Kamo sakop sa Relief Society
2024 Tibuok Kalibotan nga Debosyonal sa Relief Society
Dominggo, Marso 17, 2024
Presidente Camille N. Johnson: Igsoon kong mga babaye, ah unsa ko kamo kamahal! Pagkadakong oportunidad kini nga magkapundok sa tibuok kalibotan niining makasaysayanon nga okasyon, sa ika-182 nga anibersaryo sa pag-organisar sa Relief Society. Bisan asa kamo nagpuyo, bisan unsa ang inyong pinulongan, bisan asa kamo gitawag sa pag-alagad, kamo nahisakop sa usa ka kapunongan sa mga babaye nga balaang gitukod sa pagdala sa gugma ug kahupayan ni Jesukristo ngadto sa uban. Ug kaninyong tanan nga mo-18 na karong tuiga nga moapil na unya sa Relief Society, welcome. Gikinahanglan mo namo; gihigugma mo namo!
Ania ko uban sa akong mga magtatambag, si Sister Dennis ug Sister Yee, ug ang mga Kapangulohan sa Kinatibuk-ang Primary ug Kinatibuk-ang Young Women. Ania kami dinhi sa Gambalay sa Relief Society, diin kami nagtinabangay, kauban nga nag-ampo, ug nagtinambagay. Nakigbahin kami og usa ka komon nga katuyoan: sa pagtabang sa pagtukod og tibuok kinabuhi nga mga disipulo ni Jesukristo kinsa naghupot sa ilang mga pakigsaad ug tinguha ug mosarang alang sa labing importante sa tanang panalangin, mahangtorong kinabuhi uban sa Dios ug sa mga tawo nga ilang gihigugma. Pipila kaninyo gitawag sulod sa usa ka panahon sa pag-alagad sa kabataan sa Primary o sa pag-alagad sa atong young women. Bisan asa kamo nagserbisyo, nahisakop gihapon kamo sa Relief Society.
Presidente Susan H. Porter: Isip sakop sa Relief Society nakahimo kini kanako sa pagkat-on gikan sa gipahinungod nga mga babaye sa tibuok kalibotan kon unsay gipasabot sa paghigugma ug pag-alagad sama sa Manluluwas. Karong panahona gitawag ko sa pagtabang sa kabataan sa Simbahan sa pagduol ngadto ni Kristo. Mapasalamaton ko nga kanunay kong sakop sa Relief Society.
Presidente Emily Belle Freeman: Sa mga katuigang milabay, usa ka tigpangalagad nga sister miingon kanako, “Ganahan ko sa Relief Society! Gitukod nako ang akong panimalay sa mga baroganan niini; gitukod nako ang akong kinabuhi sa mga baroganan niini.” Iyang gisilsil diri kanako ang pagtuo sa kahupayan nga gikan sa kapunongan nga nagsunod ni Jesukristo. Iya kong gitudloan nga bisan asa pa ako nag-alagad sa Simbahan, ang Relief Society maoy akong pinuy-anan.
Presidente Johnson: Unsa ka nindot nga pagpahayag sa buhat sa Relief Society—sa pagdala sa Iyang kahupayan ngadto sa bag-o nga kaliwatan pinaagi sa pagtabang sa pag-establisar ug paglig-on og personal nga koneksiyon ug pasalig ngadto ni Jesukristo diha sa atong kabataan ug kabatan-onan.