua maua se faaaliga i lea lava taimi ao la taumafai e faatino i le faatuatua ma vaai i ai i se vaaiga faavavau. Sa la talanoa i mea sa la iloa, o mea la te lei iloa lava, ma pe aisea na taumafai ai pea ia iloa. La te lei maua uma tali, ae i lena siomaga, afai na la o mai faatasi ia iloa le upumoni, tatou vaai la i lena faatinoga o le faatuatua ma le talitonu, mai mea na la iloa.

E mafai la faapefea ona ou fesoasoani ia e aoao le ala e te aoao ai ma le ala e maua ai tali a o e agai i luma i lena gafatia? O nisi taimi e tatau ona tatou faaeteete, a tatou le tuu i mataupu ma aoaoga faavae o le talalelei e suia i tatou, tatou te taumafai e suia mataupu ma aoaoga faavae o le talalelei ia fetaui ma o tatou tulaga. Afai e mafai ona tatou fai atu, “Tama Faalelagi, ou te fia pei o oe. Fesoasoani mai ia ou iloa le auala e fesoasoani ai aoaoga faavae ma mataupu faavae o le talalelei ia te au i lena agaga o le, “E iai a’u fesili ma popolega, ae ou te fia iloa lava le upumoni.” I le avea ai ma faiaoga tatou te fatuina le ituaiga o siomaga i le ala tatou te tali atu ai. Ae o le fesoasoani i tatou tamaiti e o i mau ma perofeta e aoao ai upumoni ma fesoasoani ai a o latou tauivi, ia iloa le mea moni. Ou te fai atu foi, aua le faatauvaaina le mana o le molimau ma le tautinoga. “O fofoga o molimau e toalua pe toatolu e faamautu ai upumoni uma.”³ I mau, o upu a perofeta ma a latou lava molimau e uiga i mea e moni. A molimau mai la lena agaga, o le a fuafuaina e o tatou talavou, ma latou iloa ai le ala e aoao ai mo i latou ma latou iloa ai le upumoni mo i latou lava.

Brother Willard: Ou te fiafia i le tali a Nifae, “Ua ou iloa e alofa o ia i ana fanau; e ui i lea, ou te le iloa le uiga o mea uma.”⁴ Sa molimau mai Nifae i mea sa ia iloa, ma o se faamanuiaga mo i tatou uma.

Brother Wilkinson: O se tasi o manatu na oo mai o le fafine lea na molia i le mulilua ma le faataitaiga a le Faaola. E le’i ‘alo o Ia mai le a’oa’o atu o le upumoni. Sa Ia a’oa’o ia te ia le aoaoga faavae sa le’i taliaina. Ae na Ia faia i se ala e puipuia ai o ia, o se nofoaga saogalemu e maua ai sona iloa.

Sister Johnson: Sa’u mafaufau foi faapena, afai e lagona atili e tamaiti lena alofa o le Faaola ma le mana o le Togiola o se malosiaga sili atu nai lo le tatou aoao atu o poloaiga ma taunuuga o le le usitaia. Afai o le lagona lea latou te aveina mai le vasega, o le lesona e iai se tasi e alofa tele ia i latou, e iai foi se ala e maua ai le mana o le Togiola, ma a tatou faia mea sese—ma e tupu i tagata uma—e iai foi mea tatou te moomia ai le Togiola. Ma o le itu lelei o nei mea uma e avea ma mea e alu ma le tamaitiiti. Ua iai so latou faamoemoe. E matua moomia i lenei lalolagi.

Brother Willard: Faafetai mo finagalo. O le toe fesili e faiā foi iai. Tatou te fesoasoani faapefea ia lagona e talavou o iloa i latou, ma e taua foi a latou fesili? Sister Craig, le a sou sao?

Sister Craig: E iai se mau i le Mareko tou te masani uma ai. Sa fesili se mauoa i le Faaola, po o le a se mea na te fai ia maua ai le ola faavavau. Sa lau iai e le Faaola poloaiga na ia usitaia. A’o le’i ta’u atua i lenei alii talavou e fai se mea matua’i faigata lava—ma o tatou uma e iai mea faigata—Ou te fiafia i le fuaiupu 21: “Ua silasila atu Iesu ia te ia, ua alofa ia te ia.”⁵ O le mea sili tatou te faia i a tatou fegalegaleaiga uma ma le autalavou o le faia ia latou lagona le alofaina. Ou te iloa e le faigofie pea, o nisi taimi e tele taumafaiga ma tatalo tatou te faia ia vaai ai e pei ona silasila mai iai le Faaola.

O se isi mea ua ou mafaufau iai, e ao ona tatou faaaogaina le mana o fesili. Lea sa ta’ua soo i le asō, ae moomia le aoao ia matua ofi i o tatou tamaiti aoga ma i latou tatou te aoaoina ma fai fesili lelei—fesili tatou te mafai ai ona fua o latou lagona ma le mea o iai, ona uuna’i lea e fai a latou fesili moni, e le o fesili latou te lagona tatou te manao latou te fai mai. O fesili ia e le logomalie i nisi taimi ma e le faigofie tali, ae e le afaina. E le mafai ona faapasi aua, o nei fesili faigata e iloa ai mea latou te mananao ai. Tatou te le mananao foi e tau na ona latou faalolololo. Tatou te mananao ia latou fesili mai. O la tatou galuega o le taita’i o i latou i puna talafeagai, ae sili ona taua, o le Alii, ia maua ma faatino faaaliga patino. E ao ona tatou faia lea lava mea a o fatuina siomaga o le faatuatuaina latou te lagona ai le saogalemu e ta’u mai o latou talitonuga ma masalosaloga i nisi taimi. Pe a tatou fatuina nei siomaga o le saogalemu ma a faaaloalogia i latou, lo latou atamai, gafatia, mea latou te aoao mai ia i tatou, mea latou te ofo maia, a tatou tuu atu ia i latou avanoa e tali atu ai i se valaau a se perofeta ma Iesu Keriso ma auai i le galuega o le faaolataga ma le faaeaga, o le lagona o le vaaia, lagonaina ma le manaomiaina o se taunuuga masani.

Sister Aburto: E ao foi ona tatou nofouta i tamaiti a’oga e eseese tulaga i o latou olaga ma aiga. E ao ona latou lagonaina lo latou aofia ai, o i latou o se vaega o lenei Ekalesia ma lenei tino o Keriso, ua tatou iai uma. E ao foi ona tatou faaeteete i upu tatou te lafo. Faataitaiga, e iai tamaiti atonu e le o nonofo ma matua, tau ina tatou fai atu, “lou aiga” po o le “tagata e te alofa iai” nai lo le fai atu “matua.” O le agavaivai foi e fesoasoani latou te iloa ai o loo tatou tauivi uma lava ma se mea, e tofu uma foi tatou ma vaivaiga. O le lagonaina e tamaiti o i latou o se vaega o lenei malaga o loo tatou iai faatasi, e leai se tasi e atoatoa, latou te iloa ai e taua i latou. Ma le, faalogo atu ia i latou, faalogo i o latou manatu, faalogo ia latou fesili. Afai latou te fesili, e ao na tuu tatou mea o fai ae taumafai e fesoasoani iai e su’e e i latou lava tali—e le faapea e avatu iai le tali, ae su’e e i latou lava tali i tusitusiga paia e ala i tatalo, ma upu a perofeta soifua.

Sister Johnson: Tau ina ou fai atu o le vailia o nei fesili na ou toe manatua ai faiaoga sa iai i lo’u olaga ma lo latou taua tele i lo’u lava olaga—e maeu lava. Sa ou matua faafetai i nai aso talu ai mo lea mea, e mafaufau ai i o’u faiaoga, lo latou alolofa, ma le tuuto i le Faaola, se aafiaga inā tele. Sa ou lagonaina lo’u taua tele ma le fitoitonu ona o i latou ma lo latou alolofa i le Faaola ma a’u. E faavavau lo’u faafetai mo faiaoga lelei uma o i lenei Ekalesia. O se aafiaga matagofie le toe tomanatu i mea lelei.

Brother Willard: Pe a mafaufau i ai, o le faataitaiga a se faiaoga maoae e leotele atu. E tele atu a latou tala nai lo lenei talanoaga mo le faavavau i le aoao atu. Na pau le mea o le mafaufau i se faiaoga ua faamanuiaina lou olaga, mafaufau i se tagata na aapa atu ma auauna atu ia oe i se ala e manuia ai lou olaga. Ou te iloa o le a avea o se lauga e umi atu se taimi e tautala ai nai lo le tatou taimi i le asō. E faafetai ai mo lena faamanatu.

A o tatou faaiu faatasi i le asō, se’i tau ina ou faafetai atu i sui taitasi o i lenei aufaitofa mo le aoaoina o i tatou i la tatou talanoaga. sili ona taua, o a outou faataitaiga i le soifua ai faapei o Keriso. O outou o soo o Iesu Keriso, ma o se faamanuiaga lo tatou mafuta ma a’oa’o mai ia te outou taitoatasi. I la tatou aofia o faafofoga mai i le lalolagi atoa, e fai ma sui o le ‘aufaitofa, matou te alolofa ia te outou. Faafetai atu i le tele o auala o outou sailia e faamanuia ai fanau a le Atua. Ou te molimau atu o loo soifua o Ia; o Lana galuega lenei. Ou te tatalo ia liligi ifo Ana faamanuiaga silisili i o tou soifuaga taitasi, pe o fea lava e te i ai, i le suafa o Iesu Keriso, amene.