Pagkab-ot sa Gahom sa Dios pinaagi sa mga Pakigsaad
2024 Tibuok Kalibotan nga Debosyonal sa Relief Society - Mga Pre-rekording
Dominggo, Marso 17, 2024
Minahal nga mga sister, ang atong propeta, si Presidente Russell M. Nelson, nagbalik-balik og pamulong kabahin sa gahom sa pagkapari nga anaa sa kalalakin-an ug kababayen-an pinaagi sa pakigsaad nga relasyon ngadto sa Dios.1 Miingon Siya:
“Ang matag babaye ug matag lalaki kinsa … mohimo … sa mga ordinansa sa pagkapari [ug kinsa mohimo ug motuman niadto nga mga pakigsaad sa Dios] direktang makaangkon sa gahom sa Dios. Kadtong gitugahan diha sa balay sa Ginoo makadawat og gasa sa gahom sa pagkapari sa Dios pinaagi sa hiyas sa ilang pakigsaad, uban sa gasa sa kahibalo nga masayod unsaon paggamit niana nga gahom.
“Ang kalangitan abli ngadto sa mga babaye kinsa natugahan sa gahom sa Dios nga gikan sa ilang mga pakigsaad sa pagkapari sama ngadto sa mga lalaki kinsa naghupot sa pagkapari.”2
Isip anak nga mga babaye sa Dios, kita mahimong matugahan uban sa gahom sa pagkapari––ang gahom sa Dios nga moabot kanato samtang kita naghimo ug nagsunod sa mga pakigsaad sa pagkapari. Kini adunay sama ka importante nga mga pagpasabot. Isip natugahan nga mga babaye, kita adunay katungod sa paggamit sa walay pagpugong sa gahom sa Manluluwas sa pagtabang sa atong mga kaugalingon, atong mga pamilya, ug sa uban.3
Nadawat ko ang akong pagtuga sa dihang ako 20 anyos ang panuigon, apan sulod sa mga dekada wala ako makasabot sa langitnong gahom nga akong naangkon pinaagi sa mga pakigsaad nga akong nahimo uban sa akong Amahan sa Langit ug ni Jesukristo. Hinoon, karon samtang akong hinumdoman, akong nailhan ang dugang nga kalig-on ug kapasidad nga ako gihatagan sa paghupay sa daghang nagkalain-laing mga hagit diha sa nagkadaiyang mga kahimtang sa kinabuhi. Pagkadako sa panalangin nga kita nagpuyo sa usa ka panahon nga adunay dugang pa nga pagsabot sa nagtubo nga gahom, kalinaw, ug kalig-on nga mahimong maato pinaagi sa pakigsaad nga relasyon ngadto sa Dios.
Ang atong Amahan sa Langit naghigugma sa Iyang tanang mga anak, ug Siya gusto nga maapil sa atong mga kinabuhi. Apan dili Siya molapas sa atong kabubut-on. Dili Niya ipugos ang Iyang Kaugalingon diha sa atong mga kinabuhi. Kon atong gamiton ang atong kabubut-on sa pagpili sa pagsulod ngadto sa usa ka pakigsaad nga relasyon uban Kaniya, kita nagsaksi ngadto Kaniya nga kita gusto nga Siya moapil gayod diha sa atong mga kinabuhi ug nga kita andam sa pagbayad sa bili aron madawat ang nagtubo nga gahom ug mga pribilihiyo nga moabot uban niana nga pakigsaad nga relasyon.
Sama sa gitudlo sa atong propeta, kon kita mosulod og usa ka pakigsaad nga relasyon ngadto sa Dios, ang atong relasyon uban Kaniya mahimong mas suod kaysa wala pa ang pakigsaad ug Siya dili gayod mobiya niana nga relasyon. Siya dili gayod kapoyon sa Iyang mga paningkamot sa pagtabang kanato, ug kita dili gayod makapahubas sa Iyang pagkamapailobon ngari kanato. Kita sa hingpit nga kalipay nahiusa sa pagkabugkos pinaagi sa walay kataposang pakigsaad nga atong gipili sa pagsulod uban Kaniya.4
Kini nga kahibalo kinahanglang mohatag kanato og dakong kalinaw ug kasegurohan samtang kita nagsinati sa mga kalisod ug mga kaguol niini nga kinabuhi. Ang gahom sa pagkapari sa Dios mopadako sa atong espirituwal nga mga gasa ug mga talento, kini mohatag kanato og kalig-on lapas sa kaugalingon natong pagpas-an sa bug-at nga mga palas-anon sa mortalidad, ug kini mohatag kanato og kalinaw ug gahom nga atong gikinahanglan samtang kita nag-atubang sa pisikal, emosyonal, ug espirituwal nga mga kalisod nga makapatay-og sa atong mga kinabuhi.
Kini nga gahom nga nagagikan sa atong mga pakigsaad makapanalangin sa atong mga kinabuhi sa daghan kaayong mga paagi tungod kay kini gahom sa Dios! Ang mga inahan makagamit sa Iyang gahom alang sa dugang nga kapasidad ug kusog sa pagsagubang sa ilang inadlaw nga mga hagit ug sa mas klaro nga paagi madungog ang direksiyon sa Ginoo sa pagtabang ug paggiya sa ilang mga anak. Kadtong kinsa nawad-an og usa ka minahal pinaagi sa kamatayon o diborsiyo makasangpit sa Iyang gahom aron mabati ang kahupay ug pagtabang. Ang gahom sa Dios makahatag usab og paglaom ngadto niadtong kinsa adunay kalisod sa pagkakita sa bisan unsa nga kahayag diha sa ilang mga kinabuhi tungod sa hilabihan nga kalisod sa kahimtang sa kinabuhi nga ilang giatubang.
Agi og dugang ngadto sa gahom nga makapanalangin kanato pinaagi sa pagsunod sa atong mga pakigsaad sa pagkapari, kon kita gitawag ug gi-set apart o gihatagan og buluhaton sa pagtabang sa buhat sa Dios, kita gihatagan usab og awtoridad sa pagkapari––awtoridad sa Dios sa pagrepresentar Kaniya samtang kita nagtuman sa atong mga calling ug mga buluhaton.5 Sa 2014, sa dihang ang akong bana ug ako nagserbisyo isip mga lider sa misyon didto sa Ecuador, si Presidente Dallin H. Oaks miingon niini diha sa kinatibuk-ang komperensiya: “Wala kita maanad nga mosulti kabahin sa kababayen-an nga adunay awtoridad sa pagkapari diha sa ilang mga calling sa Simbahan, apan unsa man diay kanang laing awtoridad?”6 Mapasalamaton kaayo ako niining dugang nga pagsabot, ug ako naningkamot sa pagtudlo niini nga kamatuoran sukad niadto ngadto sa kababayen-an nga ako adunay impluwensiya. Miingon si Presidente Nelson, “Isip usa ka matarong, natugahan nga babaye nga Santos sa Ulahing Adlaw, kamo makasulti ug makatudlo uban sa gahom ug awtoridad gikan sa Dios.”7
Walay laing relihiyosong organisasyon sa kalibotan, nga ako nahibalo, nga dako kaayo ang paghatag sa gahom ug awtoridad ngadto sa kababayen-an. Adunay mga relihiyon nga nag-orden og pipila ka mga babaye ngadto sa mga posisyon sama sa mga pari ug mga pastor, apan diyutay ra kaayo kabahin ngadto sa gidaghanon sa mga babaye diha sa ilang mga kongregasyon ang nagdawat niana nga awtoridad nga gihatag sa ilang simbahan kanila. Sa kalainan, ang tanang kababayen-an, 18 anyos pataas, sa Ang Simbahan ni Jesukristo sa mga Santos sa Ulahing mga Adlaw kinsa nagpili og usa ka pakigsaad nga relasyon uban sa Dios diha sa balay sa Ginoo gitugahan sa gahom sa pagkapari nga direkta gikan sa Dios. Ug samtang nagserbisyo kita sa bisan unsa nga calling o buluhaton, lakip ang pagpangalagad nga mga bulohaton, gihatagan kita og awtoridad sa pagkapari sa pagbuhat niadto nga mga responsibilidad.8 Akong minahal nga mga sister, kamo sakop sa usa ka Simbahan diin nagtanyag sa tanan niini nga kababayen-an sa gahom ug awtoridad sa pagkapari nga gikan sa Dios!
Bisan pa niana, sama lamang sa iyang gibuhat ngadto ni Adan ug ni Eva didto sa Tanaman sa Eden uban sa kahoy sa kinabuhi,9 ang kaaway gusto nga mopunting sa atong atensyon diha sa unsay kita wala mahatagi ug nagbuta kanato ngadto sa tanan nga kita nahatagan. Mga sister, ang mga henerasyon nga nagsunod kanato ma-impluwensiya pinaagi sa mga pagpili nga atong gihimo karon. Magpili kita og lig-on nga pagkakonektar nga pakigsaad nga relasyon ngadto sa atong Langitnong Amahan ug ni Jesukristo aron kita makadapit sa Ilang gahom, sa Ilang kalig-on, ug sa Ilang kahupay sa mas hingpit nga paagi nganhi sa atong mga kinabuhi.
Nahibalo ako nga ang balaang mga pribilihiyo ug mga panalangin nga mahimong maatoa samtang atong pilion kana nga pakigsaad nga relasyon mopanalangin sa atong mga anak ug mga apo sulod sa mga henerasyon nga moabot.