Mauaina o le Mana o le Atua e ala i Feagaiga
Faigalotu a le Aualofa i le Lalolagi Atoa 2024
Aso Sa, 17 Mati, 2024
Uso e pele, ua saunoa soo lo tatou perofeta, o Peresitene Russell M. Nelson, e uiga i le mana o le perisitua ua avanoa mo alii ma tamaitai e ala mai i se sootaga faalefeagaiga ma le Atua.1 Sa ia saunoa:
“O tamaitai uma ma alii uma … o e auai … i sauniga o le perisitua ma [osia ma tausia feagaiga ma le Atua] e mafai ona maua le avanoa tuusa’o i le mana o le Atua. O i latou ua maua faaeega paia i le maota o le Alii ua mauaina se meaalofa o le mana o le perisitua a le Atua e tusa ma le paia o a latou feagaiga, faatasi ma se meaalofa o le poto e iloa ai le auala e utuvai ai mai lena mana.
“E tutusa lava le matala o le lagi i tamaitai o e ua faaeeina i le mana o le Atua e tafe mai ia latou feagaiga faaleperisitua e pei ona matala ai foi i alii o loo umia le perisitua.”2
I le avea ai ma afafine o le Atua, e mafai ona faaeeina i tatou i le mana o le perisitua—o le mana o le Atua lea e oo mai ia i tatou a o tatou osia ma tausia feagaiga o le perisitua. O lenei tulaga e i ai ni taunuuga taua. I le avea ai ma uso ua maua faaeega paia, ua ia i tatou le aia tatau e utuvai tele ai mai i le mana o le Faaola e fesoasoani ia i tatou lava, o tatou aiga, ma isi.3
Na maua o’u lava faaeega paia ina ua 20 o’u tausaga, ae mo le tele o tausaga sa ou le malamalama ai i le mana faalelagi na mafai ona ou faaaogaina e ala i feagaiga sa ou osia ma lo’u Tama Faalelagi ma Iesu Keriso. Ae peitai, a o’u toe tepa nei i tua, ua ou iloa ai le malosi ma le gafatia faaopoopoina sa tuuina mai ia te a’u e onosaia ai le tele o luitau eseese i tulaga eseese o lo’u olaga. O se faamanuiaga lava lo tatou ola ai i se taimi ua tele ai le malamalama e uiga i le faateleina o le mana, filemu, ma le malosi lea e mafai ona fai mo tatou e ala i se sootaga faalefeagaiga ma le Atua.
E alofa lo tatou Tama oi le Lagi i Ana fanau uma, ma e finagalo o Ia ia aafia i o tatou olaga. Ae o le a Ia le solia lo tatou faitalia. O le a Ia le faamalosia o Ia lava i o tatou olaga. Pe a faaaoga o tatou faitalia e filifili ai e ulu atu i se sootaga faalefeagaiga faatasi ma Ia, ua tatou molimau atu ia te Ia tatou te mananao ia atili loloto Lona aafia i o tatou olaga, ma ua tatou naunau e totogi le tau ia maua ai le mana ma avanoa faateleina lea e o mai faatasi ma lena sootaga faalefeagaiga.
E pei ona aoao mai lo tatou perofeta, a tatou ulu atu i se sootaga faalefeagaiga ma le Atua, o le a sili atu ona vavalalata lo tatou sootaga ma Ia nai lo le taimi ae tatou te lei osifeagaiga, ma o le a le mafai lava ona Ia lafoaia lena sootaga. O le a lē vaivai lava o Ia i Ana taumafaiga e fesoasoani ia i tatou, ma o le a tatou le faaumaina lava Lona onosai ia i tatou. Ua fusia faatasi i tatou ma le olioli e ala i se feagaiga e faavavau lea ua tatou filifili e ulu i ai faatasi ma Ia.4
O lenei malamalama e tatau ona aumaia ia i tatou le filemu ma le faamautinoaga tele a o tatou uia faigata ma tiga o lenei olaga. O le mana o le perisitua a le Atua o le a faamalosia ai o tatou meaalofa ma taleni faaleagaga, o le a aumaia ia i tatou le malosi e sili atu nai lo lo tatou lava malosi e tauave ai avega mamafa o le olaga nei, ma o le a aumaia ia i tatou le filemu ma le mana lea tatou te manaomia e fetaiai ai ma mafuie faaletino, faalelagona, ma faaleagaga o o tatou olaga.
O lenei mana lea e tafe mai i a tatou feagaiga e mafai ona manuia ai o tatou olaga i le anoano o auala eseese aua o le mana lea o le Atua! E mafai e tina ona utuvai mai i Lona mana mo le gafatia ma le malosi faaopoopo e faafetauia ai o latou luitau i aso taitasi ma atili manino ai lo latou faalogo atu i taitaiga a le Alii e fesoasoani ma taiala ai a latou fanau. O i latou o e ua leiloa se e pele e ala i le maliu po o le tatala o faaipoipoga, e mafai ona valaau atu i Lona mana ia lagona ai le faamafanafanaina ma le sapasapaiaina. O le mana o le Atua e mafai foi ona aumaia ai le faamoemoe ia i latou o e faigata ona iloa atu soo se malamalama i o latou olaga ona o tulaga sili ona faigata o le olaga o loo latou fetaiai.
E faaopoopo atu i le mana lea e mafai ona faamanuiaina ai i tatou e ala i le tausia o a tatou feagaiga o le perisitua, pe a valaauina ma vaetofia pe tofiaina i tatou e fesoasoani i le galuega a le Atua, e tuuina mai foi ia i tatou le pule o le perisitua—le pule a le Atua e fai ai ma Ona sui a o tatou faataunuu o tatou valaauga ma tofiga.5 I le 2014, a o ma auauna atu ma lou toalua o ni taitai misiona i Ekuatoa, sa saunoa ai Peresitene Dallin H. Oaks i le konafesi aoao: “E le masani ona tatou talanoa e uiga i tamaitai e i ai le pule o le perisitua i o latou valaauga faale-Ekalesia, ae o le a se isi pule e mafai ona i ai?”6 Sa matuai ou faafetai lava i le i ai o lenei malamalama faaopoopo, ma sa ou taumafai e aoao atu lenei upumoni talu mai lena taimi i tamaitai i li’o e mafai ona oo atu i ai la’u faatosinaga. Na saunoa mai Peresitene Nelson: “I le avea ai ma se tamaitai amiotonu o le Au Paia o Aso e Gata Ai ua maua faaeega paia, e te tautala ma aoao atu i le mana ma le pule mai le Atua.”7
E leai lava se isi faalapotopotoga faalelotu i le lalolagi, ua ou iloa, ua matuai lautele le tuuina atu o le mana ma le pule i tamaitai. E i ai tapuaiga ua faauu ni isi o tamaitai i tulaga e pei o ositaulaga ma faafeagaiga, ae itiiti lava e faatusa i le numera o tamaitai i lo latou aulotu e mauaina lena pule lea e tuu atu e la latou ekalesia ia i latou. O se faatusatusaga, o tamaitai uma, e 18 tausaga ma matutua atu, i le Ekalesia a Iesu Keriso o le Au Paia o Aso e Gata Ai, o e filifilia se sootaga faalefeagaiga ma le Atua i le maota o le Alii ua faaeeina i le mana o le perisitua ua tuusao mai le Atua. Ma a o tatou galulue i soo se valaauga po o tofiga, e aofia ai tofiga o auaunaga, ua tuuina mai ia i tatou le pule o le perisitua e faataunuu ai na tiutetauave.8 Ou uso pele, ua tou auai i se Ekalesia lea e ofo atu ai i ona tamaitai uma le pule ma le mana o le perisitua mai le Atua!
E ui i lea, e pei lava ona ia taumafai e faia ia Atamu ma Eva i le Faatoaga o Etena i le laau o le ola,9 ua manao le fili ia taulai atu o tatou loto i mea e le’i tuuina mai ia i tatou ma faatauaso i tatou i mea uma ua tuuina mai ia i tatou. Uso e, o augatupulaga e mulimuli mai ia i tatou o le a faatosinaina e ala i filifiliga o loo tatou faia i le asō. Tau ina ia tatou filifilia se sootaga loloto faalefeagaiga faatasi ma lo tatou Tama Faalelagi ma Iesu Keriso ina ia mafai ona tatou valaaulia atoatoa atili lo Laua mana, lo Laua malosiaga, ma lo Laua toomaga i o tatou olaga.
Ou te iloa o avanoa ma faamanuiaga paia lea e mafai ona fai mo tatou a o tatou filifilia lena sootaga faalefeagaiga o le a manuia ai a tatou fanau ma fanau a fanau mo augatupulaga a sau.