O Le Tosinaga a Tamaitai
Faigalotu a le Aualofa i le Lalolagi Atoa 2024
Aso Sa, 17 Mati, 2024
O’u tuafafine pele o le Aualofa, ou te talisapaia lo’u talanoa atu ia te outou i lenei aso. E tele taimi ou te mafaufau ai ia te outou. E matua’i o’oo’o lo’u faafetai mo outou ma lagona ai le nofo aitalafu ia te outou. O le tele na’uā o mea lelei ua ausia e lenei Ekalesia—ma o le tele na’uā foi o mea ua tutupu i le lalolagi—ua tutupu ona o outou! Faafetai atu i lo outou tuuto i le Alii faapea foi a outou taumafaiga e faaēaēa isi. Ou te iloa le tele o le alofa ma le faalagolago o le Alii ia te outou.
Ou te maofa lava i lo outou faatuatua ma le taunapa i mea a le Agaga. Ua musuia lava a’u i lo outou maelega, taitaiga faama’ite, ma lo outou tomai e vaaia se manaoga ma faatinoina. Pe o le lē iloa faitautusi ma tusitusi, matelāina, atugaluga faalesoifua maloloina o le mafaufau, po o manaoga i aso faisoo o isi, tou te taulimaina lava to’atuga o le olaga moni i se su’ifefiloi tulaga ese o tomai, agaalofa, malamalamaaga, ma le alofa. O le misiona atoa a le Ekalesia a le Alii o loo faamalosia e outou.
Tuafafine, ua ia te outou se meaalofa faalelagi e mafai tino ai e outou ona suia olaga! E faapitoa le moni o lenei mea a o tatou auai ma le naunautai e faatino le poloaiga paia e faapotopoto Isaraelu. Soo se taimi tatou te fesoasoani ai i soo se tasi ia maua le ala o feagaiga ma tumau ai, ua tatou fesoasoani i le faapotopotoina o Isaraelu. E leai se tasi e sili atu lona faia lelei o lenei mea nai lo outou—o ni tina, ta’ita’i, faiaoga, tuafafine, ma uo. O loo outou tapenaina tupulaga o le lumanai o le Ekalesia a le Alii ma le lalolagi!
Talu ai nei, sa ma faalogo ai i se teineitiiti e tolu tausaga, na ala a’e mai lana moe. Ina ia faafiafiaina o ia, sa aveane ai e lona tuagane lea manutaalo ma lea manutaalo. Ae o le a le mea na i’u ai ina nā o ia ma fiafia? O lana lava kopi o le Tusi a Mamona. E matau e lenei teineitiiti lona tina o faitau mai le Tusi a Mamona i aso uma. Sa manao o ia ia faapei o lona tina!
E matua le mafai lava ona fuatia le tosinaga faalelei-olaga a tamaitai o le feagaiga a le Atua. Ou te alofa i la’u Usoga, ma ou te faapelepelea le avanoa paia o le galulue faatasi ai ma i latou. Ae peitai, o tagata e toalua i le lalolagi na sili ona faatosinaina ai a’u o lo’u toalua o Dantzel, le tina o le ma fanau e to’a 10, o lē na maliu faafuasei i le 78 o ona tausaga, ma, mo le 18 tausaga ua mavae atu nei, o lo’u toalua matagofie o Wendy.
I le taimi o lo’u toe malosi matautia talu ai nei mai le mea na ou pa’ū ai, sa lē malolo Wendy i le tausiga o a’u i le faaletino ma le faaleagaga i ni auala e le mafai lava e se isi ona fai. O le tosinaga maoae na faia e Dantzel ma Wendy mo au e le mafai e upu ona faamatala. Na la suia lo’u olaga! Na la’ua faia lo’u olaga ia atoa atili.
Sa i ai tamaitai i le totonugalemu o le fuafuaga a lo tatou Tama Faalelagi mai lava i le amataga. Sa faalagolago le fuafuaga o le faaolataga a le Atua i faatinoga totoa a ni tamaitai lototetele se toalua o—Eva,1 “o le tina o tagata ola uma,”2 ma Maria,3 le tina o lo tatou Alii o Iesu Keriso.
Tuafafine, faamolemole aua lava nei manatu faatauvaa i le mana tulagaese o i totonu o outou e tosinaina ai isi mo le lelei. O se meaalofa ua faamanuiaina ai e lo tatou Tama Faalelagi tamaitai uma o le feagaiga. I le avea ai o se afafine o le feagaiga a le Atua, ua ia te oe se gafatia e maua ai le Agaga, ma se tomai lautele e te maua ai le mana e maua ai faaaliga patino ma iloatino ai le mea moni mai mea sese. I lo’u fai atua o lenei mea, ou te lē o faasa’olotoa ai la alii mai le iloaina o le sa’o mai le sese pe mai le faia o galuega faaleagaga ina ia maua ai faaaliga. Peitai, afai e le toe i ai i le lalolagi le amiomama ma le amiotonu o ona tamaitai, o le a lē toe foi lava le lalolagi i se lelei.4
Tuafafine, matou te manaomia o outou leo e aoao atu ai le aoaoga faavae a Keriso. Matou te manaomia o outou tomai o ni tamaitai e iloa le taufaasese ma ta’utino atu le mea moni. Matou te manaomia lo outou poto musuia i aufono i o outou aiga, uarota, ma siteki, faapea foi i isi nofoaga o le tosinaga i le lalolagi atoa. E manaomia oe e lou aiga, le Ekalesia, ma le lalolagi! Tuafafine, e leai se tasi e mafai ona faia mea uma, e le tatau foi ona e taumafaia. Peitai, ou te iloa le taua o la outou vaega i le fausiaina o le malo o le Atua.
O le mea lea, i le asō, ou te valaaulia outou ia avea tusitusiga paia ma au lava Liahona patino,5 le malumalu ma ou nofoaga o le sulufaiga ma le taulaiga, ma avea au tatalo faaletagata lava ia ma auala e te iloa ai le mea e manaomia oe e le Alii ia e i ai i lena aso. O le a oo mai le taimi, o le a e maofa ai i le ala o le a Ia taiala ai oe ina ia e i ai tonu i le mea e mafai ona e ta’ita’i ai, taiala, ma savali i autafa o se tasi e moomia oe.
Ona o lena mafuaaga, ou te faamanuia ai oe i se iloatino faaleagaga faateleina ma le tomai e maua ai le olioli i le ofoina atu o le toomaga i isi. Ou te faamanuia ia te oe ia e maua le poto e iloatino ai le mea e moomia, ma aua ne’i e tamoe e sili atu i le mea e te mafaia. Ou te faamanuia ia te oe ia e maua le lototele e ausia ai ou avanoa paia o se afafine o le feagaiga a le Atua. Ou te faamanuia ia te oe ia loloto ou lagona faapea e silafia ma alolofa le Tama Faalelagi ma Lona Alo, o Iesu Keriso ia te oe. Na La auina mai oe i le lalolagi i le taimi nei ona e taua oe i le malo o le Atua i le taimi nei! Ou te faamanuia ia te oe ia e iloa o au meaalofa paia o se afafine o le Atua e avatu ai ia te oe le mana e le gata ina suia ai olaga ae e suia ai foi le lalolagi!
Ou te alofa ia te outou, o’u tuafafine pele. E moni nei mea. O loo tatou punouai uma i le galuega a le Alii. Ou te molimau atu o loo soifua Iesu Keriso! O loo tu o Ia i le ao o lenei Ekalesia. I le suafa o Iesu Keriso, amene.