Faaiuga
Faigalotu a le Aualofa i le Lalolagi Atoa 2024
Aso Sa, 17 Mati, 2024
Uso e, tatou te ulu i le ala o feagaiga i le papatisoga. “Tatou te ulu atoa atu i ai i le [maota o le Alii].”1
Matou te valaaulia outou taitoatasi ia saunia ma maua faamanuiaga o le faae’ega paia i le maota o le Alii. O uso agavaa o e mananao e maua o latou lava faae’ega paia e mafai ona faia faapea pe afai e le itiiti ifo ma le 18 o latou tausaga; ua faamaeaina pe ua le toe auai i le aoga maualuga, aoga tulaga lua, po o aoga faapena; ua mavae le tausaga atoa e tasi talu ona faamauina [o latou papatisoga] ma latou lagona se manao e maua ma faamamalu feagaiga o le malumalu i o latou olaga atoa.2
Na saunoa Peresitene Nelson:
Ana mafai ona ou tautala atu i alii ma tamaitai taitasi o loo faananau mo se faaipoipoga ae e le’i maua lava sana soa e faavavau, ou te augani atu ia te outou e ‘aua le faatali se’ia faaipoipo ina ia maua ai faae’ega paia i le maota o le Alii. Amata nei ona [e] aoao ma maua aafiaga o le uiga o le faaauupegaina i le mana o le perisitua.”3
E tuuina atu la’u molimau o Peresitene Russell M. Nelson o le fofoga taumomoli a le Alii i le lalolagi i le asō. Ua faafia ona Ia saunoa mai ma le manino e faapea, a tatou fusia i tatou lava ia Iesu Keriso e ala i feagaiga paia o le perisitua i le maota o le Alii, e mafai ona tatou utuvai mai i le mana o le Atua ma e le manaomia ai lava ona tatou lagona le tuuatoatasi!
Uso e, afai ua maua ou faae’ega paia, ia tumau pea ona agavaa e ulu atu i le maota o le Alii e ala i le umia pea o se pepa faataga aoga ma e ala i le auai atu e le aunoa i le maota o le Alii. Ua faia e le Alii ia sili atu ona faigofie ona maua Ona malumalu i Ana fanau o le feagaiga.
Ua valaaulia i tatou e lo tatou perofeta pele e fai le galuega “e sili ona faafiafiaina” o le “galulue faatasi ma le Agaga”4 e malamalama ai i le ala e mafai ona tatou utuvai ai i le mana o le Atua—le mana o le perisitua—e fesoasoani i o tatou aiga ma i latou tatou te alolofa i ai. Ou te toe ta’ua ma le lotomaulalo lena valaaulia ma faaopoopo atu la’u molimau i le molimau a Peresitene Nelson e faapea, “o le a faatupulaia lou mana pe a e auauna atu i isi. O au tatalo, anapogi, taimi mo tusitusiga paia, auauna atu i le malumalu, ma galuega o talafaasolopito o aiga o le a matala ai le lagi ia te outou.”5
O ni nai masina ua mavae, sa ou maua ai le avanoa matagofie e lauga ai i se konafesi a tamaitai i Korea i Saute. Na toeitiiti 1,400 uso o le Aualofa na faapotopoto mo le faatasiga, lea na faaiuina i se faigalotu lea na ou faasoaina atu ai se savali mai ia Peresitene Nelson e faapea, o outou, uso pele, e alofaina e le Tama Faalelagi ma Iesu Keriso, ma le perofeta; ma e manaomia i le tapenaina o le lalolagi mo le Afio Mai Faalua o le Faaola; ma o outou o afafine faapelepele o le Atua.
I le faaiuga o la’u tautalaga, na ou tuua ai le pulelaa ina ia matou saofafai faatasi ma uso a o matou olioli i se vitio faaiu o le faatinoga o le “O A’u o se Atalii/Afafine o le Atua.” O le taimi lava na mae’a ai le sauniga, sa fesili mai ai le uso sa nofo tonu i o’u tua pe mafai ona pu’e se matou ata, ona musumusu mai lea ia te a’u, “e alofa o Ia ia te oe!” O se taimi ootia lea sa faamanatu mai ai ia te a’u e uiga i lena upumoni taua. Ona ou vave tuumuli ai lea e pue la’u vaa.
Pe tusa o se vaiaso mulimuli ane, na ou maua ai se savali mai la’u uo fou, o lē sa faamatala mai sa sau o ia i le konafesi a tamaitai ma se tauiviga ma nisi o mafaufauga ma manatuga le lelei. Ao ou talanoa atu, sa oo atu se manatu ia te ia, e manaomia ona ou lagonaina le alofa o le Atua mo a’u. Sa ia faamatala mai, “Sa ou mafaufau pea e finagalo le Alii ina ia e logona e alofa o Ia ia te oe.”
“Mo a’u, e masani ona sili atu le faigofie ona lagona le alofa o le Alii mo se isi tagata nai lo mo a’u lava. Atonu o le mea lena na ala ai ona tupu lenei mea atoa—aua sa Ia silafia o le ala lea e mafai ona ou lagona ai Lona alofa. Atonu na sili atu lo’u manaomiaina nai lo oe. Ae ui i lea, sa ou lagona se manao malosi—e pei na finagalo le Alii ou te ta’u atu ia te oe e alofa o Ia ia te oe.
“E ui ou te le aloese mai le faatinoina o uunaiga, ae sa foliga mai o se miti faivavale le ta’u atu ia te oe. Sa o a’u o se tamaitai e toatasi i se aofia toatele … ae na ou te’i i lou saofai i o’u luma tonu lava! O lea na ou talosaga ai e pu’e se ata ina ua uma le sauniga, ma e ui ina sa tatau ona e faatelea’i atu i le malae vaalele, ae sa e agalelei ma faataga a’u e pue le ta ata. Ma sa ou maua sina taimi e opo ai oe ma musumusu atu sina upu o le faamoemoe e mafai ona e lagona le malosi o le alofa o le Alii mo oe a o e fesoasoani mai ia i matou uma ia lagona Lona alofa.
“Ma sa faapea ona ou lagonaina ai Lona silafia ma le alofa mo a’u, e ui i lo’u tauivi ai ma mea le lelei. …
“Na te silafia lelei a’u.
“Sa finagalo o Ia e faataga a’u e auauna atu ia te oe ina ia mafai ona [ou] toe lagona ma le manino tele Lona alofa. Ou te tatalo sa alalua le alofa mutimutivale, ma na e lagonaina malosi Lona alofa e pei ona sa ou lagonaina ai.”
Na aumai e la’u uo fou, o lo’u uso a Aualofa o loo alala i Korea i Saute, le toomaga faaleagaga ia te a’u e ala i le momoli mai o le alofa o Iesu Keriso ma sa faamanuiaina i le maua ai o lona lava toomaga ia te Ia, o se faamautinoaga o le alofa tumau o le Faaola mo ia.
Tou te silafia, pe a tatou aumaia le toomaga o le Faaola i isi, tatou te maua ai mo i tatou lava.
Ma a o tatou faatino e pei o Ona mata ma taliga, pei o Ona laugutu ma ona aao—a tatou saili e faataitai ia te Ia—o le a faateleina lo tatou manao mo se sootaga faalefeagaiga ma Ia. O lo tatou malamalama i le auala e utuvai ai i luga o Lona mana o le perisitua o le a faatelēina a o tatou aumaia Lona toomaga i isi.
Ua aoao mai Peresitene Nelson e faapea, “O le ulu atu i se sootaga faalefeagaiga ma le Atua e noatia ai i tatou ia te Ia i se auala e faia ai mea uma e uiga i le olaga ia faigofie atu.” E lei saunoa mai o ia o le faia o feagaiga o le a faigofie ai le olaga. “Ae o lou mulimuli o oe lava ia i le Faaola o lona uiga e te mauaina Lona mana faamalosiau ma togiola.”6
Uso e, e tuu atu la’u molimau, la’u tautinoga atoatoa, o Peresitene Russell M. Nelson o le perofeta a le Atua ma e saunoa mo le Faaola, o Lana Ekalesia o loo ia taitaia. Faamolemole faalogo i ana upu, talia ana valaaulia, ma utuvai mai le faamoemoe ma le malosiaga mai ana folafolaga.
Tatou te molimau atu o i tatou o afafine alofaina o le Atua.
Ma i le avea ai o ni tamaitai ma sui auai o le Aualofa ua i ai se tatou matafaioi taua e fai i le sauniaina o le lalolagi mo le Afio Mai Faalua o Iesu Keriso. Tatou te maua le mana o le Atua—le mana o le perisitua—i le ausiaina o lena galuega atofaina faalelagi. E agai i luma tai tasi le galuega. Ma o Iesu Keriso o le toomaga.
I le suafa paia o lo tatou Faaola, o Iesu Keriso, amene.