Ang Impluwensya sa Kababayen-an
2024 nga Tibuok Kalibotan nga Debosyonal sa Relief Society
Dominggo, Marso 17, 2024
Minahal kong kaigsoonan sa Relief Society, mapasalamaton ko nga mamulong kaninyo karon. Kamo ania kanunay sa akong hunahuna. Mapasalamaton kaayo ko kaninyo ug mibati nga utangan ninyo. Daghan sa kaayohan nga nahimo niini nga Simbahan—ug daghan kaayo sa kaayohan nga nahitabo sa kalibotan—nahitabo tungod kaninyo! Salamat sa inyong debosyon ngadto sa Ginoo ingon man usab sa inyong mga paningkamot sa pagtuboy sa uban. Nasayod ko unsa ka dako ang gugma sa Ginoo kaninyo ug nagdepende kaninyo.
Natingala ko sa inyong hugot nga pagtuo ug ka sensitibo sa mga butang sa Espiritu. Nadasig ko sa inyong kakugi, kaabtik nga pagpangulo, ug sa inyong abilidad sa pagkakita sa panginahanglan ug sa pagtubag niini. Bisan ang kakulang sa kahibalo sa pagbasa ug pagsulat, malnutrisyon, mga problema sa kahimsog sa pangisip, o sa inadlaw-adlaw nga mga panginahanglan sa uban, inyong gisulbad ang tinuod nga mga isyu sa kinabuhi ginamit ang talagsaon nga kombinasyon sa kahanas, kaluoy, pagsabot, ug gugma. Ang tibuok misyon sa Simbahan sa Ginoo nalig-on tungod kaninyo.
Mga sister, kamo adunay balaan nga pagtuga nga nakapahimo ninyo sa literal nga paagi sa pag-usab og mga kinabuhi! Tinuod gayod kini samtang kita matinguhaon nga moapil sa balaan nga sugo sa pagpundok sa Israel. Bisan kanus-a nga kita motabang ni bisan kinsa nga makakita sa dalan sa pakigsaad ug magpabilin niini, kita nagtabang sa pagpundok sa Israel. Walay lain nga makahimo niini nga mas maayo kay kaninyo—isip mga inahan, mga lider, mga magtutudlo, mga sister, ug mga higala. Inyong giandam ang umaabot nga mga henerasyon sa Simbahan sa Ginoo ug ang kalibotan!
Karong bag-o, among nahibaloan ang bahin sa gamay nga tres anyos nga batang babaye nga nahigmata sa iyang pagtagpilaw. Aron sa paglingaw kaniya, ang iyang igsoong lalaki mihatag kaniya og nagkadaiya nga dulaan nga hayop. Apan unsa ang nakapahupay ug nakapalipay niya sa kataposan? Ang iyang kaugalingong kopya sa Basahon ni Mormon! Kining gamay nga batang babaye nagtan-aw sa iyang inahan nga mobasa sa Basahon ni Mormon kada adlaw. Gusto siya nga mahimong sama sa iyang inahan!
Dili gayod posible ang pag-ihap sa makapaayo sa kinabuhi nga impluwensya sa mga babaye sa pakigsaad sa Dios. Gimahal nako ang akong Kaigsoonan, ug akong gimahal ang pribilihiyo nga makigtambayayong uban kanila. Hinuon, ang duha ka tawo sa yuta nga labing nakaimpluwensya nako mao ang akong asawa nga si Dantzel, inahan sa among 10 ka anak, kinsa namatay og kalit sa edad nga 78, ug sa milabay nga 18 ka tuig, ang akong talagsaong asawa nga si Wendy.
Atol sa akong bag-ong tinguha nga mamaayo gikan sa pagkatumba, si Wendy walay kutas nga miatiman nako sa pisikal ug sa espirituwal nga mga paagi nga walay usa ang makahimo. Ang dakong impluwensya nga gihatag nila ni Dantzel ug Wendy kanako dili mahimong mapagamay. Sila nakapausab sa akong kinabuhi! Sila nakahimo sa akong kinabuhi nga mas kompleto.
Ang mga babaye anaa sa sentro sa plano sa atong Langitnong Amahan gikan sa sinugdanan. Ang plano sa Dios sa kaluwasan nagdepende sa bayanihong mga aksiyon sa duha ka maisogon nga babaye—si Eva,1 “ang inahan sa tanan,”2 ug si Maria,3 ang inahan sa atong Ginoo nga si Jesukristo.
Mga sister, palihog ayaw ipakaminos ang talagsaong gahom nga anaa kaninyo sa pag-impluwensya sa uban alang sa kaayohan. Usa kini ka gasa nga gituga sa Langitnong Amahan sa matag babaye sa pakigsaad. Isip usa ka anak nga babaye sa pakigsaad sa Dios, kamo adunay abilidad nga mobati sa Espiritu ug kusog nga paghukom sa matarong gikan sa sayop nga mohatag ninyo og kapasidad sa pagdawat og personal nga pagpadayag ug sa pag-ila sa kamatuoran gikan sa sayop. Sa pagsulti niini, wala nako giabswelto ang mga lalaki gikan sa pag-ila sa matarong gikan sa sayop o sa pagbuhat sa espirituwal nga buhat sa pagdawat og pagpadayag. Apan, kon ang kalibotan mawad-an gayod sa moral nga katarong sa mga babaye niini, ang kalibotan dili gayod makabawi.4
Mga sister, kami nagkinahanglan sa inyong mga tingog nga magtudlo sa doktrina ni Kristo. Nagkinahanglan kami sa inyong abilidad isip mga babaye nga makamatikod sa panglimbong ug sa pagpasabot sa kamatuoran. Nagkinahanglan kami sa inyong dinasig nga kaalam sa mga konseho sa inyong pamilya, ward, ug stake, ingon man usab sa ubang mga dapit sa impluwensya sa tibuok kalibotan. Ang inyong pamilya, ang Simbahan, ug ang kalibotan nagkinahanglan ninyo! Mga sister, walay usa nga makahimo sa tanan, ni inyong kinahanglan nga sulayan kini. Hinuon, nasayod ko kon unsa ka importante ang inyong bahin sa pagtukod sa gingharian sa Dios.
Mao nga, karon, ako modapit kaninyo sa paghimo sa mga kasulatan nga inyong personal nga Liahona,5 ang templo nga inyong dapit nga kadangpan ug katutokan, ug ang inyong personal nga mga pag-ampo ang paagi nga inyong makat-onan asa kamo gikinahanglan sa Ginoo nianang adlawa. Paglabay sa panahon, kamo masurprisa kon giunsa Niya kamo sa paggiya aron kamo eksakto nga maanaa diin kamo makapangulo, makagiya, ug makalakaw tupad sa usa ka tawo nga nagkinahanglan kaninyo.
Tungod niana nga katarongan, ako mopanalangin kaninyo og dugang espirituwal nga pag-ila ug abilidad nga makakaplag og kalipay sa paghatag og kahupayan ngadto sa uban. Ako mopanalangin kaninyo sa kaalam sa pag-ila sa unsay gikinahanglan ug dili modagan og mas kusog kay sa inyong mahimo. Ako mopanalangin kaninyo og kaisog sa pagkab-ot sa inyong balaanon nga mga pribilihiyo isip usa ka anak nga babaye sa pakigsaad sa Dios. Ako mopanalangin kaninyo nga mobati og lawom nga ang Langitnong Amahan ug ang Iyang Anak, si Jesukristo nakaila kaninyo ug nahigugma kaninyo. Sila mipadala kaninyo sa yuta karon tungod kamo importante sa gingharian sa Dios karon! Ako mopanalangin kaninyo nga makaamgo nga ang inyong balaan nga mga gasa isip anak nga babaye sa Dios naghatag kaninyo og gahom dili lamang sa pag-usab sa mga kinabuhi apan sa pag-usab sa kalibotan!
Ako nahigugma kaninyo, akong minahal nga mga igsoong babaye. Kining mga butanga tinuod. Kitang tanan apil sa buhat sa Ginoo. Ako mopamatuod nga si Jesukristo buhi! Siya nagbarog sa ulohan niini nga Simbahan. Sa ngalan ni Jesukristo, amen.