Maningkamut nga Mamahimong
2020 nga Tinuig nga Sibya sa Pagbansay sa S&I
Martes, Hunyo 9, 2020
Elder Ulisses Soares: Minahal nga kaigsoonan, bisan asa man kamo, kini usa ka tinuod nga dungog para sa akong asawa ug kanako nga ikauban kamo karong adlawa. Akong gidala ang mga pagtimbaya ug gugma gikan sa Unang Kapangulohan ug sa Korum sa Napulog Duha ka mga Apostoles para ninyong tanan. Si Presidente Nelson personal nga nagpadala sa iyang labing maayong panghinaut para ninyo. Kanunay siyang naghangyo kanamo nga ipaambit ang iyang labing maayong pagbati ug gugma niadtong among mahimamat. Siya tinuoray nga nakadayeg sa inyong pagserbisyo alang sa mga anak sa Dios.
Minahal kong mga kauban, sa dili pa kita mopadayon, gusto kong mopahayag sa akong personal ug lawom nga pasalamat sa inyong talagsaong pagserbisyo sa seminaries ug institutes. Kamo adunay kahigayunan sa pagtudlo ug pagtabang sa nagtubo nga henerasyon nga maglakaw sa mga tunob sa Manluluwas paingon sa kahangturan. Kamo nagtudlo sa pipila sa labing halangdon nga mga espiritu sa Dios, kinsa gitagana nga moanhi sa yuta atol niining kasamtangang hugna sa kasaysayan. Ang atong minahal nga propeta, si Presidente Nelson, nagtawag niining halangdong mga espiritu isip ang labing nindot nga kuponan sa Dios, Ang Iyang labing maayong mga magdudula, ang mga bayani, nga makaapil niining katupusang, dakong panagpundok—ang pagpundok sa Israel.1 Kining bantugan nga kuponan makahimo sa imposible ug makatabang sa pag-umol sa padulngan sa tibuok tawhanong pamilya.2
Ang akong minahal nga asawa, si Rosana, nag-uban nako niining espesyal nga miting karon. Siya mao ang nahimong kahayag sa akong kinabuhi sa katapusang 39 ka tuig. Tungod sa iyang buotan ug talagsaong ehemplo, siya ang pwersa sa among pamilya sa pagtabang sa matag usa kanamo nga mahimong mas Kristohanon. Si Rosana ug ako ang tigdawat sa mga panalangin nga miabut sa among kinabuhi gikan sa pagsunod sa pagtulun-an nga nadawat sa among pagkabatan-on gikan sa mapahinunguron nga mga magtutudlo sa seminary ug institute. Ang ilang matinud-anong serbisyo adunay dako kaayo nga epekto sa among kinabuhi samtang kami nagsugod sa ebanghelyo ni Jesukristo. Kining mapahinunguron nga mga magtutudlo mitabang sa pag-umol sa among kinabuhi sumala sa mga kamatuoran sa ebanghelyo ni Jesukristo ug migiya kanamo samtang naningkamot kami sa pagsubay sa dalan balik sa atong Langitnong Amahan. Gusto kong dapiton ang akong minahal sa pagpaambit sa iyang pagbati kon giunsa siya sa pagpanalangin sa seminary ug institute isip bag-ong kinabig sa Simbahan ug sa iyang paningkamot nga magpalambo og Kristohanong mga hiyas. Pwede ba nimong ipaambit imong hunahuna karon, pinangga?
Sister Rosana Soares: Salamat, akong pinangga, sa pagdapit nako sa pagpaambit sa akong pagpamatuod.
Sa unang higayon nakadungog ko mahitungod sa Simbahan, mga nuwebe anyos ko. Ug sulod sa walo ka tuig nangayo ko sa akong amahan og pagtugot nga mabunyagan, ug siya kanunayng moingon nga dili. Miingon siya nga bata pa kaayo ko aron mohimo og ingon ka importanting desisyon ug kinahanglan nakong pamatud-an ngadto niya nga mao gyud kini ang akong gusto.
Bisan og dili ko sakop sa Simbahan akong gikompleto ang upat ka tuig sa inadlaw nga seminary. Ang klase sa seminary gitudlo diha sa chapel sa alas 6:00 sa buntag kadaadlaw. Ang akong amahan motugot lang nako sa pag-adto sa kondisyon nga ang magtutudlo mohapit nako. Maayo nalang, aduna koy maayo kaayo nga magtutudlo kinsa mohapit kada adlaw sa alas 5:30 sa buntag aron mopasakay kanako. Ang akong amahan mopukaw nako kada adlaw sa alas 5:00 sa buntag, ug mag-ilis ko ug magpaabut sa magtutudlo. Kanunay gyud kong duka kaayo ug moingon sa akong kaugalingon, “Palihug ayaw’g anhi. Palihug ayaw’g anhi,” apan kanunay siyang miabut. Malipayon kaayo, kanunay siyang miabut.
Mibati ko nga napanalanginan kaayo ug mapasalamaton tungod sa akong kugihan nga magtutudlo sa seminary, nga unta dali ra nga napul-an nako. Apan wala niya buhata.
Katloan ka tuig ang milabay, ako adunay oportunidad sa pagtudlo og seminary ngadto sa akong anak nga babaye sulod sa usa ka panahon diha sa panimalay. Siya dili makatambong sa seminary didto sa chapel nianang tuiga tungod sa iyang iskedyul sa eskwelahan. Usa siya ka babaye nga lihok kaayo ug dili ganahan nga maglingkod sulod sa 45 minutos, ilabi na uban nako isip iyang magtutudlo. Busa mihukom ko sa pagpangandam og lahi nga mga klase ug gitratar ang akong anak isip ang labing maayong estudyante sa seminary, bisan og siya lang ang estudyante. Sa katapusan niana nga tuig siya malipayon, siya mibati sa gugma sa atong Langitnong Amahan alang kaniya, ug nabati usab kini nako.
Mga kaigsoonan, sama sa akong anak, ako nakahibalo nga ang pulong sa Dios makapahimo sa tanang kalainan sa atong hunahuna, diha sa atong kinaiya,ug diha sa paagi sa atong pagtan-aw sa atong kaugalingon ug sa uban.
Gusto kong motapos uban sa usa ka matahum nga kinutlo gikan ni Presidente Henry B. Eyring:
“Kamong talagsaon nga mga magtutudlo nakahimo na og talagsaong paningkamot ug sakripisyo sa inyong pagpangandam sa pagtudlo sa pulong, sa inyong pagtudlo,ug sa pag-amuma alang sa mga estudyante. … Kamo karon makadugang sa inyong hugot nga pagtuo aron mas daghan sa atong mga estudyante mohimo sa mga pagpili nga mosangput sa tinuod nga pagkakabig.”3
Mopamatuod ko sa pangalan ni Jesukristo, amen.
Elder Soares: Salamat, akong pinangga, sa imong matam-is nga mga pulong. Talagsaon siya, dili ba?
Manghinaut ko nga dili ninyo ibaliwala ang inyong kapasidad sa pag-impluwensya ug pag-awhag atong kabatan-onan sa pagtinguha og pagkamatarung sa ilang kinabuhi. Sama sa gisulti sauna sa atong pinangga nga si Presidente Packer, nagtubo sila sa teritoryo sa kaaway. Pinaagi sa inyong mapahinunguron nga serbisyo sa pagtudlo nila, sila magtubo sa pagtuo ug pagkamasulundon ug mahimong lig-on sa espiritwal nga paagi. Sila makakat-on unsaon sa pagsagubang ug pagbuntog sa tintasyon.
Akong minahal nga kaigsoonan, ang seminary ug institute mao ang duha sa labing importanting nagtabang sa kalig-on ug kusog sa Simbahan. Ako nagsiguro ninyo nga ang Dios nagtuman sa “[Iyang] buhat ug [Iyang] himaya—ang pagpahinabo sa pagka-imortal ug sa kinabuhi nga dayon sa tawo”4—pinaagi sa inyong bililhong pagserbisyo Kaniya ug sa Iyang mga anak. Busa, ang inyoha ug ang akong nag-unang tumong kinahanglan gayud nga kanunayng mao ang kaluwasan ug kahimayaan sa mga anak sa atong Langitnong Amahan.
Niining talagsaong handbook alang sa mga magtutudlo ug mga lider sa Seminaries and Institutes of Religion, Pagtudlo ug Pagkat-on sa Ebanghelyo, atong makita kining talagasaong pahayag: “Ang atong katuyoan mao ang pagtabang sa kabatan-onan ug mga young adult nga makasabut ug makasalig sa mga pagtulun-an ug Pag-ula ni Jesukristo, makasarang alang sa mga panalangin sa templo, ug makaandam sa ilang kaugalingon, sa ilang pamilya, ug sa uban alang sa kinabuhing dayon uban sa ilang Amahan sa Langit.”5
Kini nga tahas nahiuyon sa unsay gisulti sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw: “Ang Seminaries and Institutes of Religion (S&I) nag-abag sa mga ginikanan ug lider sa Simbahan sa pagtabang sa mga batan-on ug young adult nga magpalambo diha sa ilang pagtuo kang Jesukristo ug sa Iyang gipahiuli nga ebanghelyo.”6
Usa sa atong kindak-ang hagit alang kanato nga naapil niining talagsaong buhat sa pagluwas og mga kalag mao ang tinguha nga mamahimong, pasabut nga motubo o mahimong matang sa disipulo nga gilauman sa Ginoo. Dayon ang Ginoo mohimo kanato nga makaapekto sa kinabuhi niadtong atong gitudloan samtang sila maglakaw sa dalan paingon sa kinabuhing dayon. Kining konsepto nga mamahimong may kalabutan gayud sa usa sa tulo ka elemento kon unsaon pagkab-ot Iyang katuyoan, sama sa gihulagway sa Pagtudlo ug Pagkat-on sa Ebanghelyo nga handbook: “Kita magsunod sa ebanghelyo ni Jesukristo ug maningkamot alang sa pagpakig-uban sa Espiritu. Ang atong pamatasan ug mga relasyon sulundon diha sa panimalay, sa klasehanan, ug sa komunidad. Kita padayong magtinguha sa pagpalambo sa atong buhat, kahibalo, kinaiya, ug karakter.”7
Ang Apostol Pablo mitambag kanato sa importansya sa pagkab-ot sa samang pagkahingkod ni Kristo. Sa iyang sulat sa mga taga-Efeso, miingon siya:
“Ug ang iyang mga gasa mao nga ang uban mahimong mga apostoles, ang uban mga propeta, ang uban mga ebanghelista, ang uban mga pastor ug mga magtutudlo;
“Alang sa pagkasangkap sa mga balaan, alang sa buhat sa pag-alagad, alang sa paglig-on sa lawas ni Kristo:
“Hangtud makakab-ot kitang tanan sa pagkahiniusa sa pagtoo ug sa kahibalo mahitungod sa Anak sa Dios, ug makakab-ot sa kahamtong sa pagkatawo, sa sukod sa gidak-on sa kahupnganan ni Kristo.”8
Ang atong mahinungdanong pangutuna tingali kay kon unsaon nato pagkab-ot sa sukod sa gidak-on sa kahupnganan ni Kristo pinaagi sa atong serbisyo, samtang naningkamot kita sa pagtabang sa uban sa pagbuhat sa ingon. Ang ebanghelyo ni Jesukristo naghatag kanato og tabang niana. Atong ikonsiderar ang pipila ka baruganan sa pagsulay sa pagtubag niana nga pangutana.
Ang una ug sukaranang baruganan kanunayng mao ang pagsunod sa Agalon, si Jesukristo. Ang matinguhaong pagpamalandong ni Jesukristo sa atong mga kinaiya, pulong, ug binuhatan magpalambo sa atong kapasidad sa pag-impluwensya ug pag-awhag sa uban nga mangandam ug mahimong angayan sa kinabuhing dayon uban sa atong Amahan sa Langit. Sa pagbuhat sa ingon, kita makatabang sa atong kabatan-onan nga mohigugma sa Ginoo, kay unsay ilang gihigugma magtino unsay ilang gipangita. Unsay ilang gipangita motino unsay ilang hunahunaon ug buhaton. Unsay ilang hunahunaon ug buhaton motino unsay ilang makab-ot.
Ikaw ug ako nagrepresentar sa Ang Simbahan ni Jesukristo sa mga Santos sa Ulahing mga Adlaw dinhi sa kalibutan. Tanan natong buhaton ug isulti magpakita sa imahe sa Simbahan, sa mga kamatuoran niini, ug, sa katapusan, sa Manluluwas. Samtang kita magtinguha nga mas makasabot ug mopahiuyon sa atong kinabuhi sa ebanghelyo, mas gikinahanglan nga maningkamot kita nga mahisama ni Jesukristo. Si Presidente Dallin H. Oaks sa usa ka higayon mitudlo:
“Ang ebanghelyo ni Jesukristo mao ang plano diin kita mamahimo kon unsa gayud ang angay nga mahimo sa mga anak sa Dios. Kining walay lama ug hingpit nga kahimtang moresulta gumikan sa makanunayong pagsunod-sunod sa mga pakigsaad, ordinansa, ug lihok, usa ka katingbanan sa hustong mga pagpili, ug sa nagpadayong paghinulsol.”9
Bag-ohay lang kong nakig-istorya sa pipila sa akong kauban sa klase sa seminary ug institute sa Brazil, diin ako nagdako. Ako nadasig sa unsay ilang gisulti bahin sa Kristohanong impluwensya sa ilang mga magtutudlo nganha kanila atol sa panahon sa mahinungdanong mga pagpili sa ilang kinabuhi. Maminaw kita sa unsay gisulti sa pipila nila.
Sister Barreto: Ok, sa paghinumdum sa akong pagkabatan-on. Nagtuo ko—kuan, Wala ko nagtuo: sigurado ko—tanang desisyon ug akong gilauman, nga akong gipangandoy, adunay lig-ong pundasyon sa dihang nagtuon ko sa ebanghelyo. Ug ilabi na klaro kaayo kong nakahinumdum sa seminary. Bata pa kaayo ko—ang seminary nagsugod pa dinhi sa Brazil—ug nakahinumdum pa ko sa akong maayo kaayo, mapahinungurong mga magtutudlo, ug misugod ko sa paghigugma sa Manluluwas. Ug nagtuo ko nga ang pagpamatuod nga akong naangkon dihang estudyante pa ko sa seminary milambo ug mitubo, dako ang paglambo, ug ako mao karon tungod atong mga panahona, tungod ato nga mga panudlo, tungod ato nga mga magtutudlo, ug sa akong mga desisyon.
Sister Silva: Alang nako, ako nagtuo nga ang akong magtutudlo ang importante kaayo niadtong panahona, tungod kay ako usa ka bag-ong kinabig adtong higayuna, ug mitabang gayud siya nako nga masabtan kadtong mga baruganan ug unsaon sa paggamit niini sa akong kinabuhi ug sa pagpangita sa mga hiyas nga anaa kang Jesukristo — sama sa pailub, pag-usbaw sa kahibalo, pagkamasulundon ngadto sa buhing mga propeta. Kining tanan mitabang nako niadtong panahona aron mapalambo ang abilidad nga maminaw sa mga paghunghong sa Espiritu Santo. Busa importante kini kaayo alang kanako tungod kay ako bag-ong kinabig. Tungod kadto sa magtutudlo. Siya dunay talagsaon kaayong kanaadman, ug gitabangan usab niya ang daghang estudyante nga makakat-on niana nga kinaadman. Siya mitubag sa among mga pangutana ug uban pa. Nakatabang kini kanako nga makabaton og pagpamatuod ug magpabiling lig-on diha sa ebanghelyo.
Elder Gonçalves: Kuan, sa dihang nabunyagan ko, samtang misulod ko sa chapel sa unang higayon, gilambigit dayon ko sa mga batan-on ug sa magtutudlo sa seminary sa mga kalihokan. Siya midapit nako nga motambong sa mga klase. Ang kurso nagsugod na, busa kinahanglan nakong magdali ug motubag sa mga assessement aron makadawat sa sertipiko niana nga tuig. Wala koy bisan unsang butang nga nakat-unan gikan sa pagtubag niadtong mga assessment, apan akong nakat-unan ang paglambigit sa akong kaugalingon, ug kana nga paglambigit importante. Kadto nga paglambigit importante aron makabati ko og tinguha nga mas magkat-on kabahin sa mga kasulatan, nga wala nako mahunahuna kaniadto ug nga wala pa nako masabti. Human nianang pasiunang kahinam, ang kalipay sa pag-apil nagsugod nga nahimong kabahin sa akong kinabuhi. Nahimo kining normal, ug mibati ko sa tinguha nga mas magkat-on pa sa kasulatan ug sa pagbuhat niadtong mga butang nga tinuod gayud ug mipanalangin sa kinabuhi niadtong mga batan-on nga inyo kining makita sa ilang mga buhat. Sa paghinumdum, makahinumdum ko niini; ang binuhatan niadto nga mga batan-on mihimo nako nga makakita sa butang nga tinuod.
Elder Soares: Ang sulat ni Apostol Pablo ngadto ni Timoteo nagpahinumdum kanato niining importaning tambag: “Sa mga magtutuo, pagkinabuhi ingon nga panig-ingnan sa sinultihan, ug sa paggawi, sa gugma, sa pagtuo, sa kaputli.”10
Ang ikaduhang baruganan nga gusto nakong isulti mao ang pagtudlo sa kamatuoran inubanan sa kaisug ug katin-aw. Ikaw ug ako gitawag sa pagtudlo sa ebanghelyo ni Jesukristo. Kita kinahanglang dili magtudlo sa kaugalingon natong ideya o pilosopiya, bisan sinagulan og kasulatan. Ang ebanghelyo mao “ang gahum sa Dios ngadto sa kaluwasan,”11 ug kini pinaagi lamang kang Jesukristo ug sa Iyang ebanghelyo nga kita maluwas. Uban sa giya ug pag-abag sa Espiritu Santo, kita kinahanglang motudlo sa mga baruganan sa ebanghelyo ingon nga kini makita diha sa sumbanang mga kasulatan sa Simbahan ug sa mga pulong sa mga propeta sa modernong panahon ug mga apostoles ingon nga sila gitudlo karon. Kita kinahanglang mahimong mga instrumento sa kamatuoran ug motudlo niini nga klaro kaayo nga kini dili ikalibug sa mga pilosopiya sa kalibutan. Nindot kaayo basahon kon giunsa paghulagway ni Alma ang gahum sa pulong sa Dios diha sa kasingkasing sa mga tawo ug giunsa niini pagpalig-on ang pagtuo sa natural nga paagi. Atong basahon og dungan ang Alma 32:42:
“Ug tungod sa inyong kakugi ug sa inyong hugot nga pagtuo ug sa inyong pailub uban ang pulong sa pag-alima niini, nga kini mogamot diha kaninyo, tan-awa, dili madugay kamo mopu-pu sa bunga niini, diin bililhon kaayo, diin tam-is labaw sa tanan nga tam-is, ug diin puti labaw sa tanan nga puti, oo, ug putli labaw sa tanan nga putli; ug kamo mokaon sa bunga niini gani hangtud kamo mabusog, nga kamo dili na gutumon, ni kamo uhawon.”
Mga kaigsoonan. kining bantugang kasulatan naghulagway sa gahum sa kamatuoran nga mahimong madawat sa mga kasingkasing sa atong kabatan-onan ug moawhag kanila sa pagbuhat og maayo sa ilang kinabuhi. Palihug hinumdumi nga ang epektibong pagtudlo mao gayud ang mahinungdanong bahin sa pagpangulo sa Simbahan. Ang kinabuhing dayon moabut lamang kon ang mga lalaki ug mga babaye matudloan sa ingon ka epektibong paagi nga sila mag-usab ug modisiplina sa ilang kinabuhi. Dili sila mahimong pugson ngadto sa pagkamatarung o ngadto sa langit. Kinahanglan gayud silang giyahan, ug kana nagpasabut sa epektibong pagtudlo.12
Atol sa kinatibuk-ang komperensya sa miaging Abril, si Presidente Russell M. Nelson mitudlo bahin sa “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibutan sa Ikaduhang Siglo nga Kasaulogan.” Sa katapusan sa iyang mensahe, siya mihatag og buluhaton sa tibuok Simbahan sa pagtuon niini ug pagpamalandong sa mga kamatuoran ug paghunahuna sa epekto niadtong mga kamatuoran sa atong kinabuhi. Ako nagtuo nga atong responsibilidad labaw pa kay sa niana nga buluhaton. Kamo ug ako apil sa grupo sa katawhan nga gisangunan sa pagdala sa dinasig nga mga kamatuoran niining pamahayag ngadto sa kasingkasing sa atong mga batan-on ug young adult. Ingon og, ang mga magtutudlo sa seminary ug institute ekstensyon sa 15 ka propeta, manalagna, ug tigpadayag sa ilang tahas sa pagsangyaw niining mga kamatuoran ngadto sa kabatan-onan sa pagpangandam sa ilang panaw ngadto sa makalibug kaayong kalibutan. Kamo ug ako adunay kritikal nga responsibildad sa paghimo sa mga panalanganin niining pamahayag nga matinuod sa ilang kinabuhi. Kitang tanan nasayud nga kita nagpuyo sa mahagitong panahon. Ang kalibutan nagkalimot sa importansya ug tahas sa Langitnong Amahan ug ni Jesukristo sa ilang kinabuhi ug nagkawala sa panglantaw sa ilang balaanong kinaiya. Nagkadaghan ang kalibutanong mga pilosopiya nga naghulip sa balaanong hingpit nga mga kamatuoran sa ebanghelyo ni Jesukristo sa kasingkasing sa mga tawo. Kamo ug ako adunay dakong oportunidad nga mahimong instrumento sa kamot sa Ginoo sa pagpanalangin sa kabatan-onan ug pagdala og mga kamatuoran ngadto sa ilang kasingkasing nga klaro ug kusganong gideklarar niining pamahayag.
Tuguti kong ipakigbahin kaninyo ang pipila sa ubang gisulti sa akong maayong mga higala kon sa unsang paagi ang kamatuoran, nga klaro ug maisugong gitudlo, nakapalig-on sa ilang pundasyon sa ebanghelyo ni Jesukristo.
Elder Silva: Para nako, ang unang butang nga mosantup sa hunahuna mao ang ehemplo sa mga magtutudlo, tungod kini mao ang tinubdan diin kita motan-aw, ug kita gustong mahisama kanila. Ako kanunayng naghunahuna, “Posible kaha nga usa adlaw makabaton ko og ingon ana nga pamilya? Posible kaha nga usa ka adlaw mobuhat ko niadto nga mga butang?” Pipila sa epekto sa doktrina, sa unsay gitudlo ilabi na pinaagi sa ehemplo, sama sa ilang giingon—kita kinahanglang mosunod sa doktrina ug mopahaum niini sumala sa atong mga kahimtang. Ako naningkamot sa pagbuhat niini sa labing maayong paagi nga posible, sumala sa akong mga kapabilidad ug abilidad, aron nga sa tinud-anay ako molambo matag adlaw ug makahimo sa labing maayong pagpili—sama sa akong gibuhat dinhi sa akong labing maayo nga pagpili, nagpili sa akong asawa, nga usa usab sa mga butang nga nakatabang kaayo kanako.
Sister Barreto: Ako kanunay milantaw sa akong mga magtutudlo isip mga ehemplo. Ako makahinumdom gihapon ilabi na sa usa. Siya batan-on pa kaayo, wala pa naminyo. Siya usa ka returned sister missionary, ug samtang nagtan-aw ko niya dihang nagtudlo siya namo ako nakahunahuna, “Ako gustong mahisama niya. Ako gustong mahimong mas sama niya,” kay sama siya sa Manluluwas. Siya nagmahal gayud namo, ug matag higayon nga siya nagtudlo namo, akong nabati iyang gugma ug iyang pagpahinungod sa iyang gibuhat. Usa ka butang nga sa akong pagtuo importante sa akong kinabuhi—ako dili kinabig, apan ako adunay panahon sa akong pagkakabig. Natawo ko sa Simbahan, busa kon maghisgut kita bahin sa among mga istorya, ang akong istorya lahi gamay kay wala ko kahinumdum nga nagduhaduha o wala mituo sa Simbahan ug sa ebanghelyo. Ang tanan natural ra kaayo para nako. Apan ako naghunahuna—Ako sigurado nga moabut ang panahon dihang kinahanglan nimong mahibalo sa imong kaugalingon ug mao gayud na—mao kadto akong seminary ug institute, ilabi na sa panahon sa seminary. Kon mobalik ko ug maghunahuna niini, importante kaayo kadto nga panahon diin kinahanglan kong mohukom kon nganong naa ko sa Simbahan—kon tinuod ba gayud ang Simbahan para nako, kon ako ba adunay pagpamatuod sa ebanghelyo ug kang Jesukristo. Busa karon mahimo nako nga magpakaako tungod niadto nga mga adlaw.
Sister Gonçalves: Una, dili ingon nga hingpit na atong mga magtutudlo ug lider, apan atong gilantaw atong kaugalingon nga mahimong sama nila, magbaton og pamilya nga sama sa ila, ug sa pagsunod sa ilang ehemplo, makabaton og samang pagsabut ug kahibalo. Dunay pipila ka lider nga adunay dakong epekto kanako ug nagsilbing ehemplo nga maong nakaingon ko, “Gusto kong mahisama nila inig dako nako.” Kini mihimo nako nga kanunayng naningkamot sa paghimo sa maalamong mga pagpili sa akong kinabuhi. Ug ako mipadayon, hinay-hinay. Sama sa giingon ni Elder Bednar bahin sa pagkakabig, dili kini mahitabo dayon, hinay-hiny kini, usa ka kausaban sa kasingkasing, hunahuna, kinaiya ug kanunayng nakapokus sa kabubut-on sa Dios. Busa una ang kabubut-on sa Dios, ug dayon kini nga mga magtutudlo mitabang nako nga makasabut ug makakat-on sa paghigugma sa kasulatan. Busa kini nahimong kabahin sa akong kinabuhi. Ako naninguha sa paghimo og maalamong mga pagpili sumala sa kabubut-on sa Dios.
Elder Soares: Laing baruganan nga gusto nakong hisgutan karon mao atong tahas sa pagtudlo sa atong mga estudyante pinaagi sa Espiritu. Ikaw ug ako,kita anaa sa buluhaton sa Ginoo. Kita Iyang mga sinugo, ug kita gitugutan ug gitahasan sa pagrepresentar Kaniya ug sa paglihok alang Kaniya. Isip Iyang mga sinugo, kita may katungod sa Iyang tabang. Kita gayud gilauman nga makugihong mag-andam sa matag leksyon, i-master ang lain-laing paagi sa pagtudlo ug pagkat-on aron sa pagtabang sa atong mga estudyante nga mogamit sa ilang kabubut-on sa pagkamatarung. Apan, klaro nga para makaangkon sa tabang sa Ginoo pinaagi sa Espiritu Santo sa mga leksyon nga atong itudlo, gikinahanglan ang pagpakabuhi nga mahimong angayan niana nga tabang.
Sa pakigpulong sa mga magtutudlo sa Simbahan, ang Unang Kapangulohan mipahayag: “Ang labing importanting bahin sa inyong pagserbisyo mao ang inyong kaugalingong inadlaw nga pagpangandam, lakip sa pag-ampo, pagtuon sa kasulatan, ug pagkamasulundon sa mga sugo. Kami nag-awhag ninyo sa pagpahinungod sa inyong kaugalingon sa pagsunod sa ebanghelyo uban sa mas dakong katuyoan kay sa kaniadto.”13 Dayon kita mangayo sa tabang sa Ginoo, ug Siya mopanalangin kanato sa Iyang Espiritu aron masayud unsay buhaton. Palihug hinumdumi kanunay nga ang pagtudlo pinaagi sa Espiritu makatabang kanato sa pagtudlo sa mga sakop sa klase sa paagi nga sila mas makasabot sa mga baruganan sa ebanghelyo ug madasig sa paggamit niini sa ilang kinabuhi: “Busa, siya nga nagsangyaw ug siya nga nakadawat, nakasabut sa usag usa, ug ang duha makadawat og kaayohan ug maglipay nga maghiusa.”14 Kini mahimong nasabtan na, apan ako mosiguro ninyo nga atong mga estudyante makadawat lang sa mahunturong kamatuoran pinaagi sa Espiritu kon kini gitudlo pinaagi niana nga Espiritu.
Ganahan ko sa paagi nga gipasabut ni Nephi kining nindot nga konsepto: “Ug karon ako, si Nephi, dili makasulat sa tanan nga mga butang nga gitudlo taliwala sa akong mga katawhan; ni ako gamhanan sa pagsulat, sama ngadto sa pagpamulong; kay kon ang tawo mamulong pinaagi sa gahum sa Espiritu Santo ang gahum sa Espiritu Santo modala niini ngadto sa mga kasingkasing sa mga katawhan.”15 Unsa ka importanting tahas nga aduna ang Espiritu sa atong mga panudlo, sa pagdala sa kamatuoran ngadto sa kasingkasing sa katawhan!
Akong minahal nga kaigsoonan, kita mahimong maayo kaayong manulti ug mamulong sa publiko, apan kon wala ang Espiritu, atong abilidad walay mahimong kalainan. Si Presidente Russell M. Nelson bag-ohay lang mitudlo nga, “wala gayud sukad nga mas importante nga makahibalo unsaon sa pagpaminaw sa Espiritu nga mamulong [kanato] kay sa karon.” Siya midugang nga “sa Dios nga Kapangulohan, ang Espiritu Santo mao ang mensahero. Siya modala sa mga hunahuna diha sa [atong] [mga] alimpatakan nga gusto sa Amahan ug sa Anak nga [atong] madawat. Siya mao ang Maghuhupay. Siya mohatag og pagbati sa kalinaw sa [atong] [mga] kasingkasing. Siya mopamatuod sa kamatuoran ug mokumpirma unsa ang tinuod samtang [kita] maminaw ug mobasa sa pulong sa Ginoo.”16
Ang ikaupat nga baruganan nga gusto nakong isulti mao ang pagtudlo gikan sa kasingkasing. Dunay mga magtutudlo kinsa makamugna og elegante, hapsay nga mga kapahayag ug dalaygon ug nindot paminawon. Apan ang mga magtutudlo nga adunay makapaagni nga mga ideya, kinsa makigsulti sa kasingkasing, mao gayuy makapadasig kanato sa paglihok sa atong nakat-unan. Pipila niini nga mga magtutudlo tingali dili kaayo maayo sa pagpamulong sa publiko, apan kon ang mga estudyante maminaw nila, sila mobukas sa ilang mga mata ngadto sa mas maayong pagsabut. Kini nga mga magtutudlo makatisok og tinguha sa ilang kasingkasing ug hunahuna nga moimpluwensya ug moawhag sa mga estudyante sa ilang pagpangita sa kamaayo ug pagpaningkamot sa kahimayaan. Ang mga magtutudlo kinsa adunay dakong epekto sa akong kinabuhi mao kadtong mga mitudlo nako gikan sa ilang kasingkasing. Sila dili ang kinamaayohan sa mga pamaagi sa pagtudlo, apan makahimo sila sa pagpakigsulti sa kasingkasing. Ang ilang impluwensya dili tungod sa mekanikal nga pagsunod sa gisugyot nga mga lesson plan o teyoriya sa edukasyon apan tungod sa tinuoray nga pagpakabana, sinseridad, pagbati, ug lig-on nga pagtuo. Sama sa giingon sa American nga tagsulat ug magtutudlo si Parker Palmer, “Ang maayong mga magtutudlo adunay kapasidad sa pagkakonektado. … Ang mga koneksyon nga nahimo sa maayong mga magtutudlo wala naggikan sa ilang mga pamaagi apan sa ilang kasingkasing—pasabut ang kasingkasing sa karaang kahulugan, isip ang dapit diin maghiusa ang hunahuna, emosyon, ug kalag sa tawo.”17
Ang atong Ginoong Jesukristo mao ang hingpit nga ehemplo niana nga baruganan. Siya mibilin og pisikal nga mga tunob sa balas sa baybayon apan mibilin og espiritwal nga marka sa Iyang mga panudlo sa kasingkasing ug kinabuhi niadtong tanan nga Iyang gitudloan. Siya misugo sa Iyang mga disipulo niana nga adlaw ug kanato nagsulti sa samang mga pulong: “Sumunod ka lang kanako.”18
Maminaw kita sa katapusang mga gisulti sa akong mga kauban sa klase ug mga higala. Tingali wala pa nako sila gipaila-ila ninyo. Kining tulo ka magtiayon mao sila si Glaucia ug Reinaldo Barreto, Lucelia ug Mauro Gonçalves, ug Celia Maria ug Ramilfo Silva. Ako nakaila sa kasagaran niining talagsaong mga tawo sukad sa among pagkabata. Ako nagtan-aw kanila atol sa ilang kinabuhi ug nakakat-on gikan sa ilang matinud-anong mga ehemplo. Sila matinud-anon, malahutayon, ug mapahinungurong mga miyembro sa Ang Simbahan ni Jesukristo sa mga Santos sa Ulahing mga Adlaw kinsa nagpadako sa ilang pamilya sa ebanghelyo ug tibuok kasingkasing nga miserbisyo sa mga responsibilidad nga ang Ginoo mitawag nila.
Elder Barreto: Ako adunay maayo kaayong mga ehemplo sa akong kinabuhi gikan sa mga magtutudlo, coordinator, ug direktor sa seminary ug institute. Kami adunay maayo kaayong panaghigalaay uban kanila sukad niadtong panahona. Dili igo ang akong pagpasalamat sa ila ug sa ilang ehemplo sa akong kinabuhi. Maayo kaayo sila nga mga higala usab. Sa kanunay mibati ko og kamasaligon nga makaistorya kanila bahin sa bisan unsang butang. Sila mimatuto nako, sila mitudlo nako, sila mitudlo sa ebanghelyo, apan ang ilang ehemplo talagsaon. Sila dako kaayo og impluwensya nako.
Sister Goncalves: Mapasalamaton kaayo ko nga nakabaton sa ebanghelyo ug nakapadako sa akong pamilya niini ug makakita karon sa bunga niadtong tanang paningkamot dihang bata-on pa mi. Nakahinumdum ko sa higayon nga naa ko atubangan sa templo dihang gipahinungod kini, ug ako adunay kahigayunan sa pagkanta didto uban ni Presidente Kimball. Si Sister Lobo ang among chorister kaniadto. Dunay pipila lang ka tawo nga nakasulod sa celestial nga lawak, ug ang makabati sulod sa templo nga tanang akong gikat-unan didto, tanan nakong nakat-unan sa akong pagkabatan-on, bililhon kaayo, nakapahimo nako nga gusto mopadayon hangtud sa kahangturan. Tanang butang sa kinabuhi adunay katuyoan, ug ang akong katuyoan mao ang makabalik sa presensya sa Langitnong Amahan kauban sa akong pamilya ug mga higala.
Elder Silva: Akong mga hunahuna, una sa tanan, mga pasalamat alang niadtong walay kahadlok nga mga magtutudlo, kadtong mga tawo kinsa boluntaryong mipahinungod ug tinud-anay nga mipadayon sa paggahin og panahon sa pag-andam sa ilang mga kaugalingon sa pagtudlo. Dili nako masukod ang maayong impluwensya sa mga magtutudlo ngadto sa ilang mga estudyante. Usahay atong madiskubrehan lang kini sa paglabay sa daghang katuigan. Apan sila tinuoray nga mipili sa pagbuhat sa unsay husto ug sa pagpabilin sa dalan. Ug ako tinuoray nga mapasalamaton alang niini. Ako adunay pagpamatuod nga si Joseph Smith usa ka propeta sa Dios. Ako adunay pipila ka kasinatian nga ako dili makalimud nga si Joseph Smith usa ka propeta sa Dios. Ang Basahon ni Mormon mao ang pulong sa Dios. Karon kita adunay propeta nga naggiya kanato ug kinsa nagdawat og pagpadayag, ug ako nasayud nga si Jesukristo aktibo sa pagpangulo sa Simbahan. Kini akong mga hunahuna, sa ngalan ni Jesukristo, amen.
Elder Soares: Salamat, minahal nga mga higala. Hinaut nga ang Ginoo mopanalangin kaninyong tanan samtang kamo magpadayon sa pagkahimong maayong mga ehemplo sa unsa ang inyong nakat-onan sa bata pa kamo ug padayon nga magpakita sa ebanghelyo ni Jesukristo ngadto sa mga kasingkasing sa uban.
Ang katapusan ug labing importanting baruganan nga gusto nakong ipaambit mao ang pagpamatuod sa unsay atong nahibaloan nga tinuod. Akong minahal nga mga kauban sa ebanghelyo, ang gahum sa inyong lig-ong mga pagpamatuod makausab sa kinabuhi sa inyong mga estudyante sa kahangturan. Mao gayud kana ang nahitabo sa matag usa nato, o sa atong katigulangan, sa dihang nakadungog sa mga misyonaryo nga nagpaambit sa ilang pagpamatuod. Ang lig-on nga pagpamatuod pinaagi sa gahum sa Espiritu Santo mao ang maabagon nga gahum sa malampuson nga kinabuhi ug maghatag og kalinaw, kahupay, ug kasiguroan. Kini makamugna og kombiksyon nga samtang ang mga pagtulun-an sa Manluluwas kanunay nga gisunod, ang kinabuhi maanindot, ang umaabut sigurado, ug aduna unyay kapasidad sa pagbuntog sa mga hagit nga moabut sa atong kinabuhi. Ang inyong lig-ong mga pagpamatuod maoy moabag sa pagtuo sa inyong mga estudyante ug motabang kanila nga mag-ugmad ug ilang kaugalingong pagpamatuod sa ebanghelyo. Ang ilang pagpamatuod maoy usa sa mga haligi nga motabang kanila nga makaila sa gahum sa balaan nga maulaong sakripisyo ni Kristo sa ilang kinabuhi. Kon sila molihok sa ilang pagpamatuod diha sa pagkamatarung, ako mosiguro ninyo nga ang ilang pagpamatuod maoy mahimong taming nila batok sa mga pagsulay sa kaaway sa pagpahuyang sa ilang pagtuo ug pagsilsil og kawalay pagtuo sa ilang hunahuna sa tibuok nilang kinabuhi. Kini nga pundasyon maghatag kanila og kaisug sa pagdeklarar sa mga kamatuoran sa ebanghelyo ngadto sa kalibutan.
Ang kanta sa Primary miingon: “Ako nasayud nga ang Amahan buhi. / Ang Espiritu naghunghong kanako niini, / Tinuod gyud kini.”19
Niini nga espiritu, ako gustong motapos sa akong pakigpulong karon pinaagi sa pagpaambit sa akong kaugalingong pagpamatuod diha kaninyo, usa ka pagpamatuod nga natukod sa pagtulun-an human sa usa ka pagtulun-an ug nagpadayon sa paglambo samtang ako nagpadayon sa pagpangita uban sa sinserong kasingkasing aron mas hingpit nga makasabut sa pulong sa Dios. Ang binhi niana nga pagpamatuod unang natisok sa akong kasingkasing pinaagi sa talagsaong mga misyonaryo kinsa mitudlo sa akong pamilya sa akong pagkabata. Kini dayon giamumahan pinaagi sa akong matinud-anong ginikanan, kinsa mitudlo nako pinaagi sa ilang ehemplo ug debosyon sa Ginoo. Sa katapusan ang binhi niana nga pagpamatuod namulak samtang ako naminaw sa mga panudlo sa akong talagsaong mga magtutudlo sa seminary ug nadasig sa paglihok niini sa akong kinabuhi sa batang pangidaron.
Nasayud ko nga si Jesus mao ang Kristo. Nasayud ko nga Siya buhi. Nasayud ko nga Siya nag-antus alang sa akong mga sala ug nabanhaw ug mihatag nako og kahigayunan sa pag-usab sa akong kinaiya. Nasayud ko nga Iyang gikalimtan Iyang kaugalingon alang kanako; gisalikway niya Iyang kaugalingong mga tinguha ug mibuhat gayud sa unsay gipabuhat sa Amahan Kaniya. Bisan gayud nianang higayon sa dakong pag-antus, Siya milimud sa Iyang kaugalingon ug mihimo sa unsay gipabuhat sa Amahan Kaniya.
Nasayud ko nga buhi ang atong Langitnong Amahan ug naminaw sa atong mga pag-ampo. Mopamatuod ko kaninyo nga Siya nakasabut sa kasakit. Nasayud ko nga kini mao ang tinuod nga Simbahan ni Jesukristo sa yuta. Ang Ginoo mipasiugda gayud sa Pagpahiuli sa Iyang ebangehlyo ug pagkapari pinaagi ni Propeta Joseph Smith. Nahigugma ko sa akong Manluluwas ug Langitnong Amahan, ug gusto nakong moserbisyo Kanila. Naningkamut ko sa pagpakita sa akong gugma sa akong minahal nga Ginoo sa tibuok nakong kinabuhi pinaagi sa akong pagserbisyo sa mga anak sa Dios. Minahal kong kaigsoonan, mapasalamaton kaayo ko sa akong mga magtutudlo sa seminary ug institute nga walay kaluyang miimpluwensya nako pinaagi sa ilang mapahinunguron ug mahigugmaon nga serbisyo sa Ginoo. Ang tanan nagsugod niadtong panahona, ug mapasalamaton kaayo ko niana.
Gimahal ko kamo, mga kaigsoonan. Gimahal ko ang oportunidad nga gikauban mo karon. Salamat usab sa tanan nga inyong gibuhat para sa Ginoo ug sa Iyang katawhan sa yuta. Gisulti ko kining mga butanga sa ngalan ni Jesukristo, amen.