7:16

Ia Tasi ma le Atua e ala i Au Feagaiga

Faigalotu a le Aualofa i le Lalolagi Atoa 2024

Kristin M. Yee

Fesoasoani Lua i le Au Peresitene Aoao o le Aualofa

Aso Sa, 17 Mati, 2024

Uso pele, ua tofu tatou taitoatasi ma le avanoa e faipaaga ai ma le Alii i se ala mamana e ala i a tatou feagaiga. Na aoao mai Peresitene Russell M. Nelson, “O le ala o feagaiga e faatatau uma i la tatou sootaga ma le Atua”¹—o se sootaga e i ai noataga e faavavau ma faamanuiaga taua.

O se tasi o na faamanuiga o le faiga paaga mafanafana ma tumau a lo tatou Faaola o Iesu Keriso i “a tatou mea uma e fai.” E le o tuua lava na o i tatou. E le manaomia ona tatou faatautaia na o i tatou luitau, o lē mautonu ma vaivaiga o le olaga. O le a i ai o Ia i o tatou autafa; o la tatou folafolaga ma le faamanuiaga faalefeagaiga lea. E alofa o Ia ia te oe ma e finagalo ia avea ma se vaega o lou olaga, ou atugaluga, ou fiafiaga ma au faaiuga. E finagalo Iesu Keriso e avatu ia te oe Lana toomaga.

I le avea ai o se uso e lei faaipoipo lava, o lenei sootaga faalefeagaiga ma le Atua ua i ai se nofoaga o’oo’o i lo’u olaga ma o le puna o lo’u filemu, malutaga, olioli, ma le taitaiga. E finagalo lo tatou Tama oi le Lagi ma le Faaola ia fai mo tatou taitoatasi nei faamanuiaga e tusa lava po o a o tatou tulaga. La te silasila mai ia te oe ma ua silafia e i La’ua lou ala.

O ni isi taimi, i le iuga o se aso, ou te fia talanoa ai i se tasi e uiga i le alofa mutimutivale mai le Alii na ou molimauina po o se tulaga faigata o loo o’u tauivi ai. O ni isi taimi e auina mai ai e le Alii ma le alofa mutimutivale ni uo, aiga, ma isi i lo’u ala, ae o ni isi taimi Na Te faaosofia ai a’u ina ia ou aapa atu. Ae o le tele o taimi, na ou maua ai le avanoa ma le faamanuiaga e talanoa atu ai i lo’u Tama oi le Lagi e uiga i lo’u aso ma lagona o lo’u loto. Ona o lenei mea, ua faapea ona ou masani lelei ai ma le Atua, ma lelei ai i le talanoa ma Ia. Ou te lagona le vavalalata ma se alofa faifaipea mo Ia. Ma o lenei sootaga, ou te lagona ai le saogalemu i Lona alofa ma le atamai ma i Lona malamalama atoatoa ia te a’u ma o’u manaoga. Ua ou atiina a’e se alofa ma le faafetai loloto mo Ia ma Lona i ai faalelagi i lo’u olaga. O lenei faiga paaga e ala i a tatou feagaiga e moni. O loo soifua Iesu Keriso. Ma e finagalo o Ia e fesoasoani ia te oe ma ofo mai Lona alofa ma le toomaga faamalolo. E le o tuua lava na o i tatou.

I le 3 Nifae, na tatalo ai le Faaola i le Tama mo e faatuatua, e aofia ai oe ma a’u: “Le Tamā e, ou te le tatalo mo le lalolagi, ae mo i latou ua e tuuina mai ia te au mai le lalolagi, ona o lo latou faatuatua, ina ia faamamaina i latou ia te au, ina ia mafai ona ou i ai i totonu o i latou e pei ona i ai oe, le Tamā, i totonu ia te au, ina ia tasi i tatou.”²

E tatau ona tatou tasi ma le Atua e ala i a tatou feagaiga. A tatou filifili e ulu atu i se sootaga faalefeagaiga ma Ia, ua tatou filifili e suia, ia salamo ma toe taumafai, ia mamā e pei lava ona mamā o Ia. Ua mafai lenei suiga e ala mai ia Iesu Keriso ma Lana Togiola. O le ola i a tatou feagaiga e suia ai o tatou natura ia avea e pei o Ia, aumaia i tatou ia latalata atu lava i le avea ma ē tasi e ala i Lona Agaga. E maeu lenei faamafanafanaga ma le meaalofa. A o tatou atiina a’e a tatou sootaga faalefeagaiga ma le Atua, o isi sootaga uma i o tatou olaga o le a siitia maualuga.

Matou te valaaulia outou ia saofaga i lenei sootaga alofa e ala i le ola ai i au feagaiga, talisapaia taimi ma lo tatou Faaola o Iesu Keriso i Lona maota paia, i le tatalo, i le suesue, ma i auaunaga e pei o le a Ia faia ai. Ma matou te valaaulia outou e aoao i mea uma tou te mafaia e uiga i le faaaogaina o Lana faamanuiaga o le feagaiga o le pule o le perisitua.

A o [ou] i ai i se tofiga, sa fesiligia ai e se uso nofotoatasi pele se fesili manaia e uiga i le auala e faia ai se fale o se nofoaga paia ae o loo e nofotoatasi. E masani ona tatou talanoa e uiga i le fatuina o se aiga, ae e faapeī ona foliga?

Ou te fia faasoa atu ni isi o upumoni ua oo mai i le mafaufau, e faatatau ia i tatou uma e tusa lava po o a o tatou tulaga.

I le avea ai o ni afafine o le Atua, o i tatou taitoatasi o ni ō Lona aiga pele e faavavau. E ui ou te lei faaipoipo i le taimi nei, ou te le vaai ia te au lava o se nofotoatasi. I le avea ai ma afafine o le Atua, e anoanoai mea e uiga ia te oe ma au nai lo o se tulaga faalefaaipoipoga po o se faailoga faamata‘inumera.

Na tatou o mai uma mai se aiga faalelagi, o lea ua i ai se tatou galuega e fai e lagolago ma fesoasoani ai i lo tatou aiga, aiga vavalalata ma lautele ma i latou o i talaatu o le veli. Ua tofu i tatou ma se matafaioi e tatau ai, ma faafailele e fai i se filifili e faavavau o noataga faaleaiga. I le avea ai ma tamaitai o le feagaiga o le Aualofa, ua ia i tatou le tiutetauave o le aumaia o le toomaga o le Faaola i o tatou aiga ma i fanau uma a le Atua. Tatou te fesoasoani e aumai i latou ia Keriso.
E mafai ona tatou fatufatuina se “fale” lea e mafai ona mafuta ai le Agaga ma aumai isi i se avanoa paia ina ia alofaina ma fafagaina ai. O lou maota, lou fale mautotogi, lou potu, e ave atu ai le Agaga e te aumaia i lou olaga. E mafai ona tatou fatuina nofoaga o le puipuiga ma le saogalemu mai le lalolagi, lea e manumalo ai mea e faavavau ma maua ai le malologa. Ua tofu i tatou taitoatasi ma le faamanuiaga ma le avanoa o lenei tausimea, o le tausimea o le fatuina o se “fale” lea e mau ai le alofa ma le toomaga o Iesu Keriso.
O loo tatou agai i luma i taimi uma. O lenei tulaga e leai se laina faatalitali e i ai. E le afaina po o le a lo tatou tulaga faalefaaipoipoga po o mea e o mai ai, afai tatou te mananao e mulimuli i le Faaola, o le a Ia saunia le tele o avanoa mo i tatou ia aoao ma tuputupu ae ai, ia fesootai ma atinae ai mafutaga, ia salamo ai ma faamagalo, ma ia o mai ia Keriso ma ia suia.
Uso pele, e maoae tele lo outou faatosinaga, ma e manaomia a outou meaalofa. Tagai foi i olaga o i latou o siomia oe ma i latou ua tuu e le Alii i totonu o ou faatosinaga. Mo au, ou te lagona le avea o se vaega o olaga o fanau a ou uso ma tuagane ma alofa ia i latou ma fesoasoani ia i latou ia iloa po o ai moni i latou o ni fanau a le Atua. Ou te lagona foi ia faamalosiau atu ma alofa i le autalavou ma aiga i lo matou pitonuu. Ma ou te lagona le lilifa atu e fesoasoani e faamalolo lo’u aiga, i aso ua mavae ma aso nei, e ala i galuega o talafaasolopito o aiga ma malumalu. O i tatou o e fafagaina i latou uma e i totonu o lo tatou lalolagi. E faape’ī foliga o lau tausimea o faatosinaga? O ai ua tuuina e Iesu Keriso i lou olaga e mafai ona e alofa i ai ma sii a’e? O ai e mafai ona e aumaia i ai Lona toomaga?

Ou te iloa o loo soifua Iesu Keriso ma e alofa o Ia ia te oe! O le a toe afio mai o Ia. O Ia o le Faatoafaiava ua loa ona faatalitali i ai, ma o i tatou o Taupou e Toasefulu, o tamaitai o le feagaiga o Lana Ekalesia. Ua ia i tatou le faamanuiaga o le faatumuina o a tatou lamepa i le suauu matagofie o se sootaga faalefeagaiga ma Keriso. E le manaomia ona tatou faatali seia toe afio mai o Ia e iloa ai o Ia, e mafai ona tatou filifili ia iloa o Ia i le asō, ma maua Lona alofa, mana, ma le toomaga faamalolo i o tatou olaga i le taimi nei e ala i a tatou feagaiga. Ma a toe afio mai o Ia, “o le a tatou faapei o ia, ona o le a tatou vaai ia te ia e pei ona i ai o ia,”³ aua o le a tatou tasi ma Ia.