Panel nga Diskusyon
2020 nga Tinuig nga Sibya sa Pagbansay sa S&I
Hunyo 9, 2020
Brother Jason Willard: Gi-welcome namo kamo, bisan asa kamo, niini nga panel nga diskusyon. Ako si Jason Willard, nagserbisyo ko isip associate administrator sa Seminaries and Institutes of Religion. Nalipay kaayo mi karon nga gikauban ang mosunod nga espesyal nga mga bisita: Si Sister Reyna Aburto, Ikaduhang Magtatambag sa Relief Society General Presidency; Sister Michelle Craig, Unang Magtatambag sa Young Women General Presidency; Sister Jill Johnson, asawa sa atong commissioner, Elder Paul V. Johnson; ug Brother Chad Wilkinson ug Bert Whimpey, nagserbisyo usab isip mga associate administrator sa S&I. Salamat kaninyo sa pagpakig-uban kanamo karong adlawa.
Ang tuyo niini nga panel mao ang paghisgot sa pipila ka pangutana nga gipanghinaot namong makatabang sa daghang managlahing mga kahimtang samtang kamo magtinguhang makapanalangin sa impluwensyal nga paagi sa kabatan-onan ug mga young adult sa tibuok kalibutan. Among gipangayo ang tabang sa langit agig pangandam sa diskusyon karon, ug modapit kami nga buhaton sab ninyo kini.
Uban niana, sugdan nato pinaagi sa unang pangutana. Daw nagkadaghan ang atong mga magtutudlo, mga estudyante, ug mga pamilya kinsa nagsagubang og kaluya, kabalaka, depresyon, ug ubang emosyonal nga hagit. Unsay atong mahimo sa pagtabang kanila?
Sister Reyna I. Aburto: Tingali sa tinud-anay kitang tanan nagkinahanglan og pagkaayo gikan sa usa ka butang, apan tingali importante nato ang pagtabang sa atong mga estudyante aron makasabut nga kon nagsagubang man sila o nanglimbasug sa ilang mga pagbati nga sila dili gubaon, sila dili depektuso, kanang mga pagbati mga kabahin sa atong balaanong kinaiyahan. Hinoon, kon kanunay kitang magsubo, tingali nagkinahanglan kitang mangayo og tabang. Mao nga mosugyot ko sa pagsunod sa ehemplo sa Manluluwas. Nangutana Siya aron ang mga tawo motug-an sa ilang mga pagbati. Siya nagtugot sa mga tawo sa pagpahayag sa ilang kasakit — sama pananglit, dihang nangutana Siya ni Maria ug Marta sa dihang si Lazaro namatay. Usab, didto sa dalan padulong sa Emmaus, nakigsulti Siya sa Iyang mga disipulo, ug Iya silang gipangutana aron motug-an sila sa ilang mga kaguol ug ilang kasakit kay sila nawad-an sa ilang Manluluwas. Sama sa nahitabo ni Maria Magdalena didto sa lubnganan ug sa dihang gipangutana Niya ang managlahing mga tawo aron itug-an nila ang ilang mga pagbati.
Mibati ko nga kon maghimo ta og kahimtang diin ang mga estudyante mobati nga luwas nga motug-an sa ilang mga pagbati—wala kinahanglanang diha sa klasrom ug wala kinahanglanang diha sa matag usa apan mobati nga luwas silang motug-an sa ilang mga pagbati tingali sa sulat, tingali ngadto sa sakop sa pamilya, tingali sa higala, ug ilabi na, sa Langitnong Amahan. Mahimo tang mangutana aron matug-an nila ang ilang mga pagbati. “Unsay inyong mga problema bahin sa inyong mga higala, inyong pamilya?” “Unsaon nato nga makatabang sa usag usa?”
Akong nabantayan nga kon mangayo ta og ideya sa mga tawo o pagpadayag o inspirasyon kon unsaon pagtabang ang uban, madawat nila kana nga inspirasyon kon kini ilang iampo, ug makaadto sila ug motabang. Mao nga kon maghimo kita’g kahimtang diin ang mga tawo dili mobati nga gihukman, niana nagtabang kita kanila, ug motabang kanila nga makasabut nga walay sayop nga mga tubag, nga makapangutana sila ug aron mobati silang gawasnon ug luwas nga motug-an sa ilang mga pagbati. Ug labi na kon may butang silang gikalisdan, dili sila kinahanglan nga mag-inusara sa pag-atubang niini, sila makaduol sa atong Langitnong Amahan, sa atong Manluluwas, ug sa usag usa. Ug bisan unsa pa, bisan unsa pa ang nahitabo sa ilang kinabuhi, ang matag usa kanato anak sa Dios, ug kita makadangop sa atong Langitnong Amahan. Kitang tanan managsoon, ug kita makaduol sa usag usa. Kitang tanan mga disipulo ni Kristo usab, ug kita makadangop Kaniya.
Brother Bert Whimpey: Nakadayeg ko ni Elder Holland—kon nakahinumdom kamo, naa kini sa Oktubre 2013 nga iyang pakigpulong sa komperensya. Gihisgutan niya ang iyang panlimbasug kaniadto sa depresyon. Ug dayon siya miingon niini: ““Dili angayng ikaulaw ang pag-angkon niini sama sa pag-angkon sa mga problema sa pangisip [ang atong mga panlimbasug sa kahimsog sa pangisip] kay sa pagdawat sa pakigbugno sa high blood o sa kalit lang nga pagtumaw sa makamatay nga tumor.”1 Siya miingon nga OKlang ang paghisgot niini ug pagtug-an niini, gani, sa pagpaambit nianang mga butanga. Ug dayon nagpasalamat kaayo ko sa tulo ka butang nga iyang gipakigbahin: “Ayaw pagkawala og pagtuo sa inyong Amahan sa Langit. … Tinguhaa ang tambag niadtong naghupot sa mga yawe alang sa inyong espirituhanong kaayohan,” ug unya, kon gikinahanglan,“ tinguhaa ang tambag sa mga eksperto nga may sertipikadong pagbansay, propesyonal nga mga kahanas, ug maayong mga hiyas.”2
Ug tingali importante dili lang sa atong mga estudyante apan usab sa atong mga magtutudlo nga mahibalo nga pwede rang itug-an kadtong mga butanga ug hisgutan kini ug makadawat sa tabang nga ilang gikinahanglan. Maanindot nga butang usab sa atong propesyon ang makig-istorya sa HR representative aron masayud unsang mga benepisyo ug mga dapit sila makaadto sa pagpangita og tabang, ug ang website sa Simbahan usab nindot adtoan para makakita’g kapanguhaan.
Brother Willard: Brother Whimpey, salamat niana. Ang sunod nga pangutana mahitungod sa atong kabatan-onan ug mga young adult ug kon unsaon nga kita makatabang nga ilang makita nganong ang Simbaban importante sa ilang kinabuhi, nganong nagkinahanglan sila sa Simbahan, ug nganong ang Simbahan nagkinahanglan kanila.
Sister Michelle Craig: Sa akong hunahuna usa kini ka importanting pangutana ug nagtuo gyud ko nga ang atong kabatan-onan ug atong mga young single adult kinahanglang mobati nga ang pagkamiyembro sa Ang Simbahan ni Jesukristo sa mga Santos sa Ulahing mga Adlaw labaw kaysa usa ka listahan sa mga lagda o mga kahon nga angay tsekan. Labaw pa kini sa usa ka social nga grupo. Kinahanglan nilang masabtan nga ang importanting bahin sa ebanghelyo ni Jesukristo mao ang gugma. Gugma kini sa Dios, ug gugma kini alang sa uban. Ug sa pagkat-on ug pagsunod sa ebanghelyo, ila gyung mahibaloan ug mabatyagan ang ilang pagkatawo ug ilang katuyoan.
Ang atong kabatan-onan karon misanong sa mga baruganan sama sa paghigugma sa uban, pagtabang sa ubang nagkalisud sa katilingban, paghigugma. Gusto sila og usa ka kawsa, ug gusto sila nga makahimo og kalainan sa kalibutan. Ug manghinaot ko nga ilang masabtan nga kon magmatinud-anon sila, diha sulod sa organisasyon sa Simbahan, may mas daghan pa silang oportunidad nga mohimo og kalainan alang sa kaayohan sa kalibutan kay sa ubang organisasyon.
Ug usa sa mga butang nga akong ganahan bahin ni Presidente Nelson ug sa direksyon nga padulngan sa Simbahan mao nga anaa gayud ang paghatag gibug-aton sa kabatan-onan ug sa mga young single adult, labaw kay sa ubang panahon nga akong mahinumduman. Ug isip mga hingkod mohunong usa ta, ug kinahanglan mahatagan nato ang atong kabatan-onan og mga oportunidad nga mangulo, magplano, magtinguha og pagpadayag ug paglihok niana nga pagpadayag. Kinahanglan kitang morespeto sa ilang panabut, ug kinahanglan nga magkat-on sa mga leksyon nga ilang ikatudlo kanato. Kita nagkinahanglan kanila, dili aron modaghan ta apan tungod kay ang kalibutan anaa sa grabe kaayong panginahanglan sa unsay ilang ikatanyag. Ug ang Simbahan adunay organisasyon aron matuman kana nga mga panginahanglan ngadto sa usa ka tawo sa usa ka higayon. Manghinaot ko nga ang tanang gikat-unan sa atong kabatan-onan ug atong mga young single adult diha sa ilang mga balay, sa simbahan, ug sa mga seminary ug mga institute modasig kanila sa paggamit sa ilang kasingkasing ug sa ilang mga kamot sa pagtabang ug paghigugma sa ubang tawo ug pagserbisyo sa ilang mahimamat. Kay mao kanay natural nga resulta sa gugma alang ni Jesukristo ug gugma alang sa uban.
Tingali ang tanan masangput gayud ngadto kang Jesukristo. Ang tanan natong buhaton ug itudlo isip mga magtutudlo ug niadtong mohigugma ug makig-inter-aksyon sa kabatan-onan ug sa mga young single adult ug sa kabataan kinahanglang molig-on sa pagpamatuod sa kinabuhi, sa misyon, ug sa Pag-ula ni Jesukristo. Ug mao gayud kana ang tanan. Tingali kon buhaton nato kana, unta mahibaloan nila nga mao kini ang ebanghelyo ni Jesukristo, nga kini Iyang ebanghelyo, ang mga panalangin sa pagkamiyembro niining ebanghelyo hilabihan ka mahinungdanon ug kitang tanan gikinahanglan alang sa katumanan sa buhat. Sa tinuod Iya kini nga buhat.
Brother Willard: Maayong pagkasulti. Salamat. Brother Wilkinson, unsay imong ikadugang niana?
Brother Chad Wilkinson: Wala na koy ikadugang sa bag-o lang gisulti ni Sister Craig. Naghunahuna lang ko samtang nag-istorya siya bahin sa usa nako ka klase sa institute nga ang kadaghanan mga returned missionaries. Ug nag-istorya sila mahitungod sa usa sa labing dakong pakigbisog sa pag-adjust sa pagpauli sa panimalay, nga sila nakatutok sulod sa 18 ka bulan o 2 ka tuig sa laing tawo, ug sa dihang mauli na sila daw ang tanan mahitungod na kanila. Sa sulod sa ebanghelyo ug sulod sa atong mga klasrom makahimo kita’g mga pagdapit nga makapahunahuna nila niana o sa pagsuhid og mga paagi sa paghimo niadtong mga butanga ug pagtabang dili lang sa ilang kaugalingon.
Brother Willard: Sister Johnson, unsay idugang nimo niana?
Sister Jill Johnson: Samtang gikonsiderar nako kini nga pangutana duna koy laing nahunahuna bahin sa gahum sa pakigsaad nga madawat nato diha lang sa simbahan nga adunay awtoridad ug gahum sa Dios. Ug sa kalibutan karon, uban sa grabing pagpamugos sa mga batan-on ug pagbitad kanila palayo sa Simbahan, sa pagkonektar nila og balik sa gahum diha sa pagtuman sa pakigsaad. Atong mabatyagan nga nag-inusara kita niining kalibutan ug walay gahum sa pagbuntog sa mga butang nga moabut kanato: atong mga pagsulay, mga pagtintal kanato. Apan ang mga pakigsaad nga makaplagan lang nimo sa Ang Simbahan ni Jesukristo sa mga Santos sa Ulahing mga Adlaw, ug sa sagrado nga mga dapit, mas dako og gahum kay sa anaa bisan asa niana nga mga pwersa. Ug tingali mao gayud kanang butanga ang ikahatag sa Simbahan. Ug kana atong ikapahibalo sa atong mga estudyante ug makapamatuod niana ug makapakita kanila pinaagi sa atong kaugalingong kinabuhi nga adunay mas daghan pa sa Simbahan kay sa paghimo lang og maayo. Adunay gahum diha sa mga pakigsaad.
Brother Whimpey: Sister Johnson, mapasalamton ko sa imong komentaryo. Nakig-istorya ko og mga young adult kinsa misulti og ingon niini kanako: “ Makabatyag ko og kasuod sa Langitnong Amahan bisan dili magsimba.” Ug miingon ko, “Mouyon ko. Apan ang akong tumong dili lang aron mobati nga maduol sa Langitnong Amahan; gusto kong mahimong sama sa Langitnong Amahan. Ang akong tumong mao ang pagkahimaya.” Ug tingali aron kinahanglan natong tabangan ang atong kabatan-onan ug mga young adult sa paghinumdom nga ang katuyoan sa mortalidad mao ang pagkahisama sa ilang Langitnong Amahan. Sa Simbahan nila makit-an ang mga yawe sa pagkapari ug ang mga ordinansa ug mga pakigsaad, sama sa gihisgutan ni Sister Johnson. Kini ang gingharian sa Dios dinhi sa yuta, ug adunay butang nga ilang maangkon dinhi nga makatabang nila nga mahimong sama sa Langitnong Amahan nga dili nila makuha sa ubang dapit ug sa wala nay laing paagi.
Brother Willard: Tinuod gayud kana. Dili lang aron mahimong kabahin sa usa ka kawsa, apan—tingali gihisgutan kini sa atong bag-ong kinatibuk-ang komperensya—nga mamahimong kabahin sa “kawsa ni Kristo.” Ug mao kana ang ikahatag niadtong mga pakigsaad alang kanato. Salamat kaayo niana. Unsay ubang gagmay ug yanong mga butang ang atong mahimo aron mapalambo ang atong gahum sa pagpanalangin sa atong mga estudyante, sa pagtudlo uban sa mas dakong gahum, ug makabaton og tinuoray nga makahinganghang pagtulun-an?
Brother Wilkinson: Ganahan ko niana nga pangutana. Kita naghisgot ug nagtudlo ug nagbansay og daghang kahanas ug mga pamaagi ug daghang managlahi nga mga butang, ug ang tanan importante. Apan samtang gipahimutang nato ang atong kaugalingon isip magtutudlo—nagpasabut nga ang Espiritu Santo ang magtutudlo—samtang atong himoon nga ang Espiritu Santo isip atong magtutudlo ug kita modapit kaniya sa atong mga klasrom, nan kana nga gahum, kana nga makahinganghang pagtudlo mahitabo.
Si Elder Johnson mitudlo nako kausa nga si Satanas dili makakuha og daghan kaayong mga empleyado sa S&I o mga tawo aron makapanapaw o makasupak sa Pulong sa Kaalam o sa paghimo og butang nga ngil-ad kaayo o bug-at o grabe. Apan makahimo siya og ginagmayng mga butang nga makaiban sa atong gahum. Makadapit siya kanato tingali sa pagreklamo o sa paglingkod libut sa lamesa ug molitok og mga dautan sa uban o pamugalbugal sa usa ka estudyante o mangatawa niini, o sa ginagmayng mga butang nga, kon monunot kita nianang mga butanga, mawala kanato ang Espiritu Santo, o ang Espiritu Santo dili magpabilin kanato sa samang ang-ang nga Iyang mahimo o himoon.
Ako naghunahuna ni Achan sa Daang Rugon, diin sila gimandoan sa dihang nangadto sila sa pakig-away batok sa Jericho nga dili manguha og bisan unsang laglagunon nga butang—mga kalan-on, mga kabtangan—gikan sa Jericho. Ug si Achan nanguha, ug walay bisan usa nga nahibalo niini. Ug ang sunod nga away, nga gituohan nga ingon og daog nang daan batok sa siyudad sa Ai, napildi sila, ug 36 ang namatay.
Adunay baruganan niana nga unsay atong gibuhat may mga pulos. Ang gagmayng butang nga atong isulti o ang mga reklamo o pagbagulbol, o bisan unsa nga posibling moabut nga makaimpluwensya sa gahum sa Espiritu Santo nga moabut sa mas kusganong paagi sa atong kinabuhi—may pulos kini. Ug mohurot kini sa kinatibuk-ang gahum. Butang kini nga may pulos. Gusto lang kong modapit kanato sa pagbuhat nianang ginagmayng mga butang. Tagda ang ginagmay ug yanong mga butang nga modapit sa Espiritu Santo o motabang nato nga makaangkon, sa kinadak-ang kapasidad nga makab-ot, ang impluwensya sa Magtutudlo.
Brother Willard: Brother Whimpey, duna kay komentaryo?
Brother Whimpey: Kon nakasentro gyud kita sa Manluluwas, mao kanay akong nahunahuna samtang naglingkod ko ug naghunahuna sa akong mga estudyante ug naghunahuna sa akong mga leksyon, nga ako nakasentro gyud kang Kristo. Gusto nakong mahibaloan sa akong mga estudyante ang Iyang mga kinaiya ug mga hiyas. Mao nga kini magsugod niini kon ako magpunting sa Manluluwas.
Ug dayon naghunahuna ko nga ang ikaduhang butang mao nga ako naka-focus sa akong mga estudyante. Nakadayeg ko kang Elder Bednar—kon nahinumdom mo, sa usa ka Serye sa Leadership Enrichment naghisgot siya sa usa ka kasinatian sa iyang anak nga lalaki, dihang ang iyang anak gustong matabangan aron masayud unsay planuhon para sa Priest ug Laurel nga kalihokan. Gibasa ni Elder Bednar kaniya ang Jacob 1:5: “Kay tungod sa pagtuo ug dako nga kahingawa, kini sa pagkatinuod nahimo nga gipakita ngari kanato mahitungod sa atong katawhan, unsa nga mga butang ang mahitabo ngadto kanila.” Kon mahinumduman ninyo ang istorya, mikabat og pipila ka higayon sa anak ni Elder Bednar aron sa katapusan makaamgo nga si Elder Bednar nag-ingon, “Unsay kinahanglang mahitabo? Sa dili pa kamo magplano og kalihokan, hunahunaa una unsa nga kasinatian ang gikinahanglan sa atong mga estudyante.” Gamiti kini og “Unsa kaha ang gikinahanglan sa estudyante nga masinati?” diha sa atong pagpangandam.
Dayon tingali ang ikatulong butang, sigun sa gisulti ni Brother Wilkinson, nga tugutan ang Espiritu Santo nga mopahigayon sa Iyang tahas ug buluhaton samtang naa kita sa klasrom. Importante kaayo kana. Tingali ang Gospel Teaching and Learning [Pagtudlo ug Pagkat-on sa Ebanghelyo] nga handbook, seksyon 2.1, usa ka pinakamaayong butang nga ribyuhon samtang maghunahuna kita bahin sa unsay tahas ug buluhaton sa Espiritu Santo. Ug ang yanong pagsabut niana ug ang pagtugot sa Espiritu Santo nga mopahigayon sa Iyang tahas ug buluhaton diha sa klasrom hilabihan kaayo kamakahuluganon.
Sister Craig: Usa lang ka yanong butang ang akong nakit-an nga kon magtudlo ko ug mobati nga ang Espiritu wala diha, kon mohatag ko og sinserong pagpamatuod bahin ni Jesukristo ug sa Langitnong Amahan, ang Espiritu Santo motungha. Mao kana ang misyon sa Espiritu Santo, ang pagpamatuod sa kabalaan ni Jesukristo ug sa Langitnong Amahan. Busa kon mopamatuod ko, sa usa ka yanong pagpamatuod, motungha ang Espiritu.
Brother Willard: Naghisgot kita mahitungod sa mas gamhanan nga pagtudlo, nga mas nakasentro kang Kristo. Apan kon tinguhaon natong mas makapunting sa tigkat-on, unsa kahay mahimo sa mga magtutudlo aron ang ilang preparasyon mas mohaum ug piho para sa mga estudyante?
Sister Johnson: Dihang una nakong nabasa kana nga pangutana, naghunahuna ko, Unsay ipasabut sa pagpangalagad ngadto sa mga estudyante sa tinagsa-tagsa? Buot ipasabut ba nga mailhan sila sa piho nga paagi? Mahimo lang ba nga makaila ta nila sa personal? Paggahin og panahon uban nila sa pamaagi nga mas makaila kita kanila? Dayon naghunahuna ko nga kini nga pangutana mahimong lahi alang sa magtutudlo nga taga Orem ug nagtudlo og 100 kapin ka estudyante. Ang pagpaningkamot nga personal nga moapil sa mga kinabuhi sa tanang mga estudyante dili lalim nga tahas kon itandi ngadto sa usa ka magtutudlo sa Frankfurt, Germany, nga adunay unom ka mga estudyante nga iyang kauban sa pagsimba ug suod kaayo sa ubang mga pamilya. Tingali makadismaya kaayong bation nga, isip magtutudlo, ang imong responsibilidad mao ang personal nga pagpanginlabut sa matag estudyante, sama sa pagbisita sa ilang mga pamilya ug pagtambong sa ilang mga kalihokan. Daghan kaayo sila’g kalihokan, ug mabug-atan kamo.
Busa duna koy pipila ka mga ideya sa pagsusi sa ilang mga panginahanglan. Naghunahuna ko, kinahanglan kitang mangutana. Kinahanglan kitang mangutana sa mga estudyante mismo unsay ilang mga panginahanglan. Kita kinahanglan nga mangutana sa ubang mga magtutudlo kon unsay ilang namatikdan diha sa mga estudyante sa samang edad ug mga grupo sa ka-edad ug kultura, tungod kay kini nga Simbahan anaa sa tibuok kalibutan ug adunay daghan nga mga kalainan sa kultura. Apan ang pinakaimportante, mangutana sa atong Amahan sa Langit ug mosalig sa Espiritu ug sa mga saad nga anaa kanato nga kon nagbuhat kita sa tanan kutob sa atong mahimo, mapanalanginan kita og inspirasyon nga atong gikinahanglan aron makaila sa mga estudyante ug mahibalo unsay atong angay itudlo kanila. Ug sa komplikadong kalibutan uban sa tanang bag-ong mga hagit nga anaa sa kabatan-onan, mas importante gani nga aduna kita niana nga giya gikan sa atong Langitnong Amahan sa pagtudlo kanila.
Sister Aburto: Tingali kon makigtambag kita kanila ug mahibalo mahitungod kanila, mas makaila kita kanila. Importante ang pag-obserbar usab kanila ug pagpaminaw sa mga timailhan o pagbantay sa mga timailhan nga ihatag nila kanato. Ang mga komentaryo nga ilang buhaton o kakulang sa mga komentaryo o mga ipangutana magtugot nga kita mas makaila kanila. Siguro tugutan nato silang mangutana nga dili sila magpaila. Usahay mobati sila nga gawasnong mosulti unsay naa sa ilang kasingkasing kon wala kita makaila sa ilang ngalan. Siguroa usab sa pagsumpay sa mga baruganan ug mga doktrina nga atong nakat-unan ngadto sa mga panghitabo diha sa ilang kinabuhi sa pagkakaron—dili gayud kinahanglan nga sa umaabut, apan karon—aron sila makakita sa ilang kaugalingon diha sa mga kasulatan, aron sila makakita sa ilang mga kaugalingon sa pagpundok sa Israel, aron sila makakita sa ilang mga kaugalingon diha sa buhat sa kaluwasan ug kahimayaan. Ug sila usab makatan-aw og balik sa kaugalingon nilang kinabuhi ug makita ang mga panahon diin ang Ginoo mipanalangin sa ilang kinabuhi aron mahinumdom sila kon si kinsa sila ug nga Siya kanunayng andam nga mopanalangin kanila. Tabangi silang makakita sa kaimportante niana. Ug aron mahimo kana, kinahanglan kamo nga mahibalo unsay nanghitabo sa ilang kinabuhi.
Brother Wilkinson: Nagtuo ko nga kanang duha ka mga komentaryo maanindot kaayo. Akong nakaplagan nga sa unang adlaw sa klase pahimuon gani og sulat ang mga estudyante ngari kanako. Dili ko gustong mosulti sila nako unsay ilang mga sala o bisan unsang ingon niana apan mosulti mahitungod sa ilang kaugalingon. Unsay kinahanglan nakong mahibaloan mahitungod kanimo nga makatabang kaayo nako sa pagserbisyo nimo isip imong magtutudlo niini nga semester o niining tuiga? Sultihi ko mahitungod sa imong pamilya, sultihi ko mahitungod sa imong trabaho, sultihi ko kon unsang mga kalihokan ang imong giapilan karon. Sultihi ko unsay imong gilauman sa klase. O gani isulti nga, “Naglisud ko sa akong pagtuo,” o, “Nakigbisog ko sa usa ka butang.” Ug dayon litratuhan nako ang matag estudyante ug ipapilit kini ana nga papel. Ug samtang nagbasa ko niana nga sulat, akong mailhan kana nga estudyante, ug ako kadtong ibutang sa hunahuna samtang akong gibuhat ang akong pagpangandam. Pipila kadto, siguro pipila lang, sa praktikal nga mga paagi aron makuha ang unsay gitudlo kanamo ni Sister Johnson ug ni Sister Aburto.
Brother Willard: Ang atong sunod nga pangutana alang sa mga magtutudlo aron sa pagtabang. Unsaon nato sa pagbalanse kining anaa kanato nga responsibilidad sa pagtudlo sa doktrina sa klaro ug matinuorong paagi samtang padayon nga mag-awhag sa mga estudyante kinsa naggikan sa managlahing mga kahimtang ug managlahing kultural nga mga kaagi aron ikapaambit sa tukmang paagi ang ilang mga hunahuna ug mga pagbati? Unsay imong ikasulti sa magtutudlo nga naningkamot sa pagsiguro nga ang mga estudyante mobati nga aduna silay tingog sa klase, makasulti sila, makapaambit sa ilang mga hunahuna ug mga pagbati nga tingali lahi sa unsay nahitabo sa klase ug sa gihapon magtudlo sa doktrina?
Brother Whimpey: Usa kana ka lisud nga balanse usahay diha sa klasrom. Tingali kinahanglan natong hinumduman nga ang atong responsibilidad mao ang pagtudlo sa kamatuoran, dili opinyon. Ang atong mga estudyante kinahanglang mahibalo nga kon moadto sila sa klase, madungog nila ang kamatuoran. Mao kana nganong kinahanglan kitang nakasentro sa mga kasulatan ug sa mga pulong sa mga propeta aron nga kon mangabut ang mga estudyante, diha kita magbase, ug diha kita mangita sa atong mga tubag. Ug usab, hinumdumi ang katuyoan, ug nga ang atong katuyoan mao ang pagtabang sa kabatan-onan ug sa mga young adult aron makasabut ug mosalig sa mga pagtulun-an ug Pag-ula ni Jesukristo. Gikinahanglan nga tabangan nako ang akong mga estudyante aron makasabut.
Apan naghunahuna sab ko nga kinahanglan kitang mohinumdom nga ang atong mga estudyante adunay responsibilidad. Hinumdumi sa Doktrina ug mga Pakigsaad 50: magsangyaw kita sa pulong sa kamatuoran, apan ang atong mga estudyante usab kinahanglang modawat sa pulong sa kamatuoran. Kinahanglan sila nga magmatuohon inig anha nila sa klase. Mao nga kon ang atong mga klase siguro mahisama sa usa ka laboratoryo, diin moadto ang atong mga estudyante ug mobati sila niining kahimtang diin ang kamatuoran itudlo, dayon didto mobati nga luwas silang mopaambit sa ilang mga pangutana o mga kasinatian o mga kabalaka. Apan dayon, isip mga magtutudlo, kita anaa didto aron sa pagtabang sa atong mga estudyante nga makakat-on unsaon sa pagkat-on—magkat-on unsaon nga mobati sa Espiritu, unsaon sa pagkat-on alang sa ilang mga kaugalingon dinha niana nga kahimtang, mopakigbahin unsay ilang gihunahuna. Ug malagmit mosangput kana sa atong diskusyon, motultol kanato ngadto sa mga kasulatan ug sa mga pulong sa mga propeta aron matabangan kitang makakita sa kamatuoran ug dili lang kon unsa ang opinyon o unsay gisulti sa kalibutan karon.
Apan magpunting kita unsa ang kamatuoran. Hunahunaa ang bahin sa sundanan alang sa pag-angkon og espirituhanong kahibalo. Kon kita makapunting gayud niana nga sumbanan ug makatabang sa atong mga estudyante nga makakat-on unsaon sa paglihok diha sa hugot nga pagtuo ug makabaton og mahangturong panglantaw ug dayon sa pagtan-aw sa balaanong gitudlo nga mga tinubdan sa pag-angkon sa ilang mga tubag, nan sa ilang pagtambong sa klase, maong naa sila dinha, aron sila makakat-on sa kamatuoran, aron mahimo silang sama sa ilang Langitnong Amahan.
Usa sa among mga direktor sa area mipaambit kanako og usa ka kasinatian. Naglingkod siya sa usa ka klasrom, ug usa ka young adult mipaambit sa iyang opinyon nga wala kaayo mahiuyon sa mga pagtulun-an sa Simbahan. Dayon ang magtutudlo mitubag og sama niini. Miingon siya, “Sa unsang paagi ang imong kaugalingong pagpamatuod ug panabut bahin sa plano sa kaluwasan mihatag og kasayuran sa imong opinyon? Magsugod gikan sa pagtuo, gikan sa unsay imong nahibaloan ug unsay imong gibati, hisgutan nato kana gikan niana nga panglantaw.” Ug dayon miingon siya nga nakita niya nga kining young adult sa tinuod nakakuha og pagpadayag diha dayon samtang naningkamot sila sa paglihok uban sa pagtuo ug mitan-aw niini uban sa mahangturong panglantaw. Gihisgutan nila unsay ilang nahibaloan, unsay wala pa nila mahibaloi, ug nganong gusto sila nga padayong maningkamot sa pagsusi niini. Wala kanila ang tanang tubag, apan niana nga sitwasyon magtinabangay sila aron mahibalo sa kamatuoran ug tan-awon kadto, pagbuhat uban sa hugot nga pagtuo ug sa pagkamatuohon, gikan gayud sa ilang nahibaloan.
Karon, unsaon nako sa pagtabang nga makat-on kamo unsaon sa pagkat-on ug unsaon sa pagpangita’g mga tubag samtang padayon kamo niana nga kapasidad? Usahay kinahanglan kitang magmatngon, nga kon kita usahay dili motugot nga ang mga baruganan ug mga doktrina sa ebanghelyo mousab kanato, mosulay kita sa pag-usab sa mga baruganan ug mga doktrina sa ebanghelyo aron mohaum sa atong sirkumstansya ug sitwasyon. Kon kita makasulti man nga, “Langitnong Amahan, gusto kong mahimong sama kanimo. Tabangani ko nga makat-on kon sa unsang paagi nga ang mga doktrina ug mga baruganan sa ebanghelyo makatabang nako nga, sa diwa sa “aduna gihapon koy mga pangutana ug kabalaka, apan ako gusto gayud nga masayud kon unsa ang kamatuoran.” Tingali isip mga magtutudlo makahimo ra gayud kita og ingon niana nga matang sa sitwasyon, sa pamaagi sa atong pagsanong. Apan ang pagtabang sa atong mga estudyante sa pag-adto sa mga kasulatan ug sa mga propeta aron makat-on sa kamatuoran ug motabang kanila samtang nakigbisog sila aron mahibalo gayud unsay tinuod. Dayon moingon sab ako, ayaw ipakaubos ang gahum sa pagpamatuod ug pagsaksi. “Apan diha sa ba-ba sa duha o tulo ka mga saksi nga ang matag pulong matukod.”3 Diha sa mga kasulatan, ang mga pulong sa mga propeta ug ilang kaugalingong pagsaksi sa unsay tinuod. Ug kon kana nga espiritu mosaksi, ang atong kabatan-onan molihok niini ug makakat-on sila unsaon sa pagkat-on alang sa ilang kaugalingon ug mahibalo sa kamatuoran alang sa ilang kaugalingon.
Brother Willard: Ganahan ko sa gisulti ni Nephi dihang miingon siya, “Ako nasayud nga siya nahigugma sa iyang mga anak; bisan pa niana, ako wala masayud sa kahulugan sa tanan nga mga butang.”4 Si Nephi mihatag sa iyang pagpamatuod sa unsay iyang nahibaloan, ug kadako nga panalangin niana para kanatong tanan.
Brother Wilkinson: Usa sa mga ideya nga misantop sa akong hunahuna mao ang babaye nga gisumbong nga nanapaw ug ang ehemplo sa Manluluwas. Wala Niya ihikaw ang pagtudlo sa kamatuoran. Mitudlo Siya kaniya sa doktrina nga kadto dili maayo. Apan gihimo niya kadto sa paagi nga mapanalipdan siya, mihimo niini nga usa ka luwas nga dapit sa pagtabang niyang makabaton og kasinatian.
Sister Johnson: Naghunahuna pud ko nianang sama nga mga pagtulun-an, nga kon ang mga estudyante mobati niana nga gugma sa Manluluwas ug sa gahum sa Pag-ula nga susama sa usa ka pwersa kay sa atong pagtudlo sa mga sugo ug sa mga sangputanan sa dili pagtuman niini. Kon sa katapusan ang pagbati nga ilang nakuha gikan sa klase ug ang leksyon mao nga adunay tawo nga nahigugma nila sa hilabihan, nga adunay paagi nga makagamit sa gahum sa Pag-ula, nga kon makahimo kita og mga sayop—ang tanan masayop—may mga butang nga gikinahanglan nato ang Pag-ula. Ang positibo nga bahin sa tanan niini mao ang unsay madala sa estudyante sa pagbiya sa klase. Mobati sila nga anaay paglaum. Ug sila nagkinahanglan gayud niana niini nga kalibutan, tingali.
Brother Willard: Salamat niadto nga mga komentaryo. Gani, kining katapusang pangutana may kalabutan usab niana: Unsaon nato sa pagtabang ang kabatan-onan nga mobati nga sila nakita gayud, nga ang ilang mga pangutana mapuslanon gayud? Sister Craig, unsay imong idugang?
Sister Craig: Naghunahuna ko sa usa ka kasulatan diha sa Marcos nga pamilyar ninyong tanan. Usa ka adunahan, batan-ong tigmando nangutana sa Manluluwas, naghunahuna unsay iyang mahimo aron makadawat og kinabuhing dayon. Ug ang Manluluwas milista og pipila ka sugo nga iya nang natuman. Ug dayon, sa dili pa hangyuon kining batan-on sa paghimo og butang nga labihan kalisud—ug kita may mga butang nga malisud—ganahan ko sa bersikulo 21: “Ug si Jesus, sa nagsud-ong Siya kaniya,” o nagtan-aw kaniya, “nahigugma kaniya.”5 Tingali ang pinakaimportanting butang nga atong mahimo uban sa matag inter-aksyon sa atong kabatan-onan mao ang pagtabang nga sila mobati nga gihigugma. Akong naamguhan nga dili kanunay sayon ug usahay nagkinahanglan kini og dakong paningkamot ug pag-ampo sa atong bahin aron makabaton og mata nga makakita sama sa makita sa Manluluwas.
Laing butang misantop sa hunahuna dihang naghunahuna ko mahitungod niini mao nga kinahanglan kitang mogamit sa gahum sa mga pagpangutana. Kana gisihanna og hisgut dinhi karong adlawa, apan kinahanglan kitang makakat-on aron atong ikasinabut ang mga estudyante ug kadtong atong mga gitudloan ug mangutana og maayong mga pangutana—mga pangutana nga makahimo nga atong masukod unsay ilang pagbati ug kon asa na sila ug dayon dasigon sila sa paghatag sa ilang tinuod nga mga pangutana, dili lang mga pangutana nga ilang gibati nga gusto natong ilang ipangutana. Mga pangutana kini nga usahay dili komportable ug dili sayon nga tubagon, ug ok lang kana. Dili kini ibaliwala kay, tungod kay nagtuo gani ko nga kay aduna sila niining mga lisud nga mga pangutana nagtimaan kini sa ilang interes. Ug kita sa pagkatinuod dili gusto nga sila uyon-uyon lang nga mga partisipante. Gusto nato nga mangutana sila. Ang atong trabaho mao ang pagtabang sa paggiya nila ngadto sa tukmang mga tinubdan, labing importante ang Ginoo, sa pagdawat ug paglihok subay sa personal nga pagpadayag. Ug kinahanglan kitang mohimo sa mao gihapon samtang maghimo kita og mga kahimtang sa pagsalig diin mobati silang luwas nga mosulti sa ilang mga gituohan ug usahay sa ilang mga pagduhaduha. Sa akong hunahuna samtang kita maghimo niini nga mga sitwasyon nga luwas ug samtang kita nagrespeto gayud kanila, sa ilang salabutan, sa ilang mga kapabilidad, unsa ang ikatudlo nila kanato, ug unsa ang ilang ikatanyag, samtang kita mohatag kanila og oportunidad sa pagtubag sa tawag sa usa ka propeta ug ni Jesukristo ug moapil sa buhat sa kaluwasan ug kahimayaan, hunahuna nako ang pagbati nga makita, madungog, ug gikinahanglan mao ang natural nga resulta.
Sister. Aburto: Tingali kita kinahanglan usab nga mahimong sensitibo sa mga estudyante kinsa adunay managlahing sirkumstansya sa ilang kinabuhi, ug sa ilang mga pamilya. Kita kinahanglang maniguro nga mobati sila nga nahilakip, nga sila kabahin niini nga Simbahan ug niini nga lawas ni Kristo, nga mao kitang tanan. Mibati ko nga kita usab kinahanglan nga magmainampingon sa mga pulong nga atong gamiton. Sama pananglit, dunay mga estudyante nga tingali wala magpuyo uban sa ilang mga ginikanan, mao nga kita mahimong mosulti nga “sa inyong pamilya” o “ang mga tawo nga inyong gihigugma” imbis nga moingon og “mga ginikanan.” Naghunahuna usab ako nga ang pagkahuyang makatabang aron sila makakita nga kitang tanan nanglimbasog og usa ka butang, nga kitang tanan adunay kaugalingon natong mga kahuyang. Mao nga tingali ang pagtabang sa mga estudyante nga mobati nga kabahin niini nga panaw nga atong gisaw-an, nga walay perpekto, makatabang nga sila mobati mga importante sila. Ug usab, siyempre, ang pagpaminaw kanila, pagpaminaw sa ilang mga komentaryo, pagpaminaw sa ilang mga gipangutana. Kon mangutana sila, kinahanglan lang kita nga mohunong sa unsay atong gibuhat ug tabangan sila sa pagpangita sa tubag sa ilang mga kaugalingon—dili gayud kinahanglan nga ihatag kanila og mga tubag apan sa pagpangita sa tubag sa ilang mga kaugalingon diha sa mga kasulatan pinaagi sa pag-ampo, pinaagi sa mga pulong sa buhing mga propeta.
Sister Johnson: Gusto lang kong mosulti nga ang pagsinati niini nga mga pangutana nakapahunahuna nako og balik sa nangaging mga magtutudlo sa akong kinabuhi.ug ang kaimportante nila sa akong kinabuhi––talagsaon kaayo. Mapasalamaton kaayo ko niining katapusang mga adlaw sa pagpangandam niini sa paghunahuna bahin sa nangagi nakong mga magtutudlo ug sa ilang gugma, ug sa ilang debosyon sa Manluluwas ug unsa kadako ang epekto niini. Mibati ako nga importante kaayo ug makahuluganon kaayo tungod kanila ug sa ilang gugma sa Manluluwas ug kanako. Hangtud sa hangtud akong mapasalamaton sa tanang maayong mga magtutudlo nga anaa kanato niini nga Simbahan. Maanindot lang gayud kaayo nga kasinatian ang paghunahuna og balik sa pagkamaayo.
Brother Willard: Kon moabut kita niini, ang ehemplo sa talagsaong magtutudlo daghan kaayo. Kana daghan og ikasulti kay sa niini nga panel nga diskusyon o sa mga pakigpulong nga walay katapusan bahin sa pagpanudlo. Ang gikinahanglan lang niini mao ang paghunahuna sa magtutudlo kinsa mipanalangin sa imong kinabuhi, sa paghunahuna sa indibidwal kinsa mitabang nimo ug nangalangad kanimo nga nakapanalangin sa imong kinabuhi. Ug nahibalo ko nga sermon kana nga mas taas ang pagpamulong kay sa atong mahimo sa atong panahon karon. Mao nga salamat kaayo niana nga pahinumdom.
Sa atong pagtapos karon, magpasalamat lang ko ninyong tanan dinhi sa panel sa pagtudlo kanamo pinaagi sa inyong mga pulong sa atong diskusyon karon apan, labawng importante, sa inyong mga ehemplo sa pagpakabuhi nga sama kang Kristo. Mga disipulo kamo ni Jesukristo, ug para nako pribilehiyo kini nga gikauban kamo ug magkat-on gikan kaninyo. Sa atong tumatan-aw nga naminaw karon sa tibuok kalibutan, sa ngalan sa matag usa kanamo diha sa panel, gihigugma namo kamo. Salamat kaninyo sa daghang pamaagi nga inyong gitinguha sa pagpanalangin sa mga anak sa Dios. Mosaksi ako nga Siya buhi: Iya kini nga buhat. Ug ako nag-ampo nga ang Iyang pinakabuhong nga mga panalangin ibubu sa matag usa sa inyong kinabuhi, bisan asa man kamo, sa ngalan ni Jesukristo, amen.