I Le Avea Ai ma Ona Afafine o le Feagaiga, O I Tatou o se Auala Lea e Tuuina Mai Ai e Iesu Keriso Lona Toomaga
Faigalotu a le Aualofa i le Lalolagi Atoa 2024
Aso Sa, 17 Mati, 2024
I le avea ai ma Ona afafine o le feagaiga, o i tatou o se auala lea e tuuina mai ai e Iesu Keriso Lona toomaga.
Uso e, o loo outou faataunuuina lo outou tautinoga paia o ni sui auai o le Aualofa i soo se taimi tou te faia ai soo se mea e aumai ai le toomaga i isi—faaletino pe faaleagaga—aua o loo e avatua ia i latou le alofa o Iesu Keriso.
Ou te tautino atu a o e faia, o le a faamanuiaina oe ia maua lo oe lava toomaga ia te Ia. O Iesu Keriso o le toomaga. Ma o oe o ni ō i le Aualofa.
Mai lena vaega toalaiti o tamaitai e toa 20, sa faapotopoto i Navu i le 1842, ua fuga a’e ai se faalapotopotoga i le lalolagi atoa ua toeitiiti 8 miliona tamaitai. O le Aualofa ua taitai i le faama’ite o fesoasoani agaalofa a le Ekalesia i le lalolagi atoa e faailoa atu manaoga o tamaitai ma tamaiti.
I le avea ai o ni afafine o le feagaiga a le Atua, tatou te taumafai malosi e tausi i latou o manaomia le fesoasoani e ala i le auai i taumafaiga o fesoasoani agaalofa lea ua i ai se aafiaga aupito sili ona maoae ua mafai ona i ai. O le alualu i luma i le lalolagi atoa ua amata i tamaitai ma tamaiti, ma ua tatou faamuamuaina o latou manaoga e ala i le tausiga o failele ma pepe fou faatoa fananau, taumafaiga ia fafaga tamaiti i meaai paleni, tui, ma le aotauina i le lalolagi atoa.
O’u uso pele, o outou o se vaega o lenei taumafaiga i le lalolagi atoa pe a e tausia ma le faapelepele lau lava tama, aoao se uo e faitau, faailoa atu ma le onosai manaoga o se tuaoi matua, fetagisi ma se uso o loo faavauvau, saunia taumafataga mo e mama’i, ma auauna atu e pei o le a faia ai e le Faaola.
E masani lava o auaunaga fesoasoani agaalofa e faia lea ia i latou e sili ona latalata mai ia i tatou i galuega agalelei i aso uma. Pe a e auauna atu i lou aiga ma ou tuaoi, o oe o le vaega o lo tatou faamoemoega i le lalolagi atoa. Faafetai atu mo le faaalia atu o lau molimau e uiga ia Iesu Keriso e ala i le avea ma Ona lima mālū, Ona vae televave, Ona taliga e faalogo, Ona laufofoga e fetalai i le agalelei.
Tatou te iloiloa manaoga i le lalolagi atoa, ona tatou saili lea ia faamalie na manaoga tai tasi, e pei ona sa faia e le Faaola. Sa auauna atu le Faaola i le tamaitai e to’atasi sa i ai i le vaieli. Sa Ia faamaloloina le afafina e to’atasi o Iairo. Sa Ia faamanuiaina tamaiti sa Nifae, tai to’a tasi. E alofa o Ia ia i tatou tai to’a tasi.
O le a tatou momoli atu Lona toomaga i isi, tai to’a tasi.
Sa faavaeina le Aualofa i le vaitaimi a o fausia le malumalu o Navu ma le faamoemoega ina ia tuuina mai ai sauniga ma feagaiga iina. Sa auai uso i tapenapenaga faaletino mo le malumalu ma sa saunia faaleagaga e maua faamanuiaga o le malumalu e ala i le perofeta o Iosefa Samita.
O le taimi nei, i lenei vaitau tulaga ese o le fausiaina o malumalu, o loo tumau pea lava le faamoemoega o le Aualofa: ia saunia tagata i le faaletino ma le faaleagaga mo faamanuiaga o le maota o le Alii.
Matou te mananao i o tatou uso o le Aualofa ia maua ia faamanuiaga uma o se mafutaga faalefeagaiga ma le Atua, e aofia ai le maua o Lona mana o le perisitua e i latou o e osi feagaiga i le maota o le Alii. E leai se faalapotopotoga i le lalolagi e mafai ona fofogaina ni faamoemoega e talitutusa, ma filifilia faalelagi e pei o le Aualofa.