Pagkahimong Usa sa Dios pinaagi sa Imong mga Pakigsaad

2024 Tibuok Kalibotan nga Debosyonal sa Relief Society

Kristin M. Yee

Ikaduhang Magtatambag sa Kinatibuk-ang Kapangulohan sa Relief Society

Dominggo, Marso 17, 2024

Mahal kong mga sister, matag usa kanato adunay oportunidad sa pagpakig-uban sa Ginoo sa gamhanang paagi pinaagi sa atong mga pakigsaad. Ingon sa gitudlo ni Presidente Russell M. Nelson, “Ang dalan sa pakigsaad mahitungod gayod sa atong relasyon uban sa Dios”¹—usa ka relasyon nga may mahangtorong mga pagbugkos ug importante nga mga panalangin.

Usa niadto nga mga panalangin mao ang makahupay ug malungtarong panag-uban sa atong Manluluwas nga si Jesukristo sa “tanan natong gibuhat.” Wala gayod kita mag-inusara. Dili kinahanglan nga magnabigar kita sa mga hagit, sa mga walay kaseguroan, ug sa mga kahuyang sa kinabuhi nga mag-inusara. Anaa Siya sa atong kiliran; mao kini ang atong saad ug panalangin sa pakigsaad. Nahigugma Siya kanimo ug nagtinguha nga mahimong kabahin sa imong kinabuhi, sa imong mga kabalaka, sa imong kalipay, ug sa imong mga desisyon. Si Jesukristo nagtinguha sa paghatag kanimo sa Iyang kahupayan.

Isip usa ka sister nga wala pa maminyo, kini nga relasyon sa pakigsaad uban sa Dios adunay lawom nga dapit sa akong kinabuhi ug mao ang tinubdan sa akong kalinaw, seguridad, kalipay, ug direksiyon. Ang atong Amahan sa Langit ug ang Manluluwas nagtinguha niini nga mga panalangin alang sa matag usa kanato bisan unsa pa ang atong kahimtang. Sila nakakita kanimo ug nasayod Sila sa imong gibuhat.

Usahay, sa kataposan sa adlaw, gusto kong makig-sulti og usa ka tawo bahin sa malumong kaluoy gikan sa Ginoo nga akong nasaksihan o sa malisod nga sitwasyon nga ako nanlimbasog. Usahay ang Ginoo maloloy-ong mopadala og mga higala, pamilya, ug uban diri kanako, ug usahay Siya moaghat kanako sa pagdangop ngadto kanila. Apan sa makadaghang higayon, aduna koy pribilihiyo ug panalangin sa pagpakigsulti ngadto sa akong Amahan sa Langit bahin sa akong adlaw ug ang gibati sa akong kasingkasing. Tungod niini, nahimo kong mas maayo uban sa Dios, ug mas maayong mopakigtambag uban Kaniya. Mibati ko og mas duol ug makanunayong gugma gikan Kaniya. Ug niini nga relasyon, mibati ko og luwas diha sa Iyang gugma ug kaalam ug sa Iyang hingpit nga pagsabot kanako ug sa akong mga gikinahanglan. Nakapalambo ako og lawom nga gugma ug pasalamat alang Kaniya ug sa Iyang balaang presensya sa akong kinabuhi. Kini nga panag-uban pinaagi sa atong mga pakigsaad tinuod. Si Jesukristo buhi. Ug Siya nagtinguha sa pagtabang kanimo ug nagtanyag sa Iyang makaayo nga gugma ug kahupayan. Wala gayod kita mag-inusara.

Diha sa 3 Nephi, ang Manluluwas miampo ngadto sa Amahan alang sa matinud-anon, lakip kanimo ug kanako: “Amahan, Ako wala mag-ampo alang sa kalibotan, apan alang niadto kinsa ikaw mihatag kanako gikan sa kalibotan, tungod sa ilang hugot nga pagtuo, nga aron unta sila maputli ngari kanako, nga Ako unta anaa kanila ingon nga ikaw, Amahan, ania kanako, nga kita magkahiusa.”²

Kita gituyo nga mamahimong usa uban sa Dios pinaagi sa atong mga pakigsaad. Kon kita mopili sa pagsulod og relasyon sa pakigsaad uban Kaniya, kita mopili sa pag-usab, sa paghinulsol ug maninguha pag-usab, aron mamahimong putli ingon nga Siya putli. Kini nga kausaban nahimong posible pinaagi ni Jesukristo ug sa Iyang Pag-ula. Ang pagsunod sa atong mga pakigsaad makapausab sa atong mga kinaiyahan nga mamahimong sama Kaniya, magdala kanato nga mas duol ug mas duol nga mamahimong usa pinaagi sa Iyang Espiritu. Unsa ka makahupay ug gasa kini. Samtang nagpalambo kita sa atong relasyon sa pakigsaad uban sa Dios, tanang uban nga mga relasyon sa atong kinabuhi mabayaw.

Nagdapit kami kaninyo sa pag-angkon niining mahigugmaong relasyon pinaagi sa paghupot sa inyong mga pakigsaad, paggahin og panahon uban sa atong Manluluwas nga si Jesukristo diha sa Iyang balaang balay, diha sa pag-ampo, sa pagtuon, ug sa pagpangalagad sama Kaniya. Ug nagdapit kami kaninyo sa pagkat-on kutob sa inyong mahimo bahin sa pag-angkon sa Iyang pakigsaad nga panalangin sa gahom sa pagkapari.

Samtang diha sa usa ka buluhaton, usa ka mahal nga sister nangutana og usa ka nindot nga pangutana bahin kon unsaon sa paghimo sa usa ka panimalay nga usa ka sagrado nga dapit kon dili pa minyo. Kanunay kitang mosulti mahitungod sa paghimo og panimalay, apan unsa may hitsura niini?

Gusto kong mopakigbahin og pipila ka kamatuoran nga nahunahunaan, nga magamit kanatong tanan bisan unsa pa ang atong kahimtang.

Isip mga anak nga babaye sa Dios, matag usa kanato nahisakop sa Iyang mahigugmaong mahangtoron nga pamilya. Bisan og dili pa ko minyo karon, wala gyod ko magtan-aw sa akong kaugalingon nga dili minyo. Isip mga anak nga babaye sa Dios, adunay daghan pa alang kanimo ug kanako kaysa kahimtang sa kaminyoon o demograpiko nga marka.

Kitang tanan gikan sa yutan-ong pamilya usab, mao nga aduna kitay trabaho nga buhaton aron sa pagsuporta ug pagtabang sa atong pamilya, ang atong kaugalingong pamilya ug paryente ug niadtong lapas pa sa tabil. Matag usa kanato adunay mahinungdanon, makapaayo nga tahas nga buhaton diha sa mahangtoron nga kadena sa mga pagbugkos sa pamilya. Isip mga babaye sa pakigsaad sa Relief Society, aduna kitay tahas sa pagdala sa kahupayan sa Manluluwas ngadto sa atong mga pamilya ug sa tanang anak sa Dios. Motabang kita sa pagdala kanila ngadto ni Kristo.
Makamugna kita og “panimalay” diin ang Espiritu magpuyo ug magdala sa uban ngadto niana nga sagrado nga luna aron higugmaon ug amomahon. Ang imong panimalay, ang imong apartment, ang imong lawak, nagdala sa Espiritu nga imong gipadayon sa imong kinabuhi. Makamugna kita og mga dapit nga may seguridad ug kahilwasan gikan sa kalibotan, diin ang mga butang sa kahangtoran nagpatigbabaw ug diin posible ang kapahulayan. Matag usa kanato adunay panalangin ug pribilihiyo niini nga pagkatinugyanan, ang pagkatinugyanan sa pagmugna og “panimalay” diin anaa ang gugma ug kahupayan ni Jesukristo.
Kanunay kitang naglambo. Dili kinahanglan nga magpaabot pa og laing tawo aron molambo. Bisan unsa pa ang atong kahimtang sa kaminyoon o kaagi, kon andam kitang mosunod sa Manluluwas, Siya mohatag og igong mga oportunidad alang kanato sa pagkat-on ug pagtubo, sa pagpahayag ug pagtukod og mga relasyon, sa paghinulsol ug pagpasaylo, sa paghigugma ug pag-amuma, ug sa pagduol ngadto ni Kristo ug mag-usab.
Minahal nga mga sister, ang inyong impluwensiya halangdon, ug ang inyong mga gasa gikinahanglan. Tan-awa ang mga kinabuhi niadtong anaa sa inyong palibot ug niadtong kinsa gibutang sa Ginoo diha sa inyong impluwensiya. Alang kanako, gibati nako nga kabahin ko sa mga kinabuhi sa akong mga pag-umangkon ug sa paghigugma ug pagtabang kanila nga masayod kinsa gayod sila isip mga anak sa Dios. Gibati ko usab nga awhagon ug higugmaon ang kabatan-onan ug mga pamilya sa akong kasilinganan. Ug gibati nako nga kinahanglan kong motabang sa pag-ayo sa akong pamilya, sa nanglabay ug sa karon, pinaagi sa buhat sa family history ug sa templo. Kita mao ang tig-amuma sa tanan nga anaa sa atong palibot. Unsa man ang itsura sa imong pagkatinugyanan sa pag-impluwensiya? Kinsay gibutang ni Jesukristo sa imong kinabuhi nga imong higugmaon ug bayawon? Ngadto kang kinsa nimo dad-on ang Iyang kahupayan?

Ako nasayod nga si Jesukristo buhi ug Siya nahigugma kanimo. Siya mobalik pag-usab. Siya mao ang dugay nang gipaabot nga Pamanhonon, ug kita ang Napulo ka mga Dalagang Birhin, ang mga babaye sa pakigsaad sa Iyang Simbahan. Kita aduna sa panalangin sa pagpuno sa atong mga lampara sa maanindot nga lana sa usa ka relasyon sa pakigsaad uban ni Kristo. Dili kinahanglan nga maghulat hangtod nga maabot Siya aron makaila Kaniya, makapili kita sa pag-ila Kaniya karon ug pagdawat sa Iyang makaayo nga gugma, gahom, ug kahupayan ngari sa atong mga kinabuhi karon pinaagi sa atong mga pakigsaad. Ug kon maabot na Siya pag-usab, “kita mahisama kaniya, kay kita magasud-ong man unya kaniya sa iyang pagkamao,”³ kay mausa kita uban Kaniya.