Isip Iyang Anak nga mga Babaye sa Pakigsaad, Kita Mao ang Agianan Diin Mahatag ni Jesukristo ang Kahupayan
2024 Tibuok Kalibotan nga Debosyonal sa Relief Society - Pre-recordings
Dominggo, Marso 17, 2024
Isip Iyang anak nga mga babaye sa pakigsaad, kita mao ang agianan aron mahatag ni Jesukristo ang Iyang kahupayan.
Mga sister, kamo nagtuman sa inyong balaanong mando isip sakop sa Relief Society sa higayon nga kamo mobuhat og bisan unsang butang nga magdala og kahupayan ngadto sa uban—temporal man o espiritwal—tungod kay inyong gidala ngadto kanila ang gugma ni Jesukristo.
Mopamatuod ko nga kon buhaton ninyo, kamo mapanalanginan nga makaplagan ang inyong kaugalingong kahupayan diha Kaniya. Si Jesukristo ang kahupayan. Ug kamo sakop sa Relief Society.
Gikan nianang gamay nga grupo sa 20 ka babaye, nga nagpundok sa Nauvoo niadtong 1842, usa ka tibuok kalibotan nga organisasyon sa dul-an 8 ka milyon nga mga babaye ang milambo. Ang Relief Society maoy nanguna sa tibuok kalibotan nga makitawhanong inisyatibo sa Simbahan aron matubag ang mga panginahanglan sa mga babaye ug kabataan.
Isip mga anak nga babaye sa pakigsaad sa Dios, kita naningkamot sa pag-atiman niadtong nanginahanglan pinaagi sa pag-apil sa makitawhanong mga paningkamot nga adunay dako kaayong posible nga epekto. Ang tibuok kalibotan nga pag-uswag nagsugod sa mga babaye ug sa kabataan, ug busa among giuna ang ilang mga panginahanglan pinaagi sa pag-atiman sa inahan ug sa bag-ong nahimugso, mga paningkamot sa nutrisyon sa bata, mga pagbakuna, ug edukasyon sa tibuok kalibotan.
Akong minahal nga mga sister, kamo kabahin niining tibuok kalibotan nga paningkamot kon kamo malumong moatiman sa inyong kaugalingong anak, motudlo og higala sa pagbasa, mapailobong motubag sa mga panginahanglan sa usa ka tigulang nga silingan, maghilak uban sa usa ka sister nga nagbangutan, mag-andam og pagkaon alang sa masakiton, ug mangalagad sama sa gibuhat sa Manluluwas.
Kasagaran ang labing maayo nga makitawhanon nga tabang mao ang paghatag og gagmay nga mga buhat sa pagkamabination kada adlaw ngadto sa mga tawo nga duol kanato. Kon kamo moserbisyo sa inyong mga pamilya ug sa inyong mga silingan, kabahin kamo sa atong tibuok kalibotan nga kawsa. Salamat sa pagpahayag sa inyong pagpamatuod bahin ni Jesukristo pinaagi sa pagkahimong Iyang malumong mga kamot, Iyang abtik nga mga tiil, Iyang maminaw nga mga dunggan, Iyang mabination nga mga ngabil.
Among gitimbang-timbang ang mga panginahanglan sa tibuok kalibotan, ug dayon among gitinguha nga mahatag kadtong mga panginahanglan sa tinagsa, sama sa gibuhat sa Manluluwas. Ang Manluluwas nangalagad ngadto sa usa ka babaye diha sa atabay. Siya miayo sa usa ka anak nga babaye ni Jairo. Siya mipanalangin sa kabataan nga Nephita sa tinagsa. Siya nahigugma kanato sa tinagsa.
Atong dad-on ang Iyang kahupayan ngadto sa uban, sa tinagsa.
Ang Relief Society naorganisar atol sa pagtukod sa templo sa Nauvoo ug sa pagpaabot sa mga ordinansa ug mga pakigsaad nga matanyag didto. Ang mga sister miapil sa pisikal nga mga pagpangandam alang sa templo ug andam sa espirituhanong paagi sa pagdawat sa mga panalangin sa templo pinaagi ni Propeta Joseph Smith.
Karon, niining panahon sa wala pa sukad kapaspas ang pagtukod og templo, ang tumong sa Relief Society nagpabilin nga pareho: sa pag-andam sa mga tawo sa temporal ug espiritwal nga paagi alang sa mga panalangin sa balay sa Ginoo.
Gusto namo nga ang atong mga sister sa Relief Society makagamit sa tanang mga panalangin sa usa ka pakigsaad nga relasyon uban sa Dios, lakip ang Iyang gahom sa pagkapari nga anaa niadtong mohimo og mga pakigsaad diha sa balay sa Ginoo. Walay kalibotanong organisasyon nga makapahayag og ikatandi, gipili nga balaanong mga katuyoan ug mga tumong ngadto nianang sa Relief Society.