22:22

Lawom nga Pagkat-on ug Kalipay diha sa Ginoo

Elder Kim B. Clark

General Authority Seventy

Tinuig nga Training Broadcast sa Seminaries and Institutes of Religion • Hunyo 13, 2017

Usa ka panalangin nga mamulong sa S&I nga pamilya sa tibuok kalibutan. Gihigugma ko kamo pag-ayo, ug mapasalamaton ko alang kaninyo ug sa tanan ninyong gibuhat ug kon unsa kamo. Nag-ampo ko nga ang mga panalangin sa Ginoo maanaa kaninyo sa mahinungdanong buhat nga nagpaabut kanato.

Mga kaigsoonan, importante nga buhat ang pagtudlo, pag-andam, pagbayaw, ug paglig-on sa nagtubo nga henerasyon. Mibati ko sa kadinalian ug sa kabug-aton niana nga buhat. Ang kabatan-onan ug mga young adult sa Simbahan sa Ginoo nag-atubang og daghang lisud nga mga hagit ug daghang nindot nga mga oportunidad. Ang kalibutan libut kanila napuno sa gamhanang mga teknolohiya nga gigamit alang sa dagkong kaayohan ug makahadlok nga kadautan. Daghan sa atong kabatan-onan anaa sa mga nasud nga naapektuhan sa mga gubat ug hungihong sa gubat, mga buhat sa panglisang, korapsyon, kalaglagan sa mga pamilya, politikal ug sosyal nga kagubot, pagkakalibutanon, ug mga grabeng epekto sa kakabus, sakit, ug kagutom.

Taliwala niining tanan nga kaguliyang ug kasamok, hinoon, ang Ginoong Jesukristo nag-andam sa Iyang gingharian ug sa Iyang katawhan alang sa Iyang pagbalik. Gamhanan Siya nga naglihok sa tibuok yuta sa pagpundok sa nagkatibulaag nga Israel, sa pagtukod sa Iyang gingharian, ug sa pag-establisar sa Zion. Ang Iyang bukton sa gugma ug kalooy gitunol ngadto sa kabatan-onan ug mga young adult sa Iyang Simbahan, nagdapit kanila sa pagdawat sa Iyang makaayo, makalig-on, ug matubsanon nga gahum sa ilang kinabuhi.

Ang dako nga gubat tali sa maayo ug dautan nga gisugdan didto sa premortal nga kalibutan padayon nga nagkagrabe sa ulahing mga adlaw. Niana nga pakig-away ang kabatan-onan ug mga young adult sa nagtubo nga henerasyon wala magpadaplin. Anaa sila sa atubangan, ug mag-anam kaimportante ang ilang tahas sa dakong buhat sa Ginoo. Mao kana nga mamulong ako karon kaninyo.

Anaa kamo diha sa atubangan uban sa nagtubo nga henerasyon. Kon maghunahuna ko kaninyo ug sa inyong gibuhat matag adlaw aron sa pagtandog sa kinabuhi sa gatusan ka libo ka kabatan-onan ug mga young adult sa Simbahan sa Ginoo, makahunahuna ko sa panan-awon ni Nephi sa atong panahon:

“Ug … ako, si Nephi, nakakita sa gahum sa Kordero sa Dios, nga kini mikunsad diha sa mga santos sa simbahan sa Kordero, ug diha sa mga katawhan sa pakigsaad sa Ginoo, kinsa nagkatibulaag diha sa ibabaw sa tibuok yuta; ug sila gisangkapan sa katarung ug uban sa gahum sa Dios sa dako nga himaya.”¹

Gihulagway ni Nephi ang balaan nga proseso nga naapil kamo sa mahinungdanong paagi. Kon maghunahuna kamo sa inyong gibuhat nga nagtudlo sa seminary ug institute, hinaut nga kini nga tudling moabut sa inyong mga hunahuna. Mga instrumento kamo sa kamot sa Dios diha sa balaang proseso diin ang Iyang bililhong mga anak sa pakigsaad mapanalanginan uban sa pagkamatarung ug makadawat sa Iyang gahum ug sa Iyang himaya.

Kini ang inyong gibuhat. Nagtudlo kamo niining talagsaon nga mga batan-on sa ebanghelyo ni Jesukristo, ug nagtabang kamo kanila nga makadawat sa balaan nga gahum sa priesthood, diha sa templo, sa pakig-uban sa Espiritu Santo, sa balaan nga mga kasulatan, sa sagradong mga pakigsaad ug mga ordinansa. Gahum kini sa Dios, ug mohatag Siya niini ngadto sa Iyang hinigugmang mga anak aron sila makahimo sa paghigugma, pagtudlo, ug pagserbisyo uban sa pagtuo ug paglaum diha Kaniya, naghimo sa Iyang buhat sa tibuok nilang kinabuhi.

Tingali lisud usahay ang pagkonektar sa makadasig nga panan-awon ni Nephi ngadto sa reyalidad sa inyong klase sa seminary sa 6:15 sa buntag o sa gabii na kaayo nga klase sa institute uban sa daghang gikapoy nga mga estudyante. Nakasulay pud ko og mga nagduka nga mga tin-edyer sayo sa buntag. Ug kahibalo ko unsay hitsura sa kapoy nga estudyante sa kolehiyo. Apan nakakita na ko unsay mahitabo niadto nga mga tin-edyer ug mga estudyante sa kolehiyo kon ang magtutudlo nga nagmahal kanila motudlo kanila uban sa Espiritu sa Ginoo. Nakakita na ko unsay mahitabo sa ilang mga kasingkasing ug sa ilang mga kalag kon ang magtutudlo moabli sa gahum sa mga kasulatan ngadto kanila ug motabang kanila nga lawom nga makat-on sumala sa pamaagi sa Ginoo. Nasayud ko niana tungod kay mao kana ang nahitabo sa tanan nakong mga anak. Ug kana ang nahitabo karon sa akong mga apo.

Ang mga kabatan-onan ug mga young adult nga inyong gitudloan talagsaon. Apan gikinahanglan nato nga daghan pa kaayo kanila ang modawat sa mga panalangin sa priesthood ug sa templo, moserbisyo og misyon, magminyo diha sa templo, maghimo og mahangturong mga pamilya, moserbisyo sa Ginoo sa Iyang gingharian, ug mamahimong kahayag sa kalibutan—daghan pa kaayo kanila. Nagpasabut kana nga kinahanglang padayon kamong mahimong mas maayo sa inyong gibuhat Ang Ginoo nagkinahanglan kaninyo nga mahimong mas impluwensyal ug mas epektibo niining talagsaong buhat.

Kalipay diha sa Ginoo

Gusto kong mopaambit kaninyo karon og mga hunahuna nga akong gilauman makatabang ninyo samtang magpadayon mo niana nga balaang katuyoan. Ang akong mensahe yano lang: kinahanglang duna pa kitay buhaton aron sa pagtabang sa kabatan-onan ug mga young adult nga makasinati og kalipay—tinuod, espirituhanong kalipay—diha ni Ginoong Jesukristo. Nagtuo ko nga ang labing maayong paagi sa paghimo niana mao ang pinaagi sa lawom nga pagkat-on sa doktrina ni Kristo sa pamaagi sa Ginoo. Kini ang akong pagsaksi ug pagpamatuod kaninyo nga ang lawom nga pagkat-on sa doktrina ni Jesukristo mosangpot ngadto sa kalipay diha sa Ginoo.

Sama sa gitudlo ni Presidente Nelson:

“Mga kaigsoonan, ang kalipay nga atong gibati dili kaayo konektado sa mga sirkumstansya sa atong kinabuhi apan konektado kaayo sa gitutokan sa atong kinabuhi.

“Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi. Ang kalipay moabut gikan ug tungod Kaniya. Siya ang tinubdan sa tanang kalipay.”²

Kana ang kalipay nga kinahanglang mabati sa atong kabatan-onan. Manalipod kini kanila batok sa dautan, modasig kanila nga magmatarung, moawhag sa ilang tinguha nga kanunay makabaton sa Espiritu Santo uban kanila, ug mopaduol kanila sa Ginoo.

Ang Manluluwas mihatag kanato og maanindot nga sumbanan diha sa Basahon ni Mormon sa pagtabang kaninyo nga motabang sa inyong mga estudyante nga makakaplag og kalipay diha Kaniya:

“Busa, ipakita ninyo ang inyong kahayag aron kini moiwag sa kalibutan. Tan-awa Ako mao ang kahayag diin kamo mopakita—nga diin kamo nakakita kanako nga mihimo. Tan-awa kamo nakakita nga Ako nag-ampo ngadto sa Amahan, ug kamong tanan nakasaksi.

“Ug kamo nakakita nga Ako misugo nga walay mopalayo kaninyo, apan hinoon Ako misugo nga kamo moduol ngari kanako, nga kamo unta mobati ug makakita; gani mao kini nga kamo mobuhat ngadto sa kalibutan.”³

Sa dihang ang Manluluwas mipakita ngadto sa mga tawo didto sa templo sa Bountiful, Siya mihigugma kanila, mitudlo kanila sa Iyang doktrina, ug mipanalangin kanila. Mibati sila og tumang kalipay. Niini nga tudling ang Manluluwas mitawag kaninyo sa pagduol Kaniya ug, pinaagi sa gahum sa Espiritu Santo, motan-aw Kaniya nga nagtrabaho, mobati sa Iyang gugma, ug mosinati sa Iyang kalipay. Dayon misugo Siya kaninyo sa pagdala sa unsay inyong nakita ug gibati ngadto sa inyong mga estudyante: mohigugma kanila, motudlo kanila sa Iyang doktrina, modapit kanila sa pagduol ngadto Kaniya ug mobati sa Iyang hingpit nga kalipay. Kon ang gugma, doktrina, kahayag, ug kalipay ni Kristo anaa kaninyo, makadasig kamo kanila ug makaawhag kanila sa pagtinguha sa ilang kaugalingong pribado, personal, espirituhanong mga kasinatian uban sa Ginoo.

Kalipay ug Lawom nga Pagkat-on

Ang pagkat-on nga mosangput sa kalipay mao ang lawom nga pagkat-on sa doktrina ni Jesukristo, ug kinahanglan buhaton kini sa pamaagi sa Ginoo. Ang lawom nga pagkat-on mao ang pagkat-on sa tibuok kalag—sa hunahuna, kasingkasing, lawas, ug imortal nga espiritu. Ang lawom nga pagkat-on makadugang sa gahum sa estudyante sa pagbuhat og tulo ka mga butang:⁴

1. Mahibalo ug makasabut

Ang una mao ang pagkahibalo ug pagsabut. Kini ang kahibalo sa hunahuna ug sa kasingkasing. Gamiton ngadto sa pagtuo kang Jesukristo, sama pananglit, ang mga estudyante makakat-on nga ang pagtuo diha kang Kristo usa ka baruganan sa lihok ug gahum. Pinaagi sa pagsaksi sa Espiritu, mobati sila sa kamatuoran niana nga baruganan ug mosugod nga mas klarong makakita, mas kusganong magtinguha, ug sa ingon mas hingpit nga makasabut diha sa ilang mga kasingkasing sa mga kahimoan niana nga baruganan sa ilang kinabuhi.

2. Mohimo og epektibo, matarung nga binuhatan

Ang ikaduha mao ang paghimo og epektibo, matarung nga binuhatan. Ang mga estudyante makat-on kon unsaon paggamit sa baruganan sa pagtuo kang Jesukristo diha sa ilang kinabuhi ug dayon mobuhat gayud niini. Sama pananglit, makahukom sila sa paglihok uban sa pagtuo sa Manluluwas aron makabaton og kaisug sa pagdapit sa usa ka higala sa pagbasa sa Basahon ni Mormon. Samtang molihok sila uban sa pagtuo diha Kaniya, ang ilang pagsalig Kaniya motubo ug ang Ginoo mopanalangin kanila og mas hugot nga pagtuo.

3. Mas mahisama sa atong Langitnong Amahan

Ang ikatulo mao ang pagkahimong mas sama sa atong Langitnong Amahan. Ang pagkahimo maoy usa ka proseso sa pag-usab sa pamatasan ug kinaiya mismo sa estudyante. Moabut kini pinaagi sa matubsanon ug makapalig-on nga gahum ni Jesukristo. Gamiton ngadto sa baruganan sa pagtuo sa Manluluwas, nagpasabut kini nga ang usa ka estudyante mag-anam sa pagkahimong mas matinud-anong tawo. Ang pagtuo kang Kristo mahimong usa ka hiyas sa ilang pagkatawo, kon kinsa sila, samtang pabalik-balik ug makanunayon silang nagtubo sa kahibalo ug pagsabut sa pagtuo diha kang Jesukristo, molihok uban sa pagtuo diha Kaniya sa pagbuhat unsay Iyang gusto nga mahimo, ug magtinguha sa Iyang mga gasa ug panalangin nga mahimong sama Kaniya ug sa Iyang Amahan.

Kining tulo ka dimensyon sa lawom nga pagkat-on mo-interact ug molig-on sa usag usa. Ang pagkahimong matinud-anon nga tawo modugang sa kapasidad sa estudyante nga mahibalo ug makasabut. Ang mas lawom nga pagsabut modasig og mas epektibo nga lihok, nga momugna og bag-ong mga panabut ug mosangput ngadto sa mas lig-ong pagkatawo. Adunay dakong kalipay sa matag elemento sa lawom nga pagkat-on—kalipay sa bag-ong pagsabut, kalipay sa matarung nga buhat, kalipay sa pagkahimong mas sama sa Amahan ug Anak.

Ang Pamaagi sa Ginoo sa Lawom nga Pagkat-on

Tulo ka mga Pagdapit

Ang pamaagi sa Ginoo sa lawom nga pagkat-on yano lang apan gamhanan. Kini ang deskripsyon sa Ginoo sa pagkat-on sumala sa Iyang pamaagi:

“Kon ang inyong katuyoan usa ngadto sa akong himaya, ang inyong tibuok kalawasan mapuno sa kahayag.”⁵

“Mag-andam sa inyong mga kaugalingon, ug magbalaan sa inyong mga kaugalingon.”⁶

“Motudlo sa usag usa sa doktrina sa gingharian.”⁷

“Pagtudlo kamo nga makugihon ug ang akong grasya mouban kaninyo.”⁶

“Pangitaa ninyo nga makugihon ug magtudlo sa usag usa sa mga pulong sa kaalam.”⁹

“Pangitaa ang pagtulun-an, gani pinaagi sa pagtuon ug usab pinaagi sa hugot nga pagtuo.”¹⁰

“Pagtudlo diha sa inyong mga kaugalingon og usa ka magtutudlo, ug dili ang tanan magdungan sa pagpamulong.”¹¹

“Himoa nga ang usa mamulong sa tagsa-tagsa ka higayon ug himoa nga ang tanan maminaw … nga ang tanan unta mahatagan og kaayohan sa tanan.”¹²

“Labaw sa tanan nga mga butang, sul-ubi ang inyong mga kaugalingon uban sa higot sa gugma nga putli.”¹³

Kining nindot nga mga tudling gikan sa seksyon 88 sa Doktrina ug mga Pakigsaad miila og tulo ka makapalig-on nga mga elemento diha sa pamaagi sa Ginoo sa lawom nga pagkat-on: Ang una mao ang makugihong pagtuon, pagtinguha, pag-andam, ug pagsunod.¹⁴ Ang ikaduha mao ang pagpundok aron motudlo sa usag usa, diha sa mga higot sa gugmang putli, giniyahan sa dinasig nga magtutudlo, inubanan sa grasya ni Jesukristo Ang ikatulo mao ang pagdawat og pagpadayag, inspirasyon, ug ubang espirituhanong mga gasa nga moabut pinaagi sa gahum sa Espiritu Santo.

Ang magtutudlo sumala sa pamaagi sa Ginoo nagdala og aktibo, dinasig nga tahas sa pagpaapil sa mga estudyante sa tanang mga elemento sa lawom nga pagkat-on. Duha ka butang ang mahinungdanon: una, nga ang Espiritu Santo magauban kaninyo, ug ikaduha, nga gihigugma ninyo ang mga estudyante.

Duna kamoy talagsaong kapanguhaan—ang Gospel Teaching and Learning handbook¹⁵—sa pagtabang kaninyo sa pagtudlo aron ang inyong mga estudyante makakat-on sumala sa pamaagi sa Ginoo. Busa, hatagan ko kamo og assignment: gusto nako nga basahon ug tun-an ninyo ang handbook gamit ang panglantaw sa lawom nga pagkat-on, ilabi na ang doktrina ni Jesukristo, nga mosangput sa kalipay. Kon masabtan na ninyo nga ang lawom nga pagkat-on alang sa kalipay maoy inyong katuyoan, makapausab kini kon unsaon ninyo paggamit ang gamhanang mga baruganan nga gipalambo diha sa handbook. Hatagan ko kamo og tulo ka yano nga mga ehemplo (duna pay daghan):

Inyong hangyoon ang inyong mga estudyante nga moabut sa klase nga andam sa pagtudlo sa usag usa.
Inyong hatagan og prayoridad ang pagtabang sa inyong mga estudyante nga makapalambo og Kristohanong mga hiyas.
Inyong himoon ang kalipay nga komon nga katuyoan sa inyong classroom, ug ang mga estudyante regular nga mopaambit og pagpamatuod sa kalipay.

Mga kaigsoonan, nasayud ko nga nagbuhat na kamo og daghang talagsaon ug maanindot nga mga butang aron sa pagtabang sa inyong mga estudyante nga mapatuhop ang ebanghelyo ni Jesukristo diha sa ilang mga kasingkasing ug makasinati og kalipay diha Kaniya. Nasayud ako sa inyong sakripisyo ug debosyon. Ug mao usab ang Ginoo.

Gusto nakong tapuson karon uban sa tulo ka pagdapit. Nasayud ko nga kon buhaton ninyo kini nga mga pagdapit, inyong matabangan ang inyong mga estudyante nga mas lawom nga makat-on sumala sa pamaagi sa Ginoo ug makasinati og mas dakong kalipay diha Kaniya.

Pagdapit 1: Mahangturong Pagkatawo ug Katuyoan. Dapiton ko kamo sa pagtabang sa mga estudyante nga masayud kon kinsa gayud sila. Tabangi sila nga makakita ug mobati ug masayud nga sila tinud-anay nga mga anak sa Dios, Iyang pinalanggang mga anak. Tabangi sila nga makasabut sa kahulugan ug implikasyon sa “Ang Pamilya: Usa ka Pamahayag ngadto sa Kalibutan” diin miproklamar kini nga ang matag usa sa inyong mga estudyante ”adunay kinaiya sa pagkadios ug kalagmitan nga mahimong Dios … ug [usa ka] walay katapusan nga pag-ila ug katuyoan.”¹⁶

Palihug tabangi sila nga mobati sa ilang mga kasingkasing nga sila espirituhanon nga mga binuhat nga nagsinati sa mortalidad. Ang Ginoo ug Manluluwas nga si Jesukristo, nag-antus ug namatay alang kanila aron sila “[mo]lambo ngadto sa kahingpitan ug sa katapusan makakab-ot sa ilang walay katapusan nga kapalaran ingon mga manununod sa kinabuhing dayon.”¹⁷ Kana ang plano sa Langitnong Amahan alang kanila. Palihug tabangi nga ang Iyang plano mahimong tinuod ngadto kanila.

Tudloi sila nga natawo sila gikan sa Langitnong mga Ginikanan aron makakat-on ug molambo ug mahimong sama Kanila. Ang pagkat-on mahinungdanon sa katuyoan sa premortal ug mortal nga kinabuhi ug sa ilang mahangturong kaluwasan. Kinahanglan nilang makat-on mahitungod sa mga butang sa Dios ug sa mga butang sa kalibutan aron matuman nila ang mga katuyoan sa Dios diha sa ilang kinabuhi. Tabangi sila nga makakita nga ang pagkat-on importante sa mahangturong plano sa Dios ug, sa ingon, sa ilang mahangturong katuyoan ug balaanong padulngan.

Pagdapit 2: Ang Pamaagi sa Ginoo sa Lawom nga Pagkat-on. Dapiton ko kamo sa pagtabang sa inyong mga estudyante nga makat-on unsaon sa pagkat-on sumala sa pamaagi sa Ginoo. Mahimo ninyo kini sa usa ka bahin pinaagi sa ehemplo. Sa usa ka gamhanan kaayo nga paagi, unsaon ninyo sa pagtudlo maoy unsay inyong gitudlo sa inyong mga estudyante mahitungod sa pamaagi sa Ginoo sa pagkat-on. Kon mohimo mo kanila og mga kasinatian sa pagkat-on sumala sa pamaagi sa Ginoo, makakat-on sila sa Iyang paagi. Kon dili ninyo buhaton, dili sila makat-on.

Manghinaut ko nga inyong tudloan ang inyong mga estudyante sa pamaagi sa Ginoo sa pagkat-on pinaagi sa inyong kaugalingong ehemplo. Apan manghinaut usab ko nga direkta ug tuyo ninyo silang tudloan sa Iyang pamaagi, nga may katuyoan. Adunay talagsaong oportunidad sa pagbuhat niana diha sa Doctrinal Mastery, diin ang mga baruganan sa “Pag-angkon og Espirituhanong Kahibalo” tukma nga nagtudlo sa pamaagi sa Ginoo sa pagkat-on. Samtang magtudlo kamo niadto nga mga baruganan sa tibuok tuig, inyo silang matudloan sa pamaagi sa Ginoo sa pagkat-on. Kana nga pagtudlo mahimo usab sa mga kurso nga inyong gitudlo sa institute.

Palihug tabangi ang inyong mga estudyante nga makaamgo nga ang pamaagi sa Ginoo magamit ngadto sa tanan nga ilang tun-an. Ang piho nga mga pamaagi nga ilang masugatan sa ilang mga klase sa secondary o post-secondary nga edukasyon mag-agad sa ilang mga magtutudlo. Apan ang inyong mga estudyante makahimo kanunay nga aktibong moapil, magmakugihon sa ilang pagtuon, ug mapanalanginan sa pakig-uban sa Espiritu Santo. Palihug dapita ang inyong mga estudyante sa pagdala sa Espiritu Santo uban kanila sa eskwelahan.

Pagdapit 3: Paghinulsol ug Pagkat-on. Dapiton ko kamo sa pagtudlo sa inyong mga estudyante nga ang paghinulsol mahinungdanon sa lawom nga pagkat-on. Ang paghinulsol mao ang proseso sa Ginoo alang sa personal nga pagkat-on, espirituhanong paglambo, ug pagkahimong mas sama Kaniya. Ang inyong mga estudyante makat-on sumala sa pamaagi sa Ginoo pinaagi sa matubsanon ug makalig-on nga gahum ni Jesukristo nga naglihok sa ilang kinabuhi, nga nag-abli sa Iyang kalooy ug grasya ngadto kanila.

Palihug tabangi ang inyong mga estudyante nga makasabut nga ang paghinulsol mao ang balaang proseso diin mamahimo silang mas mahisama sa Manluluwas sa tanang panahon. Usahay ang ilang paghinulsol mahimong mahitungod sa usa ka butang nga kinahanglan nilang hunungon sa pagbuhat. Usahay mahitungod kini sa usa ka butang nga kinahanglan nilang sugdan sa pagbuhat. Palihug tabangi sila nga masayud nga ang paghinulsol sobra pa kay sa pagsulti lang sa Ginoo ug sa inyong bishop nga duna kamoy nabuhat nga sayop. Ang pagpakasala mao ang pagpalayo gikan sa Ginoo. Ang paghinulsol mao ang pagbalik ngadto Kaniya. Ang paghinulsol nagkinahanglan og kausaban sa kasingkasing ug hunahuna, kausaban sa kinabuhi nga gipahaum sa personal nga sitwasyon sa estudyante.

Apan palihug tudloi usab sila nga ang paghinulsol padayon nga makapanalangin kanila. Kini ang paagi nga ang Ginoo motabang kanila nga mobuhat og mas maayo ug mahimong mas maayo sa tibuok nilang kinabuhi. Nagkinahanglan kana nga mag-usab sila ug molambo, ug nagpasabut kana nga kinahanglan silang maghinulsol, mas hingpit nga modangup sa Manluluwas, mas hingpit nga motugyan Kaniya sa ilang mga kasingkasing sa tanang panahon. Kana nga proseso sa pagdangup ug proseso sa paghatag buhaton sa tibuok kinabuhi. Importante kini sa lawom nga pagkat-on.

Pagpamatuod

Mosaad ako kaninyo niini: Kon inyong tudloan ang inyong mga estudyante kon kinsa gayud sila, unsaon nga makat-on og maayo sumala sa pamaagi sa Ginoo, ug sa balaang baruganan sa paghinulsol, sila lawom nga makat-on sa doktrina ni Jesukristo, ang ilang pagtuo ug gugma alang Kaniya motubo, ug makaangkon sila og kalipay diha sa Ginoo. Kamo ug ang inyong mga estudyante makasinati niining talagsaong saad sa Ginoo: “Sa pagkatinuod, sa pagkatinuod, Ako moingon nganha kanimo, Ako mohatag nganha kanimo sa akong Espiritu, nga mohatag og kahayag sa imong hunahuna, nga mopuno sa imong kalag uban sa hingpit nga kalipay.”¹⁸

Nasayud ako nga tinuod kana nga saad. Mohatag ako sa akong pagsaksi nga ang Dios nga atong Amahan buhi. Si Jesus mao ang Kristo. Siya buhi! Kini ang Ilang balaan nga buhat. Ako mopamatuod sa ingon ug mobilin kaninyo sa akong gugma, sa pangalan ni Jesukristo, amen.